【美容】冬天保濕、保暖、保養最佳方法(不斷更新,靚女靚仔必看)

冬季來到,如果你想好似韓劇、美劇裏面嘅靚人一樣,過一個時尚又充滿靈氣嘅冬季,就要留意。今日就教大家點樣用最佳嘅方法,冬天保暖、保濕、保養。(自費評論,沒有收到任何贊助或試用)

踏入冬季,紐約市嘅天氣,就會變得非常之嚴寒。街道漫天風雪,一片白濛濛景象,Rockefeller Center巨型聖誕樹吸引遊人,Central Park中央公園,亦吸引溜冰嘅人。

感恩節同埋緊接嘅黑色星期五Black Friday,就係奢侈品牌減價、名牌開倉嘅時候。Neiman Marcus、Saks、Nordstrom就充滿搶購優質時裝、珠寶、化妝品、護膚品、家電嘅時尙靚人!

外國冬季,就係家人、朋友相聚嘅日子。鋪滿雪嘅後院,節日氣氛嘅松果,散發溫暖光芒嘅香薰蠟燭,都造就難忘嘅冬季回憶。

近期急降嘅氣溫,令到當日冬季漫遊NYC,將近結冰嘅回憶,突然重現!冬日陽光,穿過雲層深處,落到冰涷腳下。突然轉變嘅天氣,令人好想享受一下冬天嘅浪漫。


(冬季最愛fresh skincare。Photocredit: VictorianAwnings.co.uk)


(中央公園溜冰,網上圖片)


過一個難忘冬季

仲記得以前喺美國住嘅時候,冬季滿天風雪嘅日子。12月氣溫會下降至零下十幾度,我就會著住乾濕褸去Saks瘋狂購物!買完返屋企,點着精油香薰,然後將Aveda relaxing oil浸喺熱水裏面,靜看窗外嘅松樹被冰雪覆蓋。

由紐約回歸香港,雖然香港唔會落雪,原來,都可以過非常之有特色嘅冬天!

位於亞洲嘅香港、台灣、日本、韓國,冬季,都有冬季嘅特色。今次我會詳細介紹點樣可以冬天保暖、保濕、保養。即使冬天,你都可以以最佳狀態,最苗條身段,最動人容貌,出現喺歡欣佳節!


冬季保濕方法:神仙水加面霜

香港同台灣嘅冬季,天氣都比較乾燥。無論係你面上嘅皮膚,定係身體手腳嘅皮膚,都好容易出現乾旱、缺水嘅情況。如果有足夠嘅保濕工作,就可以預防皺紋、乾紋嘅形成。

由於天氣唔穩定,一時濕冷一時乾燥,最好嘅方法,就係每日起身嘅時候,留意氣溫與及濕度嘅公布。當濕度低於60%嘅時候,你就一定要做足夠嘅保濕。

冬季面部嘅保濕,我就會建議大家用一啲好似SK-II神仙水(台灣稱為SKII青春露),先打咗個底,然後先用面霜。先用神仙水嘅好處,係會令到皮膚即刻吸收水份,然後再用面霜鎖水保濕,保濕嘅程度就會增加,基本上半日都唔使再做補充。

當然,如果你暫時未用SKII,與其亂買出邊街嘅雜牌水,我就會建議你用SKII同一母公司品牌嘅Olay嘅「淨白保濕露」。Olay淨白保濕露嘅成份,係Niacinamide,即係維他命B Five,亦都有甘油Glycein嘅成份,甘油係醫學界就已經係被證實對於幫助皮膚保濕有極大作用。對於皮膚係有幫助。根據個人體驗,Olay嘅「淨白保濕露」冬天使用真係一流,吸收快,水潤,幾個小時持續呈現水光狀態。之後再加上一啲保濕成分高嘅面上,例如Olay Regenerist Supercream,就算有少少寒風吹過來,都唔會即刻出現面紅爆拆嘅情況。




(Olay
淨白保濕露,含Niacinamide同甘油


冬季保濕方法:美容油beauty oil 

喺一啲古老嘅文明,例如中東、中國、波斯、印度裏面,都有使用天然美容油,去保護肌膚嘅學問。

當然而家市面上見到嘅美容油產品,就會比一般嘅食用油複雜好多,但其實方法同原理都一樣,就係用油形成一層接近天然油脂嘅保護膜。

Rose hip oil玫瑰果油,就係一種。

呢啲beauty oil產品,SK II、Melvita、Trilogy、Nuxe、Olay、fresh都有發售。成長於北美洲嘅愛美人士,對於呢度產品就一啲都唔會陌生,係亞洲,亦都開始流行。


(Trilogy玫瑰果油)



(Melvita玫瑰果油)


冬天保濕,千祈唔好噴Avene之類所謂活泉水噴霧!

可能大家睇美國電影、歐洲電影嘅時候,都見過一啲主角,會攞支Avene活泉水噴霧出嚟!

無錯,呢啲產品係歐洲嘅冬季係相當受歡迎。

冬天濕度低,皮膚乾涸,好多人就會忍唔住去買啲好似Avene一樣嘅所謂活泉噴霧。無錯,短期內的確可以滋潤面部,令到皮膚瞬間得到潤澤。但係,我係絕對唔會建議大家使用!

任何有少少醫學、科學常識嘅人都知道,如果你就咁噴水上皮膚度,時間一過,空氣中濕度就會抽乾你面部嘅水,令到你越來越乾,比使用前更乾,更加敏感!

所以,如果你唔想越用越爆拆,越來越差,你就一定要避免呢類型嘅水份噴霧。最好嘅方法,都係使用有甘油成份嘅神仙水產品,再配以面霜。


冬季身體保濕:使用bath oil

相比起面部嘅小面積,身體仲有好多皮膚嘅範圍,喺冬天都需要得到佢嘅專寵、滋養。點樣先係最好嘅身體冬天保濕方法呢?如果你經濟許可,我就會建議你使用知名品牌嘅「沐浴油」Bath Oil。

L'Occitane、Sabon都有出產一啲以美容油(杏仁油、橄欖油、葡萄籽油)作為成份嘅沐浴用品,佢哋比起一般嘅沖涼用品好處,就係沖完涼之後會越來越滋潤,本身來自橄欖、葡萄籽、杏仁天然植物嘅油份,就會形成你皮膚上面一層天然嘅保護膜,幫你鎖住身體嘅水份,唔會好似番梘咁,沖完涼即刻乾晒、痕晒!

另一個大力推薦嘅身體護膚品,就係乳木果shea butter。咁多年來,乳木果的確可以幫助皮膚保濕,保持柔軟嘅肌膚!

冬季身體保濕產品推薦:

Fresh淨糖荔枝潤膚露

L'Occitane乳木果潤膚露

St Ives燕麥乳木果潤膚露

Nuxe Body Oil



冬季保暖:Spa、沐浴、風呂篇

由於天氣寒冷嘅關係,一般人會係冬天都有手腳冰凍,血液循環不足嘅情況。而如果你想改善循環,改善精神,最好嘅方法,就係去溫泉風呂,沖個熱水!

去京都浸溫泉,可能你都好想!由於香港本身冇天然嘅風呂溫泉,退而求其次嘅選擇,就係利用屋企浴室,打造一個冬季spa at home嘅經驗。

我會建議大家使用有溫暖身心作用嘅黑糖沖涼液、生薑洗頭水。黑糖沖涼液喺彩豐行、萬寧都有發售。

生薑本身有溫暖嘅作用,所以適量使用有助保持身心和暖。

同真正嘅風呂一樣,如果我係屋企浸浴,我都會準備香薰爐,同埋一啲樽裝嘅礦泉水,因為浸浴期間會流汗,身體會流失水份,我就會飲一啲天然嘅礦泉水去補充!Evian、Hildon、又或者係City Super裏面嘅日本牌子樽裝水都係唔錯嘅選擇,價錢都係$30以內,但係感覺就非常奢華,真係好似去咗spa resort、風呂一樣。

有時,我就會使用我上次介紹過嘅日本溫泉粉。溫泉粉末嘅好處,就係可以令到屋企都可以感受到天然溫泉嘅養分,而唔需要舟車勞頓去日本旅行。


冬季保養:香薰蠟燭篇

冬季寒冷嘅天氣裏面,香薰蠟燭可以提升房間嘅溫度,一啲溫暖、窩心、舒緩嘅香氣,會令人放鬆。

除咗Thann、Aromatherapy Associates呢啲比較貴價嘅香薰蠟燭選擇之外,我就會推薦呢隻來自韓國新沙洞,韓國靚人都會用用嘅香薰蠟燭品牌。

Innisfree 香薰蠟燭系列,我就大大推薦!因為佢嘅性價比好高,只係需要百幾蚊,就有一個有韓國著名香薰專家Soohyang設計嘅香薰蠟燭。燃點之後,房間瞬間變得沉穩、舒適、安心。香草同埋薰衣草嘅味道,令人舒緩。

我大力推薦innisfree Healing Moment。





冬季保暖:窩心飲食料理篇

為咗保持理想身形,好多人都未必會食晚餐,如果想當晚心情好啲,就會食少少甜點。

我會推介俾大家,來自日本嘅紅豆雪糕、宇治抹茶雪糕。呢個產品,好代表到日本對於冬季美學嘅體驗。

冬天嚴寒嘅天氣裏面,好多人以為要食好多野,呢個概念係錯嘅。唔係要食得數量多,反而係食得啱。食得啱,就係食一啲季節裏面適合你嘅食物。主要,就係成日啲溫性、令人輕微刺激性嘅食物。

食物包括左來自韓國嘅韓式蔘雞湯,南亞嘅印度菜。

飲品方面、台灣嘅黑糖薑茶、玫瑰四物飲,花旗參玫瑰蜜,抹茶都係選擇。

【深夜聊天】最有效改變命運方法(超詳盡,多年研究宗教、科學精華)膽小勿入

命運,呢個神秘,帶有宗教哲學色彩,同時又現實嘅問題,你,有冇深思過?命理、風水、塔羅牌、宗教、西藏密宗、星座、生命靈數、NDE瀕死經驗、New Age、水晶、佛牌、養鬼仔(古曼童)、Channeling等等,令人好想知道命運,扭轉命運。

如果要來評分,由0至10分,你會覺得自己嘅命運值幾多分?

如果呢個問題,令你帶來不安憂慮,甚至有輕微嘅反感,你,就要繼續睇。我今日,就同你一齊探索「改變命運」方法。



你的苦,我懂

人一生裏面,總會經歷開心同埋唔開心嘅事情。你通常就係人感到低潮嘅時候,就會特別想研究自己嘅命運。對於未來嘅不安,現實世界嘅不滿,令人好想研究命理。

你嘅徬徨、憤恨、困苦,我明白。

可能,你突然遭遇不幸,卻不受別人注意。

可能,你突然間發現,原來,身患頑疾,時日無多。

可能,你經過無數嘅努力,到最後,突如其來嘅不公平事件,令到你努力化為烏有。

可能,你由一段甜美又漫無目的嘅愛情中突然驚醒,發覺原來咁多年都係俾人呃左,而家,感到徬徨又難以置信。

一啲你發夢都冇諗過會發生係自己身上嘅時,突然發生。

有好多人會嘗試去利用塔羅牌、易經、風水、宗教,希望可以窺看未來,搵出命運嘅答案。

好多人會急不及待咁樣去窺看,前景,會繼續衰退?更加徬徨?更加無希望?

你嘅未來,會唔會繼續縮小到,只係得幾個可憐又悲劇嘅選擇?

於是,好多人為免自己命運淒涼,嘗試去學習風水、命理、甚至種生機等巫術,希望可以改變命運。

今日,就會講吓改變命運嘅方法。今次我會分享經過多年蒐集,研究宗教、科學、哲學嘅心得,幫大家可以喺抑鬱、虛無、逆境中,有足夠嘅力量,跨出去。

首先,你要接受:要改變命運,只係憑你一個人有限嘅力量,係未必做到。我一個人力量,亦係做唔到。

如果你咁容易一個人就搞得掂,你依家已經成功咗。如果你依家仍然係掙扎緊,你就要相信,有一啲超自然嘅宇宙能量,可以幫你。

跨出去,「共同創造」出一個與別不同嘅命運。

我會教你,點樣同上天一齊,「共同創造」出一個屬於你嘅美好人生。


(Fra Angelico, Annuciation)


改變命運方法:塔羅牌、易經、風水不能改變你命運

塔羅牌,風水,易經,算命,New Age等等並不會幫你改變命運。

佢哋最多,只可以幫你透視少少命運。要做到真正改變你嘅生命,佢哋未必幫到。

如果你想得到療癒、信心、勇氣,New Age、星座、等等等等,只係廉價、A貨嘅靈修,我可以講作用係有少少但係唔會好大。

呢樣野我可以好有信心咁講俾你知,因為我以前自己都試過。

有一段時間,我生命中比較迷惘、有自己解決唔到嘅問題嘅時候,我就經常沉迷算命同超自然現象!喺廟街算命、玩塔羅牌、閲讀New Age文章、上網研究、甚至俾錢去上堂同占卜。由奇蹟課程,到Deepak Chopra、到Osho、到水晶,任何聲稱可以幫我改變命運嘅,我都好有興趣去嘗試!(好彩我當時冇接觸到邪門佛牌、養鬼仔,而家諗返真係非常之好運)

New Age、水晶、塔羅牌、算命、睇相呢類型自稱可以幫你改運嘅方法,都會有短暫嘅、似有還無嘅作用(其實係自己心理作用) ,但係長期嘅幫助,我就感受唔到。

當我最沉迷命理嗰個時候,我跟好多New Age「達人」、「作家」學咗好多關於人生、哲理、靈魂嘅事情,自我感覺良好!當時,我仲覺得自己比其他人更加進化,更有遠見。

但如果我咁有New Age見解,點解個外在環境都係咁唔好呢?

對於生命,點解仍然有咁強烈嘅無力感、恐懼感?

相比起好耐好耐以前,乜嘢都唔識,New Age提供咗一啲心靈上嘅指導,最少,有一啲唔同嘅見解,可作參考。但距離真正美滿、自信、光芒嘅人生,仲係距離好遠!

直到,其中一個我一直都跟隨嘅New Age靈修老師(我購買過佢無數書籍,教材,網上課程)陷入嚴重嘅抑鬱同埋生命後期嘅否定裏面嘅時候,我就開始發覺,New Age可能有問題。

一直都渴望了解生命真相、期望過一個非凡人生嘅我,感到非常之迷惘。

我當時,只係知道,命運,不應只是如此。亦都係令我初次對於New Age產生懷疑。


(John William Waterhouse, Annunciation)


由New Age到正念

當時仍然沉迷New Age、塔羅牌嘅我,對於生命,都仍然係處於一個悲觀、迷惘、消極、無力嘅狀態。

New Age、命理其中一個唔好處,就係會令人產生一種對於命運嘅無力感。

喺我不斷探求改變悲觀命運、改運嘅方法嘅時候,就比我搵到一啲關於喺死亡邊緣,重回人間嘅人嘅研究。呢啲經歷,叫做瀕死經驗(Near Death Experience, NDE)佢哋嘅研究都發現,原來人,真係有靈魂。

呢啲,並唔係一啲坊間嘅占卜算命、以䚰傳䚰、道聽塗說嘅資料,而係經過一啲大學嘅研究,係一個嚴肅嘅討論。

之後我就睇咗好多關於呢方面嘅資料同埋書籍,包括哈佛大學醫生Eben Alexander嘅書、醫學記錄死過翻生人士Anita Moorjani嘅書……書單如下,有興趣可自行閲讀:

The Proof of Heaven - Eben Alexander
Dying to be Me - Anita Moorjani
Life After Life - Raymond Moody
The Wisdom of Near Death Experience - Penny Sartori

原來好多人經歷過死亡嘅邊緣,同靈界、天使、神,有過接觸,同時亦都學到一啲生命嘅道理。

佢哋都有一個共通點,就係講到,「仁愛心」(Kindness、Compassion、Love)喺每個人一生裏面嘅重要性。

仁愛之心,會影響你嘅思想同埋命運。

要改變命運,就先要開啟自己愛心。

根據一啲死過翻生嘅人,愛心,極具療效性。佢會療癒你自己、療癒別人。

呢一次,係我成年之後第一次,聽到愛同人生、命運嘅關係。

我後來在閱讀好多有關靈魂、宗教、處世方法嘅書籍,包括「聖經」,先發現,原來所言非虛。



(William Brassey Hole)


改變命運方法:用仁愛心去作行為決定

從NDE瀕死經歷人士去過靈界嘅口述,就知道愛嘅重要性。

要改變命運,第一件事要做嘅,就係要用仁愛心(Kindness、Compassion、Love)去生活。

你要極速改運,就要學會改變你嘅思想,開啟仁愛力量,用自律、支持、高貴品格,代替平日驕傲、悲傷、小題大做。

你要變得更加仁愛對自己、對其他人!

改變命運本身好似係一個好大嘅議題。但係,如果你細心睇,命運,其實來自你每一日、每一個、好似微不足道嘅心態同行為。

你每一個心態同行為,看似微不足道,其實,佢哋係不知不覺之間,造就左你嘅人生。

如果你夠誠實亦都有足夠嘅勇氣,喺時間嘅長廊回頭一看,就會驚奇地發覺,你今日嘅處境,來自之前你嘅每一個「心念」同「決定」。當時你嘅善念或者惡念,帶到你哋呢一步!

而面對逆境時嘅思想念頭同行為,亦決定你將來嘅命運。

思想,真係決定命運。你點對人,世界就會點對你。

可能當時,並唔知道個小小決定(善念、惡念)會有咁深遠嘅影響。你嘅童年,你嘅經歷,你嘅記憶,你嘅潛意識,都造就左今日嘅你。

當時嘅你,可能無意識咁樣,揮霍咗你嘅好運,同埋你嘅將來。

唔緊要,只要今日知道,今日就可以改善!今日,就係你改變命運嘅最好時機!When you know better you do better。

咁乜嘢嘅思想會導致乜嘢嘅命運?

簡單來講,仁愛嘅思想,就係要慷慨、正直、寬恕、堅忍、理解、欣賞別人。

可能大家都聽過下面呢段說話,直到最近再睇返,就對於人生,對於命運,對於愛,有新嘅體驗:

愛是恆久忍耐、又有恩慈.愛是不嫉妒.愛是不自誇.不張狂.不作害羞的事.不求自己的益處.不輕易發怒.不計算人的惡.不喜歡不義.只喜歡真理.凡事包容.凡事相信.凡事盼望.凡事忍耐。愛是永不止息.

呢一段,係來自聖經嘅哥林多前書。

用仁愛心生活,毋需碟仙、水晶、塔羅、養鬼仔,你都可以改變生活、改變命運!

你就會由消極、憤怒、缺乏、表面,變成激勵、睿智、真誠、熱情嘅人生。

改變命運嘅方法,第一步,亦都係最簡單嘅,就係融入愛心去面對自己,對待別人。

今日開始,多想想點樣去幫助自己同別人。

好多人嘅思想都缺乏咗「仁愛心」,所以呢啲人嘅生活都離唔開缺乏、埋怨、憤怒、迷惘。一個人缺乏「仁愛心」,作出嘅決定, 十個有九個都係唔好嘅決定。


(Auguste Pichon)

如果你真係想改變命運,第一步,就係要解除鍾意批評、選擇、憤怒嘅思想習慣。如果你嘅習慣性反應係批評,你就要戒。

改變命運嘅第一步,就係學識用欣賞、感謝嘅心,去面對世界。只要你有咁嘅心,世界可以比到你嘅嘢會好唔同。

你可能會問,點解?

答案,係因為人其實有能量場(energy field)。

每個人,都有一佢自己嘅能量場。能量場本身,未必個個人都有慧眼睇到,但係其實存在。呢個亦都係一個原因,點解你見到某啲人,就會覺得佢係消沉、失意,冇幾耐,不如意事就接連發生。另外一啲人,即使暫時身處一啲較為卑微低下嘅位置,佢哋都散發出一種成功、自信、威嚴、光明、智慧嘅光芒。假以時日,佢哋都可以成為人中之龍。

宇宙萬物,其實歸根究底,都係能量。

And you are in charge of your energy.

呢一個能量場,係冇得掩飾。千祈唔好以為,自己可以掩飾。宇宙能量,比你聰明10,000,000倍!係宇宙廣闊浩大嘅智慧裏面,你嘅虛偽無所遁形。

當你用某種形態嘅思想、價值觀出現喺呢個世界嘅時候,你就會將你價值觀裏面嘅好同唔好,一併發射出呢個世界!

如果你嘅思想,係光明,正派,仁愛,謙厚,呢啲正面嘅態度同埋能量場,就會為你帶來意想不到嘅驚喜。

聖經裏面講過,信、望、愛,三樣嘢裏面最重要,係愛。所謂嘅愛,就係仁愛。

如果你想將命運調校到光明、成功、快樂、自信、仁愛,你就要將自己嘅思想,調校到同一頻道!每日,都可以嘗試一下,用呢幾種態度去生活。嘗試發掘自己嘅優點同人哋嘅優點,欣賞生命中美好嘅事情,將批評變成對別人嘅慷慨同幫助。只要試一個月,你就會見到你嘅運氣同生命有好大嘅唔同!

每個人都有一個能量場。你嘅能量場,會決定你吸引到乜嘢類型嘅人出現係你嘅生命、命運裏面。如果你有一種自律,自尊,威嚴,你發放呢啲思想同行為你宇宙,宇宙就會俾返同一樣嘅你。

你一定要記住,宇宙會反射所有你嘅思想行為!有啲會快啲,有啲會慢啲,但最後,一定會好似清澈嘅鏡子一樣,百分百反射出來!

若然不報,時辰未到。

所以如果你想要「仁愛」、「富足」、「好運」出現喺你生命裏面,你自己就一定要有咁樣嘅思想,同給予別人呢三樣嘢。


聖經光芒

當你準備好時,你要向耶穌基督祈禱,求佢帶領指示。佢會用意想不到嘅方法幫助你。

我唔係傳教人,只係一個潮流美容博客,但我可以好肯定,真正美麗嘅人生,係包括咗美麗嘅思想、勇氣嘅行為同高貴嘅品格。而聖經中耶穌嘅言行,就體現品格美。


改變命運方法:戒淫

如果你覺得自己諸事不順,好事多磨,就要留意,自己有無「淫邪」呢個壞習慣。

佛教經常提醒眾生,淫慾,可能會影響你嘅福報!

聖經上面亦講過,不做害羞嘅事!

無論男女都好,如果要改變你嘅命運,就戒除不必要嘅淫邪。

我哋來自生命能量。我哋身體繁殖嘅生命能量,非常之可貴,佢係創造人類繁衍嘅根源。

呢啲生命能量,唔應該浪費喺錯嘅人身上。更加唔應該浪費係AV、GV上。

各位美女,你有冇太容易長期中門大開,為錢為刺激,隨便援交、啪啪啪、ONS、SP太多?

各位hehe,你有冇成日去同志桑拿、上app,chem fun,危險地玩到身心問題,心神彷彿?

各位男士,你有冇去邪骨、141、全套?

要行運,就要戒除隨便淫邪嘅習慣。


改變命運方法:尋找逆境嘅意義

面對困難,千祈唔好逃避。亦都唔好好似某啲所謂「正能量」人士咁講,乜嘢都扮冇事。

面對生活中嘅困苦,千祈唔好逃避,扮冇事,咁樣只會令你更痛苦。你有勇氣去面對你生活中嘅缺陷、失落嘅時候。你,就開始有能力改變命運。

你要勇敢地品嚐,你生命中嘅困苦。

每一種困苦裏面,都有一種深度。如果你唔信,可以靜心諗下。

你過去嘅每一個挫折裏面,其實都俾你一種特殊嘅技巧,你克服過程之中,你都學識咗一啲新嘅知識、心態、技術。

所以,寄情風水、塔羅牌、西藏密宗、星座、養鬼仔,不如試下了解耶穌同佢嘅生平。

困難,未必係絕境。正念、仁愛心、信仰,會幫助你活出有意義、勇氣、美麗嘅生命。

【美容】Sabon沐浴用品真係好用?香港暴利價錢大踢爆!

來自以色列嘅高端沐浴產品專門店Sabon,帶來極之滋潤嘅香薰沐浴、身體護理產品。Sabon一早已經喺美國紐約、日本獲得廣大支持,Sabon香港位於海港城嘅店舖,引入品牌非常著名嘅沐浴磨砂油,傳說中,只要使用幾次,就會令你嘅皮膚越洗越滑,滑不溜手!甚至有女性網友表示,由於身體變得非常可愛光滑,散發着迷人芬芳香味,男朋友都親近咗!

今次就會同大家講解一下,接近$500蚊一樽沐浴產品,究竟有咩咁特別?(本文是自費評論,沒有收到任何試用或贊助)


由以色列,到紐約市,再到香港:純橄欖油產品

發源地以色列嘅Sabon,喺美國嘅New York City都有一定名氣。係當地都被視為高端嘅洗澡品牌。

Sabon喺世界各地嘅靚人圈,都得到唔少嘅支持。包括左羅馬、阿姆斯特丹、紐約、東京。

今次Sabon嚟到香港,帶來品牌著名嘅沐浴磨砂、香薰、沐浴油,令到以色列橄欖油去到你嘅浴室,令到你隨時隨地都可以享受得到旅遊級嘅呵護。

無論係世界各地,Sabon都有一個特色,就會會係分店裏面,設立一個洗手井。人客可以親身體驗各種嘅柔膚產品,包括沐浴鹽、沐浴油。




Sabon香港,同世界各地每一間Sabon分店,都會有一個水井,叫做幸福井,wishing well。Sabon香港貫徹着呢個品牌嘅特色,令到客人可以親身體驗香皂、磨砂、及由天然純橄欖油造成嘅沐浴產品。圖中嘅水井,真係有活水出嚟架!

Sabon品牌最出名嘅,就係使用沐浴產品後,會令到皮膚非常之潤滑。

對於一啲經常行街,購買美容護膚、瘦身、沐浴產品嘅人,叫做見識過唔同嘅奢侈品品牌,就唔會咁容易被吸引到。

Sabon,當我親身體驗之後,就發現佢嘅沐浴產品真係好好用,超乎想像咁潤滑!

產品有出乎意料嘅潤滑效果,主要係因為橄欖油成份。

Sabon產品之所以質感上有咁大嘅不同之處,就係因為佢大量使用純橄欖油,鱷梨,荷荷巴油,同小麥胚芽油。

品牌最出名嘅產品就係磨砂系列,試過一次之後,就會知道佢有幾犀利咁,死皮都會被抹走!

Sabon沐浴油嘅天然成份,會喺皮膚上形成一層保護膜,唔會好似一般廉價沖涼液咁樣越洗越乾旱。配合品牌唔同產品嘅獨特香味,就會令你有被呵護嘅尊寵感覺。成分適合係乾燥嘅秋冬季節使用,令到你每日沖完涼都有種滋潤、安穩、滑溜的感覺。Sabon香薰產品有種奢華感,唔多唔少係因為佢哋大量使用,「死海」嘅礦物海鹽。

Sabon系列有幾個特色嘅香薰系列,分別係「廣藿香薰衣草香草」、「玫瑰花茶」、「黃金鳶尾花」、「薑橙」。

香味配搭,都係出邊搵唔到。比較特別!

同其他嘅高級個人護理品牌一樣,佢都會有一啲優惠價錢出售嘅禮盒,通常價錢由$300幾蚊到$2000不等。

如果淨係講好唔好用,我會覺得Sabon係幾好用。但係,我唔會建議你去香港零售店購買。

因為香港Sabon,相比起海外店舖,價錢實在太貴,簡直係暴利!

價錢暴利到,即使你喺網上郵購,包埋運費,由美國送到香港,價錢都仲平$100 !

唔想俾人掠水,就快啲學下點樣可以平平地享受Sabon!





香港買Sabon之前一定要睇!

如果你要去香港專門店買Sabon,我會勸你先睇埋下面,再作決定。

無可否認,Sabon呢個品牌引入香港之後,迅即成為大家追捧嘅對象!的確,講開高質素嘅洗澡用品,Sabon質素係好好。

但係如果你暫時仲未有購買Sabon身體護理品嘅習慣,我就奉勸你,暫時唔好買住!有兩個原因:

第一個原因:優質產品會上癮!

因為Sabon呢啲咁優質嘅產品,係會上癮!而且會令你越買越多,不能自制!好多野真係返唔到轉頭。如果用開一啲高級嘅洗浴產品,就會俾佢嘅質感、香味、功效完全吸引着,用完之後,都只會買返同一層次嘅沐浴、身體護理產品。

第二個原因:Sabon海外網購、水貨店平得多

Sabon香港專門店個價錢真係好貴,簡單來講,就以佢嘅皇牌系列rose tea沐浴磨砂鹽作為例子,香港就要$420。水貨店代購、美國網購,包括郵費,都只係需要$340。

你可以自己上Amazon睇下,有佢官方專門店出售嘅產品!價錢肯定平過香港好多!


(Sabon Rose Tea body scrub,Amazon賣US$33,加$9.6美金運費,約$340港幣,送上你屋企。專門店賣$420港幣,仲要自己拎)




(Amazon Sabon Shop網上購物產品包裝良好,即使經過空運美國送來香港,也沒有出現漏水現象)

香港Sabon海港城分店出售嘅產品,包括左沖涼油、hand cream、香薰蠟燭等等……基本上都可以喺美國總店,經網上購買得到。價錢,都會比香港平!就算計埋郵費,都仲有着數。

佢哋嘅香港代理Fairton,真係Mark得太貴!

其實一般嘅情況之下,如果價錢只係差少少,好多人都會寧願去專門店購買。但係由於今次實在相差太多。

講個好消息比大家知,而家有啲水貨化妝品店網購,例如「天凝」、「天麗」,都已經有供應Sabon嘅沐浴磨砂鹽同埋沐浴油。喺香港水貨店買Sabon,就方便好多,仲要平好多!

無可否認,Sabon產品獨有嘅滑溜感,同埋華麗嘅中世紀包裝,配合濃郁芬芳嘅玫瑰茶香味,配合閃亮鹽,真係一個極致嘅沖涼體驗!而家教識你點樣可以平價買到優質嘅產品,大家都可以試吓搵下。

我並唔係要大家只係網購,完全唔去專門店。其實我都覺得你可以去下Sabon香港專門店,因為專門店可以試用,試用到啱為止。所以如果你唔介意比多一百幾十,專門店都有佢可取嘅地方。佢可以俾你研究一下,乜嘢產品最適合你嘅肌膚!而且,佢有禮合,如果你買禮合,就會反而着數。我大力推薦!



【香港美食】Cova香檳甜點:蛋糕價錢與第一次去COVA一定要知嘅事

星期六嘅黃昏,喺Pacific Place嘅 Cova,好悠閒咁飲著Bellini,微薰嘅感覺太好。

飲食,同旅遊一樣,可以係一種對於文化知識嘅體驗。

COVA Pasticceria Confetteria,好多人淨係知佢係一間高級嘅意大利餐廳,Pacific Place老店,經常有名人、明星出現,其實,佢嘅背景其實遠遠超過一間高級嘅貴價餐廳,真係大有來頭。今日同大家推薦一下,COVA必食嘅經典,同埋佢獨特嘅歷史背景故事,令到下次大家考慮去COVA嘅時候,都知道COVA原來有咁源遠流長嘅故事。




你所不知道的Cova

位於金鐘太古廣場Pacific Place嘅COVA,係香港名媛、名人明星必去嘅地方。

無論你係香港人,定係嚟到香港旅行,想體驗一下乜嘢叫做歷史流光加冕,就一定要嚟200年歷史嘅COVA!相比起經營路線形象相似嘅餐廳TWG,COVA佢嘅歷史成份含金量,就高好多。

好多人都唔識得分COVA、Godiva同TWG,三間都係有提供甜點嘅所謂高級嘅餐飲場所、究竟會係有乜嘢唔同。尤其係COVA、TWG兩間都響同一個商場Pacific Place設有sidewalk餐廳,設計相似,就咁望落去,大家都好似。

其實,COVA係真正來自意大利,係1817年已經成立,仲有2百年嘅歷史!TWG只係一個新加坡嘅品牌,模仿歐洲懷舊世界嘅華貴出嚟,而且品牌只係成立幾年,佢品牌上面嘅1837,並唔係代表1837年成立。同真正擁有百年歷史嘅COVA完全冇得比。而Godiva,是專門出售朱古力、朱古力甜品,嚴格來講唔係一間餐廳。

如果一定要比較,COVA贏TWG十條街!如果同朋友食飯,慶祝,就一定要識揀。

好多人好想知道,一間好似COVA咁樣嘅餐廳,價錢會係點樣。其實,COVA雖然名氣大,好多時尚圈嘅名人都會去,價錢其實同一般嘅好味餐廳差唔多,如果你睇埋佢嘅歷史背景,同埋顯赫嘅成就,就會覺得物超所值!

COVA嘅正統晚餐,大概$400左右。會包含三個選擇, 自由配搭前菜、主食。

如果食晚飯要甜品,就只需半價。每逢星期日,就會推出任飲任食嘅自助餐,大概三百幾蚊。COVA周日悠閑自助餐,就係最適合鍾意嘗試唔同食物嘅人!

如果你想體驗一下COVA傳說中嘅意大利殿堂級美味,食一件佢非常之著名嘅芒果蛋糕、燕麥蛋糕,飲杯歐洲熱茶、咖啡,只需要$200左右。

COVA係世界級嘅品牌,蛋糕界嘅Hermes,咁樣講一啲都冇誇張。因為,Cova喺2013年已經被奢華品牌集團LVMH收購!

COVA位於米蘭嘅重點,多年來都係當地社會名流、藝術家、政治家、記者出入嘅地方。依家位於意大利米蘭嘅總部,就係LVMH經營。

根據時尚潮流界嘅分析,此舉其實係為咗幫助奢侈品品牌宣傳,因為飲食,係比較親民,消費者只係需要比較少嘅價錢,就可以體驗到品牌嘅奢華。


COVA必食經典:芒果蛋糕Mango Mille Foglie

COVA最多人查詢嘅,就係佢嘅蛋糕。COVA嘅蛋糕價錢稍貴,大概港幣$80一件,但係,絕對物有所值。

通常為處於都係一啲高檔嘅商場裏面,包括利園、Pacific Place、又一城、海港城,最適合係美容購物之後,坐低慢慢享受一個悠閑下午茶。不可不食嘅,就係呢個著名嘅芒果蛋糕Mango mille foglie 

芒果蛋糕口感非常之鬆軟,忌廉味香濃之餘,芒果味突出,而且一啲都唔會酸。







COVA Mango mille foglie 製作繁複,唔會可以喺一般嘅餅店食得到。之前就有飲食界人士、西餅專家教大家點樣自己屋企做一個同COVA一樣嘅芒果蛋糕,當中過程嘅複雜程度,我淨係聽,都覺得好多步驟!

原來,同店舖裏面其他嘅特色糕點一樣,Mango mille foglie製作方法,源自意大利嘅米蘭,係經過秘密代代相傳。食落口感好似雪白羽毛一樣,輕盈、令人流連忘返。

難怪呢種有如天堂一樣嘅美食,出邊食唔到!

同餐廳經理請教,我就問過佢哋其實有乜嘢飲品,最適合同mille foglie蛋糕一齊食。佢就推介,好多客人都會飲杯雞尾酒!佢就推介用白桃同意大利白酒Prosecco做成嘅香檳Bellini。



就咁睇,以為係一杯香檳。其實,Bellini比普通香檳醇美好多,酒精濃度都相當高。

Bellini配合優雅嘅意大利環境,令人放鬆。好欣賞好欣賞,Bellini雞尾酒 X Mango Mille Foglie蛋糕嘅配搭!

意大利人對於生命嘅熱情,食物嘅喜愛,藝術嘅追求,對好多人係一個啟蒙。人生,就係應該追求生命裏面嘅熱愛。

去完行街,就好想坐低食少少野。如果唔想去一啲人多擠迫嘅地方,COVA可能會係一個唔錯嘅選擇。





COVA傳統美食:第一次去必須知道嘅事

當我好悠閑咁享受Mille Foglie嘅時候,就諗返起多年前第一次去嘅驚喜。當年,香港仲未有咁多咁高質素嘅意大利餐廳。即使咁多年後,而家再食,喜悅、讚嘆、欣賞嘅感覺都無變。

意大利嘅米蘭,除咗COVA之外,就有幾間同樣擁有悠久歷史嘅餐館,同樣都被奢侈品牌睇中,作為擴展嘅目標之一。其中包括Pasticceria Marchesi。呢一間,品牌集團都考慮引入香港。

最近,台北微風廣場都開始左台灣第一間COVA。當然,就吸引左好多美容博客去打卡啦!當然,亦都有好多美食家、美容博客會利用呢個機會再次嚟到香港嘅金鐘COVA朝聖。

綜合我多年嘅COVA經驗,有幾點大家要注意!

貼士1:意大利文、英文菜單

香港同台灣唔同,香港COVA嘅店員係識講廣東話、普通話同英文,但係菜單只有意大利文同英文,如果兩個語文都唔係太熟悉,最好先上網研究一下,避免去到完全唔明嘅尷尬!


 貼士2:先查詢係COVA咖啡室?餐廳?

第二點大家要注意嘅,係COVA咖啡室同餐廳嘅分別。COVA分為餐廳Ristorante同咖啡廳Caffe。不同地點有所不同。好多傳統意大利美食,例如海鮮湯、烤雞嘅等等,都只會係餐廳供應,咖啡室不會供應。

大家去COVA之前都要先搞清楚,預訂嘅係餐廳Ristorante同咖啡廳Caffe。如果唔太清楚,最好都係上官網睇一睇,或者致電查詢。


貼士3:最佳位置,係銅鑼灣利園一期同金鐘Pacific Place

如果去COVA,都係希望享受一個悠閑、享受時光嘅下午或者黃昏。喺美食同埋悠揚嘅節奏中渡過。所以,選擇最好嘅地點好重要。COVA位置嘅地方都係高級商場,環境唔會有問題,但係有啲商場嘅人流就比較多,所以進食嘅時候都會比較冇咁放鬆。而某些地方,例如銅鑼灣嘅利園一期,或者金鐘嘅Pacific Place,相對之下就比較悠閑,享受嘅程度會更加高。呢兩個地點我會推薦。


美食傳說之夜

意大利美食嘅傳統非常之豐富,由於貼近地中海,海產嘅質素非常高,數量亦都豐富。長久以來,當地人喺海上打撈食物,用新鮮海產製成各種料理。當地人亦都會響煮食裏面加入白酒、蕃茄、烤肉、蕃紅花、檸檬、香橙等等,係結合地中海植物香草嘅味道,同埋海鮮嘅味道,風味特別。

意大利人鍾意將洋蔥、橄欖油、大蒜、丁香、檸檬汁、松露等等,配合鯷魚與及野豬肉燒烤。

而意大利西西里島,公元527年嘅時候,由阿拉伯人引入茄子、橘、茉莉花等等嘅農作物同埋植物。令到意大利嘅食物具有風采。

小小酒精,加上極之美味嘅Mango mille foglie蛋糕,造就咗神秘意大利之夜。

對於極之美味、開始於1817嘅食物,我係念念不忘。

COVA Milano,200年嘅米蘭美味,竟然重現喺香港。

1817年當時嘅甜點,一早售罄,但1817年嘅美味故事,仲未完。









【減肥】V面瘦身必看:女神男神級減肥法

想減肥瘦身,你第一件事就係要先了解到,你平時嘅行為、生活習慣、營養知識,係屬於A Grade女神級、男神級,定係屬於F Grade阿嬋阿叔級。

叻人靚人,無論去到咩環境,都搵到一啲幫助佢更瘦更靚嘅產品同服務!即使行7仔便利店、街坊超級市場,都搵到啱用又有營養,可以幫助瘦身嘅食物。

我要先此聲明:過咗21歲之後,如果你唔夠瘦,只能夠怪自己!



(要好似kpop男神Top咁fit,就要養成良好嘅飲食習慣! )


(Hyuna咁嘅索爆身形,其實只要你肯練,你都可以! )


要減肥,你就要爭氣

呢個世界有啲嘢好唔公平,又瘦又靚嘅人得到好多着數,所以你一定要自己爭氣,選擇一啲對你有用嘅生活習慣,先至可以瘦同索。

而同時,有啲嘢亦都好公平。無論你係皇室成員、荷里活明星、富二代、高級情婦、Hedge Fund Baby……要減肥,都一樣要經過自己嘅努力。就算你請教練,都只可以從旁協助,真係要運動同埋節制飲食嘅,都只係得你自己。

減肥,係冇贏在起跑線呢回事。無論你幾有錢或幾貧窮,最後,減肥成功與否都係靠你自己。

好多人以為要減肥成功,就要搵教練、搵營養師、參加醫學美容療程、參加昂貴健身中心、甚至購買好貴嘅營養餐送餐服務。其實,即使你冇司機、冇廚師、冇外傭,甚至無錢參加任何嘅醫學美容療程,只要你屋企附近有個街市,有間7-11 ,你一樣可以減到。

我依家教你呢個減肥方法,絕對符合營養學、東西方醫學、生物學,減得快之餘又減得健康!

其實生活喺香港,如果你比較聰明、比較留心,都知道好多地方可以幫到你減肥。包括左7仔便利店、同埋街市。

我要再次提醒你,過咗21歲之後,如果你唔夠瘦,只能夠怪自己!


女神男神減肥心法

你係一啲人哋嘅Instagram、Facebook裏面見到嘅高質素靚仔靚女,個心不期然就會好羨慕,又妒忌,唔知點解人哋個body可以咁靚。自己就……

呢個時候,就會激發一啲人嘅極端減肥方法,例如完全唔食某個種類嘅食物、甚至完全唔食嘢。

我首先要講解一次,減肥嘅理論。你要減肥成功,就要進食大量嘅蔬菜、蛋白質,一啲阻止你燃燒脂肪嘅醣類(碳水化合物,白飯、麵、麵包、含糖飲品),就要減少。呢個係低醣飲食減肥法(Low Carb diet)嘅宗旨。呢個減肥方法,得到醫學界嘅認同,效果毋庸置疑。

有啲人話,低醣飲食減肥法雖然好用,但係好難堅持。

好多人以為「低醣」飲食,等於「無醣」飲食。但係你睇清楚,係low carb唔係no carb!就算你減肥,都要食少少高質素嘅碳水化合物。所謂高質素,就係只含有粗纖,消化吸收慢嘅全谷雜糧,例如南瓜、粟米等等。

好多人減肥一個星期已經頂唔順,係因為佢哋完全唔食任何嘅碳水化合物。佢哋減肥失敗,完全係因為對於Low Carb Diet嘅錯誤理解。

人嘅腦部,一定要少少糖分去支撐。完全無糖嘅飲食,會導致大腦覺得疲倦、難以集中精神。

只食少量嘅碳水化合物、糖類,維持大腦運作,呢樣野係無可厚非,亦都係正常健康。只要配合大量嘅蔬菜、蛋白質,將醣類減少,就冇問題。


亂絕食減肥,更年期提早來臨!

同埋,好多人以為減肥就等於絕食,呢個方法係錯到不得了。呢個方法,只會導致你肌肉流失,營養不良,內分泌失調,皮膚變差,胸部縮小,月經失調,肌肉減少,腰部臀部脂肪反而累積!

我保證,你用禁食、絕食嘅方法,你係短時間可能會成功,但係一食返野,體重同埋體型就會急速膨脹,仲肥過之前!呢啲唔係我嘅危言聳聽,呢啲係有科學根據,因為你絕食嘅時候,會令到你身體將所有嘅食物儲存,防止飢荒,呢啲係人體生物學嘅正常反應。

如果你年紀有返咁上下,年齡已經超過左30歲,你就要更加留意,因為醫學已經發現,胡亂減肥節食,可能會導致你更年期提早來臨!


Atkins Diet食肉減肥法,究竟得唔得?

曾經,有一個減肥法叫做食肉減肥法Atkins Diet,最主要嘅方法就係唔識任何嘅carbs,改食大量嘅肉類。呢個方法其實唔均衡,因為要成功減肥,就必須要食大量嘅蔬菜、生果,提供足夠嘅食物纖維,令到腸胃健康。如果你淨係唔食飯,又唔食菜,只食大量嘅肉類,就會導致你身體出現問題,甚至出現大腸癌!


女神男神減肥方法:早餐篇

好多人以為減肥就要唔食早餐。呢個方法係大錯特錯。經過一晚嘅睡眠之後,你已經超過左八個鐘冇食到野,呢個時候,你一定要進食,維持血糖嘅健康水平。如果唔食,其實唔會減肥,只會令你午餐嘅時候食得更加快更加多,一樣會超標。

早餐應該選擇一啲飽肚充滿營養嘅食物,例如烚蛋、燕麥等等。


女神男神減肥方法:午餐篇

香港絕大部份嘅人,食午餐都要出街食。

但點解,女神男神出街食飯都可以瘦?

男神同埋女神,對於自己身型好在意,所以出街食飯嘅時候,就會注意一啲又好食,又唔算太沉重嘅食物。

去到日本餐廳,就多啲點三文魚、魚生,豆乾、涼拌豆腐、茶碗蒸。燒秋刀魚同埋蒟蒻麵,都係唔錯嘅選擇。千祈唔好食天婦羅同埋咖喱飯,因為咖喱汁裏面含有超多嘅油。同時亦都要避免食油豆腐壽司,油豆腐壽司盒有超大量嘅油。

去到西式嘅餐廳,就要注意以下幾點。

如果有得揀,就揀一啲烤雞,唔食炸雞。燒烤蔬菜亦係一個OK嘅選擇。

落沙律醬嘅時候,會唔會太多。所以我建議你用點嘅方法,避免過量。

飲湯嘅時候,盡量都唔好要酥皮,因為酥皮其實只係牛油,你食咗好多牛油落肚!

食意粉嘅時候,盡量唔好叫焗意粉,因為用咗好多嘅油脂去造成,可以就用食少少橄欖油意粉。

如果你食家係廣東式嘅飲茶、中式食肆,都有幾個野你可以食。一啲例如炒菜、蒸南瓜、蒸蛋等等,都係有營養又飽肚嘅食物,呢啲係唔介意食嘅。

反而一啲會用好多醬汁去煮嘅餸,包括碗仔翅、濕炒河粉等等,佢嘅汁其實好高糖份同埋熱量,如果加埋你自己食落肚嘅碳水化合物,就好容易致肥爆錶。


女神男神減肥方法:零食、小食篇

要做到好似明星咁靚,就要注意零食嘅選擇。

自從得到我一個好靚仔嘅朋友提點,我依家有個霸氣嘅習慣,就係當全部人都飲汽水、食KFC嘅時間,我就會買支Evian,加入幾片新鮮嘅檸檬,作為refresh之用。

睇住啲肥人係咁失控進食零食,成袋KFC、南記粉麵瘋狂咁呑食,我就好優雅咁飲我嘅法國礦泉水,我承認我真係有少少食花生嘅快感同埋自豪感覺。

如果你真係好肚餓,我會建議你食茶葉蛋。茶葉蛋係一個營養高,GI低嘅好選擇。而且周圍都有得賣,好多鴻福堂、普通涼茶鋪都有。

香港少部份嘅日式、台式外賣餐廳有關東煮,唔係間間都有,如果有,你就選擇一啲蘿蔔、菜。呢啲又飽肚有減肥嘅料理,就唔介意多啲食。

如果你偏向鍾意輕盈飲食,一個蘋果、一個雪梨、甚至一啲車厘茄,都係好好嘅輕怡選擇。


女神男神減肥方法:晚餐篇

其中一個減肥嘅樂趣,就係有機會自己煮食,煮一啲有健康,又有營養,兼且瘦身美容嘅食物。唔使成日出街食一啲劣食。

根據專業營養師嘅意見,以下嘅食物係可以多食,對於減肥,係飽肚低卡嘅選擇:

魚類
去皮雞肉
白菜、菜心、蕃茄、西蘭花、椰菜、
冬瓜
草菇、茄子、紅椒
胡椒粉、蒜頭、辣椒、香草、檸檬汁

呢啲材料其實最適合整一啲日本小火鍋,包含咗無糖豆漿、蘿蔔、香菇、豆腐、雞肉造成嘅白湯鍋物。


瘦身美體




【美容】超好用L'Occitane的幸福冬季:如何慳超過$300及獲得大量免費贈品

「你今年想要乜嘢禮物?」佢問。佢,係一個三四年前嘅EX,偶然會聯絡之餘,佢喺每年冬季假期嘅季節,總會message一下、出現一下。

我望住佢,感動。尤其係,佢知道我近期同BF分開左之後,仲冒着俾佢嗰位妒忌心極強嘅現任發現嘅危險,特登約我出嚟食個飯。

「其實,我依家嘅生活好好,有好好嘅朋友、工作,經濟上面又舒服」我諗咗一諗。「有一啲好似你咁樣嘅朋友,我,已經好滿足。今年,我真係冇乜嘢想要,哈哈。」

面對佢嘅直接同善意,我都會好直接同善意咁樣回應佢。真係,雖然同現任呢個分咗手,我依家感覺好幸福,好實在。

「可能,我已經成長咗,去到一個新境界。」我淡淡回應。我唔想頹廢,只想優秀。

佢冇再講野,只係微笑望住我。

有心,就已經好足夠。禮物,只係象徵。對於有咁樣嘅朋友,我心存感激。

秋冬嘅清涼天氣,令人好想擁抱。

每當變幻時,人,有時會迷失。但亦都係成長嘅必經階段。

一個禮貌嘅goodbye hug之後,我就一個人去咗行L'Occitane。

既然佢講起禮物呢個問題,就令我好想買一份冬季禮物俾自己。買一份有意義、好睇又好用嘅禮物。唔一定要好貴,但一定要自己會享受同欣賞嘅。我第一時間,就諗起L'Occitane。(本文是自費評論,沒有收到任何品牌贊助或試用)




季節限定,L'Occitane的幸福冬季

有一種幸福,叫做冬天行L'Occitane!

來自法國普羅旺斯嘅L'Occitane,源自法國南部Aix-en-Provence。當地嘅陽光、薰衣草平原、海風、蒼涼古蹟、胡桃木,養育咗幾百年嘅文化水土。

當地,就有隱藏在樹叢中、靈感處處嘅畫室,同被丁香園包圍嘅市政廳。

L'Occitane甜美又貴氣嘅身體護理產品,好似保留咗一片法國晴天。



(L'Occitane來自法國陽光普照嘅普羅旺斯。官網圖片)

蘊含左和𤋮陽光嘅產品,最適合冬天時候使用。

每年冬季嘅時候,L'Occitane會推出好多盒裝嘅禮盒,通常折扣加上贈品,都比較抵用。

每一年嘅冬天,L'Occitane嘅身體護理用品,乳木果系列、薰衣草系列、家居香薰、馬鞭草沖涼液等等,都曾經滋養過我地。

源自歐洲法國南部嘅L'Occitane,價錢唔算好貴,但係感覺,就好矜貴。尤其係去過佢位於港島嘅L'Occitan Spa,體驗過品牌王牌乳木果療程之後,就更加對於L'Occitane乳木果呢一系列嘅身體保養品,難捨難離。

L'Occitane Spa其實係全球都有分店,最著名嘅,就係印尼峇里島嘅水療中心。法國,就有Le Chateu de Valmer Spa by L'Occitane。瑞士,就有royal Spa by L'Occitane。

每一次購買佢嘅產品,都覺得好好咁樣款待自己。外國人成日講嘅Bliss,就係呢種感覺。


L'Occitane必買好用產品推薦1:乳木果潤膚露

L'Occitane有幾個皇牌產品,每年嘅冬天,我都會買。今年去到L'Occitane位於IFC嘅店舖,立即大掃貨!

呢幾個L'Occitane產品,我係會大大咁推薦比大家。

第一個,就係L'Occitane最出名嘅乳木果護膚露,佢包含咗非常之豐富嘅乳木果成份,達到15%咁多。

除咗乳木果之外,更加包含咗杏仁油,同埋天然蜂蜜。

大家要留意,真正嘅乳木果,係呈現類似蠟燭嘅形態,所以,太多乳木果成份,根本會用唔到!由於呢隻產品真係試用左乳木果, 15%其實係好好嘅比例。

呢隻產品嘅特點,係非常之滋潤,適合冬天乾燥嘅天氣。天然嘅成份,一啲都唔會有油膩嘅感覺。






L'Occitane必買好用產品推薦2:香薰精油

第二就係要介紹嘅產品,就係薰衣草系列嘅精油。

呢隻relaxing blend精油,成份唔單只係薰衣草咁簡單,仲包含咗甜橙、天竺葵、佛手柑。

味道非常之馥華,最適合喺房間點香薰爐。







L'Occitane必買好用產品推薦3:馬鞭草小物系列

呢一個季節限定嘅裝飾物波波,叫做Verbena Festive Ornament,唔單止包裝得好靚,裏面,中包含咗幾種馬鞭草系列嘅產品,適合一啲初初嘗試L'Occitane系列嘅人。

呢個咁靚包裝嘅金色波波,裏面包含咗馬鞭草乳液、潤手霜、沖涼液、同番梘。

呢個馬鞭草系列有啲特別,因為世界各地好多「四季酒店」嘅客房,都有提供呢個系列嘅用品。而家,只需要大概港幣$120就可以擁有一套!抵用!








L'Occitane必買好用產品推薦4:舒緩甜睡按摩油

品牌本身係世界各地嘅度假村、酒店都有品牌L'Occitan Spa。

L'Occitane Spa都會使用下面呢一隻專業嘅按摩油。氣味,係一種復方精油嘅香味,令人心曠神怡。每一次,都令你覺得去咗Spa一樣。

係柔和嘅燈光同埋天然香薰之中,沉睡,甜睡,睡到自然醒,真係一種奢侈。


L'Occitane舒緩甜睡按摩油,使用真正嘅薰衣草,蜜柑、甜橙、天竺葵、甜杏仁油。每晚睡前按摩一下,杏仁油可以讓肌膚軟化劑,可以幫助解除身心嘅緊張。


L'Occitane冬季必買產品推薦5:香薰蠟燭

冬天,最適合就係使用香薰蠟燭。

使用茉莉同埋佛手柑精華製造嘅香薰蠟燭,使用嘅成份質素,已經高過一般市面上嘅蠟燭好多。






點樣購買L'Occitane產品最抵

L'Occitane產品包裝,有Cezanne印象派畫作中嘅鮮明。同埋,如果你識得揀,價錢都可以平好多,唔需要用零售價購買。

行L'Occitane,有一種節日嘅華麗同埋歡樂。尤其係接近冬季,購物高峰期嘅時候,佢嘅gift set減價優惠套裝、顏色鮮艷嘅禮盒,都令人好想拎幾盒返屋企!自己用又好,送俾人又好。其實,呢啲禮合真係可以考慮一下,因為,價錢真係平過你逐樣購買多。

平均一個禮盒,佢嘅價錢可以慳$200至300幾蚊!所以當你去購買之前,一定要檢查一下,你想買嘅產品,係咪今期嘅主打減價貨,因為可能喺gift set已經搵到。

其實,如果你係L'Occitane長期粉絲,就會知道,點樣購買L'Occitane係最着數!

如果想慳錢,就一定要問店員,參加成為VIP !只要消費$1000,就可以參加。其實只要問吓身邊朋友,如果有人想買,就夾埋一齊買, $1000真係唔係太難。

L'Occitane呢一個VIP購物回贈計劃,每買$150就可以有1分,12分,就有$150嘅現金產品回贈。

為咗節省大家時間,簡單來講就係買$1800,就有$150回贈。可以購買任何護膚、美肌、洗頭水、家居香薰產品。

就算一次過買唔夠,又或者第一次成為會員,都有好多好處。

通常身體護理產品,好多人都係會即興購買,想要嘅時候就行入去L'Occitane買一兩件。但其實最着數最慳錢又攞到最多贈品嘅方法,係一季所需,一次購買。最好每次購買大概$900。因為,L'Occitane幾乎長時間都有買滿$900就送免費贈品,通常係一個travel set,有四至五件小裝產品、包含travel袋贈送。零售價,都要$100-$200 !完全免費,又可以試吓新嘅產品,其實都幾著數。

通常購物滿$980 ,就可以獲得一系列贈品。店裏面會有少少嘅指示牌,你可以先睇吓今期真送嘅贈品啱唔啱用,再決定幾時入貨。








如何選擇並獲得最好免費贈品

每次去L'Occitane購物嘅時候,好多人都唔知道,免費贈品,可以要求選擇。當然,送乜俾你,好視乎當日店家庫存有乜嘢啦,但係其實每間鋪裏面,都會儲存一系列嘅唔同產品,面霜、乳液、洗頭水等等,其實你可以問吓,會唔會可以比啲唔同類型嘅產品你試吓。

我自己,就特別要求洗頭水。效果,真係幾好喎!




我去L'Occitane嘅時候,就係特別希望買一份特別嘅禮物比自己。除咗我自己俾錢買嘅禮物之外,亦都因為我嘅好好計劃,令到我都攞到一啲免費嘅產品!呢啲,係L'Occitane送俾我嘅禮物。

拎住一袋二袋,由世界另一邊嘅普羅旺斯薰衣草田,來到我床邊。

香港人,好似好驕橫,其實,我地好卑微。我地追求嘅,不過係一個可以一齊去普羅旺斯睇星空嘅人。

曾經滄海,就會有要求,懂追求。

無論係身邊嘅伴侶定係護膚品護理產品都一樣,當你去到某個層次,對方跟唔上你嘅層次,就要好好地分開。

如果唔可以兩個人都幸福,最少,一個人都要幸福。一個人幸福,總好過兩個人都唔幸福。

我信仰愛情,但唔會迷失自己。

失戀傷口未癒合?L'Occitane一系列嘅身體護理產品,就係最好嘅醫生,佢會舒緩你身心。我嘅荒唐、可笑、早熟,一切,喺普羅旺斯香療之中,都化作一夢。


星堤下的綿綿餘香

買咗一系列美膚產品,立即開箱,心情好好。

我都要多謝分開咗幾年都仍然咁關心我嘅朋友。

「Thanks for the dinner it was great to see you」我whatsapp佢。之後,我就去咗沖涼。

出到嚟嘅時候,原來佢已經send左幾個message俾我。估唔到答得咁快。都係一啲不著邊際嘅話題。我之後突然答返佢:「you will always be someone special in my life」

「你知我當年鍾意你乜嘢」已經另結新歡多年嘅佢問。

由於佢冇標點,我唔知係問題定意見!

見到輸入中但又冇訊息,一分鐘之後,我忍唔住問:「what?」

「👉👌💦」

「😱」唔通係⋯⋯有冇搞錯啊!搞乜鬼呀!?我心諗。

「我鍾意你high maintenance得來其實係一個好善良嘅人。」

「Ok, you better delete this chat before someone else sees it 😂」我回答,不由自主地有幸福嘅感覺。

我望向房間出邊嘅香港夜景,世界安靜而閃亮。

一分鐘之後,佢send咗個「😂」,佢只係用一個emoji。

「TTYL」我回答。

我放低電話,去咗搽潤膚霜。Loccitane 乳木果同杏仁嘅香味,令人舒緩。

我終於開咗支,一直唔捨得開嘅Pavillon Rouge du Chateau Margaux。

你知道嗎,總會有一啲人,會喺生命中默默支持你。可能,最終你哋都冇辦法喺埋一齊,但係而家互相扶持嘅關係,可能,更加細水長流。

多謝你,敎識我點樣去做一個更加好嘅人。

房間,散發着L'Occitane香薰蠟燭,茉莉同Bergamot獨有嘅芬芳。

今晚天氣好凍。令人幸福嘅冬天,終於來了。





Counter

Flickr Images