【醫學美容】彩豐行真係好用?定係低檔山寨貨?平價彩豐行不為人知的震撼內幕!

7月 01, 2016

對於好多年輕消費者,行彩豐行,都係一種樂趣。彩豐行通常設於旺區樓上鋪,經常送出大量贈品,而出產的都是大大樽的家庭裝護膚、沐浴露、香薰產品,而且價錢超平!年輕十八廿二的新生肌膚,其實只要保濕做得夠,產品點樣都好用!但當年紀漸漸成熟,肌膚新陳代謝減慢,護膚品究竟係神仙水定係昆水,達人一出手,便知有沒有!彩豐行近年越做越大,近年更加衝出香港,連中國內地和台灣都有消費者網購,究竟,彩豐行是專門出產價廉物美產品的本地良心生產商?定係走中低檔路線的中伏山寨貨集中地?








(彩豐行係本地知名平價護膚品牌,但係質素有幾好用? )


解構彩豐行的吸引力

無可否認,香港彩豐行的顧客層,主要是本地的中下價市場。認為彩豐行好用的主要顧客群,都是學生、家庭主婦。如果對於美容產品有好高要求,平時用開動輒三數千元國際大品牌,對成份一絲不苟的高要求消費者,可能不是彩豐行的主要消費者。

彩豐行起初的時候,主要售賣批發裝超平家的美容用品給本地美容院,然後就有顧客直接買貨,變成現在有批發又有零售的運作模式。

彩豐行,已經成為某些OL港女的工餘活動同興趣!彩豐行的吸引力,其實並不是完全來自面膜或產品本身,反而是一種好着數的感覺。好多長期支持者,都有以下類似的評價:
「我用好少錢買咗好多野!」
「啲面膜同精華,好似出面好用貴價護膚品牌嘅平價版」
「買少少野又攞咗好多免費贈品!好抵!」

喺彩豐行,幾百蚊可以買到十件八件貨,包括面膜、精華、香薰、止汗劑、沖涼液……難怪好多人都覺得彩豐行好好用、好抵好着數!

當你好興奮地覺得彩豐行好抵用,好好用嘅時候,不妨冷靜地諗一諗,如果彩豐行啲嘢真係咁好用,點解要賣得咁平?


(價錢平、大大枝係彩豐行產品嘅特點)



(彩豐行位於旺角栢裕商業大廈的旗艦店)


彩豐行好用定中伏?

以前對於醫學美容上沒有什麼研究,對於皮膚學和生物學沒有什麼認識的時候,曾經,我也很喜歡去彩豐行,以為呢啲就叫做好用。嗰種行outlet,少少錢買好多美容野的感覺實在難以抗拒!

一般人鍾意去彩豐行,不外乎以下的原因:

價錢平,抵用:一般產品都大大支家庭裝,幾十蚊可以用好耐

售貨員夠親民:彩豐行的售貨員BA一般都算是有禮貌又熱心,不是某些高級護膚品名店那種高高在上的咀臉

疑似是好用貴價貨的廉價版:彩豐行好多系列,都用似曾相識的包裝廣告名稱,彩豐行自家品牌「12杯水」,和另一個品牌h2o plus的「八杯水」系列互相呼應,令人不禁驚嘆有冇咁咁啱!;彩豐行又有出產自家「神仙水」,連廣告都和SK-ii的神仙水相當似。一般的消費者看到名稱聽起來好似差不多的貨品,就不期然會立即比較包裝,連包裝的顏色都相當接近的時候,一般消費者就會產生一種錯覺,覺得兩者是好像差不多的貨品,連質素同好用程度也應該差不多,而抱着貪平的心態購買。(下面我會詳細討論)

超多免費贈品:彩豐行購物一次,只是消費一百幾十,就有好多面膜、精華、沖涼液等等的樣板回贈。彩豐行送sample的密集程度,簡直是全香港護膚品牌之冠!

香港製造:彩豐行的產品都是在自家工場香港製造,和其他品牌於大陸的工廠造不同,香港製造始終都有多一點信心。

近年來我花了很多時間了解皮膚、生物學、新陳代謝、營養、致敏物質等等的醫學美容知識。對於抗衰老、保持年輕,我亦從最新的醫學科學研究得到不少的知識和啟示。對於醫學美容有充足的了解之後,我就擺脫左平價好用這個想法、很少再去彩豐行了。

最主要的原因,就是彩豐行的質素問題。


彩豐行,係護膚品牌中嘅公屋?

討論彩豐行產品係咪好用,係一個好敏感嘅話題。因為,牽涉到個人收入同支出等嘅經濟問題,對於某些消費者來講,彩豐行可能係佢哋唯一嘅選擇。又因為價錢嘅限制,彩豐行可能係佢哋認為可以接觸到不同護膚品比較平又經濟的途徑。曾經有一個八婆朋友同我講,彩豐行係護膚品界嘅公屋!(當然,對於呢種諗法我係絕對不認同! 何況公屋都有好多好筍嘅富戶同靚景!分分鐘仲正過好多私人樓)

撇開產品是否好用,彩豐行的產品價錢好平,好多消費力一般嘅廣大市民都會買嘅牌子。由於價錢真係相當低廉,以化妝護膚品牌來講真係算最平之一,亦都係唔少收入中等嘅學生、OL、家庭主婦嘅最愛牌子之一。而大家亦明白到,鬼唔知SK-II神仙水好用?價錢好貴吖嘛!鬼唔知定期去高級醫學美容中心做激光、射頻,可以大大改善膚質?但預算都係一個好重要嘅考慮嘛。

呢一點,我理解,但係而家我會話俾你知,除咗彩豐行之外,出面都有好多好平而且更加好用嘅護膚品。

今次特別討論彩豐行係咪好用,其實係用一個尊重、科學化、實事求是嘅態度,平常心去討論,並無意去抬高其他價錢較貴嘅品牌,踩低平價嘅彩豐行,或者睇唔起用彩豐行嘅人士,反而係可以藉住呢個機會,大家一齊發掘下,仲有冇其他平價又好用嘅選擇!(包括彩豐行及其他牌子產品)

關於彩豐行的討論,網上有好多。有人說它的產品有毒,有人說它的面膜好用,有人說彩豐行的產品很容易導致爛面、敏感……眾說紛紜。去評價一件產品好唔好用,網上嘅傳言只係其中一個途徑,始終不能盡信!最科學嘅方法,就係從佢嘅原材料、成份分析,從而分析成效。

歸根結底,我而家唔會再買彩豐行的原因,就是因為有效成分不太明顯、卻有好多人造色素、添加物。作為一個對於添加物特別敏感的人,使用彩豐行中伏導致敏感的情況相當多!


彩豐行唔好用原因一:添加物

不知何故,彩豐行的產品經常添加大量的人造色素!即使最基本Joserinstine沖涼液,佛手柑和薰衣草沖涼液,都要加大量的人造色素,你會發現沖涼液竟然會呈現塑膠般紫色和黃色,人工得有點恐怖!而彩豐行的蘆薈,亦會加入綠色的人造色素,感覺很恐怖!

Joseristine彩豐行品牌旗下的產品,也經常被發現成份包含爭議性甚高的paraben,真的不知何解。同時連最基本,純粹是身體使用的按摩油,裏面都被發現成份有用礦物油!真的完全是使用最廉價成份,走最平價路線。

彩豐行一個問題,就係經常叫買家好仔細咁檢查產品成份,因為係彩豐行嘅產品裏面,好多時佢會列出所謂嘅「主要成份」,但係消費者要好小心去留意一啲英文細字,先可以得到完整嘅成份表,而當中好多次,成分表裏面我都搵到一啲化學物質、添加物、酒精等等,真係差啲就買咗雷品!

與其用咁多添加物嘅護膚品,市面上有好多零添加嘅牌子,除此以外,超級市場裏面亦都有好多有機嘅沖涼洗頭牌子,好似Avalon Organics,如果要求唔係咁高,只係一啲好潤滑香香甜甜嘅沖涼液,Taste、Marketplace by Jason's、Log On同Citysuper都有好多,包括Kose牛奶玫瑰沖涼液等等,都係$50左右,價錢都唔算貴。


彩豐行唔好用原因二:有效成分難以評定

無論是國際護膚品牌,或是一些本地牌子、韓國牌子,我評價是否好用的標準都是一樣,就是有效成分是否有科學根據。

彩豐行產品的問題在於,聲稱的好用、用處好多,例如薑油繃帶又可以減肥,按摩膏又可以減肥,好似好科學,但係其實好唔科學。花膠,又可以用來塗抹美顏!?總之話題諗頭多多,但係科學嘅根據就唔多。

而且,佢嘅商品說明好含糊,例如出售透明質酸原液,當你仔細睇成份時候,就比我發現裏面嘅成份好多係甘油!

買得美容產品,除咗自我感覺良好之外,都想會有一啲改善皮膚問題嘅效果。但係而家市面選擇咁多,即使係醫學美容牌子,都有Dr Wu、Dermacept by Dr Zein Obagi、Cellbone、Avene、Bicelle、Dermalogica……而且差唔多萬寧、屈臣氏等嘅藥妝店都會有,價錢仲要唔係太貴。與其用自己塊面試唔知有無醫學根據嘅平價貨,好多人都唔介意比多一百幾十,去買一啲有醫生同醫學團隊設計嘅產品,而且有名有姓喺萬寧出售,信心都高啲。

就算係一啲「非醫學美容」嘅普通美容產品,依家香港咁發達,選擇都有好多:森田藥妝保濕面膜、Kose保濕面膜、我的美麗日記……真係冇乜必要用唔知乜嘢牌。就算我當你係完全冇錢,,一個月只係得幾百蚊買護膚品,點解唔用一啲家傳戶曉,價錢經濟好用,又有經過無數測試成功嘅Olay?


彩豐行產品唔好用原因三:缺乏醫學研究背景

當我對於醫學美容、人體生物學嘅了解越來越多,就發現產品成功或失敗嘅關鍵,在於成份同科學研究。如果我經濟情況唔太充裕,就會寧願買一啲由皮膚科醫生、科研團隊研究嘅產品,再配以一啲天然嘅物料。一啲純天然嘅物料,例如橄欖油、口服維他命C等等,價錢都唔貴,而且一定有效,最適合經濟唔太充裕嘅人。

彩豐行科研方面,真係唔知有冇特別大嘅預算投入。因為,彩豐行雖然係香港製造,但係一啲現代嘅美容產品,都需要有充足嘅科學研究,先可以確定使用正確嘅有效成分、同埋使用正確嘅儲存方法確保有效成分仍然保鮮。

我個人估計,彩豐行放在科研與及喜歡學研究嘅資金,絕對唔會超過一啲大型嘅品牌例如neutrogena或olay。


彩豐行唔好用原因四:好似外面品牌一樣,其實唔一樣

彩豐行產品系列,往往同出面一啲比較知名好用高價錢嘅品牌,有類似嘅名稱同包裝顏色,就好似超級市場嘅自家品牌,出產嘅貨品都會同著名品牌嘅顏色相類似,而消費者通常就會覺得係相同質素,只不過價錢較平。但係面就只有一塊,睇野要睇真啲!作為一個精明嘅消費者,當你比較嘅時候,你就要比較主要嘅成份,而唔係純睇顏色同包裝。雖然彩豐行嘅產品同外面高價錢嘅產品,顏色包裝好接近,但係如果成份唔同,其實都唔可以直接比較,亦都唔可以話一隻係另一隻嘅同類產品!最佳例子,就是神仙水。好多人會用彩豐行神仙水同SK2神仙水比較,但是怎樣比呢?如果成分都不同,又點可以直接比較。

我想講嘅重點係,當你唔係好多閒錢嘅時候,你更加要睇清楚點樣用你有限嘅資源,先可以得到最大嘅美容效果!當你收入或零用錢唔多嘅時候,就更加要學多啲美容嘅知識,自己學識皮膚點樣運作,點解人會衰老,點樣防止發炎防止暗瘡。彩豐行啲嘢價錢係好平,但係唔一定好用。分分鐘你係好平咁買咗啲冇乜用嘅野。相比起出邊一啲有醫學研究嘅品牌,彩豐行嘅有效成分又細又唔見效!到時候你錢又冇,樣又冇!

好多好用嘅護膚品,價錢其實都唔貴,都只不過係一啲普通嘅開架品牌,喺萬寧、屈臣氏等藥妝店都有出售。多啲比較同學習,精明消費,都可以達到理想嘅美容效果!而唔係好懶咁樣,以為彩豐行係你無錢之下都可以美容嘅一站式捷徑,見到人哋講乜就信乜。

我依家教你點樣可以用好平嘅價錢買到超級好用嘅平價護膚品,同埋點樣可以用批發價買到高質素嘅專櫃護膚品(大推薦)。

彩豐行平價又好用推薦

講咗咁耐,彩豐行係咪一無是處呢?其實都唔係,彩豐行都有啲嘢平得來都質素可以的。講真,用上面嘅面膜、精華,我就唔會買,但係一啲粗用嘅嘢,例如牛奶浸浴粉,我會推薦。彩豐行嘅同埋浸浴粉,除咗包含咗牛奶、仲有天然海鹽、薰衣草、天竺葵,對於舒緩身心都有一定嘅幫助。

仲有佢都有一啲香水系列,多一支香水配搭,作為改善心情,其實都唔錯的。


瘦身美體






0 意見

Counter

Flickr Images