每次睇韓劇或者內地嘅BL耽美網絡劇，就會激發起爭妍鬥麗嘅心！因為裏面嘅主角，身形都fit爆，面尖尖、下巴兜兜、又夠高，着乜嘢衫都好好睇！
有啲朋友話，韓劇嘅主角唔可以作準，因為當地韓國人嘅飲食習慣，同香港人嘅飲食習慣始終唔同。佢哋食好多泡菜、蘿蔔、芽菜等等，係多蔬菜少肉嘅理想飲食。始終香港人飲食習慣始終偏向廣東粵式，出街食飯都會食多啲碳水化合物、肉類，所以好難完全變成韓國仔韓國妹slim爆咁樣。
如果香港人因為基因同飲食習慣，注定冇得做kpop男神女神，咁即係一世注定只可以做半桶水MK Pop？又未必！即使活在香港，平時食嘅係中菜，都可以靚到爆！點解咁肯定？因為我見過好多唔同國家嘅人都做到，強國人都得。
（圖中呢位面尖尖下巴兜兜嘅韓風靚仔，原來並唔係韓國人，其實係強國嘅明星高泰宇，主演人氣BL網絡電影「雙程」）
（高泰宇唔單止顏值高，似足韓國明星，身型更加一啲都唔會輸蝕，證明中國人通過健身同飲食，都可以去到韓國秒殺級美男嗰種咁靚嘅境界）
減肥，係長期鬥爭。一啲又靚又瘦嘅人，同普通人，分別在於平日飲食嘅習慣！今日就要特別講下，傳說中超有效減肥嘅5：2輕斷食減肥法。（5 2 Diet / The Fast Diet）
5：2輕斷食減肥法同一般減肥方法唔同，佢唔需要大量嘅卡路里計算，一個星期有五日，都可以隨意鍾意食乜就食，有兩日，就屬於低卡日，都可以進食，每日就食大概500卡路里左右。
5：2輕斷食減肥法嘅操作方法唔算太複雜，基本上五日就做你平時會做嘅野，當係要所謂嘅「斷食」個兩日，（其實都可以照食，大概600卡路里）就自然食少啲。5：2輕斷食減肥法個好處係，唔需要太過介懷平時嘅卡路里計算，每個禮拜只有兩日需要計算卡路里，而且都唔係完全唔食，係食少啲咁解。如果計劃得好啲，每日都可以食足三餐。
5：2輕斷食減肥法另外一個好處，就係一個禮拜有五日係飽。對一啲初初減肥嘅人，都係一個比較簡單又唔需要太用腦嘅減肥方法。
5：2輕斷食減肥法嘅好處，係通過折讓對卡路里嘅吸收，從而減少身體嘅負擔，亦減少糖尿病、大腸癌等等危疾嘅風險。根據醫學研究發現，動物食少啲，生命都可以延長！太多食物，反而可能會造成身體提早老化，令生命健康受損。
5：2輕斷食減肥法嘅好處，就係平衡左食嘢同節食之間嘅關係。以前嘅節食，就係無止境咁絕食，但明白到人類其實真係需要進食，冇理由長期飢餓，好快啲人就會放棄。
地獄式減肥無用，天堂式減肥先有用！我認為5：2輕斷食減肥法都可以算係天堂食減肥。
地獄式減肥只會令你crash and burn，無論有無效，半年後你只會更肥。反而5：2輕斷食減肥法天堂式減肥，結合營養學、醫學、時尚流行文化、美學，你會喺華麗中轉身，變得更索更健康！
要更索更健康，就要從飲食習慣開始。減肥，重點在於進食，唔係節食！要食得好，食得飽，食得有營養。5：2輕斷食減肥法嘅理論亦都係一樣。五日任食，兩日節制。
作為一個美容達人，除咗做足5：2輕斷食減肥法要求之外，我甚至會建議你將飲食，睇成一種浪漫、充滿幸福感、自我提升、時尚嘅活動，減肥就會變得好容易。 改善食物，刪減一啲對減肥吃力唔討好嘅碳水化合物，變成高質素嘅蛋白質同埋新鮮蔬果菜水果，你成個人都升呢！
近期最流行嘅減肥方法5：2輕斷食減肥法，配合以下幾個生活習慣，我保證你會瘦！
有幾個小貼士可以同大家分享下。
減肥貼士1：用高級餐具，喺可愛地方，浪漫地進食
減肥過程中，好多人同食物嘅關係好唔健康。一係就係完全拒絕進食，一係就係暴飲暴食。對於食物，你要有一種尊重、享受、重視嘅態度。所以我建議你，食飯嘅時候嘅氣氛都要好好營造！無論你係5：2輕斷食減肥法進食或非進食嗰日，都要注意食飯嘅環境。
如果你真係真心想減肥，真係想成功，首先，你要買過晒一啲高質素嘅食具。最好，無論碗筷都係一啲你自己鍾意嘅顏色、材料。最好都係一啲高質素嘅瓷器、設計師品牌，或者普通家具店選購都冇問題，最緊要係佢能夠代表到你嘅性格。一啲高質素嘅食具，令你知道飲食，其實是係生活享受之一，你應該重視呢個過程，而唔係無意識咁隨便將一啲無營養嘅嘢亂放入口！
好多香港人忘記咗進食應有嘅氣氛。其實通常食晏晝，我會去一啲有微風陽光嘅地方進食，無論係出邊街嘅餐廳我會要求坐窗口位，抑或屋企我都會盡量選擇係一個通風、陽光普照、舒服嘅環境之下，慢慢進食。夜晚，我就會選擇燭光之下，點着香薰進食。如果你屋企有露台、花園或天台，可以一個星期一晚同bf在星光下用餐，享受拍拖嘅氣氛，令人感到甜蜜、二人世界，自然唔會暴飲暴食。
如果你想減肥，你就一定要戒除喺膠兜膠盒、外賣盒直接進食嘅壞習慣。
用咗一啲優雅嘅正統餐具，例如日本筷子或韓國筷子，又或者係英國出產嘅刀叉，會令你食得慢啲，而唔係攞住膠叉紙盒亂咁食。
食物，應該好好咀嚼，從而體驗食物中嘅口感同埋味道。即使係買外賣都好，我都會要求你先將食物倒出嚟食。咁樣，你就可以更加正視飲食呢回事，好似一個貴族，優雅地慢慢食，而唔係好似隻豬咁狼吞虎嚥。
減肥貼士2：學懂自己烹飪
如果食得好，又食得飽，仲要同時瘦身，最好嘅方法，就係自己識得煮。
無錯，而家有好多方法可以幫到你健康飲食，例如專門售賣營養均衡減肥餐單嘅高級外賣店Nutrition Kitchen，但係呢啲都係短期內幫助你極速減肥嘅方法，唔通你一世人都係咁食Nutrition Kitchen，到你死嗰日咩？
而且，即是喺低卡日，仍然冇限制你用乜嘢烹調方法，只要夠低卡，都可以接受。屋企煮，就可以確保低卡，同時又美味，啱自己口味。
依家香港購物咁方便，其實要煮一餐有營養又好味嘅餸，真係唔係想像中咁難。Marketplace by Jasons、Taste、Marks and Spencer Food、C!tysuper同Aeon都有出售好多半製成品嘅食物，包括左預先醃制嘅海鮮、肉類、預先包裝嘅蔬菜，可以少量購買嘅生果、香草、外國調味、低卡飲品等等……對一啲早上要返工嘅靚仔靚女，如果想減肥，其實最好嘅方法，就係購買一啲半製成品，再用健康嘅方法烹調，喺屋企都可以達到食超優質食物嘅效果。無論係5：2輕斷食減肥法邊日，食多或少，質素都係高。
減肥貼士3：以選擇護膚產品嚴謹態度選擇食物
我問你，你選擇護膚品嘅時候，會唔會考慮用一啲劣質、引致敏感、發炎嘅產品？定係會嚴選一啲天然、有機、有科學根據、甚至達到醫學美容效果嘅高質素產品？
一啲貴價嘅spa，會有好多天然嘅療程，例如例如綠茶面膜、杏仁磨砂、蜜糖hair conditioning等等，呢啲已經係食療級嘅享受，因為療程知道你食落肚都唔驚。敷上面，同食落肚一樣都要高要求！
如果你唔會直接將一啲乾炒牛河、茶餐廳垃圾食物、快餐店薯條敷上面，我就勸你都唔好食落肚。因為兩者其實冇乜分別，你用薯條敷上面，都唔夠你將薯條擺喺你體內吸收消化嘅時間長久！如果你唔會將一啲過分加工嘅中下價劣質食物敷上面，我勸你最好都唔好食。
