【減肥】韓國人瘦身減肥法:如何好似韓星一樣成功減肥

1月 30, 2017

韓國明星普遍身形非常之良好,仲要有前有後!韓星男嘅大隻女嘅fit,男女都大胸瘦腰,對於想減肥嘅香港人,真係令人非常之羨慕。韓星同埋韓國娛樂圈嘅模特兒,身形都非常之標準。佢哋通常都有專業減肥營養師、健身教練personal trainer幫手。

韓星減肥,會用一啲好極端嘅減肥方法,例如一日只食一餐、只食番薯、只食雞胸肉,一般人未必跟做得到。但係,一般嘅韓國人都會比香港人更加健康纖瘦!一般香港人比起平均韓國人,難免真係有啲過重嘅跡象!

根據統計資料,韓國成年男人體重係68.6kg (151.2磅),女人體重係56.5kg(124.6磅)。數字已經計算社會裏面極少數嘅痴肥人士。即係話平均體重更輕。

如果你好奇點解韓國人咁瘦,就要從韓國嘅飲食習慣開始研究。


避免自己劣化,變成豬扒

好多香港人會比自己藉口話韓星減肥成功,係因為佢哋係專業娛樂圈人士,自己唔係娛樂圈人士,就當然唔需要咁瘦。

如果你肯面對現實,就發現除咗長期減肥嘅韓星之外,一般韓國人同香港人嘅體重都有分別。

平均來講,香港人普遍比韓國人肥胖。一啲身形普通正常嘅香港人去到首爾旅遊,都發覺自己比起當地人肥一大截。

如果你有自知之明,每一次睇韓劇、見到啲韓國明星,就不期然會諗起要減肥。俾人背後叫做「豬扒」、「豬西」,難聽過俾人鬧粗口。但係無可否認,年齡會令到人嘅身體身形發生變化,鬆弛、下垂、衰老,就會令一個人惡劣化,變成豬扒。

過咗25歲,就要特別留意!因為初老嘅跡象就會開始產生。唔用心去打理,男神女神就會降呢,劣化,加入豬扒一族。


韓國人飲食習慣:為何韓國人那麼瘦

韓國人同香港人飲食習慣有好大唔同。唔好話好似kpop、韓劇明星、當地模特兒呢啲職業表演者,就算一般首爾街上見到嘅路人,體重都同香港有好大出入。

好多人會問,韓國人同埋韓星咁瘦,究竟係點樣去減肥呢?

如果你仔細觀察,就發現原來韓國人減肥成功,身材瘦,同佢地嘅飲食有好大關係。

韓國飲食同香港飲食不同之處在於蔬菜同肉類、碳水化合物嘅比例。

韓國食物裏面,肉類佔每餐嘅比例好細。

香港人,飲食裏面包含咗太多肉類同碳水化合物!

好多香港人對於韓國美食嘅認識,就只限於香港尖沙咀、銅鑼灣嘅韓國餐廳、「韓燒」等等。但係佢哋其實唔代表真正韓國人嘅食物。真正首爾市民嘅食物,絕對唔似香港韓式餐館咁豐富!真正嘅韓國飲食,肉類只係好似配菜一樣,而泡菜、芽菜、紫菜、蘿蔔類型嘅食物,佔每一餐嘅比重多好多。


(韓星減肥成功例子Shinee金鐘鉉身型fit爆!原來韓國人普遍瘦,同社會經濟狀況,同埋飲食習慣有關


韓國人瘦身減肥成功原因1:肉類價格昂貴

相比亞洲各國,韓國肉類價錢,尤其是入口肉類好似牛肉,價錢比其他地方貴好多。

根據最新gmarket資料顯示:

1.6kg高級韓國生產牛肉,售價89000韓元,約港幣$592。

600g本地普通韓國生產牛肉,售價26000韓元,約港幣$173。

相比起香港,價錢真係好貴!

肉類係當地屬於半奢侈品、輕奢侈品。所以,一般人都唔會大飲大食肉類,好似香港人咁樣。一般你係香港嘅韓國餐廳見到嘅肉類比例,就係真正首爾餐廳相同食物嘅兩倍、三倍左右。

當地人,並唔會每一餐都食大量肉類。通常都係白飯、白粥、蔬菜為主。好似最出名嘅韓式拌飯(bibimbap),菜嘅比例就遠高於肉類。

唔好話韓星呢類要靠樣子搵食,長期減肥嘅人,一般韓國人食肉嘅機會都冇香港台灣咁多。

相反香港人、台灣人,每一餐都無肉不歡。如果唔食一大堆肉,好似成身都唔自在!連一般香港人食嘅早餐,都heavy過人,茶餐廳早餐香腸餐肉火腿,是常識吧。

正因為咁,一般香港人同台灣人不知不覺之間就會食咗好多卡路里同動物脂肪。

如果你想好似韓國人咁瘦,就要檢視自己嘅飲食習慣,將而家一般香港外出食飯嘅肉類份量,減少一半甚至刪除三分之二,只保留3分之一到一半,就會比較貼近令到韓國人纖瘦、健康嘅飲食份量。


(另一韓星減肥成功例子。「始源」副偈真係令到好多人羨慕又妒忌,除咗健身教練之外,飲食習慣都好重要。網上圖片)


韓國人瘦身減肥成功原因2:泡菜幫助消化;低卡前菜(Banchan)多

根據資料顯示,一般韓國人每年進食40磅泡菜!

去過韓國旅遊嘅人都知道,韓國人食泡菜嘅程度真係全亞洲之冠。

唔講你未必知道,泡菜對身體嘅益處好多。泡菜係一種高纖維,低卡路里,低碳水化合物嘅優質食物。而且佢嘅乳桿菌(lactobacilli)多,泡菜被認為含有豐富嘅益生菌,適量食用泡菜,有防止發炎、抗氧化作用。

韓國飲食,其中一個特點就係一般人會進食好多飯前嘅前菜(Banchan)。呢啲前菜主要由蘿蔔、菠菜造成。多菜少肉,飽肚但低卡路里。



(韓國人好多時候食用前菜)

有部份韓國人食泡菜代替餸菜。所以整體吸收卡路里較低。

香港好多高級超級市場,都有出售獨立包裝嘅杯裝泡菜,價錢實惠,只需要$10左右。分量啱啱好,約半碗嘅份量,每一餐之前進食,令你有口味變化之餘,又唔會加重卡路里負擔,而且食得多肉,都會想轉口味,食啲好味但低卡的食物。


韓國人瘦身減肥成功原因3:多飲水,多菜,少西式快餐

其中一個韓國人為何比較纖瘦、韓星減肥容易成功嘅觀察,就係韓國人飲用汽水嘅次數冇咁頻密。

一般香港人出街食飯,點都會飲汽水。一般嘅快餐、茶餐廳套餐,已經包含咗汽水。但係韓國嘅餐廳本身沒有提供汽水,反而有免費嘅清水供應比乘客。好多韓國人食飯嘅時候,就會飲用清水。唔好睇小汽水同清水嘅分別,汽水一杯大概100卡路里, 30日,就係3000卡路里,即係一磅脂肪!

韓國飲食裏面經常包含紫菜湯,紫菜湯高水份,低卡路里,又非常之飽肚。

玩一款韓國人最愛,就係大醬湯(doenjang soup)。湯主要由豆腐、大醬做成。水份充足,卡路里低,營養價值高!

如果你認真想瘦,好似韓國人一樣咁瘦,就多啲注意外出食飯嘅時候,要求飲中國熱茶(無卡路里) ,香港所有快餐店都有提供一個免費餐飲升級嘅選擇。或者去便利店購買清水,代替套餐附送嘅飲品。

韓國作為一個亞洲國家,同香港、大陸、台灣、日本有一樣野好唔同,就係西餐嘅普及程度。一般韓國人嘅飲食習慣裏面,唔會好似香港人接觸咁多西方嘅快餐。例如韓國嘅快餐店,就好少出手好似香港嘅焗豬扒飯、焗意粉等等。而你係韓國嘅商業區例如明洞,都唔會好似香港咁見到成行成市,總有一間喺附近嘅美式快餐店。(係有韓國炸雞大排檔,但係韓國炸雞唔係大家想像中咁普遍,當地人亦都唔會日日食炸雞)

韓國人都有食快餐,好似一啲辣煮年糕、魚肉糕、紅豆餅等等。好多韓國嘅後生仔,就會鍾意去咖啡室出沒。咖啡室出售嘅茶裏、咖啡飲品,同埋蛋糕,相比起超高卡路里、超多油、超多肉嘅美式快餐,呢啲選擇就比較健康,低卡。

如果你想減肥,就要注意自己飲食嘅份量。減少外出食劣食快餐,係減肥最快方法之一!

就算唔係香港好多地方好似韓國咁有出售低卡路里嘅韓式食物,用生果代替半餐,都係唔錯嘅選擇。



(韓星EXID「正花」身材索到!仲要瘦得嚟比例靚令到大家都想減肥好似佢咁)


韓國人瘦身減肥成功原因4:Kpop,韓劇流行,成為模仿對象

韓國嘅電視、音樂其實非常之本土化,一般嘅韓國電視台,搵唔到好多外國嘅節目。基本上韓國人淨係睇韓國嘅電視。一般韓國人嘅英文水準,亦都冇香港人咁高。所以佢哋睇嘅娛樂圈明星偏向本地韓國化(全韓星)。連觀眾對於明星嘅審美觀,都好接近韓國本土。

外國明星相比韓國明星,無論身高、體重,都比較健碩大份。但西方同亞洲嘅審美觀唔同,香港人覺得啱啱好嘅西方人士身形,當地人來講就屬於超重!


(想減肥就要以韓星Yura做目標)


韓國人瘦身減肥成功原因5:少飯,令到醣類吸收小

韓國人飲食,係亞洲人飲食裏面,算係食得少飯。相比起印度菜、泰國菜、中國菜,韓國人雖然都食白飯,但係每餐嘅份量,就絕對少好多。

大部份韓國人每餐進食嘅白飯份量,唔會超過大半碗飯。

一般韓人對於飲食形象嘅教育,都比香港人高。好多韓國人都知道,白飯本身其實只係碳水化合物,即係醣類。多食白飯對身體無益!香港人就唔同,每餐飯都好似一定要食好多飯先叫仲滿足。


韓國人瘦身減肥成功原因6:社會嚴重歧視肥人

韓國社會對於癡肥,特別歧視。一般韓國人認為,如果連自己嘅體重都管理唔到,就唔使旨意係其他方面有任何成就。所以,韓國人係唔會接受自己變肥,亦都唔接受其他人肥!同西方社會唔同,呢度冇「肥都可以靚」呢個概念。如果肥,就自動被歸入醜樣、失敗、自卑嘅行列。

如果其實好似韓國人瘦,就要好似佢哋咁有自律嘅心。


總結:改變飲食習慣,模仿韓國人,就可以變健康

飲食習慣方面,韓國人有好多值得我哋學習嘅地方。韓國人同韓星對於飲食份量、營養、食物配搭,同埋對清淡食物嘅追求,令到佢哋係減肥健身方面,遙遙領先。

多菜,多湯,少飯,少肉,就總括左佢哋嘅飲食理念。

你要減肥成功,就一定要用科學化嘅方法。以上嘅韓國健飲食習慣,差唔多喺全部韓國人裏面都體現得到,而佢地減肥成功纖瘦的效果,亦都係明顯可見。

認真,當你肥嘅時候,你自己都討厭自己。當你越來越健康,越嚟越瘦嘅時候,你對自己嘅自信心同埋自尊心,都有所增加。所以,今日就做好準備,做一個更加纖瘦同健康嘅人!


減肥瘦身




0 意見

Counter

Flickr Images