【香港美食】法式小盛宴:Bistro Du Vin香港,神話級法國小店

9月 10, 2016

好多人都會禮貌咁問,你weekend做乜嘢呀?

我通常都會好禮貌咁回答,冇乜特別嘢。

但其實,我真正嘅答案係:

「喺一個平靜嘅週末,去一間法國bistro食兩個鐘午餐,細味一下法式美食藝術。昏黃嘅燈光、美味嘅法式海鮮,喺海岸線嘅海風之中,整理半生嘅思緒。」

有時如果真係和盤托出,有啲人又會覺得我好做作!所以我都簡化,費事講咁多。哈哈!

我平時都會去下星街、SOHO、蘭桂坊一帶食飯,但真正值得記下來嘅餐廳,實在唔多。而我認為我嘅生活記錄,應該係美食同生活了悟嘅精華,最值得記下來嘅部份,而唔係逐漸變成openrice。

Bistro Du Vin香港,超高質素嘅法國小餐館,可能住港島區嘅朋友會識,但就算以香港島居民來講,都係地點比較偏僻,位於香港嘅最西面。因為香港Bistro Du Vin地點比較遠,只有美食家先會去咁遠追尋。自從堅尼地城站開通之後,對於美食家來講真係一個好消息,因為呢一帶都有好多好嘅食館,以方便出入左好多。

先前,就有好多朋友同埋美食lifestyle blogger喺網上評論都不約而同讚好呢間法國餐廳。Bistro Du Vin香港能夠引起旋風一窩蜂好評,我就一定要試吓啦!(本文是自費評論,沒有收到任何免費招待或免費試食)






法式美食藝術精神

法國菜,喺香港有一種高不可攀,高人一等嘅感覺。無他,因為通常香港食法國菜嘅餐廳,無論裝修、服務、價錢、對美術嘅追求,都遠勝於一般嘅中菜館。

法國美食同埋甜品,喺香港靚人圈永遠都有市場。

法國餐廳緩慢同埋悠閑嘅氣氛,精緻嘅美食,係咁多人會愛上呢個距離香港甚遠嘅地區食物嘅原因。係法國文化裏面,飲食都係一種藝術,係需要好好準備、欣賞、細味、回憶。

喺香港,法國菜之所以受歡迎,除咗美味之外,更有種階級優越嘅吸引力及歷史文化嘅光環。喺香港,最受歡迎嘅餐飲,都係日本、韓國、同埋中國菜。關東拉麵、韓式燒肉、壽司、魚生、台式便當、廣東飲茶等等,都係主流。但係作為一個真正嘅靚人,飲食嘅口味,就要更上一層樓,唔可以淨係比中菜、日本菜、韓國菜規限。去到一啲正統嘅法國餐廳,攞住個法文餐牌,都可以知道乜嘢係乜嘢,能夠起碼講到幾樣食物、幾種紅酒,個人都高貴啲。

Bistro Du Vin香港,最著名嘅就係法國式家常嘅小盛宴。我真係要擴闊我嘅眼光,最少嘗試一下平時唔食嘅餐廳。

人到咗某個年紀,飲食嘅口味都會進步、進化。好多人覺得過咗25-35歲左右,就應該好好的學習法國菜、同埋紅酒嘅類別,咁樣先至可以準備你人生嘅下一個階段:做一個優質、優雅嘅成年人。

我依家終於開始有年資同資格,去追尋真正法國嘅味道。

如果你同我一樣,都想做一個優秀嘅人,就一齊睇吓我嘅法式饌食學習經驗。哈哈!

Bistro Du Vin係香港一個美食家、食評人都給予好評嘅嘅法國小餐廳,Bistro Du Vin嘅好處,就係作風隨和,並唔會好似某啲本地法國餐館一樣咁造作。Bistro呢個法文,就係講小酒館。Bistro Du Vin香港係位於海邊,法國最着名嘅就係Cote d' Azur尉南海岸,海洋潮濕、有少少鹹味嘅海風,就美化咗呢間餐廳嘅氛圍。

Bistro Du Vin來頭不小,係香港同埋新加坡都有分店。係唔係普通街頭巷尾一間小型餐館咁簡單。佢係新加坡嘅Bistro Du Vin Singapore,都得到當地人嘅好評,喺香港,食過嘅食家評論都唔錯。

對於一啲經常要減肥嘅人,好似我同你咁,就會對於食物的卡路里斤斤計較。無他,因為事實上真係冇乜quota,唔可以浪費。Bistro Du Vin呢一間餐廳,我覺得係可以值得你用手頭嘅quota。





法式遺緒,感動味蕾

Bistro Du Vin香港呢間餐廳一定要食嘅就係Bouillabaisse,有人會將佢稱為法式海皇湯,其實Bouillabaisse係馬賽魚湯



呢一個Bouillabaisse,馬賽魚濃湯係Bistro Du Vin鋪頭嘅招牌菜。

去Bistro Du Vin香港,如果只可以食一味菜,我會揀呢個湯,佢就代表左Bistro Du Vin香港間餐廳嘅精髓。唔單止有鮮魚、蟹、蝦、青口、仲有濃郁嘅洋蒽、蕃茄、藏紅花同香草。

味道香濃、醇美。讚!

Bouillabaisse係法國菜中重要嘅一部份,而試過之後,我就可以判斷呢間餐廳能夠做到一定水準。


(Pork Rillettes with toast)

Pork Rillettes係一種用肉類慢煮成膏狀嘅spread,用來搽面包、多士,味道,好似餐肉。哈哈!

由於製作方法會用得比較多油和脂肪,Pork Rillettes減肥人士都係食少少就算。


去法國餐廳一定要知道嘅知識

每一次嘅用餐經驗,都豐富咗我嘅美食知識理解、同埋對法國烹飪文化嘅欣賞。

Bon appétit?好多美國人、洋腸港女都好鍾意係食法國餐嘅時候講呢句。但係,原來正統法國人食法國菜,根本係冇人會咁樣講。無啦啦講句嘢,會被人笑老土同大鄉里架!

我又再同店員溝通過,原來發覺法國菜本身係會大量使用以下幾種材料:紅酒、芝士、橄欖油、蕃茄、蘑菇、同埋鴨肉。法國菜本身包涵左唔同嘅菜佘,就好似中國菜,都有分南方,同埋北方。法國菜,好多時都被地中海嘅飲食文化影響。

好多人都以為,食法國菜,就一定係好誇張、好複雜、好高級。但原來,呢個概念已經過咗時,以前食法國菜,原來真係有呢種超華麗嘅習慣,當時叫做Haute Cuisine。原來70年代開始,法國菜經歷過大規模嘅改革,以前超隆重儀式,經過改革就變成比較輕便、隨意嘅現代法國菜Nouvelle Cuisine

去到法國餐館,飲水係有一定嘅學問。因為通常一般嘅法國餐廳,飲水都有分為水喉水、樽裝水、樽裝有汽水。如果只係飲普通嘅水,無需要樽裝水嘅話,就可以同侍應講,你要Au natural。

同時有一點要注意,就係食法國菜同食其他嘅歐洲菜唔同,佢會供應麵包,唔單只係飲湯嘅時候先會食,食緊正餐嘅時候,都會照食麵包!呢個係法國飲食文化嘅禮儀,所以千祈唔好以為飲完湯就唔可以再食麵包。法國菜,一路食餸一路食麵包係正常。


(法式烤雞水準中上,雞肉非常嫩之餘,燒烤又剛剛好,完全拿捏得到火候,令人一試就愛上。)


(牛扒簡直是一絕,絕對沒有想過在法國餐廳會點牛扒,但是無論味道、烹調、都會人回味無窮)


(Panna Cotta我至愛!水準超班,很久沒有吃過這水準甜品)

進食方面,亦都有一定嘅次序。當然啦,一般嘅餐廳都會用正確嘅次序上菜,你都唔需要擔心。但係如果係食自助餐嘅話,就要記住,法國人通常先食Hors D’oeuvres,再食個L’Entrée (Appetizer) ,先至食main course。食完先食沙律,芝士同甜品。

法國菜文化係一門學問、一門藝術。可能,有人會覺得唔重要,但係好多人眼中,佢就係連接着歐洲藝術世界嘅盛宴縮影。

有時你只想好好欣賞美食,欣賞對生活嘅熱情。

放下平時忙到不真實嘅現實世界,喺Bistro Du vin呢間小餐館裏面,品嚐一啲同樣美味到不真實嘅美食。竟然有種無盡幸福嘅幻覺,好想說聲謝謝merci。

時光,令到好多野都冇得再返轉頭。但同時,佢會令你成長,變得更加優秀,更加完美。令你知道除咗努力去keep住年輕嘅外表,反而有時坦然面對歲月洗禮,可能加添一種成熟、穩重、有智慧嘅光芒。

你已經唔再係揸住珍珠奶茶嘅細路,放低左韓劇同instagram,迎接着係對人生、生活藝術、文化、知識同智慧嘅追求。

法國菜,溫暖過無盡嘅藝術家,好似Cezanne 、Van Gough。法國烹飪藝術唔係個個都識得欣賞,亦都唔係適合每個香港人。然而覺得,我終於到咗咁嘅年紀,開始懂得欣賞,懂得仰慕。我終於,有咁嘅資格。

Bistro Du Vin 
地址: 西環 堅尼地城爹核士街1號地下D號舖 
電話: 2824 3010

0 意見

Counter

Flickr Images