隨着單次收費美容院興起，單次收費呢個營商模式漸漸變得普遍，不過好多消費者由於唔太熟悉行業運作，好容易會跌入各種各樣嘅消費陷阱！單次收費美容院原來有好多唔同嘅蠱惑招，令到大家防不勝防！
單次收費，由於佢嘅模式係逐次計，雙方都冇任何義務同責任返轉頭，更加多古靈精怪野！所以，如果你有興趣了解市面上嘅單次收費美容院，就要學識點樣保護自己！
一般消費者唔知道嘅單次收費美容院經營狀況
單次消費美容院，蠱惑起上嚟，比起傳統美容院有過之而無不及！
好多消費者對於單次收費美容院嘅認識唔深，唔識得分辨當中嘅黑暗之處。
由於單次收費美容院，比較少搵到正當明星藝人合作（規模不達標、形象不專業，經理人通常拒絕），冇錢買靚機只可以用cheap機，亦冇錢響傳統媒體賣廣告，佢哋嘅客人多數都係來自網上嘅收費轉介平台（一啲會去美容院抽佣嘅所謂消費者平台），或者Facebook、IG廣告。
市面上嘅單次收費美容院，除咗少部份之外，基本上係冇乜特別賣點，唯一可以鬥嘅，就係鬥平。
因為，當你冇專業頂尖醫學美容儀器，冇廣告效益，冇醫生，冇地段優勢，冇明星，甚至連聲譽都冇嘅時候，唯一可以做去吸引新客，就係降低價錢。
單次收費美容院，收費可以平到$120 ，甚至$80 ……
問題，就係呢度。當佢嘅價錢係講緊$100 ，甚至$80嘅時候，佢嘅成本可以用到幾多錢？
某些單次收費美容院害群之馬，做出嘅嘢係超乎你想像。
單次收費美容院蠱惑招1：用假機魚目混珠
首先要同大家講咗先，以下所描述嘅，並唔係所有單錢收費美容院都係咁，當中亦都有啲係正常正當經營，以下所講嘅例，係一啲不法經營嘅單次收費美容院地方。但係由於行業實在良莠不齊，大家都係小心啲好。
醫學美容中心嘅儀器就好似房車一樣，係有分級數。
級數最高Grade A嘅專利儀器如Thermage、Ulthera，價錢港幣$100萬左右。
級數良好Grade B+嘅，一部韓國嘅冷凍溶脂如Clatuu、熱光溶脂儀器如Le Shape、Velashape，又或者以色列出產嘅Pollagen射頻系列，因為要獲得FDA、KFDA等等認證，都講緊幾十萬！
但係，級數極低被行內人歧視，屬於Grade F不合格級數嘅大陸「假冒」儀器，價錢可能只係萬零蚊港紙。再者，呢類型嘅假機（假BTL、假Thermage、假ulthera），外表抄到似層層，普通市民難以分辨。
如果你經營一間鋪頭，你啲客只係肯比$120你， $800做一個儀器療程仲覺得好貴，你會唔會買部一百萬嘅儀器比佢？定係會將貨就價，買部大陸機就算？
好似某間網上幾高人氣單次收費美容院，就被揭發原來使用嘅激光儀器，全部都係大陸做！
市面上好多好多嘅單次收費美容院，就係利用市民無法分辨嘅盲點，呃得幾多就得幾多。唔好話工業大廈、SOLO裏面嗰啲，就算市面上比較出名果幾間單次收費美容院，而家都因為要迎合超平嘅低端顧客市場，逐漸偷偷地引入全無認證、安全有疑問嘅大陸機！
冒牌醫學美容機，同冒牌手袋唔同。使用冒牌手袋，最多俾人發現都係尷尷尬尬，唔能夠抬起頭。但係使用假嘅儀器，就分分鐘可以導致各種各樣嘅狀況，例如灼傷、擦傷、黑色素積聚、毁容。
可以話比大家知，一啲專門售賣假冒醫學美容儀器嘅地方，通常個儀器本身都會有運用相似嘅技術，去模仿效果。即係，如果部機係射頻，佢就會搵啲劣質射頻去扮。務求做到好似真機相似嘅感覺。
舉個例，就好似市面上最流行嘅HIFU同埋無針埋線，假嘅儀器一樣會使用相似嘅技術。不過，你打嘅時候，就冇超聲波監察，冇安全裝置，而零件同探頭本身，就梗係次貨。
到真正打嘅時候，因為部機本身係假貨，雖然佢用相似嘅技術，但執行上面就會粗劣好多，打嘅時候亦都會極痛！
好多響觀塘、荃灣、元朗嘅低水準單次收費美容院，就係用呢啲機。
例如無針埋線，真正韓國醫療版本係1.5mm 3mm 4.5mm，但假機做出嚟個效果，可以偏差到成為6mm+，嚴重地損害皮膚底層！
例如某間單次收費美容院，就被發現使用嘅全部都係深圳機、惠州機。難得成班傻豬豬仲覺得嗰度好平，佢嗰啲機根本就係不值一提。
有啲朋友去完單次收費美容院之後發現面部狀況出現異常。朋友問我，有冇見過呢部機，打完之後塊面好唔舒服，好痛，然之後仲無啦啦多咗條好似腫咗嘅疑似疤痕纖維線。我話部機我見過，不過並唔係響代理商嗰度見到，而係喺淘寶真係見過！
因為貪平宜使用不明來歷單次收費美容院，最後要搵醫生執手尾，所花費嘅費用已經遠遠超出原本嗰幾百蚊……
單次收費美容院蠱惑招2：使用不合格產品
你以為，高級同平價嘅美容院，分別在於使用貨品嘅級數，少年你太年輕了！
好多單次收費美容院嘅產品，唔單只係價格較低嘅批發來源，其實，係整批購入嘅次貨同過期貨。
大家可能有親身經驗，或者朋友之間有咁嘅經歷：因為皮膚問題，所以開美容院，發覺做咗療程之後，皮膚不但冇好過，仲差過之前！搞到成面都係暗瘡印、敏感、紅班等等。
如果係咁嘅情況，有可能因為單次收費美容院產品嘅質素問題！
老實講，質素唔太好嘅單次收費美容院係絕對唔會用貴野。就算佢肯投資買貴野，一啲稍為好少少嘅供應商，都唔會同佢簽約。始終人哋有個品牌需要保護，一定會保障大量入貨，形象高級嘅高端美容院。所以，喺整個體系裏面，一啲單次收費美容院就會被排斥出來。
你可能會話，「我去嗰啲價錢超平嘅單次收費美容院，都發覺佢哋有用邊隻邊隻醫美品牌喎……」
都係嗰句，少年你太年輕了！
唔能夠通過正常嘅批發渠道批發，就要從水貨、甚至黑市嘅方法。水貨對於一個消費者係會有折扣，但係相比起大量入貨嘅批發價，仍然屬於偏高，利潤絕對不理想。咁嘅情況之下，唯一可以諗到又做到嘅，就係黑市市場。
咁乜嘢係黑市市場呢？點解咁多單次收費美容院都會喺呢啲地方入貨呢？每次有一啲地方倒閉，就有一啲類似收夜冷嘅二手買賣中介。通常靚貨一定會有人承接，但質素差、過期貨、已經開始變壞嘅產品嘅亦都會有人承接。
一般護膚品會有兩至三年嘅保存期。有啲接近過期嘅產品，又或者已經過期嘅產品，就會用特價促銷。甚至倉裏面有啲已經過期兩年、三年（即係距離生產日已經五六年）嘅產品，係會用超平價發售。
咁你估下，嗰啲產品最後會去咗邊度？你塊面度囉。
到你敏感皮膚，返去投訴嘅嘅時候，真係死無對證。鋪頭裏面雖然好多個期貨、黑心貨，但係你返返去追究，佢係你面前檢查嘅時候，就攞支新嘅出嚟，你吹咩？
單次收費美容院蠱惑招3:強迫消費
美容院其中一個唔好處，就係強迫消費。單次收費美容院都有強迫消費？當然有。
呢個習慣唔知點解響元朗、屯門、荃灣嘅單次收費美容院特別常見。
通常個玩法係，當你落床，開始做美容嘅時候，治療師就會同你講，你皮膚唔夠好，要用第二隻精華。但係佢唔會響搽之前講，係會搽咗先講！
就算你話唔要，唔會加錢（可以加$500至$1000 ）轉第二隻精華，甚至你要即刻抹咗佢，佢都要收返你幾百蚊清潔費。
當然，仲有傳統美容院嗰啲，一大堆人上嚟，焗你買嘢嗰種模式啦。
所以，好多單次收費美容院嘅經營模式實在良莠不齊，最好小心比較！以免墮入消費陷阱。
如何避免黑心單次收費美容院
好多人去單次收費美容院，係因為害怕去傳統美容院，會俾人hard sell。
其實，你應該注重係搵一啲健康、正當、唔係黑店嘅地方。而唔係因為單次，就覺得佢一定良心經營；如果佢係多次傳統模式，就一定係黑心。兩者其實冇必然關係。
