幸福、寵愛自己、享受生活甜蜜嘅感覺，有時唔需要好貴。好多好好用嘅護膚品、美體沐浴產品，價錢都相當平價抵用。而就算你有公主病王子病，只會使用一啲價錢貴嘅專櫃級產品，我都可以教你點樣只需要用一半到七成嘅價錢，就可以買得到Lane Crawford、Joyce Beauty、DFS同海港城facesss嘅優質產品！慳返嘅錢，夠你買多幾樣野同埋去高貴食tea！（本文係自費評論，沒有收到任何品牌贊助或折扣）
唔好以為一定要好有錢先可以享受高質素嘅護膚。當然，如果你有錢去醫學美容，或者去六星級酒店嘅beauty spa保養，當然最好！但係，好多時日常生活嘅小小改變同知識，都可以令你多一個美麗選擇，幫你時刻表現最靚一面。高級嘅醫學美容護膚品，有佢特有嘅作用；平時嘅小小平價又好用嘅護膚保養，亦都有佢嘅樂趣。巧心思嘅護膚，都可以令你可以用好少嘅價錢，得到好好嘅美肌享受。
如果你本身預算唔多，我就會給你推薦以下幾種我個人試過又真係好用嘅平價護膚品。
Dermacept C10真皮營養液
要令你嘅真皮層都抗老化、抗氧化，改善下垂重拾青春，醫生認為最快嘅方法，就係為你嘅面部肌膚提供維他命C。食用嘅維他命C可以幫到你嘅皮膚，但係作用都唔及直接塗抹維他命C原液。直接塗抹維他命C原液，原本係屬於美國一啲醫學美容診所嘅獨有療程，由註冊醫生指導之下使用，呢對維他命C療程由於原液供應問題，只限於名媛、明星、模特兒使用。隨着呢幾年醫學美容品牌增加，競爭激烈，好多呢啲醫學美容及嘅藥物已經可以喺專櫃買到，而家連萬寧屈臣氏都買到。Dermacept C10維他命C經過臨床嘅測試，證實可以改善真皮層抗衰老，係名副其實嘅真皮營養液，一支改善去斑、美白、抗老化。價錢大概＄400左右，久不久就會有折扣，$300蚊左右都有交易，夠用一個月。
（上面呢幾支Dermacept C10、C20，我大大推薦！ ）
Olay多元修護霜（Olay Regenerist Super Cream）
呢隻Olay多元修護霜Regenerist Super Cream真係好好用，尤其係冬天嘅乾燥寒冷日子，佢嘅成份超滋潤，而且經過醫學鑒定，Olivem抗衰老，係開架品牌之中最好一種。而且佢嘅成份，同殿堂級美容品牌SK-II非常相似，而且同樣由母公司P&G嘅皮膚醫學研究中心研發。可以話係平民版嘅SK-II，不過價錢，就只係五分之一！價錢大概＄200左右，萬寧同屈臣氏都會輪住打折扣，夠用兩三個月。
除咗以上呢兩隻入門級護膚品真係平價又好用之外，其實即使你用開嘅高價品牌，分分鐘可以用一半嘅價錢就買得到！
講開好用嘅護膚品，老實講好多時真係一分錢一分貨！但如果你係讀緊書，又或者收入唔算太多，又想買到Lane Crawford、Beauty Avenue、Facesss等等地方會見到嘅專櫃產品，都唔係冇方法嘅。
好多人見到專櫃品牌好用，但係價錢好貴，都唔捨得，就唯有忍痛轉去使用一啲價錢超平但效果一般般嘅廉價護膚品（例如彩豐行、無數不知名台灣、韓國牌子）。你用開Jurlique、Dr Wu、Erno Laszlo、Bicelle、Elemis等等中高價貨品，就真係好難轉用一啲水準好大出入嘅劣質貨品。其實你只要識得去一啲批發嘅地方購買，價錢就分分鐘平一半！
有啲水貨美容護膚品專門店，睇落好似好普通，但係其實有乾坤！好多好正嘅高級品牌都有發售，而且啲貨都幾新鮮！
從批發地方入貨，慳好多！
你喺高級商場用零售價購買，同去用批發價購買，價錢真係差好遠。
聽化妝師朋友講，以前上一代嘅靚仔靚女，就會識得去尖沙咀嘅「龍城大藥房」入貨。係未有互聯網嘅時代，龍城大藥房都算係好齊，而且好多好貴嘅牌子都可以用六成至八成嘅價錢買到。
依家隨着互聯網同物流業嘅進步，水貨平行進口變得更加容易，而且成本更低。如果你識得搵一啲樓上鋪，就會發現好多鋪頭會將批發同水貨嘅護膚品出售，好似SalalaBeauty、Aroma Natural天麗護膚產品、天凝生活百貨等。當然，亦都有一啲從不明渠道得到貨品可以超平價發售嘅網店啦，始終有實體店感覺信心大一點，同埋買錯假貨嘅機會都會少啲。
美容美髮達人最愛嘅Aveda、Erno Laszlo、Eve Lom、Glamglow、Exuviance、Avene、Skinceutical，都可以搵到！我第一次去到嘅時候，真係第一次shopping shop到我有高潮！
而好多高檔品牌，都會同時經營批發業務，將貨品供應比美容院、Spa嘅地方。佢哋會出產一啲包裝平實，容量比較大支嘅商業用美容院版本。Jurlique、Elemis嘅按摩水療系列都同時生產零售版同商用版，商用版本價錢只係貴小小，分量就多好多！
跟據生意規定，呢啲商用版本嘅貨品，只可以供應水療中心、美容中心為客人提供facial and beauty spa服務用，並唔可以直接出售！但係唔知點解就流出左，而且仲係啲好正嘅品牌例如jurlique，真係消費者福音！
仲誇張嘅係，唔單止美容護膚產品搵到，香薰產品例如高級香薰蠟燭diptyque，都可以超平價出售！佢嘅價錢只係IFC旗艦店嘅六成！
最令人無法抗拒極之屈機嘅係，呢啲地方仲提供上門送貨服務！基本上你連街都唔駛出，唔使排隊等俾錢，只要好方便咁用手機㩒下，就會送來你屋企，都只係收＄30送貨費用 !
SalalaBeauty
SalalaBeauty可以話係水貨價嘅始祖，佢話佢自己嘅貨源係來自世界各地採購，但點樣都好，啲價錢真係平。而且賣緊嘅品牌都係你會響專櫃見到想買嘅品牌。SalalaBeauty有實體舖，仲有九間咁多，包括港九新界！
都好多呢類型嘅批發、水貨店一樣，好多消費就最關心嘅，就係佢會唔會賣假貨。咁耐以來呢間鋪頭嘅信譽度叫做良好。
Aroma Natural 天麗護膚品
分店數目，Aroma Natural唔算太多，但係講種類齊全到，就好好。同時可以買到美髮同埋美容嘅產品，如果你用網購嘅方法，送貨就更加簡單。
呢個要特別讚一下，因為佢嘅服務，以水貨化妝品來講，真係算唔錯。
其實仲有好多類似嘅水貨、批發用品店，只不過呢兩間我信心高啲，特別推薦俾你地。
水貨店、批發店購物小貼士
SalalaBeauty、Aroma Natural呢幾間都算係香港比較出名，可以用到接近批發價購買嘅水貨護膚品專門店。佢哋嘅地點多數都唔太方便，多數身處一啲3、4線嘅商場裏面，而且冇乜裝修，冇乜售後服務，亦都冇乜試用。店員都係盡力解釋，但始終產品功效都要靠你自己上網研究。但佢有一個好處，就係平！
如果你覺得上飛機in-flight shopping 買免稅品平，呢度就更加平！
貼士一：先自行上網研究
SalalaBeauty 、天麗護膚品、天凝生活百貨呢類型嘅鋪頭唔係專門店，係平價批貨outlet。所以並無試用裝，所有嘢都係封晒口，所以如果你完全唔知道自己想要乜嘢，最好都係先上網蒐集資料，好過去到現場靠估。因為同專門店唔同，呢啲地方嘅產品係唔準打開。如果想先了解各種產品嘅功效、質地、包裝情況等等，都係先去上網，會得到更加多嘅資料。
貼士二：上網訂購，確保你買到你要嘅產品
呢類型嘅鋪頭面積都好細，感覺似係一個類似發貨點、自行提取貨品嘅地方，加埋有少少零售咁樣。通常面積都唔會超過200尺！
係咁細嘅空間裏面，冇可能會有晒全部嘅貨品。所以喺網上見到有你想要嘅產品發售，都唔好以為每一個零售點都會有存貨！基於貨源嘅安排，最好去之前都先打個電話問下，又或者直情上SalalaBeauty、Aroma Natural天麗網購買，確保一定有。
貼士三：留意到期日期
SalalaBeauty、Aroma Natural天麗嘅產品，都唔會特別賣過期貨呃人。但由於佢真係以平價取勝，就唔會好似專門店咁樣有人定期檢查有效日期。所以檢查有效日期嘅責任都係消費者身上。我自己喺呢度去批發鋪頭嘅個人購物經歷，都發覺佢的確係真貨，只要你小心檢查到期日期，唔係太近，就可以直接購買。
平價中伏雷品分享
買到平價護膚品係好，但係千祈唔好將貨就價，變相令自己用一啲價錢平但係冇乜好用嘅產品。
中伏：彩豐行系列
一提起平價護膚品，好多人會自動諗起彩豐行，無錯佢係平價，但唔算好用。所以我唔推薦。我之前講過，隨著我對於皮膚學、醫學美容嘅認識增加，我唔會再去彩豐行買嘢，太多添加色素、Paraben、SLS，容易令人造成敏感！
中伏：L'oreal Revitalift系列
喺我心目中，佢只係平價護膚品，唔算係平價好用護膚品。呢個只係個人意見，唔知點解我唔差唔多每次買L'Oreal Revitalift嘅產品，都係中伏，永遠都造成敏感、面紅、甩皮情況！係我個人嘅使用經歷當中，L'oreal真係認真麻麻。我明白到好多時候係個人因素，但係我亦都明白，唔止得我一個人容易皮膚敏感，所以真係要好小心。
平價好用天然護膚品
講開平價又好用嘅護膚品推薦，就不得不提起天然材料。
好多天然嘅物質，例如綠茶、茶樹油、橄欖油、海鹽、維他命C補充品……都會對美肌有好大幫助，價錢都非常之抵用，一啲都唔貴。呢啲係瞬間提升幸福感同美容效果嘅優質產品！
綠茶： 綠茶本身具有抗氧化作用，無論係飲用、定係用嚟開水洗面，做綠茶面膜，都可以令到肌膚抗衰老。
我有時會用一啲日本東洋風格嘅瓷器，沖一杯綠茶。
用綠茶製造面膜，用嚟洗下面，都會有好清爽嘅感覺。價錢真係唔貴，任何一啲綠茶嘅茶包，只要係用純正嘅綠茶，就可以用嚟洗做面膜。如果你係特別要求高，亦都可以用抹茶粉。
海鹽：好多人唔知道，海鹽對於身體減壓有好好嘅幫助。好耐以前歐洲人識得利用海水嘅天然礦物質養分，平衡身心。天然嘅鹽具有礦物成份，可以幫助你舒緩心靈同埋身體嘅壓力。而且個好處係基本上每個超級市場都有得買，價錢都好平。如果你屋企有浴缸，沖涼嘅時候，不妨加一啲新天然嘅海鹽，同埋少少香薰精油（可自由配搭，玫瑰、茉莉、薰衣草、尤加利、青檸、甜橙…… ）。有時，我仲會購買或者收拾一啲花朵，係浴缸裏面加入花瓣同奶！因為有啲幾種材料，就會做到天然礦物質溫泉嘅效果。就算幾忙喺屋企，都有一種去旅行做Spa嘅美好感覺。
瘦身美體
