【醫學美容】【黑店】提防中伏!香港旺角美容院及化妝品店評論與及最新黑店名 單!

6月 09, 2016

香港嘅旺角區,對於一啲鍾意扮靚、美容嘅人士來講,真係一個天堂。因為作為亞洲美容城市,香港嘅旺角真係係亞洲三甲之內,有好多唔同品牌嘅美容產品同埋美容服務,如果講集中程度來講,喺香港都算係數一數二!香港旺角區美容院有獨特嘅特色,亦都有唔少facial手勢好,價錢合理嘅樓上中小型美容院同埋韓國水貨護膚品店,但同時,因為佢係一個好多遊客嘅區域,亦都有唔少黑店美容院,同埋售賣假貨嘅網店實體店嘅存在,令到唔熟悉呢區消費生態、又或者初次嚟呢個區嘅消費者中伏。



旺角區美容行業及美容院最新狀況

如果識得選擇,旺角的確有好多美容用品專門店。佢哋包括:

彌敦道一帶藥妝旗艦店,個人護理用品店
旺角區彌敦道有好大嘅個人藥妝店屈臣氏,同埋萬寧,基本上香港要買嘅藥妝產品、護膚品、一次過都可以喺嗰度買到。卓悅、莎莎、卡萊美亦提供海量嘅美容產品。

朗豪坊Beauty Avenue、朗豪坊辦公大樓醫學美容大樓、雅蘭中心
旺角地標商場朗豪坊,係旺角區內售賣比較高檔產品嘅地方,當中嘅Beauty Avenue,就包含咗世界各地嘅美容美妝品牌,無論售賣護膚、美容小家電,都應有盡有。而朗豪坊辦公大樓,就係九龍區來比較高檔嘅美容苑、醫學美容中心集中地。包含咗醫學美容品牌包括Dr Reborn,Perfect Medical(又名必瘦站),同埋膠原自生中心Reneex、脫毛中心Dermes同Medilase。1街之隔嘅雅蘭中心, 13樓全層定係醫學美容、脫毛中心所在,包括銀座Calla。


(位於旺角朗豪坊內嘅Beauty Avenue)




(一街之隔嘅雅蘭中心亦係美容店同美容脫毛中心嘅所在地)

醫學美容小家電專賣店、家電連鎖店
如果你鍾意醫學美容嘅小家電,呢度有一帶嘅百老匯有專門嘅樓層售賣Ya-Man、Hitachi美容儀器,MK亦都係有非常著名Tripollar嘅fitboxx。

大眼Con、韓妝專門店
如果你鍾意可愛MK路線,亦會搵到一啲旺角味道相當濃厚嘅網購小店實體舖例如Sweetymagic。百寶利商業中心、好景商業中心嘅樓上鋪都有一啲比較罕見來自台灣、韓國、泰國嘅美容美妝產品。以超平價美容產品、護膚品聞名嘅彩豐行,亦都係旺角嘅栢裕商業中心有旗艦店。

小型美容院
旺角彌敦道一帶嘅商業大廈,都有好多家庭式,員工人數十人之內嘅美容院。

根據個人經驗,旺角美容院真係美容黑店嘅重災區。如果你係初次到旺角考慮美容試做,又或正考慮旺角嘅美容院開course,你就一定要留心以下嘅資料。


提防旺角美容黑店:美容院篇

旺角嘅美容院主要分為兩大類:第一類,就係由大集團經營,主要經營高端醫學美容服務嘅連鎖店;第二類,就係家庭式經營,主要提供一啲無需要醫生主場都可以提供嘅半醫學美容服務,多數位於樓上鋪中小型嘅地方。兩類都各有正當經營,亦有黑店。

第一類,大集團美容連鎖店,又叫做美容劈場,就係超高壓銷售嘅代表。當中嘅例子包括Dr Reborn、Perfect Medical(必瘦站)、Neo Derm系嘅Reneex同Dermes。通常價錢都好貴,療程都萬萬聲起跳,如果去得呢啲地方試做,都要有心理準備,購買數千至數萬元嘅療程。由於佣金可觀,呢類美容院嘅顧問都會非常落力跑數。


(朗豪坊辦公大樓有多間醫學美容中心,包括由明星代言嘅Dr Reborn)

一般美容大場嘅sales ,每個月都有銷售目標,平均十萬到幾十萬左右。相比家庭式嘅中小型美容院,劈場嘅銷售壓力一定會比較大。

雖然佢係一間上市公司,但係Perfect Medical必瘦站嘅聲譽認真麻麻,經常有人投訴係黑店。香港嘅執法機構亦都曾經對於必瘦站採取行動,喺2015年,海關就就住不良銷售手法,拘捕左必瘦站嘅美容總監、區域總監、同埋治療師。海關以違反商品說明條例拘捕以上人士。

必瘦站 / Perfect Shape嘅銷售手法,好多時係由cold call做起,通常會用各種名義邀請市民去用較低嘅價錢試做facial,上左去之後就會瘋狂sell。你最後會幫襯幾多,用幾多錢,就各安天命。

值得注意嘅係,必瘦站係一間上市公司,所以帳目、收入等等其實都一目了然。其中一點好值得注意,就係必瘦站嘅收入來源,好多時係來自顧客買咗但無法係指定限期裏面用完嘅美容套票同埋預繳!所涉及嘅數係數以千萬計!如果你唔想你嘅辛苦錢變為因為無法及時使用而變成商家利潤,就要自己考慮大額預繳係咪適合你。

Neo Derm系列嘅Dermes同Reenex,普遍共識都認為價錢偏貴,但係都叫做有貨交,而且環境算係六星級,除咗價錢有點貴之外,療程效果一般都叫做可以。

Neo Derm Dermes同Reenex都有個特點,就會係網上做好多直銷,要求有興趣了解顧客係網站登記個人資料,然後有顧問會打電話預約時間,為客人「免費試做」並提供「禮物」(多數為公司代理嘅Bioderma卸妝水)。當然,你上左去之後,就會發現其實所謂嘅免費試做,亦都會同時sell你參加幾千到幾萬蚊嘅療程。

呢種大場嘅好處,就係價錢雖然貴,但係無論醫療美容服務、環境、療程機器都比較有保證。一般係呢類大場都唔會出現假機嘅問題。而且,呢度都有明星代言,如果你追求虛榮嘅話,大場都有佢可取嘅地方。

第二類,就係中小型嘅美容院,多數位於樓上嘅位置。呢個係美容院亦都係最良莠不齊,我見過好好,亦都見過好差!

多數香港小型嘅美容院,都會利用易拉架去宣傳,登打士街、彌敦道一帶地下道有好多美容中心、按摩中心嘅易拉架。同時一啲比較進取嘅,就會搵「問卷調查員」企街,要求行人做問卷調查,一般人不疑有詐,就會做問卷,之後講講下又會俾人sell咗上去買做facial。

有啲小型嘅美容院,喺旺角屹立左好多年,雖然裝修方面其貌不揚,但因為服務好,而且Facial效果有效,價錢都相當抵,性價比係可以好高!

去香港旺區嘅美容院,特別係旺角美容院,有幾點要提防。

第一,就係美容院「試做」被狂sell,贏粒糖輸間廠

旺角嘅美容院,無論係中小型家庭式嘅美容院,定係大集團上市嘅連鎖店,都有個習慣,就係鍾意疲勞轟炸,不停喺做facial嘅時候sell你去購買額外嘅嘅服務同埋療程。如果你自己本身唔諗住洗錢,我就會奉勸你為自己時間、心情着想,咪鬼去團購、試做等等,因為呢類係團購、試做、攞免費贈品,最後個結果都一樣,就係會俾人狂sell,一係你最後讓步,用幾千蚊買唔係好好用嘅療程;一係你企硬,一蚊都唔會再加,用試做價做完就算,但係對方亦唔會有好面色睇。人哋打開門做生意,都冇理由蝕本俾你,如果你抱住搵着數嘅心態周圍去美容院試做,搞搞震冇幫襯,難免會比人哋店家黑口黑面。

如果你只係諗住你蒐集下資料,比較下唔同療程嘅效果同價錢嘅話,我就會叫你首先喺屋企上網研究下就算。除非你有鋼鐵一般嘅意志,同埋絕對唔會耳仔軟,你去到旺角嘅美容院,面對着戰鬥力非常強大嘅sales,不論規模大小,基本上俾人hard sell,唔跌錢走唔到嘅機會係百分之九十以上。

當然,如果你本身都對療程係有興趣,試做嘅目標真係想測試一下服務水平係咪同廣告一樣嘅話,咁當然係另作別論啦。

第二,黑心美容院劣質大陸貨扮貴價外國貨

香港嘅美容院,尤其旺角嘅小型美容院,都有一個非常差嘅陋習,就係利用市民嘅無知,用劣質低價嘅大陸貨,冒充高價貨。

隨着香港女性嘅醫學美容知識增加,好多人都識得網上搜集資料,甚至去搵一啲藥廠、醫療行業嘅報告閱讀判斷,對於產品來源、成分、安全、敏感指數等等,好多人都亦有越來越多嘅理解同埋認識。但係仍然有一部份顧客,會抱着一種人哋講乜就信乜嘅心態去美容院。呢類人就係一啲黑心美容院嘅對象,佢哋會用一啲來自大陸嘅低價美容產品,包括左幾十蚊一大樽的洗面奶、淘寶大陸山寨面膜、不知名美容機,去提供服務。呢啲地方連用嘅美容儀器都係特別差,包括左假機同山寨RF。質素差都算,最唔抵得嘅事,竟然有啲人會用呢啲大陸做嘅劣質產品,冒充外國嘅高級貨,甚至有啲會明知一啲代理賣嘅所謂瑞士護膚品,其實源自大陸,但係都會照樣推銷比客人。

我嘅建議係,參加療程前先問清楚,我用邊隻品牌嘅產品,如果品牌未聽過,就要作出研究或者問下其他人先。

一般要求比較高有出得起錢嘅顧客,通常都會比較腌尖,去得比較貴嘅酒店美容Spa ,都識得問長問短,對於礦物油、防腐劑、美容品牌背景等等,都會做多少少了解,但係有一啲顧客,可能係學生或者上咗年紀唔太識英文嘅顧客,冇咁高要求,就成為左不法商人嘅目標。

一啲旺角嘅樓上美容院,就算係使用一啲充滿人造色素、酒精、基本上冇乜有用活性成份嘅所謂洗面奶同面膜,基本上做完facial皮膚冇敏感就已經好好彩!

根據多年嘅中伏經驗,我已經懂得問一個問題:呢個Facial嘅療程會用乜嘢產品?產品嘅有效成分係乜嘢?然後在自行上網研究,得到滿意結果就會去,如果連咁簡單嘅問題職員都答唔到,就一定唔會參加。

你去旺角嘅美容院之前,就一定要先了解清楚,佢哋用嘅產品來源係乜嘢,最好自己上網做少少資料蒐集,尤其是如果美容院本身經常標榜一啲你根本冇聽過嘅牌子,而牌子又唔係一啲大嘅商場會賣嘅牌子,你就真係要自己醒目。無錯,有啲牌子係只供貨專業美容院,不作零售,但係大型酒店同埋比較可靠嘅高級美容中心,都會用一啲聲譽良好兼且價錢出名貴嘅美容產品,包括Valmont、Thalgo、Elemis等等。

第三,美容院治療師缺乏醫學美容知識

旺角區係醫學美容樓上舖嘅集中地,好多醫學美容中心,都有提供HIFU、hydrafacial、RF射頻、Fraxel之類嘅半醫學美容服務。( 呢類半醫學美容、非入侵性嘅醫學美容步驟,現時無需要醫生操作,亦不需要受到醫委會監管)。

一啲好似高能量聚焦拉皮,同埋RF射頻,又或者係醫學煥膚chemical peeling,始終都會有灼傷嘅危險,實在適宜一啲經過專業訓練嘅人士使用。樓上店美容係咪最好嘅地方,就要諗清楚。

第四,美容黑店倒閉,療程預繳完全血本無歸

我會提醒你,如果你要開美容或美體療程,就唔好一次俾太多現金。因為美容院收咗錢之後倒閉、頂手,事件屢見不鮮,我個人都親身經歷過!就算好似一啲大型嘅連鎖修身專門店California fitness,都可以突然間話執笠就執笠!

如果你考慮一啲旺角樓上鋪嘅美容院,
作為一個美容專家,我俾一個貼士你,你決定係唔係真係碌卡購買成千上萬嘅美容療程之前,你應該是用兩三分鐘時間,做個最快嘅背景調查。要做嘅嘢好簡單,就係問美容院負責人或經理攞個電話號碼,最好係手機號碼(你可以推説方便將來WhatsApp聯絡),將間美容院嘅電話號碼,放入Google搜尋一下,因為好多正準備頂手、頂讓、摺埋嘅美容苑,東主負責人都會同時登頂讓廣告,如果你見到同一個電話號碼,喺一啲美容地產頂讓嘅網站出現,你就要加倍小心,因為好可能你買療程嘅錢一去不返。

為咗避免呢個情況,我會建議你以$5000作為界線,喺任何一間嘅預繳,最好唔好超過$5000以上。咁樣可以保障你自己,就算有咩問題都係有只蝕位。


提防旺角美容黑店:水貨化妝品與網店篇

除咗呢幾年網球越來越流行,好多網上知名嘅網店都紛紛係旺角設立實體店,好似專門售賣大眼Con、水貨化妝護膚品嘅Sweetymagic,就喺旺角設立左「銀行中心」與及「百寶利商業中心」兩個售賣點。Sweetymagic有好高嘅人氣,但係近年來深受出售假貨、冒牌貨黑店傳聞嘅困擾。

至於Sweetymagic係咪售賣假貨,係咪黑店,我從來都冇檢查過全部貨物,所以好難一口咬定佢係唔係黑店,咁樣對佢都唔公道。我嘅個人經驗,sweetymagic係唔係黑店我唔知,但有一樣野我可以肯定,就係佢都幾混亂。

Sweetymagic同其他美容中小企業一樣,都有一啲經營上嘅小問題,包括左店員訓練不足,服務態度有時欠佳,又或者忘記客人嘅order,取貨日仍然冇貨交等等嘅問題。我就曾經試過,係嗰度訂咗color con,點樣要求先付款我亦同意,到一早約咗攞貨嘅日子,竟然發覺完全無咗件事,同一個店員完全好似冇發生過一樣!要我第三次返去,先至攞得返之前俾咗錢嘅貨。

百寶利商業中心同埋好景商業中心嘅樓上鋪,都有賣一啲比較罕見嘅韓國、日本、泰國化妝品。

呢類型樓上店嘅問題,唔淨只係有害群之馬售賣假貨,就算係真貨,佢哋都係不知名嘅牌子,當中嘅成份、安全性、廠商背景等等,都未必有一般大型連鎖店上架要求咁嚴格,都知好多大場唔會賣嘅嘢,都可以通過呢啲樓上店流出市面。

有興趣嘗試做全新韓國美國機,各種V面、美肌、逆齡療程嘅朋友,可以直接以試用價到Reju Beauty登記。個人較推「韓國膠原激活童顏術」,效果媲美萬元貴價療程,$688限時優惠(原價$1088)



0 意見

Counter

Flickr Images