2月 2017 - OneCaratBeauty【香港美容KOL】

OneCaratBeauty【香港美容KOL】

香港免費醫美教學平台

Hot

Post Top Ad

【免費資詢體驗】


REJU 瑞士年輕科學,正版熱光溶脂,高效健康醫美產品

⇨網站:http://www.reju.hk
⇨Whatsapp免費資詢了解:https://wa.link/yrp6bg


2017年2月10日 星期五

【微旅行】香港小韓國「金巴利道」「金巴利街」攻略最新版,享受韓式平民生活 樂趣

2月 10, 2017


香港有個地方,可以滿足到你對韓劇、韓國式生活嘅嚮往。喺呢度,有出售正宗韓國市民日常生活用品。雜貨鋪裏面,你會聽到韓劇主題曲、kpop流行音樂、買得到韓文即食麵,而街上,亦會彌漫住住家韓國料理味道。甚至,有真正嘅韓國Oppa出沒。呢度,係位於香港尖沙咀,有小韓國之稱嘅「金巴利道」、「金巴利街」。


來到香港小韓國,滿足你對韓國與朝鮮文化的好奇

香港人同韓國嘅關係,從來都係感性多於理性。

如果純粹以科學角度去講,香港人實在冇特別好理性嘅原因,要特別去了解韓國呢個國家。一般香港人對於韓國文化嘅喜愛同追求,係來自一套又一套令人難忘嘅韓劇同男神Oppa。

相比歷史悠久嘅歐洲貴族文化,韓國文化顯得比較近代而且淺薄。相比起劇力萬鈞爆炸力強嘅美國荷里活電影,同挑戰自己嘅英國偵探劇,韓劇有一種顯淺易明,卻溫柔深刻嘅可愛情感。

韓國係一個近期冒起嘅傳奇。直至90年代中期,韓國仍然係被認為係一個老土、落後嘅地方。十幾年之間,就變成為一個亞洲流行文化領袖。

如果,你睇咗咁多韓劇,聽過咁多kpop,曾經被韓國獨特嘅文化感動過,想更加深入咁了解韓國呢個地方,就一定要嚟到尖沙咀「小韓國」。如果中環係殖民地文化嘅精英集中地,經濟金融掛帥,尖沙咀金巴利街就係韓國僑民喺香港嘅聚居之處,洋溢着小日子的幸福。

香港嘅小韓國,提供左一個真正3D嘅韓風體驗。除咗視覺同音樂,仲會有朝鮮家鄉嘅味道。

真正了解韓國文化,除咗表面嘅光鮮、歌舞、網上粉絲團之外,韓國人日常生活嘅飲食文化、生活習慣,都能夠給你更加多嘅見解。

除咗韓國明星廣告之外,喺呢度你可以接觸到「真正地道韓國人」料理嘅味道,購買真正來自韓國嘅生活日用品,甚至參加由韓國人開設嘅美容攝影中心嘅獨特美容攝影服務。

如果你真係好鍾意睇韓劇,我會建議你去一次香港嘅金巴利道。呢度,係真正韓國僑民會去嘅地方。呢一個神奇嘅地方,會有同正宗韓國文化某種形式嘅精神連結。

比起係屋企上網睇韓劇、韓星演唱會,步行韓國街,係比較有深度嘅韓國文化旅程。

喺金巴利街,你有機會同香港居住嘅韓國人交流,滿足你對韓國文化嘅好奇心同埋嚮往。

嚟到金巴利街嘅小韓國,你先會發現,原來真正嘅韓國料理,應該係咁嘅嘅樣。泡菜、紫菜包飯、啤酒炸雞,喚起你對首爾呢個既熟悉,又陌生嘅城市,無盡嘅想像。


(宋仲基、朴寶劍近期人氣爆燈,帶動位於香港尖沙咀,主要係韓國僑民經營嘅韓國街餐廳、韓國雜貨店生意激增)


香港小韓國:金巴利道、金巴利街全攻略

位於尖沙咀的金巴利道同金巴利街,係兩條相連嘅道路。距離香港地標建築The One只有幾分鐘路程,搭車去尖沙咀港鐵站「金巴利街」出口就可以輕易搵到。呢兩條街唔長,亦都唔係特別多鋪頭,但係佢就包含咗好多由真正韓國人開嘅餐廳同雜貨店。

首先要提醒大家,「韓國街」最佳遊覽時間係星期五、星期六。金巴利街小韓國嘅鋪頭,大部份星期日都會休息!一定要注意。

有啲人會用「韓人街」形容香港嘅韓國人聚居嘅金巴利道。但相比起外國嘅唐人街,香港嘅金巴利道明顯比較乾淨,比較安全。香港嘅小韓國其實冇外國China Town咁喧鬧,亦都唔會周圍紅燈籠、金龍金鳳嘅種族定型,反而有種自成一角嘅安靜氣氛。



(香港金巴利道、金巴利街有非常多的韓國食肆,由韓國人經營)

好多人,都有聽講過香港嘅金巴利道同金巴利街,係香港韓國人居住嘅地方,亦都有好多韓國當地食物用品出售。就會幻想,會唔會好似明洞、新沙洞一樣有好多青少年出入,咁潮?

其實,香港嘅金巴利道同金巴利街,唔係一個韓國嘅潮流中心。反而,佢似韓國嘅住宅小區,即係普通日常生活市民出入嘅地方,遠遠多過韓國首爾最流行嘅潮流中心。喺呢度,你搵唔到高科技手機、豪華化妝品,反而,你可以感受一下真正韓國嘅平民生活。

係一個安靜嘅下午,漫步小韓國,感覺有如首爾住宅區一個慵懶嘅午後。韓國電視綜藝節目同同韓劇OST音樂,喺雜貨鋪響起。雜貨店店員,會同老闆用韓文交談,就好似韓劇「請回答1988」嘅日常生活場景。

好似韓劇一樣嘅平民小生活,最平凡,卻最幸福嘅韓國生活體會。



(韓國雜貨店由韓國人經營,是香港居住的韓國僑民。出售的貨品真的是韓國本地口味為主,絕對百分百地道! )



(出售的貨品雜貨,和韓國小區的便利店差不多)



(這裏的店員都是韓國人,懂得講中文,但母語就一定是韓文)



 (金巴利街的「新世界泡菜專門店」非常有名,吸引很多居住於本港的韓國居民幫襯,出售的泡菜、紫菜包飯屬於家鄉的味道)




(新世界泡菜專門店)


香港小韓國金巴利道必去景點:新世界超級市場

居住於香港嘅韓國人,大部份都會認識「新世界超級市場」及「新世界泡菜專門店」,呢一間專門出售韓國食物嘅專門店。呢個專門出售韓國製造食物嘅超級市場,其實有好多分店於金巴利街。呢間超級市場非常之著名,但係好多人都唔記得個名,淨係叫做金巴利街韓國超市。佢哋出售有韓國嘅柚子茶、零食、泡菜、酒類飲品、餃子、韓國午餐肉、海鮮、真正韓國即食麵等等……基本上一個超級市場嘅有嘅嘢,佢全部都有出售!

下次,就唔需要比咁貴嘅郵費去網購!



(店員懂講中文)





鋪頭特別嘅地方,係佢有所出售嘅品種,遠遠超過香港任何一間連鎖超級市場出售嘅韓國貨品。

其實「新世界超級市場」同一條街,總共有幾間分店,所出售嘅貨品亦都有唔同。有啲係專賣海鮮、肉類食材,有啲係專賣冷凍食品同零食,有啲就淨係買便利店正式嘅雪糕、餅乾等等。所以你可以成條金巴利街行完一次,先決定去邊一間購買。當中有幾樣野我覺得可以值得推介俾大家。

大家去到韓國旅行嘅時候,都可能會見到一啲特色嘅食品同埋飲品,其實喺呢度都有出售。我就會特別推介:

香蕉牛奶:韓國國民飲品,高中學生經常飲用,可以幫助皮膚改善狀態!

人蔘雞湯包:韓國宮廷鮮食裏面,人蔘雞有非常之重要嘅地位。當地嘅名媛、貴婦一定定期食!人蔘喺韓國文化裏面,係滋補食療嘅一種,韓國人相信,喺必要嘅時候幫一個人迅速回復元氣。對於男性就有培元作用,對於女性亦都有改善面色作用。

人蔘雞本身係非常之滋補嘅食物,源自韓國宮廷。韓國人用錫紙袋密封包裝嘅人蔘雞湯飲品,裏面有雞肉同埋雞湯,藥材,經過烹調煮熟之後再密封包裝。非常之方便,只要將佢到出嚟加熱,就可以做到韓國宮廷鮮食嘅人蔘雞!依家簽到大概只係港幣$70、$80左右,足夠兩三個人食!所以係非常之超值。呢一類型嘅錫紙包裝人蔘雞湯,由韓國原地生產,嚟到金巴利街一定要購買。

魚漿串:去韓國街頭必食嘅小食魚漿串,喺呢度都有得售賣!魚漿串就好似香港嘅魚蛋一樣,係當地人之外小食之一,甚為具有韓國文化特色。基本上去過韓國嘅夜市,就一定食過呢個食物。如果對於佢嘅味道非常之懷念,好消息就係,呢度都有出售嘅雪藏版本,只要係屋企加熱,就可以即刻食。可以向店員查詢。

泡菜:對於真正喜愛韓國文化嘅人嚟講,就會知道,韓國嘅泡菜並唔係只係得一種。韓國嘅泡菜,基本上係成千上萬!已經幫你加入大嘅韓國超級市場,好似新世界超級市場,就有出售唔同嘅人嘅泡菜。

蟹肉:韓國料理裏面有好重要嘅一種,就係蟹肉嘅料理。呢度都有得出售。

韓國雪糕:香港好多地方都有售賣韓國嘅零食餅乾,但係韓國嘅雪糕就非常之少。金巴利街嘅新世界超級市場就有真正嘅韓國「樂天雪糕」出售,大家千祈唔好執輸!

韓國蒸餾水:來自釜山、長白山、濟州島。如果你想好似韓國人一樣咁fit,減肥必飲。

柚子茶:香港好多超級市場都有出售韓國柚子茶,但係呢度嘅品種比較多,亦都多係真正韓國生產嘅品牌,而唔係一啲台灣、大陸生產嘅品牌。

梨汁:韓國出產的雪梨汁

紫菜包飯:韓劇裏面都見到唔少人會食呢一種類似壽司嘅紫菜包飯。其實,響新世界超級市場都有出售呢一種當日即做嘅紫菜包飯,而且口味都好多選擇,有烤肉,芝士等等口味。價錢$40左右,非常抵食。




韓國即食麵、罐頭:基本上每一套韓劇都會有主角想食杯面嘅畫面。平日我就唔會建議大家食即食麵同罐頭,但係如果你真係好鍾意韓國嘅文化,就知道韓國即食麵罐頭係韓國飲食文化不可或缺既一部份。如果你真係好想食,你都可以買一兩包充滿特色,街上面一定搵唔到嘅韓國嘅即食麵。呢度嘅即食麵除咗市面上最常見嘅「辛」即食麵之外,仲有一啲特別版本,同埋韓國最著名嘅「不倒翁」系列即食罐頭同泡面。

以上嘅產品我響首爾旅遊嘅時候真係見過好多次,係韓國當地特產。估唔到香港都有得賣,而且價錢都唔算貴。


香港小韓國金巴利道必去景點:明洞Express 

整個金巴利街、金巴利道的韓國食肆,都彌漫香辣味道。就好似首爾嘅夜市一樣。

去尖沙咀金巴利街小韓國食飯,有兩種人。第一種,就係純粹尋找美食,滿足口腹之欲嘅食家。

第二種,就係對於韓國文化、劇集、歷史、音樂有認識嘅人。佢哋,除咗填飽個肚之外,更加有某種程度嘅心靈共鳴,想藉住韓國美食來感受韓國文化嘅情調。

啤酒炸雞、紫菜包飯,都不再只是餐單上嘅快餐,佢哋,係某種青春綺夢嘅投射。

位於金巴利街嘅韓國食肆真係好多好多,有好評亦都有劣食,成條街最平到最貴我都食過,根據個人經驗,性價比最高,質素最穩陣,整體衛生最好嘅,我推介俾你嘅就係呢一間「明洞Express」。

「明洞Express」係由韓國人主理同經營,十足朝鮮家鄉嘅味道!

呢間鋪頭嘅價錢唔貴,食物分量就非常之大,而且價錢非常之大眾化。其實食物嘅質素偏高,貼近市面上價錢貴嘅正規韓國食肆。講性價比,全條街都無人夠佢咁高!

呢度可以食得到人蔘雞,但係一般人如果想比較輕便一啲,就可以揀辣豬肉飯、燒雞肉飯、燒牛肉飯等等,保證水準好過一般商場嘅韓國燒烤店。








(好似快餐,但其實味道水準相當高)


香港小韓國金巴利街必去景點:Hankuk Hair

韓風同韓國流行文化有密不可分嘅關係。全亞洲嘅靚仔靚女,都以韓國look為目標。

位於韓國人集中嘅金巴利街,就有一間韓式salon。而且,仲有中英文服務!

Hankuk Hair呢間位於金巴利街,韓國風嘅剪髮鋪頭,有提供美容、美妝、頭皮水療服務,連韓國嘅婚紗攝影都可以幫你預約。佢係由韓國人打理,所以一定係以韓國人嘅審美眼光作為標準,絕對貼近韓國風格。如果你想成為韓國女神,為自己創造全新嘅造型,就可以考慮一下,下次剪髮嘅時候,嚟呢間鋪頭。Hankuk價錢方面佢都比較公開,剪髮都係$500左右,其實相當經濟。佢亦都有一啲專門嘅專業挑染、頭皮護理服務。

幾百蚊就可以變身成為韓國女神男神,其實都幾抵玩!

韓國風同MK只係一線之差,一個唔小心,就會即刻搞到不倫不類,Kpop 變成MK Pop。如果真係有心想嘗試韓妝,不妨直接去韓國人處理嘅鋪頭。


後記:韓國生活的理想與現實

出色嘅電視劇集,的確會影響觀眾口味。潛移默化,令到觀眾對於韓劇裏面嘅主角生活方式,產生興趣。而韓國政府甚至將出口韓劇作為經濟手段之一,藉着戲劇嘅受歡迎,去推廣本地經濟、產品、與文化,賺取外匯。

韓國文化熱潮興起,令到好多係金巴利道、金巴利街經營多年嘅韓國人都始料不及。

曾經有南韓教授批評過,睇韓劇嘅人,都係低智商、低學歷嘅人。教授認為,高智商高收入嘅人,普遍會鍾意睇美國、日本嘅劇集。

佢嘅理論根據,就係因為韓劇邏輯混亂薄弱。令到睇嘅人會越嚟越蠢。

其實佢所講嘅嘢唔係錯得晒。但重點係,「只」看韓劇嘅人而唔吸收其他新聞資訊、外交知識、金融財經嘅人,智商真係唔會高得去邊。

韓劇的確係情感豐富而理性缺乏。但係,就係呢一種盡情嘅情感宣洩,令到韓國劇集橫掃亞洲。佢哋唔知道,香港已經夠晒現實,夠晒理性,市民需要嘅,有時係一種感情與感性嘅發洩。韓劇,就提供一個極之需要嘅感情出口。

係香港呢個高度商業化,講求效率速度嘅社會,需要高智商才可以生存(理性)。韓國劇集着重感情(感性),令到忙碌到接近忘情嘅香港人有機會,對人生,對於青春,對於愛情,有幻想嘅空間。

我們曾經渴望過卻得不到的,或者錯過了的,劇集的主角幫我們完成當年未了的心願。

漫步尖沙咀金巴利街,實在令人想到我們曾經有過的青春歲月,及這些年來,曾經不眠不休追看過的青春劇。你會輕輕說聲:나는 당신을 사랑합니다(I love you)。


打開內容

【微旅行】韓國首爾自由行,景點推介攻略(香港人新手必看,Seoul Part 1)

2月 10, 2017
「you are my everything~」太陽的後裔主題曲,可能你都識唱,亦都勾起你對於愛情的無盡期待同想像!「藍海傳說」的許俊宰、沈清,「繼承者們」的金嘆與車恩尚,和「來自星星的你」都教授的超能力,燃亮過你煲劇的晚上。韓劇和Kpop,暖男Oppa令你對於韓國首爾這個城市好好奇。


(來到韓國首爾自由行,到處都可以見到韓星的廣告)

如果你都有興趣去首爾自由行,就要留意這個實地考察介紹!這個韓國首爾實地考察,亦是慶祝本網站Onecaratbeauty人氣次數過1,000,000,特地編寫第一次的旅遊特輯!


專為香港靚人編寫的韓國首爾自由行攻略

一個周末,去韓國首爾自由行,到三清洞的咖啡室喝茶。像全智賢、宋仲基一樣光鮮地出現,下午,到新沙洞名店街,搜羅最新護膚品,試穿韓國特色小店的獨家衣服。黃昏,到明洞的食肆,品嚐看過好多次未食過的真正地到啤酒炸雞。首爾靚人自由行,就是應該這樣!

去韓國自由行,就算唔識韓文,只要做好準備,其實不需要跟旅行團!真的,不要和不認識的阿叔阿嬸一齊逼車上。自己行,仲正!

Onecaratbeauty是時尚美容網站,當然我們的讀者群都是一堆靚人啦!由於網上大部份的韓國自由行攻略遊記,讀者群主要是一些家庭旅遊、或要求普通的讀者群,甚少專門針對高要求靚人的自由行攻略,今次自由行攻略,就是像我們這樣的貪靚人士為對象,重點介紹一些香港人真係有興趣的美人、減肥、明星景點。其他沉悶事情一律刪除!為了你有一個完美假期,這個介紹最適合閨蜜或二人世界旅行!

今次就會一次過介紹,機票,護照,酒店住宿,購物熱點黑點,其他要注意事項。

重點包括:
首爾自由行必買物品
如何像韓國明星一樣享受美顏、髮型服務
介紹某幾個韓劇重要場景,令你真心置身其中,重溫感受當中幸福
韓國食療養生之道揭秘,介紹必食的當地美食
最適合自拍、Cosplay的首爾景點
髮型屋初體驗記錄和貼士
可靠商品連鎖店推薦
增加旅程樂趣的小貼士
韓劇中的首爾和現實中的首爾分別
旅遊soundtrack推薦

不只吃喝玩樂買化妝品,而是將韓國文化精華,滋養了你人生。


前言:韓劇中的首爾,現實中的首爾

想去首爾的你,你愛首爾什麼?

對於韓劇粉絲來說,首爾是一個現實與虛構並存的城市。韓劇裏面的場景,韓國特色的商業街,咖啡室,北方的氣溫和風速,隱然散發着韓劇主角令人感動過的愛情和生命領悟。

在首爾鬧市走着走着,就會看到許多如同在韓劇中出現過的地方和場景。「藍海傳說」、「太陽的後裔」、「她很漂亮」、「來自星星的你」、「W兩個世界」「繼承者們」、「聽見你的聲音」、「韓國小姐」、「請回答系列」、「雲畫的月光」……

主角樣子印象,好像穿梭在街上。虛幻劇情,在這裏真實無比。

你嚮往的,是幸福人生。韓國化妝品、零食,其實香港都有出售,但你去韓國,係想成為韓劇主角,有那種不平凡的美好人生。

喜歡韓劇、喜歡去韓國自由行的人,終究都是幸福的人。因為他們的心中,還有對青春,對愛情,對生命有嚮往。不錯,受當地政府監管控制,被視為教育市民工具之一的韓劇,內容多數都是淺俗,簡單,善惡分明,努力不懈最終排除萬難。而結局多數有跡可尋。然而在這種大眾化的娛樂之中,你卻學識了生命中重要的課題:如何去愛,如何去珍惜活出自己的潛能,欣賞每一日生活中的美好。

你們遠道來到首爾,其實是追求劇集裏面,有笑有涙卻始終正面的人生態度,那種鍥而不捨,和那苦盡甘來的希望。

首爾是一個夢想、激發進步的城市。

首爾這個城市,包含的你們的嚮往和想像。咖啡室和學校會不會找到一個像李敏鎬的男朋友?在醫院、辦公室會不會找到像玄彬這樣的男人?你們的人生,又不會像韓劇那樣,在無數的誤會、不確定、疑惑之後,最終都會苦盡甘來?

踏進這個城市前,就一齊了解基本功夫吧!


韓國首爾自由行準備:最基本資料

每個人的審美標準不同,我是以香港比較四正,時尚,乾淨,比較貪靚的人的角度去評論韓國首爾自由行。

首爾是一個歷史與現代並存的城市,手機互聯網發展極為蓬勃,同時亦保留了大量舊式韓國朝鮮歷史建築物。當地人的文化,亦深受傳統儒家思想影響。韓國人受儒家思想影響的程度比經歷多年英國殖民洗禮的香港香港人更什。和香港比較,其實比較保守,普遍市民的質素中上,雖然說話直接剛烈,但算是比較有禮貌、整潔的亞洲城市。

近年韓風流行,韓國的影視、音樂影響力遍佈亞洲,韓國化妝產品亦衝出世界,去韓國旅遊自由行的觀光人數亦急速上升!但對於第一次去韓國首爾追夢的人來講,有幾點就一定要注意。

預算:去韓國首爾旅遊,四日三夜的價錢包括機票、酒店、飲食購物洗費,大概7000-$10000港幣就可以。如果你不介意着一些評價的旅館、三星酒店等等,價錢就一定比較便宜。

語言:去韓國首爾自由行的香港人要注意,當地人主要溝通都用韓文。英語水平和流行程度不高。韓國首爾市民及商店,普遍英語水準不高。反而用普通話可以溝通。一般的的士司機、酒店櫃位職員、售貨員、髮型師等等的英文程度,大概只有香港小學生或更低的水平。(不好意思這樣直接,是為了讓香港遊客有準確的認知及去旅行前準備)

去韓國首爾自由行一個要注意的地方,不要以為一些比較昂貴的酒店就一定會說英語,四五星級酒店的酒店服務員英語水平仍然屬於中下。溝通也有點詞不達意那種。當地人普遍只說韓文,但在旅遊區的服務人員,旁邊可以講幾句中文(普通話)。而當地亦有大量在韓國移民或留學的中國籍人士出任兼職,他們在旅遊區做大陸人生意,如果你可以講普通話,及簡單英語,並主要在旅遊區出沒,溝通就沒有問題。

市面消費價錢:根據聯合國資料顯示,韓國首爾人均收入和香港差不多,大概韓國購物的價錢和香港差不多,本地品牌護膚品是英美品牌大概七折左右。韓國對於外國入口的食物、消費品都徵收稅項,導致價錢比香港貴很多,所以一般市民的消費,也集中在韓國本地的牌子。你會發現首爾的品牌,和香港市面上見到的品牌大為不同。(整個首爾有沒有看到幾多間Fresh、Loccitane,連價錢中下的The Body Shop也沒有幾多)基本上在香港流行的日本、歐洲護膚品牌,在當地都沒有出售。當地鋪頭只出售韓國本地的產品和品牌:banila、Primera、Nature Republic。

外幣兌換:一般香港銀行都有兌換

天氣:韓國的天氣相比香港比較極端。冬天的時候肯定比香港更凍,會出現攝氏零下幾度的狀況。一定要先仔細留意天氣狀況。

衛生水準:去過韓國首爾自由行的旅客都講過,韓國的衛生情況可能有進步。韓國整體來講都是一個乾淨衛生的城市,和香港差不多,或者好少少。但某些市民仍然維持隨地吐痰的習慣。你會見到一些衣着光鮮的後生仔女,在街上隨地吐痰!

飲食:去韓國首爾自由行,就會開了你的眼界!好多人去到先知道,原來真正的韓式飲食,和香港人的理解完全不同。

和香港人在MK、TST、CWB一般見到的大魚大肉燒烤炸雞韓式食肆不同,韓國人的飲食其實頗為清淡。紫菜包飯、泡菜、白粥、拌飯等等,都是比較流行。反而一些大魚大肉的人蔘雞、韓式燒烤,其實比較不常見。在韓國,由於入口價錢問題,食肉是比較奢侈的一件事。

住宿:酒店、出租公寓、傳統韓屋、民宿。電壓220。其中一個首爾旅行特色,就是在住宿方面比其他亞洲城市更加多元化。一般自由行人士,除了可以租住酒店之外,在當地非常流行的就是高級出租公寓。

如果和朋友來首爾自由行,朋友不太熟的話,最好就租酒店。因為有管家、服務、打掃等等……出錯的機會較低。如果朋友比較熟,就可以考慮高級出租公寓。這裏有提供短租服務。

高級出租公寓和酒店的分別在於自由度更大,空間感更強。有別於一般酒店有管家服務,高級公寓本身就沒有管家,但更像一個高級的豪宅一樣,韓劇主角居住的地方。非常適合自拍video、體驗高級生活!

如果你的興趣是Cosplay 我就會建議住咗真正歷史價值甚高,完全將韓國古裝劇場景的「韓國村」。另外一個特色居住的場所就是韓國傳統建築「韓屋村」。這些歷史建築物改建而成的旅館,非常適合對古鐘韓劇有興趣的人士居住,親身感受韓劇裏面的場景。不用擔心,這些地方亦有現代化的沐浴、廁所設施。全部都經過翻新。

韓劇主角居住環境:
Theclassic500.com(紫陽洞)
Seoulloft.com(鍾路,明洞)
Theriverseoul.com(鍾路,明洞)
126mansion.com(三清洞)
Gangnamstay.con(江南)

古裝韓劇環境:
Kundaemunjip.com(三清洞)


韓國暖男Oppa,是真實現象,還是戲劇誇張?

靚仔,韓文叫做jal seng gyot da。你在韓劇中看到的韓國暖男,究竟在現實中存唔存在?

韓國仔,簡單一個字,正!

韓國首爾自由行,最重要的,就是之前的準備功夫。如果沒有做準備,很可能就會浪費很多時間在搵地圖、研究餐廳等等。這些行動就浪費了寶貴看Oppa、美容、購物、都主要景點散步、體驗韓劇風情的時間!

來到韓國不看和認識Oppa,浪費時間搭錯車,真是戇居到極!

韓國男性的靚仔比例其實不低,很多都高大,白淨,大隻。絕對比亞洲其他城市高!所以搞到這裏,到處都是賞心悅目的暖男!

當然如果用交友程式,這裏也有很多當地人使用。我自己就check過Tinder同Grindr,發現質素真是偏高!(純交友,不是約炮)所以,千萬不要豬西這樣才來到韓國首爾自由行!如果真的有心想認識新朋友,就要保持最佳狀態!


(韓國手機交友非常之流行,以旅程當中撞到一些質素高的仔仔機會也頗高)

總括來說,質素高的男性比例大概20%左右,但絕對有機會認識得到。


飛往韓國前的準備

飛行及入境準備:如果你知特區護照,是無需申請簽證的。但都要在飛機上填寫由服務員派發的入境表格。

所有從香港飛到韓國首爾,要填入境表。在飛機上會需要填妥入境表格,空中服務員會提供。

從香港出發到韓國首爾,飛機航程大概4小時左右,點到點的總行程時間,大概7小時左右。

除非你住在赤鱲角機場附近,否則公共交通到機場大概1小時,而韓國仁川機場到首爾市中心,車程大概1小時左右。如果包括海關出入境、寄存行李及提出行李的時間,其實加加埋埋香港市中心到首爾市中心,都要七個鐘!

首爾的機場有多單巴士可以直達市中心。亦有專門提供資料服務的巴士公司職員。請注意機場巴士的服務時間,晚上過了某個時間就可能停止服務。個非首爾多數都早機去,如果你選擇黃昏夜晚起飛的航班,一個不好彩如果你的飛機有延誤的話,可能去到就已經冇機場巴士。所以最好都係預約時間鬆一點。

韓國亦都有鐵路可以將遊客運到市中心。

肌膚準備:韓國的天氣比香港乾燥很多,如果你去到韓國會自拍的話,建議你出發前兩日,瘋狂用高濃度透明質酸的補水mask,這樣會幫助你的肌膚適應韓國非常乾燥的天氣。否則有可能爆拆,皮膚出現龜裂敏感情況。

一般建議在出發之前先下載有用的與及預先瀏覽旅遊網站,他們也有一些很好的旅程建議。

韓國首爾自由行旅遊網站和App

Visitseoul.net
Wow.seoul.go.kr
Visitkorea.or.kr
I Tour Seoul
Kakao Talk (通訊用)


首爾景點推介

香港是一個極端發達的城市,所以對於亞洲其他國家來講,可能首爾市的高樓大廈,本身沒有特別大的特色。(甚至香港維港兩岸的大廈更為澎湃)所以今次特別推介一些具有韓國特色的景點,值得大家一看。

今次就特別推介靚人必去景點,給品味要求高的你們。這些景點是排名不分先後。

始終靚人的要求,始終要求會高一點!和師奶、大叔旅行團要求有出入!

首爾塔:來自星星的你景點
新沙洞:高尚型格購物區
明洞:將旺角一樣的鬧市,適合旅客瘋狂購物
㢬大:獨特夜市文化
景福宮:歷史流光漫遊,可穿古裝拍攝
韓屋村:最適合自拍,cosplay


(明洞是韓國首爾自由行必去景點之一。)

我下一篇會詳細介紹韓國首爾自由行藥妝店必買的產品,今次這一篇就先講述基本資料。


韓國首爾自由行:韓劇Kpop體驗

韓國首爾自由行,如果你本身是kpop粉絲,可以預先去跳舞舞蹈中心約好課程。去跟真正的舞蹈藝員學跳舞,亦都係來到首爾自由行不可以不做的別去行程之一。簡單英語和姿勢可以溝通得到。其中一個最流行的就是Letzdance.co.kr

當然如果你是某韓國樂隊天團的粉絲,也可以從Thanks給那裏獲得資訊,自行安排出席音樂錄音活動。


韓國首爾自由行:汗蒸幕、浴場

其中一個韓國首爾自由行必去的景點,就是令人放鬆、泡熱水池、三溫暖的「汗蒸幕」。

汗蒸幕,屬於韓國特色,顧名思義就是熏蒸到出汗的場所。就像大陸的「大型休閑會所」類似這樣的三溫暖、按摩場所。最主要,是提供桑拿、蒸氣浴、休息室等等的設施。

汗蒸幕在香港基本上是沒有的。和香港的桑拿浴室不同,汗蒸幕比較適合一家大細前往,也不會有什麼奇奇怪怪的色情活動。是很健康的家庭活動地點。

香港人推薦來這裏一看,韓國首爾自由行,汗蒸幕是最能夠體驗韓式風格的設施場所之一。當地的汗蒸幕亦都有大量的活動空間,對比香港的美顏Spa更大更寬敞,雖然環境普遍都是比較家庭式,好處係自由自在。汗蒸幕供顧客飲食、睡覺、休息。除了浴池之外,亦有擦背去死皮,清潔身體的服務。

香港遊客要注意,韓國的汗蒸幕和大陸的休閑場所一樣,提供T恤短褲,但是去到公眾浴池,就是全裸進入的。如果怕同朋友一齊玉帛相見,就最好自己一個人去。

24小時營業,用感應咭記帳。

Sparex是當地比較著名的,值得推薦。同事好多都可以過夜,就在香港的按摩中心Spa可以講嘢一樣,加少少錢就可以入住。對於一些有興趣睇健康的生活,甚至節省一晚酒店費用的人來講,都是不錯的選擇!


韓國首爾自由行:韓國飲食療法
 
韓國長腿帥氣Oppa和女團的超正妖精們,其實吃什麼?

簡單來說,就是「拌飯」和養生食物。

真正體驗旅遊的樂趣,除了四處觀光之外,品嚐當地的特色美食,亦是了解當地文化最快速最直接的方法。韓國的料理,一向都比較着重養生的概念,如果你有留意韓國人,一般皮膚比較白淨,乾淨,高挑,同當地飲食不無關係。如果有機會去到韓國自由行,就一定要把握機會,多食當地的食物!

初次到韓國首爾自由行的香港人,會發現當地的飲食比較清淡。和香港早上都早餐都多士、香腸、雞蛋、奶茶等等的高卡早餐不同,當地人的早餐是食米飯、泡菜、紫菜!對於一向習慣重口味的香港人可能要習慣一下比較清淡的飲食。

韓國文化着重食療。所謂的食療,就是二食同源的概念。保養身體最好的方法,他們認為食物有很大的功勞。千萬不要戇居居走去食KFC !首爾自由行,最重要就是體驗當地的美食。我會建議大家一定要是以下幾種:

豆腐湯、大醬湯、泡菜湯、韓式粉絲、蛋卷

這幾種韓國美食在大部份的韓國餐廳都有供應。來到韓國首爾自由行,就會明白為什麼韓國的男士和女士身材都是那麼健美!真是很少見到豬扒。

韓國和香港不同,食飯的時候是不會拿起飯碗。在韓國只有乞丐才會這樣做!所以不要做出令人尷尬的行為!食飯就一定要將個碗放在枱上。湯匙吃飯、筷子夾菜。

注意,韓國本身沒有公筷這個概念。如果一班人一齊食飯,大家就會直接用自己的餐具在餸菜夾來夾去,所以大家要先了解,不要大驚小怪。

如果想食得好一點,我就會建議韓式養生餸菜。這些美食,在比較高貴的韓國餐廳都有供應,人一世物一世,就不要錯過!以下這些都是當地的上流社會人士喜愛的食物。

我會建議你去嘗試:
銅盤烤肉、人蔘雞湯、韓式年糕、生八爪魚、醬螃蟹、長腳蟹。


(螃蟹係韓國都是當地的美食之一。韓國首爾自由行必食!)

另一個韓國人面色紅潤美白,身體狀況長期保持健康,令人都知道的秘密,就是他們飲植物製造的茶。

韓國美人最喜歡飲的茶包括:養生茶、柚子茶(Yooja cha)、五味子茶(oh mi Ja cha)、紅棗茶(dae chu cha)、薑茶(seng gang cha)、冷壓果汁(chak jeub ju seu)

這些飲品,一般韓國的便利店都有出售。任何自由行人士都可以很方便的買到。


韓國首爾自由行:網購

另一個要介紹給各位去韓國首爾自由行的小貼士,就是韓國網購網站。你可能會好好奇,已經來到首爾,仲買乜鬼嘢網購?其實,就是方便你哋!因為有時如果你係韓國見到一些漂亮的日用品、衣服、食物,但有太重不想拿回香港,就可以先記下型號。然後再到網上購買!除了香港人都熟悉的gmarket之外,還有以下幾個:

Cjmall
Interpark
Yes24
11st.co.kr


韓國首爾自由行:小食

韓國首爾自由行,不可以不做的,就是品嚐當地的街頭小食!當地的街頭小食就好像香港的魚蛋燒賣一樣,真是極具當地風格,外面食不到的!我想香港的餐廳都不是每一間都有供應!

以下幾樣,就是韓國自由行不可以不吃的幾種:

辣炒年糕、魚糕串、雞肉串、血腸、鯉魚餅、煎蔥餅

這幾款韓國街頭小食,基本上每個韓國夜市都有供應。不需要特別刻意尋找,只要在晚上的旅遊區出沒,就會見到。就像香港的魚蛋燒賣,很多地方都有供應一樣。

下一集我會和大家介紹一下韓國的扮靚心得。買什麼產品可以做到韓式小臉,什麼是名媛高貴(go gyu ha da),Amore Pacific Spa ,正官莊spa。以及介紹一下歷史中的韓國,自拍最佳景點:
五大皇宮(景福宮、昌德宮、德壽宮、昌慶宮、慶𤋮宮)



打開內容

2017年2月5日 星期日

【深夜聊天】7日極速減肥瘦身美白旺桃花的方法!用最佳狀態準備約會!

2月 05, 2017
好多桃花運好旺嘅人,都有佢成功吸引到人嘅地方。其實要催旺自己嘅桃花運,唔係咁難。尤其是係情人節佳節當前,就更加要做好準備,無論你戀愛中又好,等待幸福降臨又好,今日就同大家分享幾個戀愛運氣秘密,幫助你加強自己嘅「桃花運」之外,七日之內變靚變瘦!閃閃亮亮咁出現對象面前,用最佳勝利者狀態迎接呢一日!

 

 

 
(BigBang太陽同閔孝琳修成正果,恭喜恭喜)

情人節前最後衝刺

情人節都係一個重要嘅日子,自己有無花收,有冇特別節目,之後究竟去浪漫晚餐,定係孤家寡人,都好取決於之前嘅準備功夫!

無論你一個人又好,兩個人又好,有追求者又好,定係未知道又好,你都要爭取機會,要自己主動。能夠以最佳狀態出現,成功渡過一個難忘、有人溝或者令對方受溝嘅情人節,唔係靠幻想,而係靠計劃同行動!

幸福同埋戀愛嘅機會,有時會不知不覺之間降臨。千祈唔好以為一定要好後生好靚,先至有機會。亦都千祈唔好以為要成功溝女溝仔,要用好多錢。其實好睇你對象想要乜嘢。每個人都渴望被愛,今日教你嘅嘢就會增加你嘅機會。

今日分享下催旺桃花運嘅秘密小貼士,亦都分享下點樣可以用最靚、最佳狀態去渡過呢個情人節。希望大家今年都做讓人羨慕,大把人爭住溝嘅男神女神,而唔好做人地口中嘅「肥宅」、「毒L」、「豬扒」、「二手飯」!

今次教大家嘅催旺桃花方法,亦都會一步一步咁樣教你點樣可以係幾日之內,成功到達巔峰狀態,美白,纖瘦,容光煥發,充滿幸福氣場,準備迎接情人節!

情人節嗰日搞得掂,可以係你幸福一生嘅序幕!




(荷里活電影La La Land大收,令到大家好嚮往拍拖嘅甜蜜感覺)

一啲人緣極好,桃花勁旺嘅人,其實有佢嘅良好習慣,令到人際關係非常之旺盛。佢哋嘅秘密,今日就會同大家分享。

你對我哋咁好,我會繼續向你和妳傾注「希望」與「愛」!


增強桃花運方法:用口頭禪改變氣場

如果你想搵到一啲高質素嘅伴侶,都一定要留意,自己嘅口頭禪究竟係旺桃花定係唔旺桃花。

好多人每一日都係不停時候一啲負面嘅嘢。每一日嘅口頭禪,就係話自己或者批評其他人係剩女、剩男、冇人要、嫁唔出、冇錢等等。

如果你要增強你自己嘅桃花運,就唔可以再講呢啲負面嘅說話。

你知唔知道,口頭禪,可能影響你嘅桃花運!

拍拖又好,交朋友又好,其實好多人最怕,就係俾人拒絕。如果你平時講嘢嘅口頭禪,都係批評,負面,就正正代表你自己缺乏自信,亦都缺乏包容人哋嘅心。

今日開始,你講嘅口頭禪應該係:
「嘩好靚呀!」
「多謝你!呢個諗法都唔錯」
「多謝你嘅邀請!」
「我想了解更加多,講比我知」
「無所謂啊,同你一齊就夠啦!」
「你放心,有我」
「真係好叻」
「同你一齊好開心」

好多男神女神都知道一個秘密。桃花旺好運嘅人都知道,佢哋嘅秘密,除咗樣貌見得人之外,最重要就係俾人一種「接納」嘅感覺。

你留意吓你身邊桃花運比較強勁嘅朋友,佢哋都會散發出一種容易接立別人,唔會隨便拒絕別人嘅氣場。如果你想同返我好似佢哋咁旺盛,你就要學識好似佢哋咁樣,個心裏面講:

「我可能跟你交往」
「雖然你唔係完美,我未必一定會拒絕你」
「你有機會」
「只要你再做多一步,我就會同你發展」

有時呢啲野你鍾意講出口又得,唔講又得。只要你對住適當嘅對象,你個心不停諗住以上呢幾句,就會散發出一種邀請人哋你了解你嘅甜蜜氣場。


增強桃花運方法:用手機寫下夢想

好多人成日都話,好羨慕人哋可以拍拖,或者搵到一啲高質素嘅伴侶。但係當你問佢,點解你唔去做一啲野,主動去認識多啲人呢?佢就會好多藉口,個冇時間,朋友圈子唔啱,好攰等等等等。如果你真係有心想催旺自己嘅桃花運,我就會勸你,用你嘅手機寫低你嘅夢想,例如話,我想搵一個男朋友係有以下嘅條件。然之後每日都睇一次!

唔好睇小寫低呢一個動作。佢會幫你由「幻想」,變成「計劃」!即係手機裏面非常之方便,得閑攞出黎睇下,就會增加你嘅專注重心,亦都令到你更加主動去認識唔同嘅人,唔會成日留係屋企。


增強自己桃花運方法:每朝肯定自己,講10次正面自我肯定嘅說話

如果你有啲經常有拖拍,好容易識到異性(或者同性,睇下你嘅性取向係點)嘅人,你都會發現佢哋嘅自信心係好夠。並唔會係人地面前因為缺乏自信而口啞啞或者做出一啲奇怪嘅異常舉動,所以你自己都要每日提升自己嘅自信心。其中一個方法,就係每日都起身嘅時候對住快鏡講10次以下嘅說話。

「我係高富帥,瘦白甜,我會注意自己飲食,要纖瘦同靚,唔做豬扒!」

「我努力工作,並且做喜歡嘅工作」

「我嘅收入超過某個數目」

「我係特別嘅人,所以要愛惜自己,所有對身體無益嘅嘢,包括藥物同垃圾食物,我唔會掂。」

如果佢持之以恆,朝早起身嘅時候,都要返嘅諗10次以上嘅對話,你就會每朝都記得自己其實想要乜嘢,然之後每一次實咁樣執行!自信心亦都會每日隨之而增加!


增強桃花運方法:執房

講起增強桃花運,好多人只係諗起點樣去打扮自己。好少人會諗到清理房間,都係催旺桃花旺嘅方法之一!

你睇下啲桃花運旺嘅人,通常,都係好識打理自己生活嘅人!

想加強自己嘅桃花運,你嘅當務之急,係打掃!

如果你依家仲係所謂嘅宅男、剩女,就要檢查一下自己嘅房間係咪清潔。好多毒男、剩女、豬西間房都係非常之污糟邋遢,點解呢?因為佢哋覺得拍拖嘅機會好渺茫, 所以連房都費事執!

但係你咁樣嘅狀態,點會吸引到一啲高質素嘅人呢?你自己都未準備好,唔可以奢望別人出現!

我睇咗啲大陸dating節目,有一句說話,我覺得好啱用:「你若盛開,蝴蝶自來!」

要真正加強自己嘅桃花運,就要令到佢嘅房間隨時都乾淨,整潔,魅力,即使有人客隨時光臨,你自己都有好好嘅準備!亦都因為你自己準備好,你有好強嘅自信心,知道如果突然出現對象,想返屋企「食糖水」,你都已經隨時準備好!

冇用嘅雜物要清除
過期化妝品清除
唔啱着嘅衫全部掉
一年以上冇用過嘅嘢掉
過期雜誌書刊全部扔晒

你要製造一個令人見到都唔會難為情嘅房間。要去到突擊檢查都ok嘅狀態!

你嘅房間乾淨利落,整潔,就自然有一種歡迎氣氛。

房間係舒適,可以享受親密時光嘅地方。

俾個小帖士你,每晚點燃香薰蠟燭,或者設置小光源。夜晚熄咗大燈之後,仍然有一啲溫馨、溫暖嘅光源,好適合親密時光。而且香薰或天然精油迷人嘅香味,製造出一種意境。白茶、茉莉花、玫瑰、薰衣草等等嘅香味,都好適合房間使用。你自己一個人住,定係有朋友想來活動,你每日都喺一種幸福嘅氣氛裏面沉睡。

記住如果有人嚟你度過夜,你就要記得房間裏面要拿走家人合照,冇人想喺家人監督下同你親密!


增加桃花運方法:護髮

好多生活上嘅小節,好影響得到你係人地心目中嘅印象,究竟你係唔係一個可愛嘅人。

如果你要擁有強勁嘅桃花運,人見人愛,你嘅頭髮就要時刻保持乾淨,無異味,要柔順可愛!

我會大聲話俾你知:「粗糙低質嘅頭髮,只適合粗糙低質嘅人生!」

如果你情人節有約,或者有機會有可能俾人約,就一定要呢幾日做好護髮嘅功夫。有錢就梗係去一啲專業嘅salon做啦。但係其實出街或屋企都冇所謂,基本嘅護髮、焗油、深層保護,香港好多專門出售美髮用品嘅鋪頭地方都買到,超級市場都有。

就算一啲容易超市搵到嘅頭髮護理牌子好似都好,一兩個重點修護treatment,都會係大日子帶來效果。適當嘅護髮同埋髮尾油,可以令你短時間之內頭髮回復生氣。(個人認為Dove頭髮護理精油最好用,最適合急救)

可愛嘅頭髮,代表你有心經營你自己,亦都係對追求者、男朋友嘅尊重。

如果你真係咁好彩,嗰日收到花,或收到唔同人送來嘅花,你都想即刻影張相留念。如果準備好經過悉心打理,有光澤的頭髮,就最適合自拍!

柔順、光亮、香噴噴嘅頭髮,係人都鍾意!


增強桃花運方法:做Facial

情人節或者其他重要嘅約會之前,一定要做好面膜補水急救!

約會前一晚面部吸收足夠水份,就可以防止皺紋嘅出現。無論你男定女,擁有年輕嘅外表,你一定着數。呢啲時候你平時買嘅高級護膚品好似La Mer、SKII就最適合使用。

約會前三日,再重點用生物纖維面膜補水(最好選擇小分子透明質酸),令到皮膚水潤,好有光澤,美白。我會推薦mediheal、Kose、Dr Wu。

如果你有Clarisonic洗面機就於約會之前兩三日使用一次,去除死皮,令皮膚回復光澤。如果有Glamglow就用埋。

如果經濟許可就出街做一次美容spa。香港一啲好嘅美容中心spa好似L'Occitane、Mandarin、Four Seasons、Chuan Spa都提供一啲大日子之前嘅護理。如果經濟條件有限,一啲屋邨嘅美容中心簡單護理,都幫得到你去死皮同埋增加淋巴血液循環,令面色更加均勻光亮。

如果你嘅對象約你食飯,你仲有幾日時間準備,之前果幾晚就要做好保濕嘅功夫。神仙水、面膜,真係唔可以懶。千祈唔好係重要約會之前做高敏性醫學美容,以免發生皮膚敏感狀況,影響形象。


增強桃花運方法:新底衫褲,可創造美好形象

有冇發現一啲桃花運好高嘅人,連底衫褲,同一般人都唔同?

同執好房間嘅原理一樣,情人節或其他重要約會之前,你有機會會同對方有親密嘅接觸。呢啲時刻,甚至之前嘅一個星期,都要換新買底衫褲,嚟準備突如其來嘅親密!

通常女神男神會有一個限期,內衣褲只會着一年。一年之後就立即換新嘅,咁樣,自我感覺都會好啲。


增強桃花運方法:整理社交媒體,將自己置於正面、樂觀消息之中

要做到吸引人嘅男神女神,就要時刻發放正能量。日日喊苦喊忽,唔開心嘅人,只會減低你自己嘅桃花運,同埋搵到適合對象嘅機會。

你嘅目標,就係要吸引一啲好質素嘅人出現!

所謂嘅桃花,係粉紅嘅光芒,就係一種「邀請,接納,同行」嘅氣息。

美滿嘅桃花同人際關係,就唔可以係悲傷同憤怒、自卑嘅狀態之下共同出現。桃花運係唔可能響呢啲情緒之下綻放。

所以,如果你真係想搵一個好嘅男朋友女朋友,就要注意自己嘅社交媒體。我會建議你迴避消極facebook、電視。有啲人只會發表不安、人心叵測、憤怒情緒。呢類嘅朋友就唔需要來往咁多。同時將負能量人、情緒變差嘅newsfeed刪除,亦Unfollow所有負面人士。

Facebook、Instagram媒體好好,可以俾你選擇到你想接收嘅訊息。聰明嘅人,就梗係選擇正面、樂觀嘅訊息啦,咁樣會令到你自己長期都處於一種戀愛中嘅狀態,發放出令人想追求嘅氣息。

當你每一日都沐浴喺幸福、感謝、喜歡、欣賞、有趣、溫柔、仁愛情緒裏面,你對人嘅氣質都會唔同!亦都令到適合嘅人更加容易出現!


增強桃花運方法:舊情人禮物,只留一兩件

好多人會下意識咁樣收藏左好多上一段感情大陸你嘅禮物、信件、message等等。如果你真係想向下一段感情進發,我就會勸喻你,將一啲過期嘅紀念品刪除,只保留一兩件最刻骨銘心嘅。咁樣,你先至會響心理上同埋實際上,騰出空間,你自己下一段戀情嘅機會!


增加桃花運方法:早睡早起

早睡早起,點解會幫得到你增加成功戀愛嘅機會呢?

其實,係有原因架。每個人嘅身體,都會跟隨生理時鐘,有一定嘅分泌。其中荷爾蒙嘅分泌,就會係夜晚進行。每晚如果準時10點、11點之前訓,生長嘅荷爾蒙就會分泌,而你作為男人或女人嘅荷爾蒙,亦都會係呢個時間出現。相反,如果你每晚都捱夜,你嘅荷爾蒙就會分泌不足。會導致你殘、攰、性方面嘅吸引力一定亦都會下降。所以如果你要吸引到其他人,早睡早起好緊要!


增加桃花運方法:健康減肥

係人都知道,身形好fit嘅人,特別惹人鍾意!個個都想男朋友女朋友好似韓星咁樣啦。

如果你喺約會大日子之前,最佳狀態出現,我就勸喻你之前嗰七日一定要食得好健康!你要面尖尖,纖瘦,可愛!一定唔可以做豬扒!

你記住,桃花運強嘅人,體內有源源不絕嘅希望,而唔係脂肪。

健康身體,有幸福感,兩者係共生。

當你戀愛幸福時,你會變瘦。

當你唔開心,就易暴食,肥。

二十世紀小説家Francoise Sagan講過,「不幸福會令人變肥」。

聰明飲食,纖瘦,就代表左你有能力去掌握、掌控自己人生。

肥胖,就代表你無活力,失去自信,正因為心理狀態差,你就易肥。

你要健康要瘦,因為可以散發出「我好珍惜自己、看重自己」嘅自信。

好多韓國人都話,點解一定要將自己身材打理得咁好呢?因為係佢哋嘅文化當中,身材好,係對對方一個警告!話比對方知,自己仍然好有吸引力,千祈唔好以求其對我,你要當我公主王子!

我個網站有一個分頁叫做減肥瘦身,有大量嘅資料,請隨便參考。簡單來講,就係多菜,多蛋白質,少量嘅碳水化合物,同埋唔食零食。千祈唔好飲高糖飲品!

High Protein + High Fiber + Low Carb 就係成功要訣!就算只為至七日,都會見到效果!

呢個係好好嘅方法,激勵自己唔好鬆懈!


增加桃花運方法:學習財經新聞、體育新聞

好多人未必知道,睇新聞,尤其是財經新聞同體育新聞,同增強自己戀愛運有咩關係呢?其實,關係係好大。好多人係沉迷於打機、AV、打麻雀、睇娛樂新聞、講是非,對於一啲真正嘅世界大事,或者經濟新聞,或者國際球星消息一無所知。你咁樣嘅質素同埋程度,有質素嘅人點會睇你睇得上眼呢?

要做個大方,出得大場面,唔會失禮人嘅人,就一定要確保呢方面嘅知識。每日都要睇一啲關於世界嘅大事,對於一啲經濟嘅訊息,最好都瞭解多啲!其實網上都有好多投資、銀行業、經濟訊息,報章亦都有經濟同運動嘅副刊,一定要每日都閱讀!以增加自己談話嘅本錢。就算你心目中嘅對象出現,你的都有足夠嘅專業知識同球類興趣可以討論。而唔係一講一啲高深啲嘅話題,你就完全無話可說。

要做到口才好,話題不斷,吸引到其他人,就要注意自己知識吸收!


增強桃花運方法:預先安排週末行程

有冇發覺桃花運旺嘅人,都係比較有主見,有計劃嘅人?通常啲人無論係工作或者私人娛樂方面,都有一定嘅計劃同埋意見。呢啲人亦都比較擅長計劃,而唔係懶散消沉咁樣生活。

百無聊賴嘅人,無事可做,並唔吸引!

所以我會建議大家,每個禮拜都做好周末嘅規劃。具體講明想點做,尤其係如果有機會約會,就更加要做多少少準備嘅功夫,例子,就好似下面咁樣:

週末
9am,享用早餐,健康一日
10am,去豪華健身室做gym
1230pm,去Pacific Place Thai Basil食泰國菜
2pm,去Lab Concept試用護膚產品、參觀香港公園
4pm,去小西灣參加義工活動
8pm,同男朋友去TST天台cafe,順便到city super採購食材下星期屋企煮食
10pm回家休息、閲讀、點香薰、做mask保養肌膚

咁樣會俾對方約會對象一種被重視嘅溫馨感覺,你都等對方知道你其實好忙,亦都有好多社交生活,並唔係二十四小時隨傳隨到可以等佢,人哋對你嘅尊重,信心同埋印象分亦都會增加。


總結:努力營造你一輩子的幸福

以上所講嘅種種方法,其實都係令你變成一個更加可愛嘅人,有可愛嘅外表同埋令人鍾意嘅性格。

希望你今個季節,桃花盛開,人見人愛。

桃花運,係一輩子嘅努力。而收穫,就係一世人嘅幸福。


瘦身美體





打開內容

2017年2月4日 星期六

【醫學美容】韓國Mediheal面膜好用?神秘強國背景大起底及分辨真假貨方法

2月 04, 2017
可能大家行美妝店嘅時候,都見過來自韓國近年爆紅嘅mediheal面膜。mediheal韓國面膜真係好犀利,短短幾年之間就喺香港、中國、台灣掀起搶購熱潮,好用程度勁爆!佢係少數美容達人、網上beauty blogger評論、專業美容編輯都推介嘅高性價比美容產品,亦係韓國護膚品代表性產品之一!作為美容達人,mediheal面膜我自己都有用,效果真係非常之好用,大大推薦!

雖然係好好用,但係你知唔知道Mediheal呢間來自韓國嘅供應商,其實同強國大陸有好多千絲萬縷嘅關係?

而且,mediheal面膜假貨同埋影射產品已經攻陷左香港,好多地方出售嘅mediheal,都係假貨!甚至有可能,你用緊嘅都係山寨mediheal面膜!如果你用緊mediheal一隻大家都覺得超級好用嘅面膜,但感覺唔到任何美肌好處,就非常之有可能你已經買錯假貨!

今日就要教大家點樣去分辨mediheal真假,同埋點樣去買到安全嘅正貨。


Mediheal新股東係大陸公司

我要講一講Mediheal嘅背景。

好多人以為mediheal佢係韓國品牌,但我要更正,其實佢係「韓國」同「中國大陸」公司共同嘅投資。

Mediheal 背後嘅母公司L&P Cosmetics,公司嘅背景相當神秘,佢唔似韓國Amore Pacific集團咁樣,喺香港都有自家經營嘅專門店。你見到嘅Mediheal
面膜,都係美妝店、藥房、同埋網店。對於佢嘅母公司邊度黎,究竟有咩背景,大部份人都係一頭霧水。

L&P其實係一間韓國嘅護膚美容產品公司,但係幾年前,出售咗大量嘅股份比中國大陸嘅上市公司「朗姿股份」。

所以而家嘅mediheal面膜,背後嘅股東,已經包含左大陸公司。嚴格來講,mediheal已經唔係純粹嘅韓國醫學美容品牌,係韓國加埋中國嘅醫學美容品牌。


(男神玄彬代言Mediheal)


(Mediheal代言人Fei)

(Mediheal面膜由韓國紅到香港,但假貨多到!)

如何分辨真假?mediheal山寨假貨產品非常之多!

根據我嘅觀察,係過去嘅12個月之內,市面上多咗好多好多嘅mediheal假貨,基本上響MK、新界、屯門不知名藥店出售嘅mediheal面膜產品,起碼有三份一係假貨。

其中一個令到分辨mediheal真假困難嘅原因,係因為mediheal品牌旗下生產左好多唔同包裝,但係包裝相當之相似嘅面膜。由於佢哋似但唔係完全一樣,令到一啲有心影射嘅山寨產品,都成功混入其中!


(真正Mediheal面膜)

下面張圖嘅mask,唔係Mediheal 


(Suteki面膜,好相似但「唔係」Mediheal,真係好似)

市場上有一種叫Suteki面膜,同Mediheal有八成相似。包裝紙、設計、圖案、顔色都巧合!

但係,Suteki唔係Mediheal!

再睇埋下邊張圖,都唔係正貨。
市面上另外一種面膜leaders insolution,包裝都好似Mediheal,但亦唔係Mediheal 。

Mediheal官方網站都有教你點樣去分辨真假嘅產品,但係其實最容易分辨真假嘅方法,係只去大型連鎖店,同時見到「Mediheal」呢個字先買。唔好認圖案,唔好認顏色。

如果有心分析一定可以做到。但係一般人都唔會有咁多時間咁好心機,攞住網上嘅官方網站資料,去到化妝品店研究,而且一啲居心不良嘅黑店,見到你攞住資料核對,就會趕你走!

呢隻mediheal韓國面膜,我只會建議你哋響以下渠道購買:

官方網站
萬寧
屈臣氏
莎莎

千祈唔好係淘寶或一般藥房買。

叫你唔好去一般嘅藥房一定有原因,請留意下圖,係旺角一間藥妝店。


上面店舖,就咁望,出售嘅都係一般嘅韓國人氣面膜。

你小心睇多一次?

圖中有jayjun、春雨,係真貨。但如果你睇真啲,最上嘅係Suteki唔係Mediheal!少啲眼力都唔得。

真係魚目混珠!鬼咩,要用玩photohunt找不同嘅方法搵嚟搵去先搵到,嘥時間。

雖然唔可以因為似就話係假貨,但Suteki設計詭異,成日都影射其他韓牌。佢成日出現喺淘寶、大陸網店、香港三四流化妝品店,令人懷疑。

另外有啲更加差,係佢直情係假冒,真係海關打擊嗰啲「假貨」。總之,淘寶、網購都唔好。

Mediheal點解一定要去連鎖店買?

講起韓妝啱啱開始流行,大概2012年左右,韓國好多種嘅面膜就開始經過水貨途徑運入香港。當時都有好多水貨店喺香港賣Mediheal呢隻面膜。但係價錢真係好貴,比起首爾差唔多係三倍(當時售價大概係$200一盒)。但係而家隨着mediheal大量嘅入口,價錢其實平左好多,價錢其實係緊貼韓國。依家都係上面嘅價錢大概係$70一盒。以前有一段時間都有啲韓妝店可以代購,又或者會搭朋友去韓國買,但係而家咁方便可以直接買。而且如果驚萬寧、屈臣氏繽紛嘅地方,係一定保證正貨,唔會買到假貨。

各位網店店長,我要同大家講聲對唔住先,點解我要向廣大嘅讀者推薦,mediheal呢一隻嘢一定要去大型連鎖藥妝店購買呢?因為真係太多假貨!連淘寶都有得賣嘅時候,就令我好質疑,究竟係咪咁多正貨係市面上流通!


真正Mediheal 效果評論

其實,真正Mediheal係有效。我自己用過,覺得保濕成分有,有一張叫做Mediheal high definition pixel都好用。

因為通常一般人都會買基本版,我推薦Mediheal HDP。



Mediheal HDP呢隻產品我自己都回購買咗,平均一個禮拜用兩次。我嘅美容產品、面膜其實係堆積如山,基本上可以係睡房開間卓悅都冇問題,但係我都覺得佢好用到值得再次購買,就可以見到Mediheal其實幾有用。

我自己見到嘅效果係肌膚保水同好似有一層保護膜。尤其是我做咗一日野之後條街度都見到皮膚有分別。

Mediheal啲面膜係日常嘅保養用。所以我都唔會期待佢有啲乜嘢神仙水效果。但係如果以基本日常保養來講,佢係恰如其分地做到。而且用咗佢幾款唔同嘅面膜,暫時都唔覺得有好大嘅敏感問題。有時係香港都唔敢奢望咁多,好多好貴嘅牌子,一用都會成塊面爛面!做到真正、溫和嘅作用我覺得已經幾好。

我嘅個人觀察,當皮膚比較乾燥、有皺紋嘅時候,使用呢隻面膜其實個效果唔會係最好。如果你本身已經有暗瘡或者其他現存嘅敏感問題,就最好唔好用呢隻。你可能要用醫生處方嘅面霜又或者茶樹油。

同其他嘅面膜比較,我覺得Mediheal佢係可以一用。尤其是如果你想快速保濕嘅話佢係做得OK。

由於價格平,只係$70一盒十張,所以其實都幾抵用,我係會推薦俾你囉。



打開內容

Related

Post Top Ad