【醫學美容】膠原修復槍神級逆齡效果?最新Thermatrix及Einxel Plus膠原槍價錢及效果教學

2月 24, 2018

近排好多人有興趣想知,就係韓國「膠原槍」嘅價錢同效果,同埋問值唔值得做。近期好多愛美人士都問,邊度有得打膠原槍?膠原槍,又被稱為「膠原修復槍」或「膠原修復針」,喺香港醫學美容界面世短短嘅時間,就已經得到好多香港美容人士嘅討論!膠原槍係水光針、HIFU之後,另外一個醫學美容熱潮。

(自費評論,沒有收到任何免費使用或贊助)


究竟,膠原槍係乜嘢?合理價錢幾多錢?做咗HIFU又可唔可以再做?打咗幾耐先有效?打咗Botox又可唔可以做埋?今次就一次過同大家詳細講解,令到大家唔會俾sales亂講呃左,對於呢個療程有正確嘅認識同理解。


膠原槍是什麼?

你都可能係美容中心、Beauty Bloggers試做報告睇過來自韓國嘅膠原修復槍。無論係大型嘅醫學美容集團好似Dr Protalk、悅榕莊、定係中小型嘅日迦、Kan's Beauty都有得做。

但係,搵錢咁辛苦,一定要做精明消費者!你俾錢join course之前,一定要先了解,其實個療程係做乜嘢。

OneCaratBeauty.com作為香港有超過1,000,000讀者同觀眾,有一定水準地位嘅高智商高知識型醫學美容網站,知道大家對於快速膠原生長,凍齡美肌,無痛膠原自生修復嘅興趣,就第一時間準備咗膠原槍價錢效果教學!

膠原修復槍其實分幾種!千祈唔好知啲唔知啲就去亂咁參加。一定要選擇適合自己,而且屬於安全嘅,先至能夠達到理想嘅美肌效果。

其實,膠原修復槍,係籠統咁樣指某類型用熱力刺激膠原生長,射頻探頭好似一支槍,嘅醫學美容儀器,並唔係「某一個儀器」嘅名稱。

就好似,肉毒桿菌,係指所有品牌肉毒桿菌;Botox就係指某一個牌子嘅肉毒桿菌。

膠原修復槍只係一個籠統嘅稱呼,其實,裏面包含咗幾種唔同嘅儀器。今日就同大家講解下市面上比較出名嗰幾種:Thermatrix同Einxel Plus。

市面上嘅膠原槍,可以係指來自韓國嘅Thermatrix(非創傷性,沒有微針),亦都可以係指Einxel Plus(創傷性,微針刺穿皮膚)。

當然,亦都包括左市面上其他韓國、日本、美國、德國相似嘅射頻熱能儀器。

我首先同大家講解第一種Thermatrix。

 

(悅榕莊邀請到索爆女神陳敏之為Thermatrix代言,Photo Credit:悅榕莊)



(Thermatrix膠原修復槍係新一代膠原蛋白生長嘅醫學美容儀器,而且價錢比美國製造舊一代平好多!Photo Credit:南明美容)

膠原修復槍品牌一:Thermatrix

Thermatrix,代理嗰邊正式中文名字,叫做「豐盈緊膚儀」。

可能大家都聽過,一個殿堂級嘅緊膚電波拉皮美容儀器叫Thermage。

Thermage來自美國,係醫療品牌Solta其中一個醫美儀器。佢係其中一隻電波拉皮緊膚先行者,價錢,當然亦都係殿堂級。

個名同Thermage有啲相似嘅Thermatrix,有啲人話係新一代嘅電波拉皮、射頻拉皮。其實呢個講法唔係完全正確。

Thermatrix並唔係來自美國,其實係來自韓國。Thermage同Thermatrix名字相似,原理相似,但兩間公司生產商都唔同。

Thermatrix膠原修復槍,其實來自韓國醫學美容集團Daeyang,佢係屬於新一代嘅射頻,能夠利用格子能量傳入方法,將60度以上嘅熱能,傳送到真皮層即係膠原生長地方,從而導致膠原蛋白嘅修復同埋重新整合,亦都令到面部收緊,有拉提嘅作用。

佢嘅科學原理,就同美國殿堂級醫學美容儀器Thermage好相似。係技術上亦都有改善,但係價錢收費,就平好多。

Thermatrix同時屬於單極mono-polar RF同雙極bipolar RF,技術層面屬於射頻類別。Thermatrix自己本身嘅設計,能夠有助將熱能有效送到肌底,表皮層亦都唔會太熱,安全技術上係可取。

同傳統嘅水光槍唔同,Thermatrix膠原修復槍,並唔係入侵性,亦都無針。對於表皮嘅傷害程度,比傳統嘅微針更少,唔會有刺穿表皮嘅情況。

打Thermatrix膠原槍正常情況下,唔會流血,亦都唔會有太大嘅疼痛感覺。

膠原槍呢一部來自韓國嘅儀器,係可以同時兼顧面部同埋身體嘅需要。

 
(名模陳嘉容為連鎖店Dr Protalk拍攝廣告,Dr Protalk亦都有提供Thermatrix療程)


佢有三個唔同嘅探頭,包括眼部7mm、面部15mm、同埋身體30mm。(大家注意,呢度講嘅大小,係指個探頭本身,並唔係能量深入皮膚程度)

Thermatrix一部機,已經可以解決眼部、面部、甚至身體嘅膠原蛋白流失衰老問題。

相比起傳統嘅RF,Thermatrix膠原修復槍係使用分段式RF。每個頭上面有25-196個針頭pins。但係呢啲針,並唔會刺穿表皮。

呢部機嘅主要效果,就係刺激膠原蛋白生長,改善鬆弛、皺紋、下垂、皮膚顏色差嘅衰老問題。對於皮膚,的確有幫助。

Thermatrix每次治療,可以維持六個月到一年效果。絕對唔失禮!

而且,由於佢可以均勻咁將能能打入皮膚底層,對於平時做開HIFU維持嘅朋友,都有令到膠原蛋白生長,幫助HIFU療程更加顯著效果嘅正面作用。

Thermatrix呢種膠原修復槍,市面上價錢都唔係好貴,基本上$1000,1次左右。最少最少都keep到半年。純粹講性價比CP值,其實Thermatrix性價比算係幾高,如果想靚都可以試一試。

另外一個值得一睇嘅原因,就係因為佢同傳統HIFU唔同,Thermatrix並無格數、線數限制,一個價錢,已經包含成塊面!唔會話去到先再加錢。

如果下次去醫學美容中心,有顧問同你傾開計,問你有冇興趣嘗試膠原修復槍,你就可以睇吓佢講嗰部,會唔會就係Thermatrix,係咪適合你自己。


膠原修復槍品牌二:Einxel Plus

市面上另外一部叫做膠原槍嘅醫學美容儀器,就係Einxel Plus。

Einxel Plus呢一種形式嘅膠原修復槍,同之前Thermatrix有少少唔同。

 

如果有醫學美容顧問同你講開,問你有冇興趣試做膠原修復槍,你就要睇吓嗰部機會唔會就係Einxel Plus。

Einxel Plus係一個微針加射頻療程。佢係入侵性療程!

同之前Thermatrix嘅唔同,呢一部儀器,係真係會有微針,會刺穿表皮,進入皮膚入面!療程嘅時候,射頻會同一時間微針射出,係會有痛楚感覺,亦都會有機會出血。刺入皮膚嘅深度介乎0.2mm - 4mm之間,可以經過操作去控制。

所以,嚴格來講喺法律上,Einxel Plus呢部機一定要醫生去做!

當然,Einxel Plus呢部機本身其實都唔係真係好似隆鼻Restylane、傳統入侵性水光針非常深入咁樣刺穿皮膚注射,所以,大部份美容中心都隻眼開隻眼閉,由美容師操作,當係微針咁用。

作為一個精明消費者,如果你有興趣做入侵性膠原修復槍例如Einxel Plus,我就會建議大家,搵一啲乾淨衛生嘅地方去做Einxel Plus。始終如果見血,個人衛生同安全最緊要。安全衛生一定比價錢重要。

Einxel Plus呢部機嘅最主要效果,其實係改善凹凸洞。

順便同大家提醒,呢兩部機都可以為曾經接受過HIFU、BOTOX嘅人士服務,但兩者相隔時間一定要超過兩個月!否則,有機會造成過度創傷。

同大家介紹兩部機,其實都係屬於有效,可以一試嘅類別,相信前者會比較平,後者功能比較深入。



1 意見

  1. 我見到有d post話Thermatrix 每次做只可以維持2-3星期, 要keep 住做1x次左右先可以last 到半年既?

    回覆刪除

Counter

Flickr Images