【醫學美容】嚴選尖沙咀美容院facial:高CP值美容院推介及提防黑店貼士

2月 11, 2018

尖沙咀嘅海港城,金巴利道,金馬倫道,有超多嘅高端美容品牌專門店、醫學美容醫生診所、藥妝店旗艦店,與及韓式日式美容中心。尖沙咀美容院由好平嘅$300 入門級Facial都價值三千幾蚊嘅高端儀器Facial都有,當中亦有貨真價實嘅高質素推薦地方,亦都有一啲係要大家提防嘅黑店。


全港hit爆嘅「無針埋線」Liftera V / Ultra V Lift 教學喺呢度:http://www.onecaratbeauty.com/2018/09/lifteraultra-v-lift.html?m=1




(由周汶錡開辦嘅尖沙咀美容院Megeve)

睇得OneCaratBeauty呢個人氣超過3,000,000嘅專業知識型醫學美容網站,相信大家外表同要求都有一定水準。純粹外表比分,用5分作為滿分去評分,相信大家都有最少最少都有 3分半, 4分,甚至5分滿分!但係美麗嘅路,並唔係一日半日形成,係經過我哋多年嘅努力,購買適合自己嘅產品,參加醫學美容服務等等,再加上多運動,健康飲食,改變生活習慣,先至有今時今日嘅健康氣場同逆齡美貌!美麗,係需要薪火相傳,對於真正有效嘅美容方法同店舖,我從來都唔介意同大家分享,亦都絕對唔會收收埋埋,期望剩係得自己靚,其他人冇自己咁靚。好似今日咁,就想講下尖沙咀嘅美容院,我會用自己嘅知識同埋親身經驗,我教你點樣去分辨好嘅美容院,點樣用折扣價得到最佳服務,同埋避開尖沙咀美容陷阱黑店。


尖沙咀美容院黑店特別多?

尖沙咀對於美容院同美容行業來講,係一個傳統嘅心臟地帶。尖沙咀嘅美容行業,起碼都有五十年歷史!無論係響金馬倫道、金巴利道嘅高CP值美容中心,到海港城商業中心「Vita悅活」高消費嘅「雪花秀Spa」、「沐蘭」、「Thann」、「Oasis」,到信譽良好嘅單次收費醫美小店例如「Reju Beauty」,甚至來自日本專門為男士服務嘅專業美容服務「Dandy House」,可以話應有盡有。再唔係,傳統港式連鎖店好似「現代美容」都會係尖沙咀搵到。無論係香港、日本、韓國、美國、法國、瑞士,需要打針,定係做機,定係人手,全部都响呢度搵到!

其實好多香港著名嘅明星同埋模特兒,包括一啲國際名模,內地超模,香港新人明星,名媛,視后,甚至上咗年紀已經成功嫁得好歸宿嘅上岸明星,佢哋嘅美麗足跡,都經常出現尖沙咀嘅高端美容院!過去幾年,我自己都係不同尖沙咀美容院裏面見過幾個電視台頒獎禮有份角逐嘅花旦、名媛,即使係喺美容院裏面撞到一面之緣,都見到佢哋狀態非常之靚!

尖沙咀美容院真係好多,但係, 黑店都好多!

點解會咁講?前排尖沙咀美容院又出事!有人死咗!點解?因為美容師藏有限制藥物,胡亂注射之後,導致客人死亡!

就算唔好睇一啲咁極端嘅死亡個案,尖沙咀美容院瘋狂hard sell幾個鐘,唔碌卡唔俾走,為咗亂咁sell course乜嘢大話都講乜嘢都應承,俾咗錢之後最後服務不如理想等等嘅事故,基本上日日都發生!

又或者一啲黑心嘅尖沙咀美容院,會不停開始同關閉有限公司,將顧客嘅套票轉來轉去,又會用不同藉口例如或即將轉名、搬地址等等,令到顧客無法使用之前購買嘅套票,一定要加錢先可以繼續使用等等。呢啲咁嘅賤招都出得,令到唔少尖沙咀美容院都俾消費者委員會點名譴責!

作為一般顧客,希望得到尖沙咀美容中心嘅專業服務,亦都唔想無啦啦唔見幾千蚊、幾萬蚊買一啲自己都唔啱用嘅產品同療程。講真,對於一啲老公經營地產財經,大把錢唔使做嘅名媛、明星,去邊度做facial都冇乜所謂,最緊要效果好。但係一般市民,就未必有咁嘅財政能力,可以去到為咗靚而揮金如土嘅程度。所以,點樣去細心選擇美容苑,係一個重要嘅課題。


尖沙咀美容院詳細教學

如果你想去尖沙咀美容院做facial,就一定要睇呢一個教學。

好多人成日問我,有冇美容院推介?有冇最好係旺角、尖沙咀呢啲地點方便嘅地方?

我一個月都收唔少呢一類型嘅PM問題。但係,有時可能直接同你講,講真,我介紹俾你都冇用,因為你冇錢!每個人嘅消費水準唔同,好似我都話我覺得正常合理嘅Facial價錢係$500到$1000左右,但係之前就有朋友話我介紹嘅Facial太貴!其實,真係一分錢一分貨,我自己都試過用一啲超平價錢去購買,但係無論得到嘅服務質素、產品效果、衛生程度等等,全部都係強差人意!所以,冇錢真係唔好學人美容!自己去彩豐行算了。

另外,有時候我介紹俾你地都冇用,因為佢只會幫熟人做,唔係太接受新客。我認識一啲臥虎藏龍嘅美容老闆,月入過100,000 ,跟着佢哋做facial嘅,都係好多好多年前以前喺尖東佢嘅夜總會小姐,但係因為大家都搵到錢,一直幾十年做到夜總會執笠佢哋都繼續搵去做!手勢當然係正,就算人哋用個樣來搵食,都去搵佢。咁但係呢啲臥虎藏龍人士,早年賺到嘅錢用嚟買樓,今時今日錢根本搵唔晒,心態亦都已經一早上咗岸,根本就唔會幫一啲妹妹仔做facial!

另外一啲,就係尖沙咀嘅高CP值小店,佢可能真係好有心,使用嘅醫學美容儀器都係韓國首爾皮膚管理診所使用嘅,但係礙於size問題,只係一兩個員工加店主,例如早年紅爆網絡嘅Reju Beauty,根本不能同時應付咁大量要求同Booking,有啲朋友甚至知道我有寫美容專欄,亦都有好多人向我查詢有關美容問題,佢求我「千祈唔好」喺佢未請到新員工同搵到新店面之前介紹佢哋。因為一講一推介,就會好多人查詢,但係佢哋人手唔夠,現在嘅員工已經覺得工作量太大想辭職,再加添新工作反而令公司營運出現困難,喺未請到人未搵到新店之前,細細嘅地方唔能夠接受突然大增嘅人。所以真係唔係有錢唔想搵,係根本賺唔到。

我自己都知道,尖沙咀金巴利道一帶韓國人聚居地區嘅住宅單位,有一啲韓國女性開始嘅蚊型商住美容中心,有提供傳統韓國皮膚管理服務,亦都是用一啲來自韓國嘅美容產品,價錢唔貴, $400左右,但係,由於經營嘅人,並冇商業登記,連究竟佢係用乜嘢身份來到香港都唔知,係唔係合法都唔知,所以只係可以當係私房菜,不適宜公開推介。

另外一個要同大家提醒嘅地方,就係,如果你想靚一定要識得數口精!記住,如果想用到真貨靚貨,合理價錢係$500到$1000左右。

好似我上次都同大家講過,千祈唔好做一啲$200以下嘅Facial。因為呢個價錢,基本成本例如租金、人工都不能cover。呢個價錢係商業上根本完全不能營運,除非佢嘅目標根本就唔係用呢個價錢同你長期服務,只不過係呃你開咗個頭,之後再不停hard sell。價錢$200左右嘅Facial 通常只會係一啲使用低劣產品、黑心用品、假機器、超舊三手陳年機器,先至會可以用呢個價錢出售服務。又或者,佢根本係黑店,用超平價招徠,上到去先呃你開course,要你碌咭幾萬、唔俾錢走唔到!

就好似,淘寶絕對唔係越平越好,平,可能因為佢係假貨……令你得不償失。價錢正常,就可能係真貨。

我上次都同大家計過數,facial真正合理嘅價錢,係大概介乎$500到$1000左右。你一個係合理嘅價錢,你付出合理嘅費用,亦都會得到合理正常嘅良好服務。至於超過$1000 ,就要視乎產品質素同機器、美容院地點等等。如果想得到折扣,購買大概$5000左右嘅套票,就足夠!


三個貼士,幫助你選擇正確尖沙嘴美容院

貼士1:尖沙咀美容院地點超重要!

一間美容院嘅地點,其實已經話到俾你聽大概佢嘅收費係點樣,作為客人大概要比幾多錢。尖沙咀比較價錢平嘅美容院,就會集中接近「尖東」、「山林道」一帶。呢一帶地方,就有好多小型嘅美容中心,價錢比較便宜,經營就好似家庭式一樣。

相反,海港城一帶,包括海港城Vita悦活,租金極為昂貴,環境亦都靚靚,但可以搵到$1000 (非試做價)Facial以下嘅可能性係等於零。無論試做價幾多錢都好,最後真正開course一定支出超過1000一次。

尖沙咀樂道、金馬倫道、海防道、廣東道一帶都有一啲樓上鋪美容院,通常有店主自行經營或請兩三個part-time ,水準極為參差,有好好亦都有好差。我有個朋友好好,佢經營嘅美容院真係可以話奇蹟,佢好多客都變咗佢朋友,包括出名要求高嘅我。但係,我亦都有一啲響尖沙咀經營嘅美容院,簡直就係一個黑店。(我有一個黑店名單,如果你有興趣想知,就PM我。)

所以,自己要醒目,你大概喺邊個消費水平,就去相應地方,以避免出現不愉快情況。

平均價錢(由高至低)

海港城》W酒店 = 洲際酒店》彌敦道 = 金馬倫道》樂道 = 海防道 = 山林道 


貼士2: 上美容app、forum睇下

依家好多手機美容預約app同forum,都有評論功能。我會建議大家首先上網睇吓。因為揼骨有正邪骨之分,而家美容都有!

尖沙咀一帶有一啲不法商人,美容院作為門面,其實從事不法色情勾當。有一次,我shopping期間突然間好想做facial ,諗住周圍試吓新salon,就同我嘅同事一齊去咗一間樓上鋪,一入到去,已經覺得好奇怪,因為個reception見到我地好似好錯愕咁樣,隔咗一陣先至識得招呼我地。大部份嘅美容院都係八九成女性顧客為主,男性顧客大概只有一兩成左右,呢個係正常嘅比例。但係入到去嘅時候竟然見到出出入入嘅客人大部份差唔多清一色都係男人,仲係年紀40、50歲,不修邊幅嘅男人!嗰啲美容師,條裙短到差唔多露gap!我已經覺得有啲古怪,美容師基本倒模針清都唔係好熟,好似要我教返佢點樣用導入儀!做facial嘅時候,就聽到隔離房出現奇怪嘅聲,好大聲嘅喘氣,隔咗一陣,仲好似有啲撞擊聲音……呢個咁奇怪嘅Facial ,都要六百幾蚊!加送疑似啪啪啪soundtrack,當然,呢間美容院我永遠都唔會再返去啦。後來我在上網搜尋有關呢間奇怪電腦嘅資料,發現佢竟然響一啲叫雞網頁出現!而家,我都會上網睇吓一啲網絡評論、app評論,確保唔係一啲邪牌場所,我先至會去。


貼士3: 搵香港人經營嘅店舖

個人會比較推薦香港人經營嘅美容中心。

呢個絕對冇任何歧視成分,只不過係個人多年嘅觀察。唔少內地新移民經營嘅美容院,即使係一啲好靚嘅位置例如好似尖沙咀,佢哋嘅衛生情況都不如理想,好似毛巾、床單,長期都唔會更換!

始終,如果個美容師同店主,都係香港人,衛生情況一定好啲。當然我只係講人數兩三四個嘅小型美容苑,並唔係講大集團。

尖沙咀良好信譽美容院推介:Reju Beauty 

 

有興趣嘗試做全新韓國美國機,各種V面、美肌、逆齡療程嘅朋友,可以直接以試用價到尖沙咀Reju Beauty登記。個人較推「韓國膠原激活童顏術」,效果媲美萬元貴價療程,$688限時優惠(原價$1088)


0 意見

Counter

Flickr Images