【微旅行】法國凡爾賽夢想:澳門巴黎人The Parisian酒店遊記(自費評論)

美學、激情、享受、飲食、夢想、藝術,這一切,都同法國巴黎有密不可分的關係。

巧手法式甜點、凡爾賽風格、協和廣場設計、凱旋門、玫瑰酒、印象派畫、原來已經悄悄來到。

網上近期出現一個有巴黎鐵塔、旋轉木馬的廣告,口號是「像巴黎人一樣享樂:The Parisian」。

原來,位於澳門金光大道渡假城、威尼斯人的最新姊妹酒店「澳門巴黎人The Parisian」,最近開幕!

十年前,當時萬眾期待的The Venetian開幕時,室內貢多拉,就曾經吸引無數遊客;

十年後,The Parisian引入艾菲爾鐵塔,邀請遊客去鐵塔頂端高空談情,半空中吹風,欣賞夜景。

The Parisian承諾帶俾遊客耳目一新嘅法國巴黎體驗,又再一次引起澳門遊客嘅討論!

我之前去咗唔同嘅旅行社、自由行討論區、旅遊網站、同業界人士傾計,收集關於澳門巴黎人嘅旅遊資料,自己亦去一個weekend ,務求整理一份完整嘅資料,方便大家去體驗呢一個法國凡爾賽宮特色、充滿電影感嘅旅程推薦



(The Parisian官網圖片)




(The Parisian廣告好浪漫)


法國星月神話

巴黎聖母院、玫瑰園、凡爾賽宮,係法國特色。

法國巴黎聞名世界嘅酒店有好多,當中包括Ritz Carlton,Crillon,Plaza Athenee,Meurice等。

澳門巴黎人酒店,係金沙「金光大道」項目最新發展之一。設計意念,就係以法國宮廷作為藍本。


香水之城的奢麗

不知不覺間,隨着澳門成為娛樂超級城市,好多著名嘅酒店亦都搬到澳門。The Parisian「澳門巴黎人」係全世界第一個以巴黎人作為設計概念嘅主題酒店。當中,淨係酒店項目嘅投資,已經超過$3,000,000,000美金。論規模、設計、美倫美奐程度,絕對係澳門所有酒店之中上上之選,遊客選擇酒店時性價比好高。

旅遊度假,住嘅酒店最好都係光鮮新淨,澳門巴黎人酒店係2016年9月先開幕,所有設施,都好似新嘅一樣!路氹金光大道咁多酒店,如果價錢差唔多,就梗係揀一間新。

對於法國嘅凡爾賽宮,同埋法式嘅庭園、建築,可能你都會有種莫名嘅喜愛。尤其是法國嘅面具舞會、迴廊、列柱、水池、設計師名店、凱旋門、鐵塔等等,本身都充滿傳奇色彩。係澳門巴黎人,就可以一次過體驗入住法式皇宮、盡情消費享樂、鐵塔下面晚餐、喺鐵塔頂端欣賞光之城嘅體驗!當然,酒店嘅賭場、泳池、健身室設備,都等着各位享受啦!

最令人驚喜嘅係,如果你識得去買套票,價錢就會平好多!我會教你點樣用最平嘅價錢買到最靚嘅套票,乜嘢景點最華麗,點樣可以免費食酒店高級晚餐。



(澳門巴黎人shopping mall)


澳門巴黎人外表)


金光閃閃之旅

巴黎,被稱為city of lights,和澳門金光大道crossover,真係特別。

金光大道,真係尤如其名。金光大道兩邊嘅酒店、名店、渡假村、娛樂場,金碧輝煌,有令人着魔嘅魔力。同樣位於金光大道嘅澳門巴黎人The Parisian,特別適合兩個人,或者幾個親密朋友嘅浪漫之旅。

我去過法國巴黎。巴黎市政廳、小提琴家、奶涷早餐、花園豆子、聖母院,仍然在心裡面。

莫奈的睡蓮油畫,那麼經典。

The Parisian,正好溫故知新。


旅遊小貼士

想去澳門巴黎人嘅人客要注意,金光飛航可以由上環信德港澳碼頭,或尖沙咀中港城,直接去到氹仔。到步後亦都有免費巴士直接去到巴黎人,呢個係最方便嘅做法。

由於可以喺海港城/中港城出發,最適合一個Friday嘅晚上,行完海港城,就可以跳上船,去澳門巴黎人渡假村,過一個Parisian Weekend!

搭船價錢普通等每程大概$177到$200。特別客艙由$287起。(詳情可參閱官方網頁最新船票資料:http://hk.cotaiwaterjet.com/ferry-schedule/kowloon-macau-taipa-hk.html)

澳門巴黎人酒店住宿價錢,星期一至四每晚大概$700左右,周末大概$1000左右。

其實香港人最着數嘅方法,都係購買套票(即價錢包含船票、住宿、早餐、酒店特別觀光活動)。

澳門巴黎人套票邊間旅行社最低,視乎你自己要求當時係點,有啲旅行社會提供巴黎鐵塔夜景嘅住房,價錢就會貴少少,如果你冇乜要求,即使係普通風景嘅住房都可以嘅話,價錢就會更加平。總之,如果你肯每人比$1000 ,就會有個好好嘅假期。

大部份香港旅行社代售嘅套票都會包括:

來回香港或九龍船飛
早餐或午餐(其實可以免費升級享用超正嘅鵝肝自助晚餐,下面會解說)
住房(一般套票不包括巴黎鐵塔夜景住房,但入住當日隨機有機會被升級)
大部份套票,都會增送巴黎鐵塔7樓體驗。

巴黎人酒店官方網頁套票,並不包括船票!(好多香港人係格價網站睇到之後,就好快咁覺得酒店官網平,但其實未計船票錢! )所以,就算價錢低,如果香港人去,都要計埋來回船票嘅價錢,先至可以知道總共價錢。


澳門巴黎人外觀


澳門巴黎人酒店部分



法國埃菲爾鐵塔體驗

還未到達澳門巴黎人渡假村,遠遠嘅地方,已經見到佢嘅地標建築:埃菲爾鐵塔。

我帶咗幾個Laduree買嘅macaron。Louis Vuitton Keepall入面,亦準備咗海明威嘅書「流動的饗宴」。

「流動的饗宴」1920年旅居巴黎嘅回憶錄,包括佢昔日生命中最愛時光嘅文字。

佢講過,如果人夠幸運,年輕時到過巴黎,巴黎會永遠跟著佢,因為巴黎係「流動的饗宴」。

巴黎鐵塔,建於1889年,世界博覽會。

澳門巴黎人The Parisian度假酒店嘅特色,就係可以登上The Parisian埃菲爾鐵塔。

感受喺巴黎一樣,高居臨下,欣賞城市之光嘅體驗!

埃菲爾鐵塔分兩層,如果淨係去7樓,如果酒店住客,係免費!如果係普通遊客,就要收費$160。

位於澳門巴黎人嘅巴黎鐵塔,好多香港客人都會比較疑惑,會想知道值唔值得去。

對於呢個問題,我會話:「不需要用看紀錄片的角度看荷里活電影」。

法文中Joie de vivre ,就係指生活樂趣。

澳門巴黎人嘅鐵塔體驗,其實有少少似係隔離酒店新濠影滙嘅蝙蝠俠體驗一樣,係俾你重新經歷電影中嘅經典場面,並唔代表蝙蝠俠真係存在!亦都唔係嘗試去說服大家,蝙蝠俠真係响呢度出沒!

The Parisian巴黎鐵塔都一樣,佢係俾你感受一下,有關巴黎嘅文學、電影、小說、戲劇之中嘅環境。令到每一個人,都可以體驗一下法式地標美感。

體驗夜光之城,就是Joie de vivre 

去到現場之後,就發現當初嘅懷疑係一掃而空。巴黎夜鐵塔真係好靚,夜景亦都迷離,隨着工作人員嘅指示,經歷過排隊嘅大堂,進入巴黎鐵塔7樓觀景台,再上37樓。


澳門巴黎人鐵塔部分)


(鐵塔入口部分)


巴黎鐵塔發出奇異光芒)



(可乘搭巴黎鐵塔上37樓觀光台)


(鐵塔37樓觀光部分,可以睇到夜光)

這裏沒有聖母院、聖路易橋、也沒有羅浮宮和成街藝術家、卻有完美甜點、玫瑰酒和靈感。

十月夜空,沉思。

喺鐵塔夜空之中,微風之中,

我忘卻了好多事。

我忘卻自己身在何方。


可愛貼心服務

講下Parisian服務。

呢個The Parisian行程係充滿驚喜,由check in一刻,已經俾佢極為華麗嘅凡爾賽宮住客大堂吸引。唔單止環境非常之華盛,服務員亦都會貼心咁將樽裝水同埋糖果奉上正在排隊嘅人客,貼心服務令人大讚。



(碰巧我訂的房間已經滿了,佢哋幫我upgrade去更加好的巴黎鐵塔房間。)


免費高質自助晚餐

Parisian住客餐飲方面,真係有一個小驚喜。

當我地check-in嘅時候,酒店嘅禮賓司就同我地講,雖然我哋買嘅套票,只係包括早餐或者午餐,但係巴黎人酒店暫時容許住客用早餐券去食晚餐。澳門巴黎人自助餐晚餐,係三餐之中最出色,而且價錢都最貴,如果walk in要最少$400 ,兩個人就要$800。如果用早餐段抵銷,就完全免費。由於呢個免費升級優惠太着數,不設電話預訂,只可以根據現場情況,先到先得。

所以大家買套票嘅時候,都可以問下,早餐可否升級!慢食sashimi,點都好過早上食多士!

根據服務員嘅小貼士,就係早去早着數。當去到現場嘅時候,就發現真係早去早着數。因為自助晚餐於六點鐘開始, 5點9左右,已經開始有人排隊,直覺話比我知,如果啲seasoned travelers 都知道呢個係好野,就一定係好正。

餐廳嘅環境,環境廣闊,坐得舒服之餘,好多座位,仲可以望到鐵塔。環境令人有點喜出望外,因為,裝潢都比較簡潔、法式,整體優質嘅體驗。








日落鐵塔下慢食,享受生活,真係渡假。

自助餐正式開始前,服務員為每台人客送上免費檸檬茶,舟車勞頓一日,到達酒店之後,有人放上一杯冰凍、有檸檬香味、甜蜜嘅檸檬茶,真係一個小驚喜。因為呢啲貼心嘅動作,令到大家都對酒店印象好好。




入到去,就發現唔單止環境靚,食物嘅質素亦都好高,絕對香港五星級酒店級數,選擇多,魚生、鵝肝、長腳蟹、煎海鮮等等……氣氛比較出色,芝士蛋糕、澳門曲奇等等,都令人留下美味印象。




澳門渡假村裏面,巴黎人同威尼斯人最大嘅分別,在於威尼斯人比較男性化,而巴黎人偏向女性化。The Parisian接載嘅巴士,都係用鮮艷嘅粉紅色同金色。主打鍾意靚、鍾意華麗、法式浪漫嘅遊客。





在浮躁時代,浪漫的資本你有沒有?

澳門巴黎人,到處都是超現實的電影感覺。華麗的佈景、宮廷裝飾、數百億投資……都彷彿是一個超現實的舞台。

好少去旅行,係好似今次,會每分鐘都享受。

可能,我去嘅時候,都只係一個少少預算嘅澳門quick getaway。所以,好多方面都有原本諗唔到嘅驚喜,佢都超出左我嘅預計咁好。

澳門巴黎人渡假村,總體來講以quick getaway係一個大正評。而且價錢真係好抵。陽光、泳池、法式裝潢、名店購物、上巴黎鐵塔體驗,渡假要有嘅,都可以一次過享受。

對於「巴黎人」,「威尼斯人」一樣嘅澳門渡假中心,一般香港市民反應係幾極端:一係好鍾意,一係好鄙視。

鍾意嘅原因多數比較簡單:靚酒店、大規模resort、設施齊全、賭場玩樂……而唔鍾意嘅原因,會係批評佢覺得過於浮誇、好多自由行遊客、好多人好嘈等等……

澳門巴黎人渡假村,俾人嘅一種感覺,就係逃避現實,暫時離開現實環境,去一個幻想中嘅巴黎、法國宮廷環境放幾日假。現實中嘅你,可能工作太多,休息唔夠,拍拖時間唔夠,同家人朋友相處時間都唔夠。為咗供樓連瞓覺嘅時間都唔夠,唔好講話幻想、人生理想等等較為高層次嘅題目。

即使如此,人生都要閃亮。

人生,就是要閃閃亮亮。

我經常覺得浪漫嘅資本,係要自己爭取。如果所有嘢都抱着消極、否定嘅態度,人生就會覺得好悶,好沉重。有時,無論生活係幾咁壓迫、甚至有啲苟且,都要相信,有一日終於會變好。你生命中,仍然有一啲美麗、美感、驚喜,值得去發掘。

就好像法國名作家Marcel Proust說過:

The real voyage of discovery consists not in seeking new landscapes, but in having new eyes. 



香港美食



【愛情】【美人智慧】做一個勇敢的人!如何計畫分手、贏得尊嚴

每拍一次拖,都係一個成長經歷。

無論係情陷幾天,定係苦戀幾年

每次,都可以長見識,開眼界。令到你更加了解乜嘢係愛,更加了解你自己。

由開始到考慮分開,每一步,其實都豐富咗你嘅人生。緣起、緣滅,原來都係完美。

好多人話,要睇清楚一個人嘅真面目,同佢分手就可以。如果真係咁,你都想你嘅真面目,係有尊嚴、智慧、令人羨慕。

而偏偏,分手,好多人都搞到好亂好messy。

無論你係主動分手又好,被分手又好,可能都係你人生向前嘅契機。

細個嘅時候,以為愛情一定會係長久,每一日,都可以快樂。當年紀漸長,就發現原來會經歷過感情嘅變化,而分開,亦都有可能會促進咗令一段嘅感情。可能更好,差唔多好,亦可能冇咁好。甚至,一個人,都有一種獨立同埋自信。最重要嘅,唔係努力維持一個拍拖一定幸福嘅幻象,而係懂得不斷成長、不斷去帶旺其他人。

懂得唔會再將分手,睇到係天咁大嘅事。分手,只不過係兩個人對於將來嘅睇法唔一致,並唔係一定唔好。

分手,就代表可能價值觀、生活習慣上面出咗分歧。

有分歧,未必一定係壞事,可能你地兩個,都係向住你哋命運中光明處進發,只不過你哋嘅終點唔一樣咁樣。可能,你追求嘅係富裕、有品味嘅生活,佢追求嘅,係穩定。

兩個目的地都係好好,只不過你地兩個想要嘅嘢唔同。

只要你出發點係好,對自己好,亦都對人哋好,分開,會帶來你意想唔到嘅生命機遇。

勇氣和勇敢的生命,可能,未必會盡如人意,最緊要,你無愧於心吧。

You cannot live a brave life without disappointing someone.

呢一個分手指南,就係特別準備比正考慮分手、決定分手嘅各位。希望,你學到點樣去成熟處理呢件事,對方只會記得你嘅優秀,從呢件事,都見到你嘅高品質!



冠軍級分手係點樣樣?

最高質素嘅分手,係大家都喺成熟、智慧嘅情況下,一齊將實際上嘅問題好好解決好、然之後好好放下對方。

拍拖期間嘅開心、支持、快樂、學習、相處、就銘記於心。成為滋養你生命嘅養分。

就算以後再見,唔單止仍然係朋友,甚至可以成為支撐對方生命嘅重要支持者。

你會學識,用另一種嘅方法支持,同埋愛對方。

退而求其次,稍為次一等嘅分手,就係和而不同。

可能對方嘅成熟程度有冇你咁高,喺佢心目中分開咗你就係陌路人,已經唔太重要。因為,你只需要為自己嘅行為負責,並唔需要去理會他人嘅反應。你高貴地分手,對方是否高貴地接受,係佢嘅問題。

第三等嘅分手,就係其中一方面失控,大吵大鬧,死纏爛打,要生要死。

第四等,最下等嘅分手,就係互相糾纏、將指責、憤怒、埋怨,埋藏於心,每日都唸唸有詞,覺得對方對自己幾咁唔好,死都唔肯放手。甚至將圍觀嘅朋友、網友、家庭成員都要捲入其中。呢啲係雙輸嘅局面!


好來好去:分手都要有級數

如果你嘅生命係一幅名畫,你都想將最美麗嘅時候記低。

其實,只要有計劃,有準備,你嘅分手都可以係冠軍級,令到你喺對方心目中,永遠記得你優秀、美好、智慧、可愛嘅一面。

就好似選美冠軍卸任一樣,第一次戴上后冠,到下一年卸任,優雅咁將后冠交俾下一任佳麗,由始至終,都係咁classy!哈哈!

呢一次難忘嘅戀愛經歷,可以成為對方,同埋你自己,人生之中有過浪漫又值得回味嘅一段。係風高雲遠嘅生命旅途之中,散發着芬芳嘅回憶。

預先計劃好分手,就會避免一啲突如其來嘅情況,例如小三嘅挑釁、吵架等等情況一發不可收拾,令到你忍無可忍之下,出現過激情緒化嘅反應!預先計劃好嘅分手,可以幫你控制好情況,好來好去,大家都容易掌握情況。

分手嘅過程,你一定要好好先掌握自己嘅情緒,講真,如果你真係付出過感情,就算幾冷靜嘅人,都真係要開口講嘅時候,諗起都有少少情緒嘅反應。始終分手就一定難免會有少少唔開心、憤怒、迷惘。呢啲係正常嘅反應,證明咗,你真係曾經好認真咁投入過呢段關係裏面!

其實,任何愛過嘅人,由一齊到考慮分開,都一定會經歷依戀、叛逆嘅階段。

叛逆、情緒、任性等等,如果只係用嚟當作一個生命調味劑,未嘗不可。重點係,千祈唔好掩蓋左生命裏面快樂、成長、欣賞、驚嘆、創造嘅一面!

如果唔開心多過開心,咁樣,可能已經係一段關係裏面一個警號。過分抑鬱導致胃口減少,又或者暴飲暴食,亦都代表你要審視呢一段關係對你身體同埋心靈嘅影響。

你一定要自愛,先至會得到人嘅愛。


(當愛情進入迷茫嘅階段,傷心失望嘅情緒如果裙要處理,就可以嘗試選擇用藝術去治療,網上有好多關於藝術嘅網站,有好多18世紀、19世紀同埋20世紀嘅畫作,可以激發起你嘅想像力同埋愛情觸覺)


向光芒的方向邁進

啲人成日話,要認清一個人嘅底細,你同佢分手、離婚,就會知道。

你,都想人哋記得你嘅優越,可愛,美好嘅一面,係唔係?你都唔想人哋覺得你係一個瘋狂、癡線嘅人!

一次好嘅分手,會係智慧、經驗、豁達。

好多人害怕分手,其實係害怕未知嘅將來。

更甚者,可能係害怕;之後對於生活習慣、經濟、朋友圈子之間嘅改變。如果你本身狀態已經麻麻地,一時間要接受咁多改變,可能會令你覺得好困擾!其實,只要你知道,呢啲都係好小事,始終都會過去,朋友冇咗可以再搵,經濟問題亦都可以用經濟方法解決,你就會冇咁不安。對於自己,對於別人,都會有一種隨遇而安嘅寬容。


應付小三

面對第三者,好多人,尤其是女性,都會採取情緒化嘅反應!

由單打批評到正面衝突,好多人都會好動氣。喺大陸,甚至有啲大婆去捉姦、發狂打人嘅片段!

我就反而會建議大家,諗清楚,如果你個男人唔想,根本小三係唔會有機會埋到身。佢可以埋身,就係因為男人根本就想出軌!

與其單方面咁樣想像對方「偷」你老公男朋友,你應該面對現實,就係認清楚其實你同你男朋友之間係有問題。

人好容易將個責任放喺第三者度。但其實,好多時候,當你平靜落嚟諗下,一段關係裏面,個男人揀咗第二個,可能係因為佢自己嘅問題,可能係小三嘅問題,亦都可能係你自己嘅問題。甚至,三方面都有問題。

好多人話,認真你就輸了。其實,認真本身唔係壞事,認真會讓你有機會去真心投入一段驚心動魄嘅愛情,感受到愛情嘅快樂,與及悲傷時嘅凄美,所以,認真本身唔係問題。真正有問題嘅,係執迷。

執迷,會令仇恨佔據咗你個心。導致你主動挑釁小三,言語甚至肢體上發生衝突。你每一日,就會成日諗住個小三,而唔係將重點擺係你自己度。你會成日話人,而唔係努力改進自己。

我仍然深信,發癲並唔可以幫你留到人哋嘅心。只有做一個好優秀嘅自己,發放光芒,先至可以令到其他人對你另眼相看。

三個人嘅擠迫關係裏面,你好想贏,你好好勝。

呢個時候,你一定要記住,真正嘅勝利,係喺你短短嘅人生裏面,每一日都做最好嘅自己,而唔係將自己矮化、扭曲,去成全人哋對你嘅要求。因為,人生好廣闊,比你想像廣闊好多!

無論你係乜嘢年紀、乜嘢環境,你都可以選擇改變自己嘅心態,更加有紀律,更加纖瘦,更加懂得待人接物。懂得發揮自己嘅長處,用你嘅美好,交換呢個世界嘅美好。

唔好將自己睇得咁重,睇得咁嚴重,將人生嘅鏡頭拉開,人生鏡頭包含更加多嘅人,幫助更加多嘅人。

當你喺風中回顧,回望你青春年代嘅所謂大事,你都會為當年嘅直率、幼稚、可愛微笑。

執迷,你就輸了。改善自己,提升自己,你就揀啱了。



(Sandro Botticelli嘅Venus and Mars,1483年作品)


分手的誘惑

有一句說話好有道理,就係「人情若比初相識,到底終無怨恨心。」

我成日覺得,兩個人嘅關係,如果能夠記得最開頭嘅時候點樣開始,緣份係點樣發芽,即使緣份現在開始慢慢完結,你都可以好優雅咁輕輕放開,祝福對方,感激對方,然後向人生新嘅階段進發。

當然,呢件事唔係就咁講咁容易,當中可能有感情嘅成份,亦有經濟嘅成份考慮!所以,好多人嘅講分手,就係講緊收入、零用錢、物業、共同財產嘅分配,亦都可能係減少!

冇咗鍾意嘅人已經夠慘,如果錢仲要少咗,或者係支出方面要重新分配,難怪好多人就會一心想贏!

有啲人,尤其是係一啲低質素嘅小三,就會做出各種各樣卑劣嘅行為,講大話、電話騷擾、恐嚇、扮可憐、色誘、散播是非……

我只可以引述美國前總統夫人Michelle Obama嘅一句說話,我覺得好有道理嘅說話,就係:When they go low, we go high.

嘈吵、糾紛,只會引發更加多嘅嘈吵同糾紛!只有用智慧、謙卑、感恩、正直嘅心,先至可以引領你離開是非之地,無質素嘅小人,去一個充滿愛嘅新環境裏面。

無錯,好多人心目中,留得住個男人,就等於留得住收入、社會地位嘅來源。但同時,你要知道,經濟問題,要用經濟解決。經濟問題,如果糾纏入愛情關係裏面,結果多數都係唔清唔楚,大家都唔開心。

如果,你係因為錢而唔可以損失呢個男人、男朋友,你就要審視一下,自己嘅支出收入係咪健康,同埋點樣可以開源節流,做一個自給自足、自立嘅人!好過每日乞愛情乞嚟乞去。

呢一類涉及經濟利益嘅分手,最好都係小心處理。你自立,就越多選擇。包括,一個海闊天空嘅將來。

其中一個分手好大嘅誘惑,就係數臭對方嘅唔好。尤其是當你發現對方好多大話,好多背後嘅小動作,好多你唔知道嘅關係,甚至色情桃色事件。好多人會忍唔住發爛渣,發神經,大吵大鬧。對於好多人嚟講,要去到分手呢個階段,梗係有一啲無法解決嘅問題同埋意見上嘅分歧,但係,意見上嘅分歧,並唔代表你一定要發瘋。

尤其是,當你覺得自己已經盡力去挽救迎合,對方都仍然係不為所動,甚至做出一啲冇風度、冇禮貌嘅回應嘅時候。

你一定要記住,公道自在人心。

當你自立,就能夠有資格向更好嘅選擇Say Yes。亦都有權慢慢將呢啲唔合資格嘅人係生命中剔除。

When you say yes to life, life says yes to you. When you show love, you get love.

其他人嘅行為表現反應,只係代表嗰個人嘅質素。你,只需要做好自己。

準備好分手,就勇敢地做吧。


(呢幅畫係Sandro Botticelli "Primavera"一部份,所謂嘅Three graces,就係Euphrosyne, Thalia, and Aglaia


分手的禮貌

如果,你識得點樣去尊重別人,你嘅人生亦都會更加美好。所以,令到大家都好落台,甚至,對方有過激反應,唔俾你好落枱,你都識得優雅咁walk away,去睇見到你個人嘅質素。

分手,最好都係面對面,有禮貌,感謝對方咁樣進行。充滿謝意、理解、支持嘅分開,咁樣點都好過就咁send一個短訊。

分手,其實都係為大家好。

無論最後大家做唔做到朋友都好,你要記住。

萬頃情波成覺岸,過去了。

不要忘記,人生旅途中,要修身、修心、修德。

待人以誠,有大局觀。

有時有智慧,是懂得適當時候沉默,不會自作聰明什麼都一語道盡。反而,在適當的時候要懂得說聲「謝謝」。

不要被時光淡忘、曾經燦爛的日子。

重要的,是活過的歲月。

【香港spa推介】Ten Feet Tall香港中環名人按摩私竇,真係明星級私密享受!?(自費評論)

落雨天,港島。我趁住放工peak hour人潮擁到蘭桂坊中環一帶之前,去咗L Place 21樓嘅Ten Feet Tall。

升降機門打開,裏面,係專業、清靜、好似外國渡假酒店一樣嘅地方。

第一次去嘅我,立即被黃金色嘅浪漫燈光吸引,迷離感覺,初見就有三分好感。

係中環摩天大樓嘅商業建築群之中,有一個淸靜嘅空間,令人嘆為觀止。

幾個月前,好多朋友都話,Ten Feet Tall呢個massage place名氣好大,一定要試吓。但其實,我要求嘅係一啲真正令我感到舒服、休息嘅地方,所謂嘅名人蒲點,都一定要做到呢一點,先至吸引到我。

今日,喺微雨之中,我終於見識到Ten Feet Tall嘅奧妙。







傍晚,中環即景

位於黃金地段中環L Place嘅潮流按摩店Ten Feet Tall,經常出開嚟蘭桂坊、SOHO玩嘅靚人潮人,就算未去過都一定會聽過。

Ten Feet Tall由香港娛樂大亨楊其龍Gilbert創辦,Gilbert喺中環嘅娛樂飲食界縱橫多年,開業多年嘅dragon i同Tazmania Ballroom,都分別係香港夜場嘅經典。

Ten Feet Tall同佢名下嘅其他娛樂場所唔同,走嘅路線係靜態、低調、休閑。佢時尚又注重私隱度嘅高級按摩服務,一向深受明星、富二代、名媛喜愛。

作為一間香港名人、名媛最愛嘅按摩中心,Ten Feet Tall當然喺室內設計、按摩服務方面都係別出心裁啦。而且,佢嘅佔地都相當廣闊,佔咗L Place商業大樓嘅兩層!地方夠寬敞、房間充足。



從清晨到夜晚

十月,竟然還有熱帶狂風暴雨。

當升降機門打開,踏入Ten Feet Tall,就發現佢位處嘅地方,氣溫比外面低。有種舒適、乾爽嘅感覺。

緩慢、悠悠嘅音樂,令到每個人好想走入去。

同一時間,佢嘅室內設計令人眼前一亮,低調得嚟時尚。光影迷離,美麗得不可思議。

中環係一個好特別嘅地方,因為,無論係早上定係深夜,佢嘅人氣都好高。早上,當然就係商業嘅活動,夜晚,都有好多餐館、酒吧、食肆,通宵營業。每日,都聚集左大量嘅人群。

要喺中環搵到一啲真正能夠休閑嘅地方,其實並唔容易。Ten Feet Tall位處嘅商業大樓,正正就係商業區繁華地段。

Ten Feet Tall話明係明星級、富二代級數,價錢係咪抵用?係咪物有所值先?
朋友介紹,我知道呢度有個好特別嘅服務,只要港幣三百幾蚊,就可以有個「私家房」,可以喺優雅環境之中,享受一個private foot massage。有時,做foot massage有個私家房都係好處,因為做左成日,放咗工之後嘅污where樣,最好都係避免被客戶、老闆、同事撞見!

通常去到呢啲名人開嘅餐廳、Spa,都會遇到一個問題,就係名氣太大,名不副實。但係Ten Feet Tall呢度,竟然有一種隱世秘密感覺。

而且呢種國際級環境、設計,做個按摩只需要極之本地化嘅幾百蚊,真係有點始料不及咁平。Beverly Hills質素, MK價錢。

做完登記之後,姐姐就將我帶到下一層,由於我預約嘅係一個私人嘅房間foot massage,我就被帶咗去一個獨立房裏面。裏面,有幾張超巨型嘅沙灘式沙發椅。





Ten Feet Tall比起一般嘅按摩中心優勝嘅地方,就係細節。呢度仲有提供好多新嘅本地同埋國際消閑雜誌,有旅遊、明星、投資、男性議題、女性議題,任何嘅興趣,都可以搵得到。有超過30本唔同嘅雜誌,適合放咗工想髮一鬆嘅人,唔使成日睇住個令人緊張嘅工作電話。

跟住落嚟嘅師傅,都十分之有禮貌。喺足浴浸腳嘅時間,師傅就幫我做咗肩頸同埋頭部嘅按摩,放鬆左我做咗成日野之後嘅緊張。

唔好睇少呢10分鐘嘅肩頸按摩,喺浸腳嘅期間小小嘅magic touch,亦令到之後成個療程鎮靜身心嘅作用更加有效。

正式按摩嘅時候,師傅亦都好用心咁幫我做。

可能係私人房間嘅關係,感覺真係非常之舒適,差唔多500尺嘅房間,淨係得我一個!

有好多好細微嘅細節,唔講你未必會知道,講左你就會明白。好似呢度嘅燈光設計,其實係有專人調教過,務求每一個顧客,都可以得到最放鬆嘅經驗。燈光本身,非常之柔和,令人輕易睡着。

呢個係設計師嘅原意。佢就係想製造一個光線空間,無論客人乜嘢時候都嚟,係清早、中、黃昏、定係深夜,都有一種休息嘅環境,可以完完全全放鬆、安眠。

位處中環高處,私家房,名店做massage。呢個時候,我心目中就出現咗幾隻字:chill in style。

甚至,我已經知道我嘅人生hashtag會係#chillinstyle。哈哈!

一個鐘頭過得好快,我好快訓著咗。

今次,我係好滿意嘅。

Ten Feet Tall同我想像中喧鬧,多人嘅概念完全唔同。反而得到嘅係一個非常之好嘅massage體驗。

舒緩了的,不只身體,更是心理。如果生活只有不停加班工作和夜生活,而沒有一些健康的保健,將會是多麼的頹廢。

同其他具備規模,有良好管理嘅酒店Spa一樣,整個過程中,職員從來都冇推銷任何野。

蘭桂坊、SOHO、中環一帶,是一個容易令人瘋狂的地方。高速的生活,不易掌握。去一次Ten Feet Tall,忽然覺得一切都比較美好,多了一分的快樂。


楊生開的店

楊生的故事,大家都可能有所聽聞。正所謂香港娛樂大亨,當中傳聞有真實的,也有別人虛構的,也是香港都市傳說的一部份。

Gilbert之前都接受訪問,講到佢自己對高級潮流按摩嘅愛好,令佢成立咗Ten Feet Tall嘅想法。置身佢嘅得意之作Ten Feet Tall裏面,感覺,就好像活在別人生命歷史一部份。

呢個,亦都係我鍾意香港嘅原因之一。無論去到邊度,香港密集式嘅生活,都會同一啲名人、廣告、知名浮華世界品牌活動拉上關係。香港,就係亞洲數一數二嘅潮流生活城市。

Gilbert講過,如果啲人客開心,佢會開心。

作為一個自費人客,我要多謝你令我地開心。

有時,名氣都唔係一件壞事。

原來,Ten Feet Tall,真係名不虛傳。


Ten Feet Tall 
20/f & 21/f
l place, 139 queen’s road
central, hong kong

【香港spa推介】尖沙咀胡桐足沐自費測試:潮人最愛,奇幻的按摩秘密花園!

喺尖沙咀鬧市之中,竟然隱藏咗一個神秘又隱蔽嘅秘密花園。下面係繁囂嘅加連威老道,而樓上,竟然有一個隱世小天堂,裏面,有花、有雀鳥、摩登嘅設計,裝飾着呢一個與別不同嘅Spa沐足中心:胡桐足沐。

胡桐足沐,係一個好特別嘅腳底按摩、推拿、熱石、水療,屬於Elite Beauty Group「纖之美」集團經營,係新派潮人去嘅按摩沐足店。(本文是自費評論,沒有收到任何贊助、折扣或試用)


尖沙咀加連威老道的時代記憶

每一個亞洲城市,都會有某一啲嘅區域,係屬於潮人必去。呢啲區域,通常都充滿咗年輕、時尚、潮流嘅感覺,呢啲區域嘅特點係,遊人嘅年紀較為青春,售賣嘅貨品亦比較多元化,除咗奢華品牌之外,亦都更加多係中小企經營嘅創意小店,包括潮流化妝護膚品、美髮用品、樓上Cafe、潮流衣着打扮等等……大阪嘅心齋橋、台灣嘅西門町、韓國嘅明洞、同埋香港嘅尖沙咀,就係最佳例子。

香港嘅尖沙咀,有一種香港集體回憶嘅浪漫。隨着時代進步,好多新嘅購物中心摩天大廈落成, K11、iSquare、The One等等……而同時,尖沙咀加連威老道,亦都保留左好多時代嘅記憶,其實,加連威老道自從90年代開始,已經係當時潮流嘅中心,近年隨着自由行人數增加,店舖更加多,售賣貨品更加多元化,樓上鋪、髮型設計、美容院、紅酒商、本地設計師時裝,呢啲屬於個體戶經營嘅鋪頭,令到呢區更加有特色。

尖沙咀加連威老道,曾經係潮流衣着嘅勝地,隨着潮流嘅改變,尖沙咀亦都相應變得更加高級,個人護理專門店、香薰店、護膚品店、國際品牌fast fashion紛紛落地生根。而最令人驚喜嘅係,加連威老道仍然未被連鎖店攻陷,仍然保留着某種中小企、潮人老闆、小店模式嘅新鮮感覺。唔會千mall一面咁沉悶。

呢一間以新派摩登著名嘅胡桐足沐,就係本土潮店代表之一。



(胡桐足沐位於尖沙咀分店門口,有令人心怡的植物,感覺舒服)


胡桐足沐屬於纖之美集團,同一大樓有提供集團其他美容服務)



(神秘花草引領客人上2樓「胡桐足沐」



(胡桐足沐,位於尖沙咀加連威老道,開張不久已經成為靚人潮人relax蒲點!)


胡桐足沐:尖沙咀小秘密花園

當初比胡桐足沐吸引到,就係因為佢響非常繁忙嘅街度上面一個藍色嘅招牌,同埋極之優雅嘅花藝設計,有一種講唔出嘅優美違和感。

見到咁特別嘅裝潢,同埋花藝設計,已經有感覺,覺得呢間沐足鋪頭一定與別不同。

之前都上網研究過胡桐足沐,今日就特別去試一試!

每次幫大家去試新嘅美容院同spa,都會先做少少研究,如果真係黑店,就唔需要去!所以我之前都做咗少少關於胡桐足沐嘅資料蒐集,發現網上評價都唔錯,所以就自己上嚟試吓。睇吓係咪美容黑店,同埋值唔值得推介俾大家!


胡桐足沐:傳說中的可愛系腳底按摩?

胡桐足沐身處嘅加連威老道,有好多美容、美妝、揼骨小店,當中嘅質素,有高亦都有低,有正骨亦有邪骨(各位美男美女要慎入,避免盲中中誤入唔三唔四地方)。好多呢類型嘅中小企業美容中心、足療店,有啲做生意真係唔係好老實,又或者衛生水準麻麻。講起腳底按摩、沐足、全身推拿,好多人都會覺得係一啲老人家、街坊、麻甩佬先會去嘅地方!好多呢啲地方嘅老師傅亦都有啲唔好嘅習慣,例如鍾意抽水,要搵到一個靚人、美男美女去到都會覺得自在嘅沐足地方,都唔係咁容易。

胡桐足沐嘅位置,位於尖沙咀加連威老道,係全幢!而裝修,亦都相當可愛,好明顯係主攻正骨人士、OL、女性、hehe。我上2樓之後,就去咗登記,發覺裏面雖然唔算好大,但係環境都算乾淨、優雅!係有現代式嘅可愛花園風格!

對於美容中心、Spa,我都係半個專家!你喺呢度見到我寫嘅香港spa推介評論,只係我去嘅5分1!因為,我係自費評論員,並唔係專門收免費試做着數嘅美容丐幫乞兒。對於一啲質素普通、經營手法有疑問嘅美容黑店、半黑店,你俾錢我我都唔會寫啦!做人最緊要對得住天地良心!對得住良心,真心推介,而唔係四圍乞食,亦都係美容blogger呢行最缺乏嘅!

胡桐足沐環境比想像中好,乾淨之餘,裝修接近美容院多過普通嘅足療按摩中心,令人放鬆。梗係啦,佢本身集團經營開美容,絕對唔係求其幾個腳底按摩師開間按摩店咁簡單,所有野都有規模有要求!

胡桐足沐可能擺放嘅位比較多,入到去感覺袖珍,大堂真係有少少窄狹嘅感覺。而且,腳底按摩前浸腳嘅水盆,都係普通嘅膠水盤,並唔似某些高級嘅水療中心一樣,有水力按摩水池洗腳。

但房間大小就可以接受。佢亦都有一個VIP私人嘅腳底按摩專用房間,好似我去嗰日,就被安排去到一個腳底按摩嘅一人房間,呢間房夠晒尊貴,只有一張按摩凳!夠晒私隱度高之餘,亦都令到客人唔會比其他人騷擾!

呢度仲有足部薰蒸同免費wifi提供!

老老實實,腳步薰蒸其實唔係好特別,好多腳底按摩地方都有得做,但係分別在於,好多普通嘅腳底薰蒸污糟邋遢,佢嘅顧客都係麻甩佬、麻甩婆,唔似呢間,由店員到顧客,都好似四正啲!











胡桐足沐形象比較破格,令人留下深刻印象。每一間房,都用咗特別嘅花鳥、田園設計,並唔係一般普通沉悶嘅房間佈置。

最令人驚喜嘅係,師傅質素好高,當日幫我嘅,係一個二三十歲嘅大隻靚仔,令人留下深刻嘅印象!

講真,做足療呢行好多人都係新移民嘅叔叔、嬸嬸,好少會有後生仔!胡桐足沐有靚仔技師,果然潮店有特色!

呢一點,真係令素顏嘅我突然有少少怕羞!

因為,就算正宗按摩(正骨)都係有少少身體接觸,而通常spa係放鬆嘅時間,我平時返工要着得咁靚,做人要咁polished,皮膚又要一絲不苟,衫褲鞋襪、包包、全部都要好高質素,週末spa time我就會比較casual !

正當我係最放鬆、最無任何裝甲嘅時候,竟然遇上一個咁高質素嘅大隻靚仔師傅,同我嘅肌膚有貼身親密嘅接觸,仲要刺激我極之敏感嘅腳底,令到完全素顏、形象街坊、冇任何打扮嘅我有啲緊張有啲驚!哈哈!

雖然技師佢係好靚仔,但係足療嘅功夫一啲都冇偷工減料,刺激左我嘅穴,(唔好心邪,係穴位,腳底嗰種),我亦進入左睡眠嘅狀態。

腳底係人體敏感帶,中醫亦認同某些腳底穴位,反射位係同生殖系統相連。

我承認,我係面紅紅咁被按穴。接觸,只限手同腳底,但腳底按摩術,令我竟然好似心理上有高潮!(好似係)😆

怕羞嘅我,真係面紅!

喺無任何心理準備之下被超高質靚仔做reflexology treatment,真係一個獨特體驗。

之後,我就跟左第二個女師傅去咗做一個推油(台灣人講嘅油壓),胡桐足沐個全身按摩推拿房間本身好特別,唔單止夠寬敞,而且有好多特色嘅設計!感覺,就係去咗秘密嘅花園。






推油女師傅手勢亦都唔錯,好明顯係受過訓練,照顧到手、腳、背報、頭部、額頭甚至面部嘅穴位。當中嘅過程,係酒店級數。

整個過程都非常之專業、放鬆,房間算係安靜、氣溫啱啱好。如果一定要指出一啲仲可以更加改善嘅地方,就可能係佢使用嘅按摩油。最好,就使用專業按摩專用嘅精油! (療程使用係普通嘅按摩油,冇香薰、無味嗰種baby oil)

即使係咁,過程亦都相當舒緩。

呢個按摩秘密花園可愛嘅地方係,雖然環境靚,地點都算方便,乾淨,價格都唔貴,大概200蚊一part。

有時,某些平價嘅推拿按摩店,衛生環境差,客人始終去到都唔會好放鬆,亦都係呢個原因,我好少去大陸按摩。通常只會去香港酒店、高級美容salon。喺呢度,衛生環境好好,令到我可以放心瞓覺。

由於body treatment做得太好,我再加鐘!真正全面舒緩!

Treatment之後,亦都有另外一個靚仔哥哥坐reception ,簡簡單單推介一下package之後,亦都無任何嘅hard sell。讚!

其實,佢真係唔使sell任何野,我個心裏面,已經決定咗我會再返嚟。

尖沙咀胡桐足沐嘅自費初體驗,感覺相當良好。超乎預期!呢個係我會推介俾大家,亦都會再返轉頭嘅地方。

做完按摩之後,我有一種會心微笑嘅感覺。一種莫名又忘言嘅幸福感,彌久不散。

除咗遇到靚仔師傅,更重要係久違了嘅身心休息。

呢一刻,我感到悠游、自在。

落樓之後,尖沙咀街頭遊客仍然湧湧,我卻淡然平靜。
一個人一生中最重要嘅關係,就係你同你自己嘅關係。適當時候,就要去滋養自己、肯定自己、鍛鍊自己、提升自己。美容、gym membership、按摩呢啲錢,真係唔慳得。

每個人都會走過一些路。一個treatment,可以在繁忙生活中,幫助整理身心。

歲月悠悠,在秋天乾旱的天氣中步行商業街。微風薰人,我凝望天空,黃昏的陽光照亮了天空,而白雲聚散無常。「what a lovely evening!」我更新了facebook status。


胡桐足沐

香港九龍尖沙咀加連威老道24號全幢


營業時間 : 

Mon-Sun 12p.m.-11p.m.電話 : 2706-2988



香港SPA推介




【香薰】香氣旅行:香水香薰DIY製作教學(只需五份一價錢媲美千元產品效果)

你知道嗎,有一種幸福,叫香水香薰DIY。

完成一整天繁忙的工作,跳入滿載熱水的浴缸沐浴,浴室枱上靜靜地燃點着的,是自己設計的高質香薰。

點着香薰,在寂靜中,找回自己。

我的精油、香精和香薰蠟燭好多,有購買的,也有透過半製成品原材料自己造的。

有天然的,也有香味設計師合成的。有古巴Havana味道的、有Panna Cotta甜點味道的、有橘子花味道的。也有曼谷茉莉花味、西貢的青檸味。甚至,神秘的阿拉伯之夜神話味道、澳洲開恩茲海洋氣味……

每晚沖完涼,就入睡房,就跟隨當時的心情,或拿出一本小說,或一本外國旅遊雜誌,又或是播放一套博物館紀錄片、外國劇集,選擇香味點燃,然後進入那個意境入面。

在迷離的異國香味之中,放鬆,放開。在充滿夢幻色彩的氣息中,慢慢進入夢境。

香薰不知是誰人所發明,但發明的人一定好偉大,它為我們改變了心情、改善了心境。我大愛!(自費評論,沒有收到任何產品贊助或試用)


香薰蠟燭尋幽探秘

香薰,主要可以分為兩種,第一種,就是有植物天然精油做的天然產品essential oil。這種產品的好處,就是成份天然、有種治療心靈的效果。

第二種,fragrance oil,就是平時香薰蠟燭的主要材料,一些製造出來的香味,就是香水廠、調香師使用的香味。一般高級的香水,都會同時使用這兩種材料,即是同時使用天然精油、與及香味實驗室、工作室製造出來的香味,因為,純天然精油的味道選擇有限,而且合成香精的變化和層次比較多,能夠補充天然精油味道的不足。兩者,是相輔相成。

簡單來說,essential oil就好像畫畫,天然精油是水彩畫;合成香味fragrance oil,是電腦CG繪畫。而好的藝術設計,應當兼顧傳統的藝術觸覺,與及高超的後期製作效果。你在一般香港的酒店聞到的,就是這種設計出來的味道。

高級香薰蠟燭在香港越來越受歡迎,可能,你都曾經為某幾個味道着迷過,甚至傾家蕩產過。好多香薰產品,都以回憶、旅遊、甜品、星座、甚至城市命名,當中的味道,各有特色,亦相當獨一無二。

那些動輒五六百元甚至超過千元的香薰蠟燭味道,究竟是何處來?

今日就教大家點樣用平價嘅方法,直接從原材料入手,只需要五份一價錢,就可以製作屬於自己,有獨特浪漫回憶嘅香水同香薰產品!


香水香薰原材料揭秘

市面上出售的香薰產品,價錢由最平的$150左右,到最貴的$1000都有。

但其實,如果你識得買,原材料價錢只需要五份一。

在香港,購買一些天然香薰精油essential oil的原材料(薰衣草精油、甜橙精油等等)其實很容易,大部份的連鎖店包括Log On、The Glam Beautique、甚至廉價的彩豐行也有出售。

反而是一些比較專門的專業級調香師合成香精fragrance oil,我指比較高質素那種,不是街邊平價cheap貨那種,就比較難搵。

由於fragrance oil比較難買,亦都是現今四面上的香薰蠟燭、香包、diffuser等的重要材料,今日就會重點介紹。

對初學者來說,DIY最好都是先行製作香水、複方香薰等等的入門級產品,當你的技術、材料、儀器比較專業的時候,才進階到製造香薰護膚品。

對一部分香薰愛好者,在連卡佛聞過那些高級的法國專業大師級調香師製作的香味,就會念念不忘,而且,經常幻想自己都可以設計出一種,既有意境,又難忘的香味。

不知道大家知不知道現代設計大師Andy Warhol,他同樣為香水、香薰着迷。在當時他成長的階段,雜誌上面的香水名字,就為之瘋狂!

Guerlain - sous le vent 
Marcel Rochas - Avenue Matignon 
Lengyel - imperiale Russe 

的確,氣味,的確能夠觸動心靈,令人紓緩之餘,亦能進入某種特定的意境。

最便宜購買fragrance oil香薰原材料的方法,就是直接向廠商大量訂購。但因為一般人製作香薰蠟燭、diffuser、香薰room spray其實只會是興趣,不會是全職工作,所以小量購買材料,可能較為化算!

對於一些香薰蠟燭、香薰產品狂熱人士,就可以從外國的Amazon上定購香精、調香原材料,但因為時間耐,郵費貴,而且沒有使用,都係香港零售店出售的比較適合!

香港有兩個地方可以購買到fragrance oil合成香薰的原材料,兩個嚴格來說,都是屬於零售,不算真正的批發價,但價錢也平到足以滿足到有興趣嘗試開創自己香薰事業、或設計自己香薰DIY的朋友!

第一個購買fragrance oil途徑,就是香港著名的香薰蠟燭製造商The Candle Company Hong Kong,他們同時也有出售香薰的小樽原料。(essential oil、fragrance oil也有)


(The Candle Company位於中環擺花街的店舖,出售大量製造香薰蠟燭的原材料、與及香薰蠟燭的製成品,是香港歷史較為悠久的香薰、香精經營業者。)



(The Candle Company出售的蠟燭產品眾多,好多是製成好的香薰蠟燭,如果你自己要求較高,想製造出比市面上出售更加豐富、更具有個人色彩的香薰蠟燭、香薰產品,就可以購買原材料回家自行製作)



(The Candle Company出售的香薰產品,包括天然的精油essential oil,及合成的香精fragrance oil)

The Candle Company出售的合成香精,價錢大概港幣$100左右,有好多味道,薑花、白蘭花、檀香、白砂、檸檬草等……這些香精適合製作自家香薰蠟燭、或在客廳用。

The Candle Company在中環位於擺花街的總店,裏面的香薰選擇又多又齊,無論是選擇購買香精fragrance oil,或天然精油essential oil,甚至已經做好的香薰蠟燭,選擇都好多。適合香薰愛好者慢慢選購!

第二個購買調香師級數的fragrance oil途徑,就是Glamour Perfume。

Glamour Perfume係香港市面上少數選擇極多,價錢相宜,而且開放給零售消費者的香精供應商。不經不覺,Glamour Perfume經營已經接近10年!是香港的香薰始祖之一。



(Glamour Perfume出售香水、香精的原材料,適合香薰DIY !)

Glamour Perfume主要的生意業務,就是出售DIY香水材料、香薰。

如果想自己製造香薰蠟燭、香薰產品,無論是之用,還是在市集、網站,這裏都是入貨的好地方。當中的香味選擇極多,有大路的產品例如薰衣草、玫瑰,到冷門的牛奶蜜糖、棉花糖、青竹、冷水……Glamour Perfume的選擇極多,亦非常適合自己DIY,製作出自己的香水或香精,在房間燃點。

Glamour Perfume出售的是高濃度香精,只需要一兩滴,就可以在一般的水氧機使用。最吸引人的地方,不只是價錢比較平(雖然這也是),而是選擇眾多。適合你自己選擇不同的材料,創造出自己一同的香薰意境。


(Glamour Perfume出售的香薰DIY、享受DIY原材料選擇極多,基本上市面出售的,這裏也有發售)



(Glamour Perfume出售已經調好的香薰油、按摩油、沐浴露)



(水氧機,只需要加入小量的香薰,就可以創造出獨一無二的環境)


香薰產品、香水DIY方法

無論fragrance oil在哪處購買,使用的方法都是非常簡單,只需要一個普通香薰爐,或者是水氧機,無論是單方使用,或者是混合使用,幾滴,就可以創造出獨特的氛圍。

自己去嘗試、欣賞不同的香薰氣味,再利用自己的獨特藝術觸覺,去創造、發明不同的味道,足以消磨你一個幸福的下午!

你可以選擇雲呢拿、配合玫瑰,做出了粉紅的Panna Cotta甜點味道。一時間,房間充滿了甜品店的幸福感覺!

你也可以選擇茉莉花的味道,頓時,你的房間就像曼谷一個平房的後院,沁出醉人的熱帶茉莉花香。

如果你喜愛旅遊,加入玫瑰花、海風的味道,就能喚起陽光下西西里島的海洋氣息。

東方神秘色彩,好像印度的廟宇,就可以用玫瑰、檀香的味道。至要幾分鐘,千年文化中的輪迴、生死、彷彿你都參透了。

如果你夢幻一點,就可以隨意使用香味去製造童話式的秘密花園:玫瑰、月光花、加入白麝香,就像在繁花盛開的私人秘密花園睡覺。

如果你想製造獨一無二的香薰噴霧,你只需要把適量的高質素礦泉水,加入幾滴香薰混合,配上噴嘴使用,就可以。

這些香水DIY、香薰DIY ,就是用三種不同的香味配合,總共價錢都不會超過$300 ,選擇好多,可以創造的變化更多,也不會限於高級的香薰店天文數字的價錢。

現實總是令人緊張,好多人總是緬懷於過去、不滿於現實、徬徨於未來。而香味,就可以帶你去另外一個世界。一個,充滿奇幻、旅遊獵奇、歷史文化、美好的世界。


地址:

The Candle Company
中環擺花街11號地下

Glamour Perfume & Fragrance 
1.尖沙咀加連威老道46-48號G-Square地下G05 
2.屯門時代廣場北翼3樓千色店C14


Counter

Flickr Images