【男神】性感男神內幕系列:樊野RMIUC離婚與天菜網紅現象

天菜男神小鮮肉,有一種天生領袖魅力,每一次見到佢地,自己都會想提升自己,會想變正啲,變charming啲,做最好嘅自己。

網上紅人「樊野」RMIUC ,就係其中之一。大隻、靚仔、走在潮流尖端。每一年,樊野都不停變化,幾年之間,樊野由網上紅人變成現實世界嘅紅人,由Grindr啪啪啪滾床單,到同紐西蘭靚仔結婚,到光速離婚,都成為焦點。由紐西蘭回流內地之後,仲上全國電視節目「奇葩說」,又出自傳,成為明星,而家粉絲遍布世界各地。近年,樊野仲創立自己品牌「野的」,由微博紅人變成淘寶紅人,銷售頭24小時,銷售額已經超過35萬,係真正有樣又有商業頭腦嘅男神。

有啲人,係注定一生不平凡。不平凡,因為佢哋根本就唔想平凡。

今日大家研究一下,網上天菜男神嘅現象。





樊野隨便上網貼幾張相,已經得到成千上萬嘅讚! )圖片來源:樊野微博


(如果講樣貌身材,樊野簡直係神級, 10分滿分,佢會攞10分)圖片來源:樊野微博


樊野已經成為潮流指標,舉一動都會受到網上嘅粉絲、潮流雜誌關注)


樊野受邀請為潮流雜誌Mens Uno拍攝嘅專輯)


樊野賣萌,都好多人爭住like)


樊野,你所不知道的過去

好多人見到而家已經變成男神嘅樊野,但係你又知唔知道佢嘅過去?

為咗俾大家更加了解樊野,我就做咗非常之大規模嘅起底。

其實,樊野早在10年前,已經開始網上活躍,出現喺網上型男、帥哥貼圖討論區。當然好多人一見到佢,就已經驚為天人。雖然年紀細細,少年樊野樣貌身材已經好出眾。




樊野嘅少年時代,已經係小鮮肉,靚仔呢樣野,真係唔係個個都有咁嘅福氣。年紀細細,已經有種人生勝利組自信)

好多人淨係知道,樊野佢係海外華人。其實,佢係中國內地出世,直到2002年,就去咗紐西蘭讀書同居住。

而家嘅佢,大家都會知道佢係(有極大量女性粉絲嘅)同志天菜,但其實少年時代嘅樊野,都有同女仔拍過拖。

正如樊野自己所講,而家佢嘅粉絲比例,大概係六比四,六成,會係女性;四成,係男性。一個好似樊野佢咁樣嘅男仔,當然會令到好多女仔同hehe風狂啦!

樊野曾經出版過一本自傳,叫做「待續」。當中,樊野就提及少年時代嘅戀愛經歷。當時,佢嘅初戀,都係女仔。之後嘅一次戀愛,同樣係女性。

不過,隨着年齡增長,去到外國之後,就開始接觸到同性,亦都開啟咗佢嘅自我發掘之路。

亦都係有嗰時開始,樊野,慢慢變咗做今時今日嘅同志天菜男神RMIUC。


樊野不為人知的戀愛經歷

RMIUC同JT,曾經係網上熱門搜索字。

呢個,係樊野同佢前夫Josh Taylor嘅網名。

曾經,兩位顏值超高嘅男神級人物,轟動地結婚,係網絡大事。曾經令到無數嘅粉絲心跳加速!兩位靚仔嘅結婚照片,同埋冧到爆嘅結婚過程、花絮,曾經令到網上好多食花生嘅人感到羨慕又妒忌!







(當年RMIUC樊野同Josh結婚同離婚,非常吸睛)

而家嘅樊野,好多人都只係識得佢嘅高姿態同性結婚,同埋之後同樣震撼嘅離婚。每個人嘅人生,都有前傳同埋故事。呢啲有關樊野背景嘅故事,其他網站係搵唔到。

根據佢嘅自傳「待續」透露,之前,佢都同唔同嘅男生係紐西蘭拍過拖。當中有白人,亦都有亞洲人。又出咗櫃嘅,亦都有從冇出過櫃嘅。

帥哥,就有帥哥嘅煩惱。其中一個煩惱,就係好多人會想結識你,同你拍拖,又或者只係一夜情啪啪啪。

樊野同佢前夫,相識嘅經過,竟然係通過網上約炮app Grindr。

根據樊野佢自己嘅講述,相識嘅經過,係網上見到Josh嘅相片。當時,佢就問佢喺度做緊乜嘢。佢前夫Josh就答佢,正在bubble bath!而佢就話,我可唔可以過嚟同你一齊沖bubble bath?

相比起外表突出,「百人斬」嘅樊野,佢前夫Josh單純好多,好明顯係種容易沉船嘅人。果然,同男神上完床之後,就被人啪到沉咗船!

之前,樊野仲特別提過佢,呢個只係SP嘅關係,千祈唔好以為係拍拖。而小J,竟然話,可唔可以拍拖。

樊野就好霸氣咁話,等我諗諗。

其實由始至終,從旁觀者嘅角度嚟睇, Grindr識嘅SP ,真係未必適合做老公。紐西蘭前夫Josh,可能真係比較純真,覺得可以試試。

SP變老公,可能已經為呢段感情注定左結局。

依家諗返,有啲事情,真係不能避免。

有時,有啲人特別吸引人嘅地方,就係佢嘅自信。有時愛理不理,獨特嘅愛情觀,反而令一個人更加有吸引力。有時做自己,可能長遠更加好。

其實,同一個好似樊野咁高質素嘅人一齊,難免都會有啲心理壓力。

喺自傳入面,樊野就提到戀愛價值觀。

之後,我會一一講述。


情慾世界的盡頭,是婚姻!?

樊野(RMIUC)同佢嘅紐西蘭前夫Josh,係喺網上交友程式結識。對於樊野,Josh真係一見鍾情。

好快嘅親熱之後,Josh就認定對方係拍拖嘅對象。

當時嘅樊野,都有猶豫。

約炮app上面認識嘅SP,係咪真係適合作為拍拖甚至結婚嘅對象?

一段關係能否長久,好在乎兩個人嘅價值觀係咪一致。有啲人,係一流嘅SP。但係作為老公,就好難講。

好明顯,同天菜男神啪啪啪之後,Josh佢係沉咗船。


(Karim Konrad拍攝樊野照片,好靚仔)



一直喺網上有跟開樊野嘅朋友,都知佢除咗Eddie Fan之外,仲有一個網名,以前,佢都用呢個網名行走江湖搵食。當時個網名叫做RMIUC。其實,就係Rape Me If You Can嘅簡寫!(Catch me if you can係一套荷里活電影,講述男主角足智多謀,好多人想捉佢,都捉唔到!同一道理,可能好多人都會想上佢,但上唔到!)

換轉係你,面對着樊野咁高質素嘅男神,可能你都會想沉船。但係,你都會明白,有啲嘢唔係你單方面嘅付出。單方面嘅付出,叫「做兵」!

如果大家都好好奇,Josh有乜嘢辦法,可以令到樊野一齊沉船?由SP升呢到拍拖,甚至最後同男神結婚?

認識Josh之前,樊野就同一個長期嘅伴侶分開咗。

樊野喺佢本自傳裏面,就提過,原來,Josh係一個好細心嘅人。當時,就有幾個貼心嘅舉動,令到樊野另眼相看。

當時嘅佢,就參加緊一啲跳舞嘅比賽。而Josh就非常之貼心咁樣去觀看之餘,亦都幫佢錄低過程。

樊野當年要去歐洲旅行,冇一啲見得人嘅行李箱,而Josh佢就好爽快咁將自己嘅行李箱借出,又寫咗一封信,叫人喺飛機度先可以睇。內容嘅大意,就是自從Eddie喺佢生命中出現左之後,令到佢嘅生活變得更加美好。

一直,樊野都無應承拍拖嘅要求。

一直,雙方嘅關係都只係SP。

係佢去歐洲旅程嘅時候,兩個人短暫嘅分開,令到佢諗多咗,究竟想要乜嘢。最後,返到黎之後,就答應咗一齊。

六月認識,十月結婚。




在世界之中找尋愛

每個人,都係俾佢之前嘅成長經歷、經驗,影響佢嘅思想同埋行為。

除咗當事人之外,無人可以確切地知道,點解係嗰個時刻,樊野同Josh會覺得,結婚,係一個好嘅決定。

樊野,係佢個本著作自傳「待續」裏面,就講自己愛情的價值觀。其實,呢啲價值觀,唔多唔少都可以知道,佢其實係想搵乜嘢類型嘅伴侶。

樊野一直提倡嘅,就係做一個有價值嘅伴侶。就係喺樣貌、身材、各方面都非常之出眾嘅人。咁樣,先至可以搵到相應嘅人。

呢一樣野,其實無錯。但係,你要明白,有時純交換,係比較短時間,短暫性。

講真,如果同一個咁高質素嘅男神一齊,其實都比較大壓力 。

你會每時每刻都要發揮最佳狀態!求其一陣都唔得。

跟住佢自己寫嘅自傳,發現佢哋嘅過程,真係非常之快速。由網上認識,一齊沖涼,滾床單,拍拖,結婚,只係幾個月嘅時間!

睇返佢自己講述嘅求婚過程,都幾特別。呢段感情裏面,其實都幾明顯,Josh 非常之緊張樊野。結婚戒指,都係Josh去試,同埋訂購。

Josh去珠寶店比左訂金,訂咗呢隻戒指之後,樊野,就靜靜地攞咗,下一次旅遊嘅期間攞嚟向Josh求婚!

Josh好感動咁應承咗。The rest is history.

但其實,戒指,好似唔係佢買……

當然,如果你嘅眼中真係充滿咗戀愛,比戀愛嘅感覺令你失去左理智,就難講。

當然,作為外人,永遠都唔知道百分百嘅內情。但係從一啲蛛絲馬跡,都可以觀察得到,呢段感情,兩個人之間對於呢段關係嘅睇法係點樣。

對於佢哋嘅光速結婚,同埋之後嘅分開,旁人其實係冇乜資格評論。其他人可以做嘅,其實係學習下兩個人之間嘅相處,幾時決定結婚,點樣令到兩個人相處嘅過程更加好。

(未完待續)






【微旅行】法國凡爾賽夢想:澳門巴黎人The Parisian酒店遊記(自費評論)

美學、激情、享受、飲食、夢想、藝術,這一切,都同法國巴黎有密不可分的關係。

巧手法式甜點、凡爾賽風格、協和廣場設計、凱旋門、玫瑰酒、印象派畫、原來已經悄悄來到。

網上近期出現一個有巴黎鐵塔、旋轉木馬的廣告,口號是「像巴黎人一樣享樂:The Parisian」。

原來,位於澳門金光大道渡假城、威尼斯人的最新姊妹酒店「澳門巴黎人The Parisian」,最近開幕!

十年前,當時萬眾期待的The Venetian開幕時,室內貢多拉,就曾經吸引無數遊客;

十年後,The Parisian引入艾菲爾鐵塔,邀請遊客去鐵塔頂端高空談情,半空中吹風,欣賞夜景。

The Parisian承諾帶俾遊客耳目一新嘅法國巴黎體驗,又再一次引起澳門遊客嘅討論!

我之前去咗唔同嘅旅行社、自由行討論區、旅遊網站、同業界人士傾計,收集關於澳門巴黎人嘅旅遊資料,自己亦去一個weekend ,務求整理一份完整嘅資料,方便大家去體驗呢一個法國凡爾賽宮特色、充滿電影感嘅旅程推薦



(The Parisian官網圖片)




(The Parisian廣告好浪漫)


法國星月神話

巴黎聖母院、玫瑰園、凡爾賽宮,係法國特色。

法國巴黎聞名世界嘅酒店有好多,當中包括Ritz Carlton,Crillon,Plaza Athenee,Meurice等。

澳門巴黎人酒店,係金沙「金光大道」項目最新發展之一。設計意念,就係以法國宮廷作為藍本。


香水之城的奢麗

不知不覺間,隨着澳門成為娛樂超級城市,好多著名嘅酒店亦都搬到澳門。The Parisian「澳門巴黎人」係全世界第一個以巴黎人作為設計概念嘅主題酒店。當中,淨係酒店項目嘅投資,已經超過$3,000,000,000美金。論規模、設計、美倫美奐程度,絕對係澳門所有酒店之中上上之選,遊客選擇酒店時性價比好高。

旅遊度假,住嘅酒店最好都係光鮮新淨,澳門巴黎人酒店係2016年9月先開幕,所有設施,都好似新嘅一樣!路氹金光大道咁多酒店,如果價錢差唔多,就梗係揀一間新。

對於法國嘅凡爾賽宮,同埋法式嘅庭園、建築,可能你都會有種莫名嘅喜愛。尤其是法國嘅面具舞會、迴廊、列柱、水池、設計師名店、凱旋門、鐵塔等等,本身都充滿傳奇色彩。係澳門巴黎人,就可以一次過體驗入住法式皇宮、盡情消費享樂、鐵塔下面晚餐、喺鐵塔頂端欣賞光之城嘅體驗!當然,酒店嘅賭場、泳池、健身室設備,都等着各位享受啦!

最令人驚喜嘅係,如果你識得去買套票,價錢就會平好多!我會教你點樣用最平嘅價錢買到最靚嘅套票,乜嘢景點最華麗,點樣可以免費食酒店高級晚餐。



(澳門巴黎人shopping mall)


澳門巴黎人外表)


金光閃閃之旅

巴黎,被稱為city of lights,和澳門金光大道crossover,真係特別。

金光大道,真係尤如其名。金光大道兩邊嘅酒店、名店、渡假村、娛樂場,金碧輝煌,有令人着魔嘅魔力。同樣位於金光大道嘅澳門巴黎人The Parisian,特別適合兩個人,或者幾個親密朋友嘅浪漫之旅。

我去過法國巴黎。巴黎市政廳、小提琴家、奶涷早餐、花園豆子、聖母院,仍然在心裡面。

莫奈的睡蓮油畫,那麼經典。

The Parisian,正好溫故知新。


旅遊小貼士

想去澳門巴黎人嘅人客要注意,金光飛航可以由上環信德港澳碼頭,或尖沙咀中港城,直接去到氹仔。到步後亦都有免費巴士直接去到巴黎人,呢個係最方便嘅做法。

由於可以喺海港城/中港城出發,最適合一個Friday嘅晚上,行完海港城,就可以跳上船,去澳門巴黎人渡假村,過一個Parisian Weekend!

搭船價錢普通等每程大概$177到$200。特別客艙由$287起。(詳情可參閱官方網頁最新船票資料:http://hk.cotaiwaterjet.com/ferry-schedule/kowloon-macau-taipa-hk.html)

澳門巴黎人酒店住宿價錢,星期一至四每晚大概$700左右,周末大概$1000左右。

其實香港人最着數嘅方法,都係購買套票(即價錢包含船票、住宿、早餐、酒店特別觀光活動)。

澳門巴黎人套票邊間旅行社最低,視乎你自己要求當時係點,有啲旅行社會提供巴黎鐵塔夜景嘅住房,價錢就會貴少少,如果你冇乜要求,即使係普通風景嘅住房都可以嘅話,價錢就會更加平。總之,如果你肯每人比$1000 ,就會有個好好嘅假期。

大部份香港旅行社代售嘅套票都會包括:

來回香港或九龍船飛
早餐或午餐(其實可以免費升級享用超正嘅鵝肝自助晚餐,下面會解說)
住房(一般套票不包括巴黎鐵塔夜景住房,但入住當日隨機有機會被升級)
大部份套票,都會增送巴黎鐵塔7樓體驗。

巴黎人酒店官方網頁套票,並不包括船票!(好多香港人係格價網站睇到之後,就好快咁覺得酒店官網平,但其實未計船票錢! )所以,就算價錢低,如果香港人去,都要計埋來回船票嘅價錢,先至可以知道總共價錢。


澳門巴黎人外觀


澳門巴黎人酒店部分



法國埃菲爾鐵塔體驗

還未到達澳門巴黎人渡假村,遠遠嘅地方,已經見到佢嘅地標建築:埃菲爾鐵塔。

我帶咗幾個Laduree買嘅macaron。Louis Vuitton Keepall入面,亦準備咗海明威嘅書「流動的饗宴」。

「流動的饗宴」1920年旅居巴黎嘅回憶錄,包括佢昔日生命中最愛時光嘅文字。

佢講過,如果人夠幸運,年輕時到過巴黎,巴黎會永遠跟著佢,因為巴黎係「流動的饗宴」。

巴黎鐵塔,建於1889年,世界博覽會。

澳門巴黎人The Parisian度假酒店嘅特色,就係可以登上The Parisian埃菲爾鐵塔。

感受喺巴黎一樣,高居臨下,欣賞城市之光嘅體驗!

埃菲爾鐵塔分兩層,如果淨係去7樓,如果酒店住客,係免費!如果係普通遊客,就要收費$160。

位於澳門巴黎人嘅巴黎鐵塔,好多香港客人都會比較疑惑,會想知道值唔值得去。

對於呢個問題,我會話:「不需要用看紀錄片的角度看荷里活電影」。

法文中Joie de vivre ,就係指生活樂趣。

澳門巴黎人嘅鐵塔體驗,其實有少少似係隔離酒店新濠影滙嘅蝙蝠俠體驗一樣,係俾你重新經歷電影中嘅經典場面,並唔代表蝙蝠俠真係存在!亦都唔係嘗試去說服大家,蝙蝠俠真係响呢度出沒!

The Parisian巴黎鐵塔都一樣,佢係俾你感受一下,有關巴黎嘅文學、電影、小說、戲劇之中嘅環境。令到每一個人,都可以體驗一下法式地標美感。

體驗夜光之城,就是Joie de vivre 

去到現場之後,就發現當初嘅懷疑係一掃而空。巴黎夜鐵塔真係好靚,夜景亦都迷離,隨着工作人員嘅指示,經歷過排隊嘅大堂,進入巴黎鐵塔7樓觀景台,再上37樓。


澳門巴黎人鐵塔部分)


(鐵塔入口部分)


巴黎鐵塔發出奇異光芒)



(可乘搭巴黎鐵塔上37樓觀光台)


(鐵塔37樓觀光部分,可以睇到夜光)

這裏沒有聖母院、聖路易橋、也沒有羅浮宮和成街藝術家、卻有完美甜點、玫瑰酒和靈感。

十月夜空,沉思。

喺鐵塔夜空之中,微風之中,

我忘卻了好多事。

我忘卻自己身在何方。


可愛貼心服務

講下Parisian服務。

呢個The Parisian行程係充滿驚喜,由check in一刻,已經俾佢極為華麗嘅凡爾賽宮住客大堂吸引。唔單止環境非常之華盛,服務員亦都會貼心咁將樽裝水同埋糖果奉上正在排隊嘅人客,貼心服務令人大讚。



(碰巧我訂的房間已經滿了,佢哋幫我upgrade去更加好的巴黎鐵塔房間。)


免費高質自助晚餐

Parisian住客餐飲方面,真係有一個小驚喜。

當我地check-in嘅時候,酒店嘅禮賓司就同我地講,雖然我哋買嘅套票,只係包括早餐或者午餐,但係巴黎人酒店暫時容許住客用早餐券去食晚餐。澳門巴黎人自助餐晚餐,係三餐之中最出色,而且價錢都最貴,如果walk in要最少$400 ,兩個人就要$800。如果用早餐段抵銷,就完全免費。由於呢個免費升級優惠太着數,不設電話預訂,只可以根據現場情況,先到先得。

所以大家買套票嘅時候,都可以問下,早餐可否升級!慢食sashimi,點都好過早上食多士!

根據服務員嘅小貼士,就係早去早着數。當去到現場嘅時候,就發現真係早去早着數。因為自助晚餐於六點鐘開始, 5點9左右,已經開始有人排隊,直覺話比我知,如果啲seasoned travelers 都知道呢個係好野,就一定係好正。

餐廳嘅環境,環境廣闊,坐得舒服之餘,好多座位,仲可以望到鐵塔。環境令人有點喜出望外,因為,裝潢都比較簡潔、法式,整體優質嘅體驗。








日落鐵塔下慢食,享受生活,真係渡假。

自助餐正式開始前,服務員為每台人客送上免費檸檬茶,舟車勞頓一日,到達酒店之後,有人放上一杯冰凍、有檸檬香味、甜蜜嘅檸檬茶,真係一個小驚喜。因為呢啲貼心嘅動作,令到大家都對酒店印象好好。




入到去,就發現唔單止環境靚,食物嘅質素亦都好高,絕對香港五星級酒店級數,選擇多,魚生、鵝肝、長腳蟹、煎海鮮等等……氣氛比較出色,芝士蛋糕、澳門曲奇等等,都令人留下美味印象。




澳門渡假村裏面,巴黎人同威尼斯人最大嘅分別,在於威尼斯人比較男性化,而巴黎人偏向女性化。The Parisian接載嘅巴士,都係用鮮艷嘅粉紅色同金色。主打鍾意靚、鍾意華麗、法式浪漫嘅遊客。





在浮躁時代,浪漫的資本你有沒有?

澳門巴黎人,到處都是超現實的電影感覺。華麗的佈景、宮廷裝飾、數百億投資……都彷彿是一個超現實的舞台。

好少去旅行,係好似今次,會每分鐘都享受。

可能,我去嘅時候,都只係一個少少預算嘅澳門quick getaway。所以,好多方面都有原本諗唔到嘅驚喜,佢都超出左我嘅預計咁好。

澳門巴黎人渡假村,總體來講以quick getaway係一個大正評。而且價錢真係好抵。陽光、泳池、法式裝潢、名店購物、上巴黎鐵塔體驗,渡假要有嘅,都可以一次過享受。

對於「巴黎人」,「威尼斯人」一樣嘅澳門渡假中心,一般香港市民反應係幾極端:一係好鍾意,一係好鄙視。

鍾意嘅原因多數比較簡單:靚酒店、大規模resort、設施齊全、賭場玩樂……而唔鍾意嘅原因,會係批評佢覺得過於浮誇、好多自由行遊客、好多人好嘈等等……

澳門巴黎人渡假村,俾人嘅一種感覺,就係逃避現實,暫時離開現實環境,去一個幻想中嘅巴黎、法國宮廷環境放幾日假。現實中嘅你,可能工作太多,休息唔夠,拍拖時間唔夠,同家人朋友相處時間都唔夠。為咗供樓連瞓覺嘅時間都唔夠,唔好講話幻想、人生理想等等較為高層次嘅題目。

即使如此,人生都要閃亮。

人生,就是要閃閃亮亮。

我經常覺得浪漫嘅資本,係要自己爭取。如果所有嘢都抱着消極、否定嘅態度,人生就會覺得好悶,好沉重。有時,無論生活係幾咁壓迫、甚至有啲苟且,都要相信,有一日終於會變好。你生命中,仍然有一啲美麗、美感、驚喜,值得去發掘。

就好像法國名作家Marcel Proust說過:

The real voyage of discovery consists not in seeking new landscapes, but in having new eyes. 



香港美食



【男神】美男萬聖節:在黑暗之中仰慕他

萬聖節傳入香港已經好多年,如果今年你仍然穿着那些塑膠製的萬聖節服裝,帶着硬膠面具、尷尷尬尬地流連街頭,和幾個普通朋友在蘭桂坊SOHO飲悶酒,真的是令人尷尬的一件事。

好端端的外國節日,為什麼香港的萬聖節,要有這麼廉價庸俗感覺?

全世界都在做着一些愚蠢行為的時候,清醒的你,就要好好獨處一下。

一年365日,有364日都是正面、光明、樂觀、積極。那麼為什麼不可以有一日可以盡情地享受黑暗的魅力?

就這麼一天,你可以盡情地執念、感傷、迂迴。

黑,有黑的魅力。好似黑朱古力一樣,苦澀之中,竟然有種牛奶朱古力不能相比的層次。苦,都有種獨特的美感。

當全世界都嘻嘻哈哈地喧鬧喧嘩,享受那種所謂的halloween歡樂的時候,你不妨一個人在家,思考一下死亡、殭屍、永生。


暮光之城教會你的事

在暮光之城系列電影裏面,美男殭屍Edward Cullen可以為女主角Bella付出一切。










付出,都可以分為高層次和低層次。低層次的付出,就是俗稱的做兵,就是被別人利用了。高層次的付出,就是會令對方教生死相許。Edward不只是做兵那麼簡單,更是一種心靈上對Bella的保護,珍惜,欣賞。那是一種高層次的付出。就是因為這種原因,令到大家對他着迷。令到你的愛情和性慾,有激情的感覺。

遇上一個蒼白、有超能力、靚仔殭屍,可能是你的變態愛情幻想。當現實越來越平庸無奇,就越令你沉溺在幻想入面,你希望有個像Edward的靚仔殭屍出來,趕快把你咬一口。

平庸的現實生活,比不上殭屍的危險癡情。

這就是暮光之城的吸引力。

之前台灣天菜男神高以翔也拍過改編自外國小說的荷李活殭屍影片,好像叫做「天使聖物:骸骨之地」。電影評價甚差,但是原創小説的意念可取。





美國電視劇集The Vampire Diaries裏面,就一個美男殭屍,由Ian Somerhalder扮演。




美男和殭屍,有種不可分割的關係。

這種關乎魔法、傳說、殭屍的影片,就正中你們心目中的黑暗面,殘暴,毁滅,黑暗。

這是因為潛意識裏面,你也知道,美麗的男人,和殭屍一樣,都是吸引人但危險。

美男和殭屍一樣,總會有一種莫名的危險感覺。你會知道,在短暫的歡愉之後,他最終會帶給你的,會是傷害,背叛,與懷疑。即使如此,你仍然會得到一種自虐的快樂。明知不可以為而為之,有一種折墮的快感。

正因如此,好多故事的殭屍主角,都是一個英俊、蒼白、神秘、華貴的殭屍。

死亡、和一個美麗的男人,密不可分。

男人,多數因為性瘋狂,做出一些非理性的行為。而女人,多數因為愛情的感覺,會做出一些失控行為。

暗黑的殭屍,就反映你平時內心的各種情緒。和邪惡起舞,和命運交戰,每日都思前想後,究竟什麼時候會被咬?幾時會失守最後防線,和殭屍轟烈地做愛?

而其實,妳們已經很久沒做夢。


張國榮的生死榮哀

除了電影中的美男主角之外,現實中的美男,也和死亡結下不解緣。

就好像張國榮,抑鬱症令他不想再活在世上,然而,他的生命和死亡,已經變成某種都市的精神領袖、精神寄托,他的死和不死,造就了華美。

最近古巨基派台的一首歌Dear Leslie,就是紀念張國榮,對於好多不是張國榮那個時代的觀眾來說,這首歌極好的歌詞就輕輕的介紹了張國榮影視作品的一切,春光乍洩、霸王別姬、胭脂扣,美麗、自負、敏感的男人,總教人着迷。



(張國榮霸王別姬的造型,堪稱華文同志BL電影經典。網絡BL劇雙程的男主角黃靖翔都拍了霸王別姬造型的海報,作為對前輩的致敬。)

就是因為他的早逝,才令到美麗永久定格,像殭屍一樣。永遠也在那個歲數,永生,而別人,也永遠崇拜、欣賞。

必死和不死,就是他們的吸引力。

萬聖節這個節日裏面,好多人可以好輕鬆地拿着那個搞笑的南瓜,和穿着巫婆的服飾,但你不能不能夠同樣輕鬆地,面對生命和死亡?

又是在這種節日,方才會了解到生和死,都是一種藝術表現。

在這個無聊的萬聖節,你想到好多。

萬聖節,特別想找一些舊的暮光之城、殭屍日記看看。再一次讓你沉溺在那種冷淡蒼白的浪漫氣氛裏面。

沉迷這些殭屍劇集,令你有時連現實和戲劇都分不了。在街上望見一些蒼白瘦身、淺色頭髮、行為斯文的外國人,都會令你立刻想起Edward Cullen。相比之下,那些在蘭桂坊飲酒飲到肥肚腩外突的高齡外籍男子,就令你卻步。

與其還奇裝異服地在街上流連,倒不如趕回家,在那個怪異卻浪漫的電影裏。讓你的愛情、性、都有一個幻想的空間。

在萬聖節之夜看經典殭屍愛情片,你可否想過,為什麼你寧願和一個殭屍一起過,更甚者,是「幻想」和殭屍一起,都無法接受一些平庸的追求者?

但是為什麼,是追尋不死的真相?永恆的愛情?還是他眼中那種永生的冷漠?

殭屍不死世界裏面的冷靜,超能力、淡定的環境,令你也希望可以像女主角一樣,放棄世間的柴米油鹽煩惱,全心全意沉迷在愛情裏面。

一起冒險,一起折墮,向生命最低處也是最高處進發。

如果世上真的有Edward Cullen,你會不會像女主角Bella一樣那麼扭擰,還是會爽快地在第二次見面,就會說一句,請他把你軟禁,瘋狂愛上我吧,X我吧。

不太適合卻遲早會迷戀。這樣的愛情,你懂的。

在萬聖節當晚,面對着恐怖又搞笑的萬聖節裝扮,令你明天更加想回到一個充滿靈性,正當,光明的生活。

因為人生真的不需要選擇一個悲劇結局,人,始終都想要一個美好的好結局。理性會是這麼想。然而感情,都想有一晚的放縱,一晚的失控。

今年的萬聖節一夕換季,而夜空迷茫。

電視機螢幕還是見到癡心的美男殭屍,而你,也在驚嚇中一邊吃零食,一邊看電影。始終,對於外國美男殭屍,你都是情有獨鍾。

今晚是萬聖節,在這個時候,愛上一個人,是不吉利的。









Counter

Flickr Images