唔知道大家有冇試過，放一個重整身心嘅悠長假期？一個月冇見，究竟去咗邊？
其實，過去一個月，我非常之充實。我選擇用一個月時間，潛心學習，退隱、靜心、閱讀、修行。喺過去嘅一個月，我去咗「為愛修行」。
注意，係為「愛」修行，唔係為「愛情」修行。
前陣子，工作實在太過疲倦，嗰一種疲倦，除咗體力方面，更多，係喺精神上面嘅疲累。簡單來講，就係缺乏自愛、力量。
為生活帶來樂趣，目標，夢想，其實係可以令一個人重新獲得精神力量。坐言起行，當我發覺需要休息嘅時候，就選擇暫停工作、暫停美容、暫停網站更新，全心全意休息、整理、重整旗鼓。
每個人嘅身體，都會向你發出信息。
如果你長期感到疲倦，其實係你嘅身體比一個清楚訊號你，你嘅身體叫你停一停，諗一諗，休息一下，再次補充吸取足夠嘅營養及能量，包括心靈上嘅能量。
心靈上嘅能量，包括閱讀，吸收其他智者、宗教、管理學、資訊科技嘅最新意見。重新審視自己嘅價值觀，好好思考究竟生命中最想要係乜嘢。
所以我選擇停一停，重新思考，點樣可以令到生活活在愛裏面。而唔係活在迷惘裏面，被生活中嘅麻煩同困難、低層次人事鬥爭牽着走。
為愛修行，活出悟性，人格涵養與幸福感。
同時，活出可貴嘅冒險精神、堅強、勇氣、自信心。
活到呢個年紀，你會發現，呢個世界真係有因果關係。當你全心全意比呢個世界好嘅東西，包括耐心、盡力、包容、智慧、原諒、美，你亦都一定會收得返。你會明白，活在愛嘅頻率入面好緊要。
愛嘅頻率，就係欣賞、健康、祝福、優秀、付出、超越、感謝、成長。
係冒險、係失敗中再接再厲。
你會懂得保護自己，保護別人，盡量避免討好別人委曲求全，你會明白到，你喺人間有一個使命，就係活出最好的自己，絕對唔會委屈自己，掩蓋自己光芒。
一個月嘅時間，做咗好多事，包括，去spa整理身心，閱讀靈修書籍，去品嚐美食，去體會造愛，去睇平時冇時間睇嘅電影，去打開窗感受微風與及雨點，去星光浴，靜靜凝視星空。
去同舊朋友相聚，去行山、去繪畫、去聽音樂、去盡情煲最新美國劇、泰國劇、韓國劇。
去用開放心態結識新朋友，為自己幸福努力。
去睇醫生，聽下醫生專業意見，點樣先可以令到身體更加健康。
去飲全台灣最出名嘅濃郁黑糖新鮮奶茶。
去嘗試每日一餐排毒清新素菜vegan，大量進食茄子、生菜、車厘茄、青椒。
去自己動手做，非常新鮮嘅菲律賓香蕉豆漿沙冰。
去更換upgrade香薰蠟燭，使用英國著名品牌香薰，提升房間質素。
去用祝福嘅心態給予家用，感謝有幸出生於這個時代這個家庭。
去培養自己拒絕say no的習慣，不再被別人牽着走。
去用閃亮眼睛接觸每一個人。
去gym運動，跑步、游泳。
去轟烈地愛上一個人。
去聆聽自己感覺，劃清界線，保護自己免受不必要嘅惡意批評。
去同好朋友食一餐超豐富六星酒店日本魚生盛㦉。
去用紐約高級沐浴油洗澡、法國南部薰衣草精油洗頭、使用日本韓國護膚品滋養。
去寂靜山丘上，觀察花葉，靜聽呼吸聲同心跳聲；讀讀世界名著，Marcel Prost到C S Lewis，到日本漫畫，到流行文學，到聖經。
佢用極為謙卑嘅思想參與慈善活動捐款，因為施比受絕對更有福。
甚至，去重視睡眠，早早上床睡好的。
中古世紀嘅人，會沉思，讀經，拉丁文叫Lecito Divina。
一個月時間，我故意不更新網站，我要全心全意，吸收養分，銳變出更好嘅自己。
活着，係一件非常美好嘅事情。活在愛裏，絕對係一種祝福。
當你好愛好愛自己，你會有一種智慧，看穿所有花言巧語。
你會停止批評自己，反而，你會正視自己做得好嘅地方。
當你認同你自己，你就會停止比較，停止埋怨，停止妒忌，停止追求幻覺。反而，你會追尋事物嘅真相。
你會開始懂得發現愛。
（Matt Bomer，其中一位人生勝利者）
True Love
好多頭腦簡單又不夠愛自己嘅人，愛聽花言巧語，追求夢幻婚禮。
四季酒店、半島酒店經常有奢華私人晚宴活動。參加富貴人家嘅幸福婚禮，置身六星級酒店超夢幻歐洲式佈置，品嚐名廚意大利朱古力甜點，再見證新人帶着Van Cleef and Arpel首飾，半世紀幸福約定。
理論上，參觀嘅嘉賓應該甜到入心。
但偏偏，好多參加嘉賓心目中，呢類型嘅超幸福環境，反而令人心裏，又苦又酸又咀咒。
一場婚宴，令唔少參加者同嘉賓，經歷一次全方位內心交戰。
別人嘅鋪張幸福，映襯出自己嘅唔幸福。
別人成雙成對，更加顯得自己孤家寡人。
別人一擲萬金嘅奢華，令到自己感覺不足、寒酸。
喺一個虛浮人造幸福氣氛裏面，內心裏面嘅憤怒、不忿、焦慮反而顯得更加真實。
有人用盡全身嘅力拼出一個假笑，盡量掩飾內心嘅鄙視，同時亦都好質疑自己，點解連佢哋都嫁得出、娶得到香港老婆，自己唔得。
呢種複雜黑暗嘅心理經歷，好多香港人都經歷過。
呢一類型嘅奢華晚宴，其實係一個好好嘅測試，如果你夠愛自己，你就能夠平常心面對；否則，如果你有以上反應，就證明平時你自己愛自己不足夠。可以做得更加好。
因為一晚嘅鋪張，所有人有心扮一定做得到；反而一生人嘅幸福，只有你自己，先至可以成功經營，亦都只有你自己先至可以全權享受結果。
單身係問題？
當你全程活在愛裏面，單身唔再係問題。
唔知幾時開始，香港出現咗好多單身「問題」。
剩男剩女，就好似一個咀咒一樣，無時無刻困擾，尤其係年過三十單身人仕。
英國十四世紀，反而比現代香港更開明。
近年，無論乜嘢行業，乜嘢階層，都突然間出現一堆年過30 仍然嫁唔出嘅中女，與及一班異性緣非常差嘅毒男。
單身嘅重災區，喺某啲行業更加嚴重。
對於女性來講，一啲性別較單一嘅行業例如美容、奢侈品、護士、marketing、HR、教育；對於男性來講，IT同物理工程，陰陽失調嘅情況更加嚴重。
30歲，係傳統社會結婚體制視為一種死線，有人甚至認為，如果30歲都單身，好大機會一世都單身！
其實，真正嘅問題，同單身無關。反而，同個人性格、態度、是否活在愛𥚃，關係重大。
當你每日活在愛入面，你會停止港女港男自私行為，你會懂得欣賞，你會發現同人相處容易好多，你會發覺人際關係會有所進步。
真正能夠趨旺你桃花運，並唔係八婆風水師，而係你自己是否活在愛的頻率裏面。
當你好愛好愛你自己，會檢視自己行為。只會保留一啲對你有長遠幫助嘅習慣與及行為模式。
你會停止執迷於及瘋狂行為，不再瘋狂購物。反而懂得正視你自己的美麗、快樂與哀愁。
你會發現，你嘅性格會變得相當可愛。
當你在愛裏，你會渴望成長
為愛修行，能夠令你放低一直埋藏於潛意識嘅憤怒、無助。取而代之，係希望、原諒、重拾自信、對美好的追求。
你會越變越好。
好多人錯誤以為，拍拖或結婚就係一個答案。
我認識過太多人，即使結婚，仍然感覺係一個人孤獨地生存，心靈冇交流，比單身時更慘。飯後各自搵食、寂寞、小三、出軌、分居……唔使多講，我亦都認識好多已經離婚嘅人。
所有嘅愛，都要由整理調整自己內心做起。
一個自己筋疲力盡嘅人，係冇可能幫得到其他人乜嘢。只有當你自己活在堅強、自信、冒險精神、正面思想時候，你先至會有能力幫到其他人。
要學識為愛修行
如果你感到抑鬱，你嘅首要目標，就係要有良好習慣，再一次讓自己充滿愛。
當你視每一個人，包括你自己，為一個充滿無限奧袐與尊嚴的生命體，你會尊重、愛惜。
當你充滿着愛，你的世界截然不同。你會：
將工作，變成「工藝」，用雙手延續文化。
將煩惱問題，變成成大事前嘅磨練，你掘起嘅傳奇前傳。
將每個人每段關係，變成上天交托你手上暫托嘅靈魂功課。你知道比有能力處理得好好。
你會有智慧將沮咒，變成祝福。
將愛，變成照亮你一生嘅良好習慣。
將半生，變成半世紀愛的故事。
因為你原本就是降生在這個地球，在這裏學習、服務、提升、給予及接受愛的優秀靈魂。
