【深夜聊天】提升自信心與氣場的7個方法:只需一個月,你靚到爆,自信到爆!

下午11:06


新一年,就要有新氣場!

今日我就同大家玩一個吸引力實驗,你只需要用以下嘅方法,一個月之內,就會見到神奇效果!如果你想靚到盡,自信到爆,就要一齊試吓。

7個習慣,好簡單,但係,對人生就有超乎想像嘅效果。新一年,如果你想有新嘅體會,新嘅自信心程度,新嘅樂觀心態,新嘅外表,新嘅身形,我今日就教大家7個方法,點樣可以短時間之內,迅速變成自信爆棚嘅氣場美人!


什麼是氣場?

所謂嘅氣場,就係你嘅整體情緒、能力同能量,包括你嘅熱情度、反應敏捷度、自信心、口才、魅力等等……一般來講,氣場就係個人性格魅力嘅展現。

今日要教你,會能夠迅速提升你嘅氣場,令你魅力驚人,同時, 提升自信心!


提升自信心同氣場方法一:培養美麗習慣

好多c grade、d grade嘅人(指思想行為外表中下,質素普通嘅人),都抱着外表唔太重要,內在最緊要嘅諗法。呢啲諗法好唔要得,簡單來講就係懶!

如果要真正做到自信心爆棚,每一日每一分鐘,都要自信、亮麗! 

好多香港人其實外表唔差,只要稍為打扮一下就已經好可愛,但係因為平日嘅懶惰,相比起個人可以做到嘅最靚一面,仍有距離。要改善自信,就由美麗小習慣開始。

首先,唔可以懶散。

好多人平時返工,返學,都好求其。如果可以做到8分9分,佢就只會做5分或以下,帶個核突眼鏡,求求期期污糟邋遢就去返學返工。佢哋會覺得,冇所謂啦唔需要扮咁靚,公司都冇靚仔!但係,佢哋唔知道,如果求求期期咁樣出現,唔單止自己喺人地心目中形象差,對於潛意識中自己嘅嘅自信心,亦都會有唔好嘅影響。因為,如果你自己都長期處於一個不理想狀態,你自我形象就會低,就算真係有靚仔出現,你都因為自己準備不足,狀態差而唔敢回應,人哋對你亦都唔會有好面色睇,亦都唔會有任何優質待遇。

相反,如果你每日都盡力多少少,例如化下妝,噴下香水,站立同工作嘅姿勢都挺直啲,久而久之,你就散發出一種懂得照顧自己,表現自己嘅自信心,人哋對你,亦都會好啲。如果你而家自我評分係得5、6分,你就要盡量向8分、9分進發,並且養成每日打扮一點嘅習慣!


提升自信心同氣場方法二:培養高營養瘦身習慣

第二個可以幫你迅速增強自信同氣場嘅方法,就係培養「高營養」、「瘦身」嘅飲食習慣。如果做到呢一點,你嘅身形就會迅速變索!你原本因為肥胖或者過瘦已經遮遮掩掩、不停修圖P圖嘅身材,行出來嘅自信心,都會由一般普通,變成極為自信!

你要真人都又靚又健康又瘦,唔需要P圖!

好多人都唔知道,人嘅情緒,好受到食物影響!好多人以為抑鬱、懶散、消沉,係因為自己嘅心理質素差,甚至自己都唔知點解自己抑鬱!其實,好多時如果你感到經常疲倦,做乜野都缺乏動力,你就要睇下你食嘅食物,究竟有冇營養!好多垃圾食物、高糖食物、碳水化合物食物,都會導致你疲倦同埋情緒差!如果你要做到開心、正面、高能量,就要注意自己嘅飲食。

因為冇咗一啲質素差劣嘅食物影響你嘅消化系統,冇咗佢哋不斷排出毒素,你唔單止食得乾淨,人都變得醒神!反應快!

我好多朋友自從戒除去快餐店食飯,以蔬菜代替碳水化合物之後,就發現自己身型越嚟越似頂尖模特兒!出嚟嘅自信心都增加,氣場亦都變得時尚感。同以前肥胖、論盡嘅時代唔可以相比。

點樣先叫做高營養、瘦身飲食習慣呢?就係多食水果、蔬菜、蛋白質,小小碳水化合物。食嘢,係食到飽食得好為主,千祈唔好胡亂節食減肥(因為唔會有效,百分百反彈只會令你更肥) ,亦都唔會情緒化咁暴飲暴食。最好,係飲營養補充品同添加劑,例如維他命C、whey protein蛋白粉,可以幫助你控制血糖,亦都控制你食量,亦都加強你肌膚膠原蛋白自生功能。

我會建議你:

早上食燕麥,佢可以幫你全日吸取身體多餘嘅膽固醇。

每日或隔日飲用高質素嘅蛋白代餐,例如Isowhey。

午餐食半碗飯,其餘食菜飽。

如果一定要出街食,就盡量唔好食晒啲飯。我會建議你食少量嘅飯,其他時間就食適量肉類、同時間食大量嘅蔬菜會令你飽足。咁樣,你唔會進食過量碳水化合物都知你老化又疲倦。如果你嘅餐廳冇提供大量蔬菜,你就自己出去食個生果杯,裏面嘅纖維,會幫助體內防止吸收過多油脂。

晚飯就用炒蛋、蔬菜。由於接近冇乜卡路里,兼且纖維豐富,蔬菜可以無限量任食,一般嘅豆類、蔬菜、蕃茄、豆腐、金菇、蘿蔔、茄子等等,可以任食!

每日係下午茶嘅時間食生果,代替高脂快餐。

只要你跟着以上嘅飲食規則,你就可以有緊致面孔,好身材,內臟功能亦都唔會因為太多碳水化合物同糖分導致血糖飄忽,或者胰島素紊亂。

有咗令人驕傲又羨慕嘅身材,同埋精神狀態變得靈敏,你就會發現,自信心不停提高!

緊記食得好,食得飽,不暴食,不絕食!


提升自信心同氣場方法三:學習獨立自主

要做到自信心爆滿,兼且氣場強勁,就要學習唔好太過卑躬屈膝。亦都唔需要成日要求別人讚美自己,認同自己。你要你自己去讚美自己,你自己去認同你自己!

Do not seek approval, seek to be the best person you can be! 

好多時我哋唔了解到,如果經常性地期望別人讚美自己,經常性病態地seek
approval,你嘅自信心就唔會高得去邊!你要自信心高,就要自己比自己一個高嘅目標,然之後每日執行!而對於其他人嘅理解不理解,認同或不認同,你都唔需要太過上心!

唔需要對你男朋友、上司、同事、朋友嘅意見太過傷心。因為即使你卑躬屈膝咁去幫佢哋,佢都唔會珍惜,只會令你越來越唔值錢。

總結人生經驗,你唔夠壞,人哋唔會愛!勇敢地做個badass(如果你係男)、badass bitch(如果你係女),你會有想不到嘅收穫。

你記住,你唔係你嘅工作,唔係你嘅收入,唔係你嘅外表。你,嘅價值遠超過與以上所有!以上只係你係嗰個範疇嘅經濟價值,並唔代表你人生嘅價值!

你真正嘅人生價值,就係撥出充滿愛心、挑戰潛能嘅人生!一時之間嘅成敗,一時之間嘅認可或不認可,其實無關重要。

你要活出你自己嘅#dreamlife,而唔係人哋強加於你身上嘅#theirdreamlife。

咁究竟乜嘢叫「做一個獨立自主嘅人」?答案,就係自己生命自己話事,不要期待別人幫你完成你自己嘅責任。

有勇氣去面對你自己嘅問題,有勇氣去解決,去嘗試,其實就好好!


提升自信心同氣場方法四:每日行動一小步,成就你人生一大步

每一朝起身,你第一個反應,會係冇能量、自我懷疑?定係飛揚,自我肯定,積極,挑戰,自信爆棚?

好多人對自己冇信心,但係唔需要怪自己。自信呢一樣野,係一個習慣!只要有每日行一小步嘅習慣,你就好快會自信爆滿。

提升自信心秘訣:如果你冇信心做一件事,例如冇信心去跑步,就只需要要求自己每日做少少,例如跑2分鐘,甚至30秒!唔需要多,最好就少!但一定要執行, 15秒,任何人都頂得到,慢慢,你就由恐懼變成享受,亦都會克服!

好多人對於一個難題,難免感到恐懼。但我發現一個小小嘅道理,只要每日做少少,完全可以達到嘅目標,慢慢,你嘅自信就會出嚟!

如果你害怕接觸陌生人,咁你每日只需接觸一個!

如果你怕減肥要冇啖好食,咁你每日只需要換走半餐!

如果你怕networking,就只需要上網、WhatsApp send一個短訊!

好耐之前,我對於每日去做gym都感到好恐懼,因為入個gym度見到啲好似好主動兇猛嘅人,都會感到有啲驚!但係我就話俾自己聽,其實唔需要咁驚,只需要做15分鐘,如果唔鍾意可以即刻走!每日,我只係做15分鐘就算。(多數做咗15分鐘都會繼續落去,可能會做半個鐘,但有時疲倦或心情差,我就真係做15分鐘就收檔)。因為我深信,每日一小步,我可控制得到,始終,我就會成就人生一大步!慢慢,我就克服左個恐懼,由15分鐘,到後來30分鐘、45分鐘、一個鐘!我亦都由肥胖變成纖瘦!

呢個克服嘅過程中,我從來都唔會責備我自己,相反,我會讚自己做得幾好,我會讚自己即使落雨我都有盡力,就算有時有一日冇去,第二日我照去我會讚自己今日我又有出現!

久而久之,我習慣咗讚美自己,一啲令我好恐懼嘅事,亦都克服左。


提升自信心同氣場方法五:讚美日記

我之前聽啲日本朋友講,佢哋好出名有一本叫做讚美日記嘅日記簿,就係每日寫低你自己對自己嘅讚美會係乜嘢。即使好少野,每日寫低,都對於提升自信有好大幫助!

一本叫做「讚美日記」嘅書,響日本爆紅,佢幫好多人克服左恐懼同自信不足嘅問題。所謂嘅讚美日記,其實就係每日寫低自己今日做啱左乜嘢,然後讚美自己。每日只要講下一啲微不足道嘅嘢,你一個禮拜,一個月之後睇返,原來自己都有做啱嘅時候,例如:

我有記得朋友生日,我有盡力慶祝
我行得好快,趕上平時上唔到嘅嗰班車
今日阿媽打黎,我冇敷衍,甚至傾左一個愉快嘅半個鐘,關係都改善咗

日積月累,你嘅自信心就會增加!


提升自信心同氣場方法六:學習新技術、新技能、新語文

如果你自信心唔夠,你就要留意一下,自己會唔會睇嘅嘢太過狹窄。經常都上相同嘅討論區網站、經常同同一班人來往等等。

如果你可以學習新嘅語文,例如學普通話,學韓文,學西班牙文,都會擴闊你原有嘅視野。如果你平時唔睇新聞,對於財經新聞,世界大事一曉不通,你就要多啲睇下新聞,唔係蘋果日報,可能係上cnn,或者其他Washington Post、bbc等等。

隨着吸收嘅資訊增加,你嘅溝通能力同埋話題,都會變得廣闊,對住其他人,亦都會更加多野講!


提升自信心同氣場方法七:模仿成功人士

如果你想要有一種明星級、世界領袖嘅風采同埋自信心,其中一個最快嘅方法,就係日日模仿。

我會建議你每日都收睇佢哋嘅YouTube video ,模仿佢哋講嘢嘅聲調、代入佢哋嘅角色,如果有需要,就模仿佢嘅動作,口吻,甚至背誦部份演講或表演內容,持之以恆,你就由一個頭耷耷嘅普通人,變成明星級數風采嘅人!


提升自信心同氣場方法八(bonus):為別人製造奇蹟

好多人想表現自己得出自己,就會鍾意講別人壞話。但其實,表現自己最好嘅方法,並唔係去踩低別人,反而係去為別人製造奇蹟。

與其做一個可有可無嘅凡夫俗子,點解唔去做一個能夠幫助別人,改變別人生命嘅人?

你想變得有自信,最好,就係打造高貴品格,做一個「帶旺別人」嘅人。

當你全心全意去為別人着想,為別人做好事,甚至幫佢哋一齊創造奇蹟。

最美麗嘅人生,就係能夠同時付出,亦都同時得到收穫。

如果只係不停付出無收穫係好慘嘅事。但係如果只係希望得到收穫,以自己乜嘢都吝嗇,乜嘢都唔肯為別人做,即是有得到,都只係單方面。你嘅快樂,亦都只係得一半。

以上7個方法,係我多年經驗。肯定別人,肯定自己,可以幫你提升氣場、勇氣。

請記住每次不確定狀態,就係好好學習同表現嘅機會!你跟着我做,一個月之後嘅你,會多謝你一個月之前,做咗點亮人生嘅改變!



0 意見

Counter

Flickr Images