【深夜聊天】成功需父幹!?窮人唔好生仔,成功改運的人都知道「這樣」改變命運!

3月 02, 2017

喺討論區、Facebook上討論得最多嘅,就係「成功需父幹」、「窮人唔好生仔」等等有關父母財產繼承嘅話題。甚至有人明目張膽提倡腿張開,有樓有高潮!


父母窮,就會影響子女一世。高學歷、高教育、專業父母所生嘅下一代,自然會有更好嘅成長環境。相反,如果父母貧窮,教育資源缺乏,生活環境惡劣,學習機會有限,一個人嘅見識,就會相應減少。以前,養一個細路要$4,000,000。而家,個數一定唔止!

香港係一個金融社會,而香港嘅房地產亦都係畸形地昂貴。全世界嘅資金都將香港嘅房地產項目是為「投資」而非「必需品」,喺香港,樓宇同股票、貴金屬一樣炒賣。而政府嘅房地產政策失敗,無法保障市民最基本嘅居住權。所以,喺呢個扭曲嘅環境之下,導致好多香港市民連住都冇得住。

有樓有高潮,有樓萬事足嘅思想,影響着80後, 90後,越嚟越根深蒂固。呢個畸形嘅金錢價值觀環境之下,貧窮,富裕,形成好大嘅反差。

所以有人認為,香港同外國唔同,香港階級觀念其實相當之重。一個人嘅出身,已經決定咗你嘅社交圈子,教育程度。

見到人哋又靚仔、靚女,又有錢,風光,有錢就任性,你個心就會好妒忌。

如果,不幸地,你嘅父母係屬於人生失敗組,即係貧窮,冇辦法留到任何資產比你,亦都無辦法幫你置業,無辦法幫你上車,難免,你內心就會有好大嘅怨氣。

香港嘅社會,已經唔再係同一條起跑線。有錢人,有有錢人嘅生活方式,資源,教育,錢搵錢投資嘅方法。一般其他市民,就只有捱窮嘅日子。

可能你嘅朋友已經成功極速上車,而有車有樓有高潮。好快成功結婚,炒下樓炒下股票,已經成為小富翁小富婆。你,仍然過住一啲平庸嘅日子,幸福美滿嘅將來,好似越嚟越遠!眼見無能嘅父母,冇辦法比到你乜嘢嘢,你唔想怨,亦都唔想嬲,但係已經被離晒地嘅樓價、辦公室勞動生活折磨到抖唔到氣。你個心都唔想鄙視你冇用嘅父母,但係,真係好難再尊重佢哋。

有一刻你會諗,「窮人,真係唔好生仔。」

成功,係咪一定要靠父幹?窮人,係咪唔應該生仔?

如果,你有諗過呢個問題,就一定要睇落去!


(韓國劇集「鬼怪」,令到好多觀眾對於生命有所反思。對於父母、家人嘅關係,亦都有新嘅體會)


現今社會,社會階級會遺傳!

有窮的父母,會令人感到羞恥。

一個人同父母嘅關係,唔多唔少都會同經濟有關係。一個富裕嘅家庭,並保證一定有幸福,但係,一個三餐不繼,家嘈屋閉嘅屋企,就肯定唔會幸福!

好似之前有一句至理名言,幸福嘅家庭都係相似,但不幸嘅家庭就各有各嘅不幸!

窮人,應唔應該生仔?

每逢網上討論區出現呢一類嘅討論話題,就會有好多唔同嘅意見,有啲人會認為,雖然窮,始終都係你嘅父母,點都要尊重。亦都有啲人覺得,我從來都冇選擇喺呢個世界出生,你生得我出嚟,就要有相應嘅支援。

究竟係法律上同道德上,父母有冇責任幫你?


其實,你嘅人生,你嘅父母需唔需要負責?

法律上,

18歲之前,你有權埋怨父母。

18歲開始,你就要為自己人生負責。

即使法律上,父母或法定監護人都只可以監管嚟到你成年為止。成為大人之後,每個人都要為自己嘅生命負責。所謂嘅負責,就係承受之後嘅成功、失敗。 好同唔好,都係要靠自己去創造。

當然,有良好嘅家庭背景,成功亦都比較容易,呢個係不爭嘅事實。

但好運,從來都冇擔保。亦都唔會話因為你有好嘅父母,就自然保證你下半生無憂無慮。好多時候太過順利嘅少年時期,反而係下半生沮咒嘅開始。

越走越好嘅人生,同家道中落的人生,你會想揀邊個?

家庭觀念同道德層面方面,父母,當然有責任照顧成年子女。成年子女,更加有責任照顧成年父母。係批評父母或仔女之前,首先要檢查一下自己有冇做好自己嘅責任。

優質嘅子女,值得父母金錢方面上嘅支持,幫手買樓,提高整體財政實力;優質嘅父母,亦都值得安享晚年,得到父母仔女供養。

但如果,只係一個質素中下嘅父母,就好難要求仔女成年之後繼續供養你。


人生的問題,有幾多由父母造成?

好多人想熱烈探討「成功需父幹」,「贏在起跑線上」,「窮人唔好生仔」……原因,係因為不滿於現狀。

不滿於現狀,其實係一件好事!就因為你有不滿嘅地方,先至會有心想去「改變」,「改善」,「創造更加好嘅未來」!如果積極咁諗,呢一種嘅不滿,其實係一種推動自己、推動社會嘅上進心。

無錯,如果父母本身經濟好有問題,其實係唔應該生仔,咁樣做,會影響咗自己同埋仔女生活嘅質素。應該等待家庭環境改善,有足夠資源去應付學業、醫療方面的開支,先諗下一代。否則,就會導致家嘈屋閉。

好多人會因為自己生活上嘅不滿,而對父母有微言。

不滿現狀嘅同時,你就要諗清楚,其實你不滿足嘅,係乜嘢。因為,好多人都會有個思想嘅謬誤,就係覺得生活上所有嘅不滿意地方,都係來自父母嘅不足。

我要特別提醒你一下,就算你父母係荷里活明星、皇室成員、成功企業家,都唔可能比到生命中最重要、最珍貴嘅嘢你。佢哋會令到子女財富方面有好嘅安排,包括容易入比較好嘅學校,俾首期幫你買樓,或者直接送物業,或者俾你繼承一大筆金錢。

但係生命中最重要嘅嘢,包括:

尊嚴,自信,愛,勇氣,選擇自己嘅生活方式嘅自由等等。

係俾唔到。

甚至,家人相處嘅快樂時光,分享你生命中重要時刻,都一樣俾唔到。父母越花時間賺錢,越「幹」就越少時間可以放喺屋企上面。

因為,好多人唔知道,生命,只有你自己一個人可以活出來。

只有您,才有資格活出不後悔,忠於自己嘅人生。你父母,或者任何第三者,只可以從旁鼓勵或影響,但係唔可以代替你活出你嘅生命。

你嘅生命,只屬於你。

每個人嘅生命,只屬於嗰個人。

你生命中嘅矛盾、抑鬱、茫然、孤寂,有幾多係父母直接造成?你嘅快樂、領悟、成長、勝利,又有幾多真係你父母直接俾你?

定係,其實苦與樂都係每個人成長階段必經嘅學習?

你有冇諗過,除咗父母之外,社會經濟同環球財富分配,對你環境有好大影響?

利率低導致熱錢流入樓市,導致房地產泡沫。呢個問題,唔單止香港,世界各地好似美國、中國大陸都有。

由於利息極低導致炒樓問題嚴重,樓宇供應不足,所以,如果真係要解決,你阿媽阿爸其實幫唔到。

社會嘅問題,要社會層面去解決。佢哋都只係好被動咁接受呢個現實。

同一時間,你有冇諗過,如果想改變社會,改變環境,除咗埋怨父母之外,你其實可以去改變一下社會、政府嘅財政同福利、土地同經濟政策?投票,選代表你嘅議員,為你喺立法會發聲?

參與社會運動,積極參與地方政治,好好運用你嘅選票選出代表你嘅議員,改善政策,比起來喺屋企做鍵盤戰士、埋怨老豆老母有用好多!

有時,我甚至講,有啲生活上嘅辛酸、苦難、不方便,竟然有種奇異又真實嘅缺陷美。我就係鍾意係呢種環境中,都仍然享受缺陷、盡情悲傷,你吹呀?

好多富二代、物質一無所缺嘅人,偏偏就缺乏左一種深度同思想。因為平時太保護,導致出去現實世界就變得不堪一擊,一沉不起!

世界上最有型嘅人,就係可以無視苦難,仍然堅持活出自我,活得好嘅人。佢哋唔單止冇被環境打敗,甚至享受挑戰。

苦難中都可以風騷,窮都可以風流同fun,你吹咩?

與其牽強地埋怨父母,何不有勇氣地活出自己嘅人生?

就算冇咁富有,冇咁光彩,最少,呢個係你自己創造,悉心經營嘅人生。


溝唔到女、溝唔到仔,唔好賴父母

而家再講下成功需父幹,冇父幹所以溝唔到女、溝唔到仔嘅問題。好似之前有個大言不慚嘅女人話,有樓有高潮。好多男人一聽到咁嘅說話,就會覺得,自己高攀唔起呢種女人。從而,就會錯誤地結論,高攀唔起其他女人。

對唔住,呢位講出有樓有高潮嘅小姐,硬膠樣貌身材只係屬於B-級數,有欠自然,談吐相當MK ,整體質素非常一般。

同埋,絕對唔代表全部女人囉!

講得最多成功靠父幹嘅人,就係溝唔到女嘅人。作為一個美容專家,我可以好直接同你講,呢個世界冇醜樣嘅人,只有懶嘅人!你去婚姻註冊署睇吓,好多結婚嘅人,都唔一定好有錢。有正常品格,良好外表,有趣嘅生活,健康嘅身體,同埋正面嘅思想,即使財富方面唔係大富大貴,只要正正常常,一樣結到婚。

每逢有朋友講話因為冇樓、無錢所以冇女鍾意,拍唔到拖嘅時候。我就會第一時間糾正:

They are not that into you.

如果,你肯面對現實,就會發現原來佢哋根本就唔太喜歡你。如果你真係有其他過人之處,例如獨特嘅才華,好嘅性格,人哋一定會鍾意你。

你睇吓網上紅人,好似好多年前嘅Justin Bieber,樸寶劍,都唔係因為屋企有錢而令到人哋鍾意佢。係因為佢自己本身就咁可愛!

可愛,就自然吸引到好多人幫助佢,提攜佢。好多人以為有財富就會變得可愛,其實,更加貼近現實嘅,係因為一個人可愛,所以吸引到人哋嘅幫助同埋財富。

金錢當然會影響兩個人相處之間手頭上有幾充裕。但係,當一個人如果講出嚟,話你因為無錢而唔同你一齊,呢個人其實從來都唔係咁鍾意你。

因為一個女人好鍾意你嘅時候,即使你窮到乜咁,大概都會有女黐埋去。一個極端例子,好似又打老婆又曾經吸毒嘅周永恆咁。唔單止窮,仲要賤格,都仍然會有一啲𡃁模、MK女黐埋去。

佢唔單止無錢,財政方面低分,品格方面,分分鐘係負分!但即使MK仔都有MK仔嘅魅力,吸引到其他人。

由此可見,錢,同有冇拖拍,有少少關係但絕對唔係決定性。

所以,如果一個人話你無錢,所以唔同你一齊,你就要好心水清咁樣了解到,they are not that into you。

溝仔溝女第一心法:千祈唔好呃自己。

你要做嘅,就係提升你嘅事業狀況,收入,個人履歷,口才,身材等等。當你外表、談吐、自信、社會經歷、事業上面都有進步嘅時候,愛情就自然會出現。


父母無錢,其實佢都唔想

你埋怨父母冇用,冇辦法幫你俾首期,供樓嘅時候,你有冇諗過,其實原來佢哋都可能比你更加自責。

可能,佢對自己都好失望。只不過,佢唔想喺你面前表現。

其實,活到幾十歲,好多父母,都會有少少內疚。覺得自己,冇人哋咁叻,所以導致經濟環境,比其他人比下去,家人嘅生活水準亦都因此而受到影響。冇樓,冇錢留俾下一代,其實好多父母個心都會有少少唔好意思。佢哋可能會扮強悍,甚至一講呢啲題目就非常之反感,來掩飾自己嘅自卑。

佢哋嘅失敗,導致自卑。當然,你可以繼續指責佢,拆穿佢,但真正有智慧嘅方法,係將自己嘅時間精力,集中係創造財富,學習專業,提升個人財政同樣貌水準方面。

佢哋窮,但你可以富有。你父母開始咗但未到達嘅終點,今日,你有機會去完成。

絕對無需要覺得羞恥,你應該感到光榮,有咁嘅機會,去完成父母冇機會完成嘅。


幸福要自己把握

唔幸福嘅人,最鍾意講成功靠父幹。

喺茫然、浮躁生活中,你會發現,原來幸福,斷續都出現係你生命裏面。

回到那些年,係唔係真係淨係只有怨氣,而從來冇幸福過?未必。

我要指出,你最悲觀嘅想法,都可能錯。

我想請你暫時離開現實世界,思想上回到被歡樂包圍的童年時代。

你出世、還是嬰兒的時候,父母在你身邊。

初次上課的時候。

生日會的時候。

你初戀失敗的時候。

他們在你身邊。

接觸、學習的喜悅,仍然栩栩如生存活在你我之間。

他們,都在你身邊。

想得起嗎?當時的,父母的笑容。

到底什麼時候,你離開了這個家,也離開了他們。

你以爲成就和金錢本身,可以幫到你快樂。

你,錯咗。

有時父母子女相處嘅時光,係好好嘅財富。你一種財富同埋回憶,好多有錢人要買都買唔到。

我可以好大膽咁指出,我認識嘅富二代,唔開心嘅比開心嘅多,多好多!好多小姐少爺,對人一定係歡笑張揚,但有幾多人真係夠膽講,已經活得好好?真心地完全冇遺憾?

一個人喺屋企食抗抑鬱藥,你又知唔知?同父母關係一塌糊塗,用被放逐嘅心態長居於冰天雪地嘅外國,融入唔到當地生活,嗰種心酸法,無論有錢定冇錢,都係好可憐。

因為唔開心,抑鬱,所以要虛張聲勢。所以要挑釁,理直氣壯地揮霍父親的錢。

佢地之所以挑釁,係因為「缺乏尊嚴」。係因為佢哋覺得,父母係關心、精神層面方面,係辜負左佢。

有Trust Fund,Private Bank戶口,飯來張口嘅生活方式,係富有但唔可以叫做富足。呢啲,叫做「富而不足」。

好多寂寞嘅富二代唔了解,工作,就係尊嚴。佢地冇機會真正工作,亦冇由工作帶來嘅尊嚴,導致容易失控。

工作,帶來判斷力、談判力、自信心。甚至為事業拼搏的年少輕狂,這些,都是無價的。

金錢,彌補不了生命的缺陷。

要憤恨、凋零,你,太後生。

與其浪費時間在「你睇我好,我睇你好」的幻覺當中,不如活出原創性、有天賦、有意思的人生。

今生今世,有機會做父母仔女,都係一種緣份。

可能,同你心目中想要嘅富二代緣份未必完全一樣,但係,有智慧嘅人,就算唔能夠將唔好嘅緣份改變成好嘅緣份,都懂得自己向前行,去你要嘅方向。生命,始終都屬於你。

所以,你要活出每一刻的美好。

為了你自己的人生。

好好,享受這個人生。

唔係每個人都有機會做富二代,但係每個人都有機會做富一代!


自我教育成為富一代,好過奢望做富二代

學懂投資,就會幫你快速累積財富。香港係世界上最容易投資致富嘅地方,香港嘅交易所、股票市場,係世界知名。世界各地嘅機構投資者都特登選擇香港,因為佢實在係全球最優秀。今日開始,就多多閱讀同埋嘗試投資,提早滾存你有嘅資產,創業,都可以令你增加財富。

要脫貧,就要學識提早投資!將自己打扮得好靚!主動結識唔同嘅人!

人際相處技巧,亦都係好決定你有冇機會可以嫁得好。

改寫你的命運,改變你的結局。

0 意見

Counter

Flickr Images