【深夜聊天】【改運】香港New Age學說系列1:塔羅牌、占卜算命與養鬼仔可以改運嗎?

8月 05, 2017

之前應承過大家,除咗講香港醫學美容之外,我會講一啲比較深入,有關New Age學說、靈魂、占卜、改運、抑鬱症等等比較深入嘅心靈及命理層次問題。今日嘅分享比較深層次,希望同你一齊了解到生命中嘅種種,大家最好有心理準備!


New Age、易經六爻算命、塔羅牌、養鬼仔之前先看看

如果你現在感到抑鬱、迷惘、唔知點做,千祈唔好走去算命,亦唔好道聽塗說參加New Age,更加千祈唔好好似某啲香港人咁走去學人養鬼仔、玩佛牌、陰牌。

咁樣做,只會令你更加迷惘,之後運氣更加差!我自己之前曾經瀨嘢。

我會教你點樣做,先至可以快速改變你嘅心境,同時改變你嘅行動,命運!我教你嘅方法,係一定work!

你嘅命運,係可以改變。每個人嘅命運都可以改變!但係,一定要用啱方法!

用啱嘅方法,你就會可以由抑鬱、迷惘、冇力量嘅黑洞行出來。親身體驗,改變命運嘅奇蹟!

要改變命運,你已經冇籌碼繼續浪費時間,係坊間半真半假嘅三四流學說中兜兜轉轉。要改運,就一定要用啱方法。

生命中每一步都好重要,而家就同你講解一下。

 
(上圖為生命之花,Flower of life,New Age人士經常會見到)


講解各種New Age學説背景

喺香港旺角、銅鑼灣一啲三四線商場裏面,就有一啲鋪頭,聲稱可以做能量治療、塔羅牌占卜。成日都見到有啲人喺裏面求神問卜、徵求意見。

而係網上,都有好多香港專門講解New Age學説嘅YouTube Channel同podcast。曾經紅極一時嘅New Age拆解王就係之一。

New Age本身唔係宗教,但當中儀式同宗教相似。香港好多人當new age係宗教。

近期IG、Pinterest 見到好多香港人分享有關new age學說、witchcraft巫術,靈魂、天使、高靈、Osho、算命、塔羅、生命靈數、the universe,甚至一些中國風水術、降頭邪術、靈魂出竅、合一等spirituality體驗。有啲人分享圖片,一係就係一啲充滿幾何圖案例如生命之花(上圖),有神秘感的符號 ,有啲就係深山修行嘅相片,有一啲就係星座、星雲嘅宇宙圖片,另外一啲就係充滿宗教色彩嘅繪畫;有啲人分享一啲quotation。當中分享嘅圖片或者說話,亦都唔係完全無道理,睇落去又好似有啲道理,但又唔知點樣實行。

佢哋其實,係美化咗、最危險嘅half truths。

Instagram見到呢啲圖片,同埋見到佢哋嘅支持者,真係令我有感而發。

因為生活中嘅不滿足同落差,愛情、事業、同家人關係嘅困難,令到好多人都想追求心靈上嘅歸屬。

New Age講述追求愛與光、追求合一、追求靈性的呼喚,令到好多人相信。

追求智慧、仁愛;追求光、追求靈魂提升,本身並無錯。

最錯,就係將以上概念捆綁莫某一啲半邪教、奇怪學說、或令人心神錯亂嘅鬼魂邪術入面。


New Age 和邪教一線之差

New Age 同Occult,喺香港同外國都係一線之差。

Deepak Chopra,Wayne Dyer,Marianne Williamson,Eckhart Tolle,Rhonda Byrne等等新時代運動作家所寫嘅書,「秘密」、「奇蹟課程」、「吸引力法則」,「Return to love」呢啲新時代作品我基本上全部都睇過。新時代運動經常提倡嘅manifestation,心想就事成,無錯係好似好正,好引人入勝,但係長遠跟着做,你唔慌會有運行,因為,佢只會mislead你原地踏步。

如果你曾經深深咁投入過new age新時代運動,就會發現無論係跟邊個作者、導師都好,你會發現你所追求嘅開悟啟發,只能維持好短時間。

你想追求嘅開悟、滿足只能夠維持一段很短嘅時間。之後,你就會覺得好空虛,內心對於靈魂、對於智慧飢餓,只能夠滿足1、2分鐘,之後又會覺得非常之不滿足。又要繼續參加不同療程、參加不同占卜、又要再追求另一個智者、導師。

以前都曾經為咗改變命運,我甚至相信Wayne Dyer一個manifestation教學,就係不斷發出Ahh、Ohm聲音冥想,就可以吸取財富、實現夢想,甚至減肥。而家諗返真係覺得戇居到極。

更甚者,有啲new age要求定時進貢上師,同邪教只差一線!

真正宗教修行,係唔會收費!

作為一個曾經深深沉迷係香港新時代New Age Movement入面嘅人,以上幾位嘅書我已經睇過好多次,參加過好多新時代課程,睇過好多YouTube Video。甚至用咗幾十個鐘自己工餘研究。

我只可以講一句,New Age呢啲野,並唔能夠同我將會介紹俾你個一樣嘢嘅咁犀利。我依家講埋New Age先。

無錯,呢啲New Age作者令到好多讀者對於靈魂、命運、超自然力量產生興趣。令讀者們好想嘗試利用一啲超自然嘅力量,改變而家嘅環境。呢個世界,的確有超自然力量。

超自然力量,靈魂,其實係聖經、佛經裏面都有講過。絕對唔係一啲什麼新鮮事物。

世界除咗我哋看得見嘅次元世界之外,有另外次元(靈界)嘅存在,世界各個主要宗教都承認。

有啲初接觸新時代運動嘅人,就會不停向身邊嘅人講解呢啲方法嘅神奇之處。對於呢啲人士,我唔會嘲笑或者恥笑。反而,我會用一種理解嘅態度去嘗試明白佢哋而家嘅處境。畢竟,我以前自己都係咁!


易經六爻算命,你敢保證接受結果?

先講香港流行嘅易經六爻占卜。

易經占卜係中國術數、神秘學一種。new age都有人玩易經。

所謂「唔窮唔算命」,好多香港人第一次接觸靈魂、命理、占卜、靈界、new age等等,就係當佢哋遇到生命中解決唔到嘅問題同煩惱嘅時候。

好多年前,我第一次占卜算命new age,就係當陷入一個自己都唔知道點樣處理嘅低潮裏面。當時嘅我,以當時嘅人生經驗來講,唔太清楚點樣處理係最好。

其實,每個人嘅一生,一定會有一啲比較順利嘅時刻,亦都有啲比較冇咁順利嘅時刻。當一個人遇到低潮,好多時候就會對於六爻占卜、陰陽等等產生濃厚興趣,希望可以盡快改變環境,險中求勝。

尤其是好多雜誌吹噓易經六爻占卜方法,講到如果要改運,就一定要用呢啲方法一樣。再加埋一啲道聽塗說嘅低水準腦細、劣質風水師、過氣ball場名人、強國土豪、本地MK暗星、援交𡃁模、人端老模二奶為咗出奇制勝,就用呢啲方法,令到大家都好好奇,如果自己都豁出去,會唔會都可以扭轉劣勢?

易經六爻占卜,係利用易經中共64卦,再用擲銀仔、銅錢方式,去占掛。

現代易經占卜,方法係默想問題,再紀錄硬幣「陰爻」(字)、「陽爻」(公)。投擲6次之後,將结果查找相對「64卦速查表」。每一卦,都會有幾句指引。

其實易經六爻指引中,有不同排序。「夏易」以艮卦為首,「商易」以坤卦為首,「周易」以乾卦為首。簡單講,就係巿場上易經占卜同古人已有不同。而且,又有分為古金錢起法、數字起卦,而且,根據熟悉易經占卜人士,起卦有一定方法,要先「請神」。亦要用「通天密咒」。

點先係正確方法,仍然各有各講,眾說紛紜!(呢個已經係有問題嘅預警,用一蚊銀又可以簡化占卜,真係LOL)

其實,真正易經占卜方法,好可能已經失傳。

天大地大,有冇可以預見未來嘅高人?我唔敢話冇。但香港同大陸99%都係老吹嘅騙子。

易經:「命者,人所稟受,苦貴賤夭壽之屬是也」

以前,對於算命我會好緊張,後來先知,算命,不足以影響你未來。

天機同命運,其實係人與環境共同開發。

命運,唔係「算」出來,而係「創造」出來。

最好預測未來同命運方式,就係「自行創造」。

你去睇下美國、法國、瑞典成功商人,有邊個有用六爻?佢地用「創造」。

對於危言聳聽嘅算命師傅,你可以問一下,下個月「指定日子」股市點買、買邊隻先可以發財。佢答成點,你就知佢功力。

大部分人,都講唔中!

同時,問同一條問題,易經六爻占卜結果,亦每次不同。就算唔用科學方法去測試,天意都唔會轉得咁快掛!?

你需要嘅,係希望,唔係算命。

如果你係生命中遇到好多問題,覺得一個人解決唔到,就要繼續睇下我呢個專為你準備嘅命運講座(包括我的親身經歷)。


塔羅牌占卜:力量還是失落

塔羅牌Tarot Cards係另一個最多香港人開始接觸New Age嘅項目。

塔羅牌本身有一定嘅魅力,牌子上教皇、魔術師、命運之輪、戀人、隱士、聖杯、金幣;本身都有種對中世紀想像嘅浪漫。

世界上最早嘅塔羅牌存在於巴黎國家圖書館,係法王查理六世叫人所畫。

香港new age流通幾種塔羅牌,Rider Waite係其中一種最常見最受歡迎。當中嘅插畫充滿神秘感同歷史感,為占卜塔羅呢件事帶來神秘面紗。

塔羅牌嘅背景眾說紛紜。過去嘅時代,好多人認為塔羅牌來自吉卜賽人。但亦都有其他說法認為,塔羅牌來自更加早之前嘅中世紀歐洲、埃及。係15世紀開始,塔羅牌漸漸四散,亦開始被用作占卜作用。

塔羅牌用78張牌,通常會叫參加者默默想像問題,然之後隨手抽出一張,或幾張牌(spread)。抽出嘅牌或spread,就會為你帶來「暗示」同「啟示」,但塔羅牌並唔會提供明確答案。

好多用塔羅牌占卜嘅人都會有佢自己嘅塔羅占卜師(塔羅師)去幫忙解答問題。因為,塔羅牌最引人入勝之處並唔係張卡本身嘅意義。張卡本身,可以被演繹出唔同嘅意義。其實好睇當時占卜師嘅理解,與及口才。

就算抽到同一set牌,不同嘅塔羅占卜師,亦可以有兩個完全不同解讀。

比較有經驗嘅塔羅占卜師能夠自圓其說。塔羅牌嘅問題,係因為佢唔太科學。基本上所有嘅演繹都來自塔羅師本身,佢哋其實可以用cold reading嘅方法,再配合你自己講出嚟嘅資訊了,就可以講一個動聽嘅故事。

好多人用塔羅牌占卜問嘅問題包括:

我應唔應該分手?我應唔應該轉工?究竟佢有冇出邊搞三搞四?我點先可以踢走小三?

去過唔少嘅占卜,我都發覺塔羅師來來去去都係嗰幾味:
「你係一個靈性追求者」、
「你而家呢個情況係因為妒忌所引起」、
「貪心招致問題」、
「你身邊有一個女性專門同你作對,為你帶來麻煩、呢個人你要多小心留意」、
「今年年尾前會有大改變發生」、
「你觸覺敏銳,但事業上遭人惡意批評」

就咁聽落去,好似好中喎!

再見多幾個塔羅師,再陪多幾個朋友去塔羅牌占卜,自己再諗深一層,原來講嚟講去都係行貨,同每個人都係咁講!

塔羅牌最凶險嘅地方,就係你誤信所謂嘅語言指示,而冇去自己創造命運!

成日占卜塔羅嘅人,都有一種消極氣場。

請記住,命運創造者係你,唔係啲牌。

你每一日每個選擇,都係一個成長機會。

你擁有嘅係「力量」。依賴塔羅牌,會令你冇晒力量。

相比起通靈或者其他利用靈魂、鬼魂去作出預測嘅塔羅牌超自然現象,更加危險同埋更加容易中招嘅,就係你會對於塔羅牌形成一種依賴。你好容易會令你對於自己好懷疑,冇咗塔羅牌,周身都唔舒服。

好多人去睇塔羅牌見到所謂嘅預言嘅時候,就會三心兩意,寧願相信塔羅牌面嘅解讀,都唔會親身去用理性思考、比較、嘗試解決問題。而好容易比呢啲牌搞到自己停滯不前,疑神疑鬼,失去信心。將自己睇成為一個任由命運擺佈嘅人。

冇人完全知道塔羅牌如何運作,連塔羅師本身都未必可以完全知道點解你嗰日會抽到咁樣嘅牌。

但係,塔羅師嘅三言兩語,就已經令到你恐懼,恐慌,乜都唔敢做。咁樣,你已經係自我催眠,self fulfilling,咁戇居咁搵笨嘅嘢,你做嚟做乜。

人,始終要行自己嘅路。

人係有自由意志,可以選擇改變命運。唔應該比呢啲牌嚇到你唔敢行動。

啲人成日話塔羅牌危險,冇嘢危險得過,你將你自己嘅將來、心情、甚至未來,放係一啲虛無縹緲嘅tarot spread上面。無錯有啲塔羅師真係可以同靈魂接觸,所以可以講得出你一啲非常啲私人嘅秘密(極少數) ,但係更加危險嘅,就係你自己放棄左你自己嘅信心、放棄左自己嘅free will。

究竟係你玩牌,定牌玩你,玩開塔羅嘅人都唔肯定。

開始時,係你玩牌,一陣之後,變成牌玩你。

塔羅牌另外一個問題,就係會高度上癮。

塔羅師分為兩種,一種係真的有料,就係可以同靈界溝通;另一種,都係一般嘅江湖術士。塔羅牌占卜引人入勝嘅地方,就係因為佢所謂嘅演繹同答案,其實係比較空泛。所以係好難證實佢係錯或者唔啱。亦都因為咁,基本上每一次去占卜都會有一啲講得啱嘅地方。(最主要因為你自己個心fill in the blanks)。好多時參加就會有一種錯覺,覺得塔羅牌真係預知左未來出來。

你真係相信,喺一個三四線商場嘅鋪仔裏面,搵一個完全唔識你嘅人,就可以同你一齊搵到最適合你嘅人生路向?呢個方法,真係好嘅方法?如果你有一啲朋友,將人生種種重要選擇,喺一個咁荒謬又咁兒戲嘅環境之下決定,真係有點sad!

當你冷靜咁諗,就發現,解決問題嘅方法,就係認清楚事實。同時,你都要去睇一啲有關書籍,從中搵到啟發同埋指示。呢個世界好多人已經將佢嘅人生經歷寫成書本,你只要肯睇,都一定有人可以學得到,一定有所得着。就算你話冇朋友,又冇錢,圖書館都有好多書可以免費閱讀!肯唔肯去學就係你自己嘅決定。

道聽塗說嘅塔羅牌、new age,唔可以取代真正嘅知識。香港人真係要小心。

經過你自己思考、比較、想像嘅人生,活出自己嘅命運,絕對好過比幾張牌說三道四!

當你重拾信心,你會終於醒覺,呢78張牌,無論你抽到邊張,根本唔代表乜嘢。命運,應該係你自己創出嚟。



養鬼仔、古曼童:邪術招惡報

除咗塔羅牌之外,我就要講下養鬼仔。香港new age越來越多人用呢個習慣。

你有冇發現香港旺角、銅鑼灣、尖沙咀嘅樓上鋪,除咗new age書店多咗,仲多咗好多佛牌、養鬼仔嘅地方?搞到個商場陰陰森森,好恐怖。依家好多商場業主甚至白紙黑字寫出嚟,講明佛牌租客免問!

首先要聲明一點,佛牌同佛教係冇關係!好多人以為係佛教,呢個概念係完全錯誤。各位new age人要注意!

真正佛教唔講風水、唔占卜,更加唔會養鬼。

供養鬼仔絕對違反佛教教義。同大愛添功德、做好事完全冇關係。好多人借呢啲力量只係為咗尋求一己嘅私利,絕對唔係什麼功德行為。對於增加自己嘅福報亦無幫助。

我之前再去睇過一啲有關佛教嘅文章,發現根本上養鬼仔呢個概念完全不符合佛教教義。如果你睇一啲佛教嘅網站或者論壇,大部份嘅大師都會建議你「請走」鬼仔,而唔係請佢來你身邊。

正統嘅佛教,根本唔會容許你養鬼。

好似有位內地法師講:「有大佛不拜,去拜小鬼!」

養鬼仔呢個方法,的確係近期非常流行。好多做偏門生意例如賭場、夜生活場所嘅人,都會有養鬼仔嘅習慣。但同時,依家越來越多香港人就算唔係做偏門,都有呢個習慣。實在令人震驚又不安!

我個人就知道,有啲香港醫學美容連鎖店嘅sales就會養鬼仔去追數。甚至一去,就養十隻八隻!破唒new age紀錄!

除咗美容方面,有啲人因為職業關係,例如sales要跑數,就會尋求一啲旁門左道嘅方法去爆數,例如養鬼仔、古曼童,增加自己嘅影響力。另外有一啲人,為咗希望可以留得住個男人,就會用降頭、茅山邪術去嘗試用超自然力量綁住男人個心。

養鬼仔、古曼童好多來自泰國。真正嘅起源已經無從稽考。只要你上Google search一下「養鬼仔」、「佛教」,就會發現其實好多佛教中人都唔承認養鬼仔嘅所謂功能。

而且,你絕對唔會係唯一養鬼之人。就算你養,功力未必勝過對方。

之前都有報道過,胡亂養鬼仔,會家破人亡。之前蘋果日報都有講過有荃灣法師拒絕接受陰牌,因為太多人用過之後發覺效果未如理想,仲搞到自己一身惡運,而放棄修養。亂咁將牌遺棄於寺廟。

養鬼仔、古曼童呢樣野你諗都唔好諗。

靠呃神騙鬼搵食,做出傷天害理事嘅人,氣數已盡之時,將面對報應。


(未完待續)

0 意見

Counter

Flickr Images