中國傳統有5術 :山、卜、醫、星、相。除咗市面上比較常見到嘅奇門遁甲、易經占卜、紫微斗數之外，其實仲有梅花易、火珠林、六壬、太乙神數；後期嘅推背圖、燒餅歌等等。香港New Age學說同埋書本，好多時會集中討論易經。種種嘅神機妙算，令到好多人都好想去了解，究竟命運嘅吉凶，可唔可以用呢啲方法去窺探。同埋，究竟值唔值得用幾千、幾萬蚊嘅價錢，去學習new age學説同風水命理，究竟佢會唔會真係可以幫得到你。
香港市面上有一啲風水師傅，會幫一啲有錢人用傳統秘術增強運氣。依家外國嘅New Age圈子裏面，忽然流行起一股中國風，中國傳統嘅易經占卜（I-Ching）、風水（Feng Shui）等等，都成為學習嘅教材。好多外籍人士甚至自行開班，教授其他人有關風水嘅研究。今日就會同大家講下，呢啲new age學說方法，究竟係乜嘢。我會揭露俾你知，市面上收費以$10,000計嘅傳統秘術改變命運嘅方法。呢啲方法，市面上好多人都未必清楚。以上嘅資料係經過我嘅特別整理，如果有興趣去了解中國嘅神秘改運方法，就一定要睇。
一啲年紀比較大嘅有錢人、生意人會用中國術數改命、改運方法，就係中國式嘅術數，包括風水、易經、奇門遁甲。
追尋堪輿風水根源
無論係香港嘅定係外國嘅New Age學説圈子，好多人信風水，目的，就係為咗求財，希望得到金錢上嘅好處。其實，中國古代嘅風水術，同金錢、事業上嘅好處並無關係。
堪輿風水術最初源自漢代。漢朝時期，術士「青烏子」著作：
「陰陽符合，天地交通。內氣萌生，外氣成形。內外相乘，風水自成。察以眼界，會以性情。若能悟此，天下横行。」
當年嘅市民相信，由於人嘅身體，由父母孕育而成。就算佢哋離開咗世界，只要墓穴嘅地方好，喺一個有天地靈氣嘅地方，對方身體仍然能夠感應到自己嘅身體。簡單來講，就係一個有關安葬地方嘅（粗疏）環境科學研究。
呢個就係風水術嘅起源。即係相信你已經過身嘅父母，同你仍然有某種感應、關係。你會從父母所長眠嘅地方得到某一種庇蔭。
風水對於判斷人嘅命運吉凶，其實非常之含糊。
其實，風水術，喺漢朝已經有皇室人員批評佢嘅荒謬之處。今時今日，好多人所相信嘅所謂風水，同原本嘅用途、目標無關係。有啲香港new age人以為可以旺財，其實唔會。
究竟傳統堪輿風水術有幾勁？科學討論
無論信唔信new age都好，喺香港嘅工作環境裏面，好多時好多老闆都會請師傅睇風水，以增強公司同埋自己嘅運氣。其實風水呢樣野，究竟有幾幫到手？有幾勁？
香港人真係好信風水，無論搬屋，辦公室佈置，定係坐位，都好多時要問講風水師，先至會坐得安樂。但係，其實風水同事業同生意嘅成功、收入、發展，究竟關係大唔大？
我會想用嘅方法，就係睇吓一啲信風水，處處跟從風水意見嘅社會，發展會唔會好得過一啲唔信風水嘅社會。同時，我都會想睇下一啲好成功嘅人，究竟佢哋都係會信風水？定係唔信？咁樣，大家都可以見到有少少資料係比較同理解。
先講下驗證嘅方法。一般嘅大都會發展，通常都唔太理會風水。依家香港大部份嘅都市發展，都係又唔信風水亦都唔多識風水嘅英國人、香港人所建立。過去50年間，多咗好多新嘅樓宇、建築、填海情況。根據風水學說，呢啲，都會影響到風水。但係，香港50年來，富有的人口大量增加，死亡率減少，整體衛生情況有改善！即使法律唔係完美，香港法治整體發展情況亦比50年大幅改善。破壞咗風水，反而社會發展進步，而且富有 ！
另一方面，台灣係一個非常之信風水嘅國家。但係，經濟情況、市民生活水準，過去幾十年都唔算太好，近幾年仲有惡化嘅趨勢。
唔信風水、破壞風水嘅地方，社會發展相當良好！相信風水嘅地方反而遇到好多問題。
風水命理最大嘅問題，就係只能夠嘗試解釋已經發生左嘅事，但係就未能夠推斷未來會發生嘅事。
咁樣對於推斷未來，風水其實作用唔大。
求簽的神秘
去一啲風水廟宇求簽，祈求指引，係香港中國民族嘅神秘主義行為之一。去黃大仙求簽，就係好多人每年必做嘅行為。希望可以預知命運，改變命運。
呢一類型嘅求簽行為，由宋代開始。
中國式嘅求簽方法，同西方塔羅牌占卜一樣，都會有一個好大嘅缺陷。就係因為佢哋嘅占卜結果非常之含糊，而且，通常會用一啲歷史故事、比喻嘅方法，所以究竟真正嘅指示係乜嘢，非常之唔清楚。唔同嘅師傅、唔同嘅人，有自己唔同嘅解讀。
由於求簽本身並無明確表示事情會發展嘅時間，所以，好難去證實佢係啱，或者唔啱。
未來一定會包含順利與及不順利嘅事情。所以求簽，差唔多係一定中！
廟街風水師、求簽實錄
廟街係香港最迷信詭異嘅地方，坊間術數，滿天神佛。由new age，狐仙，象神，孔雀王，陰牌，養鬼仔，古曼童，蝴蝶牌，易經占卜，塔羅，中國睇相，五花八門，招財法術、人緣法術，應有盡有。
佛教修行，達到涅槃嘅八種方法係：「正見、正思維、正語、正業、正命、正精進、正念、正定」
廟街本身氣場差
如果你同我一樣，都係一啲對於超自然靈敏度比較高嘅人，你就會知道，廟街係香港其中一條最邪最污糟邋遢嘅街。new age人真係要小心。
如非山窮水盡，大家要再三考慮先好去廟街占卜算命睇相！
改運有好多方法，如非必要，真係要三思。
頭先講話廟街污糟邋遢，唔只係當地嘅環境欠佳，污染嚴重，衛生水準差，而係整體嘅靈魂。
無錯，廟街特別多道友、失業中年人士、妓女、基層市民，環境差。但佢最危險嘅，就係一種籠罩着呢個區域嘅負面能量。
直接啲講，廟街充滿邪靈！想改命人士千祈要小心！
我係一個直覺相當準確嘅人。對於一啲事情能夠用感覺去做到一個相對準確嘅判斷，自己都無法完全解釋得到。我心目中，廟街係全個香港其中一個最污糟嘅地方。
冇乜事，都千祈唔好去廟街占卜、算命睇相。尤其當你想改變運氣，扭轉人生頹勢嘅時候，你更加唔可以隨便去廟街。以免沾染，受到不必要影響。
曾經有一段時間，我經常去廟街占卜、好似鬼遮眼一樣。當時，亦都係我人生最唔順嘅時間。
之後，我就信我自己嘅直覺，唔再去廟街。運氣亦都慢慢提升。生活亦都變得比較正常、正面、充滿希望。
其實，要運氣好，點解唔去一啲好運氣嘅地方？點解要去一啲差運氣嘅地方？
廟街邪靈當道？
我唔知道你對於魔鬼嘅睇法係點樣，但係，世界上所有嘅主要宗教， 基督教、天主教、佛教等等等，都係有對於魔鬼、邪靈嘅描寫。多數new age人都認為冇，但係，攞個腦諗下都知啦，你啲同事、同學裏面都有啲人特別邪過其他人。而邪靈一直存在，唔信，可以攞Osama Bin Laddn、Isis殺人短片睇。
對於世界上有冇邪靈同鬼，好多宗教都已經承認左。
負面、狡詐、邪門、毁滅性嘅能量，喺一啲重要嘅千年書籍包括「聖經」裏面都有提及過。
我夠膽講，香港廟街，真係特別多充滿邪靈與及魔鬼嘅地方。
廟街特別多家庭問題、白粉、K仔、海洛英、妓女問題，一切不幸福、失意嘅負面能量，已籠罩着幾條街。無論你係咪new age粉絲，都唔可以否認。
不幸嘅地方，好難盛產幸福。
就正如，一個唔開心嘅家庭，好難會出幸福嘅小孩。
香港廟街特別多社會邊緣人、失魂落魄嘅失意人士。犯罪問題嚴重。講到底，有邪惡嘅行為同外在表現，係因為有邪惡嘅內在靈魂！廟街，真係好唔乾淨。
廟街特別多有關術數嘅物品出售：包括泰國佛牌、狐師、塔羅牌、古曼童等等出售。new age及偽new age嘅嘢都好多。好多占卜嘅地方，亦都請有佢哋嘅守護靈魂。如果係靈魂嘅角度嚟睇，呢個區，就係滿天神佛，氣氛詭異。
如果你直覺感覺，比較強烈，你就會知道，廟街此地不宜久留。
踢爆香港廟街算命、占卜師伎倆
對於一啲到而家都仍然對廟街占卜睇相算命，仍然有興趣，仍然有興趣去參與new age、佛牌、蝴蝶牌、古曼童等等嘅人，我就會作出以下的建議。
我自己都曾經係一個非常沉迷超自然現象、靈魂、命運、New Age 學説嘅人。廟街睇相、塔羅牌、算命、水晶，我自己都親身試過。絕對有發言權。
基本上你去到廟街算命、占卜睇相，師傅所同你講嘅，亦都只係一啲唔好嘅說話。講真，大部份師傅都係江湖術士，都要搵食，如果下下講到好好，佢嘅可信性亦都會降低（講真唔窮唔算命，去得占卜算命梗係有好多心靈上嘅問題，正如你健健康康唔會無啦啦走去睇醫生）你都唔會再幫襯。所以大部份嘅廟街占卜師傅，都會同時講少少好嘅預測，亦都有多好多唔好嘅預測。佢哋亦都會將你嘅未來運勢預測，講到比較負面，咁樣，你哋先會有興趣去繼續俾錢，了解點樣可以扭轉乾坤，反敗為勝。
通常講一大輪你姻緣運點樣，事業運點樣，健康運點樣之後，佢就會話，買個水晶，可以幫你改運。又或者，買個佛牌，又可以幫你反敗為勝等等。你就會諗，都唔係好貴啫，都係幾百蚊，買個安心都好呀。
如果你對於廟街算命占卜、New Age學説有興趣，就要知道，真人不露相，露相非真人。通常喺廟街度，都唔會係喺超自然力量最犀利嗰啲人。
老子：「知者不言，言者不知」
突破風水命理的局限
風水嘅限制之處，在於永遠都只能夠馬後炮咁評論。如果一個人被認為好好運，但係卻遇到一啲好大嘅挫折、疾病，之前一直維持正面意見嘅風水師又會話，個人本身冇問題，如今結果唔好，係因為個地運唔夠好！
舉一個例，由於風水師會比少少預測，如果預測結果未如理想，同現實最後結果不同嘅時候，風水師就會話，預測唔准，會唔會又係因為你自己唔行善積德？
等我再講一個例子。遇到一啲大型嘅天災事件，例如馬航mh370失蹤事件，理論上，好多遭遇不幸事件嘅人士，佢哋嘅命運都係有好多唔同嘅時辰八字、五行屬性。但係，點解佢哋都會同一日遇到同一個意外呢？
究竟，風水玄學係咪真係幫到我地？
咁簡單來講，係佢講晒。
結論
到咗呢個階段，已經可以了解到，風水術、傳統中國改運方法，有比較大嘅缺陷。
就算佢可能真係有一啲幫助，呢啲幫助，都唔係我哋可以控制得到。
中國人已經迷信咗幾千年，仲要愚昧多幾多年？
幾千年前，已經有人批評風水嘅荒謬之處。今時今日，民智水準竟然比唔上幾千年前，真係令人詫異。
究竟宇宙之間，有冇一啲野可以幫到你？呢一點下一章我會詳細講解。
