【深夜聊天】【改運】香港New Age學說系列3:New Age to Jesus (耶撚勿入)

8月 20, 2017

鄭秀文做主持嘅節目「心情約會」,分享咗好多克服抑鬱症嘅成功個案。令到我好想同大家再講一下,我自己個人嘅經驗。好多人走去信師傅、求神問卜、學習風水、參加New Age,往往係因為佢哋陷入咗生命裏面嘅低潮。而呢一啲生命嘅低潮,又會同抑鬱症有不可分嘅關係。抑鬱症同new age、占卜、宗教嘅關係複雜。好少見到一啲成功美滿嘅人,沉醉喺new age學說、占卜預言裏面。

抑鬱症對於現代嘅城市人越嚟越普遍。即使係樂壇天后「鄭秀文」,香港美女「薛凱琪」都經歷過人生裏面嘅低潮時期。究竟點樣先可以有抑鬱症行出嚟?

今次講下,點樣,讓真正嘅光與愛,療癒你的抑鬱症。

點樣,讓真正嘅力量,令到你重新見到希望,有能力再向前行。


克服抑鬱,我的親身經歷

大概10年前,我因為自己思想及客觀環境嘅問題,陷入左一個(自己思想偏差所以製造出來嘅)低潮裏面。當時我年紀仲係好細個,但係已經初次嘗試過抑鬱嘅滋味。嗰半年時間,每日都活在憤怒、埋怨、負能量裏面,每日一起身,只係覺得個上天點解會咁唔公平。

嗰一段時間,我心結打唔開,令我非常之抑鬱。曾經試過響icc Elements商場,靜靜地,無聲地,慢慢崩潰。

講出嚟,都有啲恐怖。恐怖唔係因為歇斯底里。其實當時都並無任何過激嘅反應或者任何歇斯底里,反而係一種對未來冇希望,茫茫然,無力嘅感受。一種因為內分泌失調而導致抑鬱,半行屍走肉嘅生活,先係最恐怖。

未真正經歷過嚴重抑鬱嘅人,唔會知道呢種情況嘅可怕。因為內分泌嘅失去平衡,導致患者長期活在一種憤怒、疲倦、缺乏力量嘅狀態之中。

嗰一段日子嘅黑暗與及缺乏動力,相比起而家嘅能量、正面、陽光,完全係生命中兩個唔同階段。的確,兩個截然不同嘅階段。

而家同當時一樣,每日都有不同嘅挑戰與及困難,但係唔順之餘,我都會抱着一種學習、成長、甚至享受困難嘅態度,而唔係即刻進入恐慌或絕望裏面。

我可以講,當時同樣面對抑鬱症而最後成功克服嘅鄭秀文,幫到我好多。佢當時嘅信仰歌曲、演唱會,深深咁影響到我。睇到佢嘅經歷,無論係參加教會、定係佢嘅著作「值得」,令到我自己有人生新嘅方向,令到我自己都終於都可以企起身。

正當我嘅抑鬱去到谷底嘅時候,我恍然大悟,突然間發現,我一直自作聰明地諗住可以幫我改運嘅方法,包括各種各樣嘅新時代new age學說都幫我唔到。我曾經嘗試過水晶改運、A course in miracles奇蹟課程、Wayne Dyer manifestations、Deepak Chopra古印度秘術、Edgar Cayce預言、學習Carl Jung心理學集體潛意識、Louise Hay自我療癒法、Rhonda Byrne秘密、Meditation冥想、靈媒、塔羅、算命、輪迴轉生、占卜、閱讀關於命理嘅文章,全部都幫我唔到。新紀元運動經常講嘅心想事成、吸引力法則(Law of Attraction),全部都唔得。以香港人來講,對於new age呢方面嘅認識,我都算係誇張!但幫我唔到。

 
(St. Peters Basilica, photo credit: Wikipedia) 

嗰個時間,我好想改運,已經去到藥石亂投嘅階段。

我由冇宗教信仰,到跟其他人胡亂上山莊香拜神,到研究new age新紀元運動,到廟街求簽占卜,到研究泰國白龍王,你諗到嘅,我全部做過。

依家諗返,我當時好似乜都信,其實亦都係乜都唔信,只係信自己。

New Age包含咗好多唔同嘅宗教內容,每一種嘅宗教都包含少少。試完所有方法之後,先至發現,以下呢個方法,真係有用。

喺我最谷底嘅時候,係「向耶穌祈禱」,令我由黑暗嘅邊緣爬出嚟。

當我完全試完大量new age新紀元嘅學說同方法之後,最後,我突然發現,我唯一冇做嘅,就係冇同上帝祈禱,冇同耶穌祈禱。

耶穌我好細個已經聽過,但係,好多年冇再有一個親密嘅關係。我唔去任何教會,我嘅生活圈子都係一班貪靚貪錢嘅人,老實講內涵真係唔係好高,亦冇任何教會朋友。當時基本上我對住呢班自稱信耶穌嘅人係完全抱着一種唔了解但有藐視嘅態度。(我討厭嘅唔係耶穌,而係有啲自稱基督徒高人一等嘅自我感覺良好態度,即使到而家,對於一啲激進嘅耶撚,我都係敬而遠之)

嗰時候於谷底嘅我,因為見到香港天后鄭秀文,經過信仰宗教嘅洗禮,由神秘失蹤突然凱旋回歸,開演唱會,大唱信仰歌曲「信者得愛」、「上帝早已預備」,佢嘅力量、自信心、正面能量深深咁樣影響到我!令到我好奇怪,點解一個明明都同樣患有抑鬱症嘅人,可以咁勇猛咁走出嚟?而且,個效果好好喎。

 
(耶穌畫像,photo credit Akiane,外國天才少女畫家)

當時嘅我對於new age運動、超自然現象有好大嘅興趣,對於一啲靈魂學、魔術、天使以及神秘主義,基本上係照單全收。當時我就諗,既然我都有咁多經歷,都不妨試埋呢個(信教、向耶穌祈禱)。但偏偏,就係呢一個方法,令到我人生有咁大嘅正面轉變。

都非常虔誠、非常誠實咁樣,向耶穌祈禱之後,事情,竟然就開始有少少嘅正面轉機。都唔知道究竟係巧合,定係祈禱嘅奇蹟。總之點都好,事情開始向好嘅方面發展。我唔知祈禱、神秘力量點運作,同樣我唔知冷氣、LED電視、電力點運作,總之有效就得。

我之後,都冇再好勤力咁樣祈禱或者去了解耶穌。只係知道,喺嗰個時候,我再冇好似以前咁樣,充滿偏見,咁樣敵視世界,或者覺得任何信耶穌嘅人都係耶L。

之後, 一個偶然嘅機會之下我見到外國傳道人Nick Vujicic嘅片段(即係天生無手腳,但係演講一流嗰位外國人)。我無聊開來睇,基本上個心態就好似其他嘅美容教學一樣睇完就算,但係嗰一次,佢嘅說話,深深咁印入我個心裏面,我嘅眼淚,竟然不期然自己流落嚟!

 
(Nick Vujicic)

我平時,係唔會喊,所以點解會對住一個我從來都唔識嘅傳道人有咁大嘅感觸?

我當時唔單止兩滴眼淚,而係不能自己地流淚幾分鐘!嗰一次,就令我知道,呢啲人所講嘅說話,應該係有啲料到。

佢嘅說話,觸動到我嘅靈魂。我嘅眼淚,並唔係我身體,而係我內心深處嘅眼淚。

我參加咁多new age活動,睇過咁多唔同宗教(佛教、道教、印度敎) 嘅研究,從來未試過咁樣。一種嘅真誠,令我嘅靈魂知道,this is the one!

 
(鄭秀文主持心理健康節目,「心情約會」節目截圖,網上圖片)

就係因為new age、鄭秀文同埋YouTube,令到我對呢個宗教重新產生興趣。

之後,我斷斷續續開始祈禱,開始改變我嘅人生,工作繁忙,慢慢遠離各類型嘅new age學說,減少參與占卜、new age命理。我嘅生活,也斷斷續續返回正軌。

當然由抑鬱到療癒嘅過程,係會有起有跌,唔係一一條直線直上。但係整體個方向,都係向光明、智慧、原諒、愛出發。我開始去了解一啲香港同埋外國嘅人,點解會有去信耶穌。可以上網睇吓一啲YouTube短片,好多人都講new age to jesus,new age to Christianity。近年先發現,原來好多曾經宣傳新紀元運動嘅人,已經紛紛轉向耶穌!就好似世界上最多人睇嘅新紀元blogger ,擁有幾十萬個追隨者嘅Steven Bancarz一樣,原來亦都因為親身經歷奇異事件,已經轉投基督教!

 
(Steven Bancarz,曾經係世界上其中一個最多人跟隨嘅new age blogger,網站瀏覽量數十萬計,一次神秘靈異經歷令佢放棄new age,加入基督教 )

 
(Doreen Virtue係一個世界知名嘅new age心靈導師同作者,出版過大量new age書、占卜、天使咭、新紀元YouTube,2017年因為親歷耶穌出現,一次靈魂經歷而放棄new age,轉向耶穌)


跟住落嚟呢幾年,我對於new age學說、東方秘術冇咁大興趣,但係對於命運、人生、靈魂、死後嘅世界仍然充滿熱情同興趣。我漸漸發現,根本唔需要new age都可以擁有一個燦爛而充滿靈性嘅人生。

我哋想要生存嘅意義,希望了解天使,命運,奇蹟。神奇與神秘,其實唔需要從養鬼仔、通靈得到。研究咗咁多年new age新紀元運動嘅我,發現真正嘅奇蹟之書,天使之書,神秘預言,愛的教育,原來來自二千幾年前寫的一本書。嗰一本書,先至係真正嘅奇蹟課程。

回想起之後生命中每一個小小嘅改變、奇蹟,就令我更加了解到,原來,耶穌先至係所有愛、奇蹟、智慧嘅根源,穿透生死,跨越時間。其他所有new age法術、靈魂出體術,的確有,卻只係一啲低程度嘅方術。呢個世界有靈界事物,對我一啲都唔出奇,因為我自己睇過好多研究發現的確有。而其他大型嘅宗教亦都有講呢方面嘅嘢。(聖經、佛經有提及)

耶穌被認為係萬王之王,我唔去信耶穌與及佢嘅教導,反而走去追求坊間所謂上師、高靈spirit guide、靈媒,就好似有四季酒店超高質日本菜「稻菊」唔食,硬係要去深水埗挑戰劣食「明將壽司」一樣。又好似明明可以免費得到正品,卻偏偏去淘寶買偽劣貨一樣。

之後嘅人生裏面,有太多嘅事件,令我漸漸發覺,耶穌真係比坊間小鬼、靈媒,強勁好多!我有機會再同大家分享。

而家再分享一下我一次嘅靈異經歷,我有一次行商場,見到一間專門出售有關聖經及宗教物品嘅書店。當我嘗試喺書架上邊攞起一本宗教書嘅時候,突然間有一種觸電嘅感覺,呢一種突然觸電感覺,係非常之難形容,因為係屬於超自然!

有幾秒鐘,我係突然間感到無比嘅廣闊、偉大、聖潔、平靜、尊嚴、澄明,來自另一次元,我感受到神聖。我知道,呢個就係聖經所講嘅「聖靈」。

呢個觸電嘅感覺,只維持咗短短幾秒,但係呢幾秒,令我畢生難忘!

如果之前有啲人有能力感受到有鬼同埋靈魂嘅存在,嗰幾秒,就令我感受到神、天使及光明嘅存在。

 


耶L不代表耶穌

10年之前,我對於天主教及基督教教會,仍有非常之大嘅抗拒。即使到而家,對於一啲思想非常狹窄,利用教會之名去歧視其他人,散播仇恨嘅所謂基督徒,我仍係非常反感。對於一啲製造分化,惟我獨尊,虛偽嘅傳統嘅教會,我仍然係敬而遠之。

但係我知道,教會不代表耶穌。

網上耶撚更加不代表耶穌。

就正如好似美容一樣,如果一支神仙水好用,我就會用。就算有啲其他醜樣嘅人同樣都買嗰支神仙水,唔代表神仙水本身冇用。只係代表,用神仙水裏面嘅人裏面,有靚人,亦都有冇咁靚嘅人。

經過多年嘅研究同實行之後,就發覺,只有「耶穌」、「聖經」,係真正有用,對你嘅身心靈發展,啟發與及修護嘅力量,絕對比所有new age新紀元運動強勁好多!

如果你同我以前一樣,對於耶穌或基督有非常大嘅保留,好多時係因為你比一啲香港教會、癡線基督徒所影響。呢啲以歧視、批評同打擊其他人嘅所謂基督徒,根本唔代表耶穌基督呢個精神領袖,或者佢所提倡嘅信念。如果你真係有研究宗教嘅書本,真係攞本聖經嚟睇,就會發現,佢哋嘅行為,完全唔符合聖經所講,耶穌教導,愛才是最緊要,god is love。

有時呢班咁嘅劣質基督徒,真係影衰晒佢個老細!

講真,點解我咁耐以來對於基督徒都係抱住一個非常之保留嘅態度,係自己親身經歷和之後,先至知道,原來呢班基督徒所推廣嘅,同埋耶穌真正嘅力量,差咁遠?點解一啲咁神聖嘅男神,會有一班咁低水準嘅粉絲?

所以大家千祈唔好因為有一啲水準低劣,虛偽又諸多做作嘅信徒,就對於耶穌呢位奇人——神,有誤解。基本上聖經已經嚴厲譴責過呢一啲虛偽又做作嘅信徒!

聖經充滿人生智慧,啟發我們待人處世之道,與及面對生命困境方法。呢一點同坊間一啲改運方法、靈界方法唔同。

當美容、整容、瘦身、搵錢、扮幸福,都唔能夠幫你改變內心黑暗時,聖經就係黑暗中一線光。每日睇聖經,令我開始在絕望世界中見到希望。

就算而家遇到唔同嘅問題同挫折,我已經學識好快咁搵到出口。就好似你第一次遇到停電嘅時候會唔知點做,但係都你學識點樣去搵電筒、打手提電話叫師傅水電師傅上嚟維修,令屋企回復正常一樣,抑鬱,只要你知道點樣做,就可以好快回復正常。所以,而家絕對唔會再嘥時間喺抑鬱裏面。

真係可以令我在谷底嘅時候,俾到力量我,令到我可以重新出發。終於離開同結束一場黑暗又黯然嘅苦日子。搵到方法,自己行返出嚟!而家係健康、積極、豁達,雖然忙,卻絕對係屬於閃閃發光。

同鄭秀文、薛凱琪一樣,我都克服左抑鬱症。

依家諗返,嗰一段疑似抑鬱症日子,就好似一場電影一樣。雖然當時感受係真,但係所謂嘅原因,就唔係真。就好似睇電影嘅時候,當時嘅情緒係真,但係電影故事本身,只係虛構。

你嘅快樂同眼涙係真,但光影故事,並唔係。

已知改運方法:

睇聖經
寫感恩日記
改變生活習慣
運動
吸收陽光
足夠睡眠
大幅度戒淫、戒色
觀賞電影
社交活動
參與藝術治療

人唔可以改變過去,但可以改變未來。

 

為何你會患上抑鬱症

如果以現代一般香港人嘅生活方式,患有抑鬱症嘅機會絕對比沒有抑鬱症高。

喺我哋嘅生活裏面,充滿咗比較,不安,競爭,不信任。而每日無盡嘅電話、email、短信、群組訊息、宣傳電郵、垃圾電話,不停滋擾我哋嘅生活。

安靜、私人、私密嘅空間,喺香港越來越罕見。再加上非常之細小嘅居住環境,一般人打開個窗,只會見到其他蝸居嘅單位,因為居住嘅環境距離實在太近,見到窗外面嘅人做緊乜嘢,好多人,窗都唔敢打開。

更加荒謬嘅事,而家有啲二萬幾蚊一尺豪宅,玻璃幕牆嘅窗其實係唔可以打開!每日就好似坐監一樣。

全日都係活在高壓、規範、微小狀態,因為呢一種畸形又變態嘅生活環境,令到香港人嘅心,非常之抑壓。呢種環境之下長期落去,係冇可能唔抑鬱。

另外,飲食唔均勻,營養缺乏,與及不能嘅時候習慣,呢啲都會激發抑鬱症嘅形成。

如果你唔想比環境逼到癲咗,就一定要有非常之強大嘅底氣,同埋無堅不摧嘅氣場。呢一種咁強大嘅內心力量,通常來自非常之大嘅信念。


生命係好唔公平,但同時亦都好公平

唔知你會唔會留意得到,就係生命本身,其實都有各種各樣嘅所謂不公平狀況。

有啲人,天生樣貌好靚,皮膚又白,身材又正,只要小小嘅化妝同護膚,已經美若天仙;有啲人,生出來個樣就奇奇怪怪,皮膚質地又差,要經過後天大規模嘅改造、打針、整容、改變飲食、運動,先至比較似樣。

生命,真係有啲唔公平。但係,同時佢都好公平。

如果你淨係聚焦係某一個點,例如外表,都發現有啲人真係天生麗質,有啲人唔係。如果你放大整個項目去睇,包括左一個人嘅外表、心智能力、

今年香港非常之流行嘅靈性治療、new age,就係因為香港人對於現實世界非常之不滿,已經令到人處於崩潰、瘋狂邊緣。

(香港人因為壓力大,好多時候追求靈性嘅出口,就會去咗新紀元運動。其實,真正嘅奇蹟,係另一個地方)


最富有也同時最貧窮

香港係世界上其中一個最發達、治安最好嘅城市。即使有貧富懸殊,香港嘅窮人,同第三世界例如菲律賓、南美洲國家嘅貧窮問題相比,係兩個唔同嘅層次。香港最窮嘅人,都可以攞綜援、有基本嘅飲食、受到政府司法機構嘅保護。亦都有免費法律援助。如果開放香港居留權,世界上好多國家嘅人都會一窩蜂申請!

咁點解,喺一個好似咁發達嘅地方,感覺卻咁差?

明明客觀嘅環境話到俾我哋知,香港的居住環境生活環境比起其他國家,真係唔係最差。但係點解,內心一片黑暗,光,好似距離我哋咁遠?

負面情緒,點解會籠罩着我哋嘅生活?


無論係窮人定有錢人,你都需要⋯

無論你嘅抑鬱症嘅成因係點,有幾件事一定可以做。一,運動。專家已經發現,運動會釋放出多巴胺,係最天然嘅抗抑鬱成份。第二樣嘢,就係愛。

德蘭修女曾經講過一句話,令我非常之印象深刻。嗰句話大概嘅意思就係,無論有錢人定窮人,佢哋嘅內心,都渴望愛,希望得到接納。

如果見到有抑鬱,好多香港人就會即刻跳出來講:「其實你已經好幸福架啦,睇吓你有嘅嘢啦!」,「你正面啲啦!」、「加油」。其實呢一啲嘅說話,對於有抑鬱,或者心情非常之低落嘅人,聽起來真係好刺耳。仲難聽過粗口!

抑鬱症嘅起源成因複雜,有心理嘅因素,亦都有生理嘅因素。不正確嘅睡眠習慣、缺乏運動、內分泌失調等等,都有可能導致抑鬱。

一般對抑鬱症缺乏了解嘅人,就會覺得你身在福中不知福。

無錯,世界各地的確發生好多戰亂、自殺襲擊、游擊隊、天災、貧窮、與及各種疾病。好多人,仍在生死邊緣掙扎當中。佢哋亦都有非常之沉重嘅憂傷與及抑鬱。有啲人,一啲貧窮落後地方嘅人,都可以去掙扎求存,點解會係相當富有嘅香港,人反而會咁脆弱?

但同時,活在屬於大都會嘅香港,都唔代表你冇事。香港冇戰亂同饑荒疾病,就代表香港冇問題?

第三世界有第三世界嘅問題,香港有香港嘅問題。

你嘅苦,外人未必明。就正如你未必明白,身處於戰亂地區嘅人嘅苦難。你可以想像,但係唔能夠真正親身去體會。

所以,千祈唔好因為咁,而令自己有任何罪惡感。

如果你覺得抑鬱,就要從正確嘅方法,行返出嚟。

你要吸收強大氣場,令自己有力量、有信心、有勇氣、有智慧、有尊嚴咁樣,重生。

對,就是像蝴蝶破繭而出一樣,重生。


不完美中的完美

有沒有想過,人一生中,有誰可以完全避開傷害痛苦呢?

如果公道啲諗,當你去埋怨其他人有幾咁唔完美,做得有幾差嘅時候,有冇諗過,其實自己亦都有啲係可以改進呢?

呢個世界,冇任何一個人,可以做到完美。

你唔需要做到完美,但你可以做到最好。

You don't have to be perfect, you just have to be your best self.

困難同埋逆境,係一個好好嘅人生導師。

風調雨順嘅時候,根本就唔知道好多野。當你真正面對生活嘅難題嘅時候,就會發現,知道你有好多野,包括因為困難而產生嘅獨立、自信、品德。

高尚嘅人格同品德,好多時係逆境中得以發揮。你可以睇到好多經濟環境唔係咁好嘅人,佢哋嘅慷慨、人生智慧,分分鐘高過好多喺中產辦公室營營役役打工嘅人。

當你非常之冷靜咁去面對個情況嘅時候,你就會發現,困境同峙俾咗阻礙你,亦都同時激勵咗你。

困境,可以令你好軟弱,亦都可以令你好堅強。

只有當夜晚,全世界都熄晒燈嘅時候,你抬頭,先至會發現,原來漆黑之中,滿天都係星星。


情緒就是情緒,不代表你

面對着的情緒,最重要的,就是了解情緒並不代表你。

情緒來來去去,就如潮水一樣。然而,你自己就是那個永恆不變的海岸。

所以,不要被那不停的海潮,擾亂了你自己。


勝利藏於小節裏

好多人並唔知道,勝利,往往隱藏於生活中嘅小節裏面。

世界上最偉大嘅建築,包括中國嘅萬里長城、金字塔、繼續去希臘嘅神殿、每一樣建築物,驚為天人,但係,都係有一小步一小步造成。萬里長城,並唔係由一次過建築完成。佢哋係由一小塊一小塊嘅轉頭開始築起。

最偉大嘅人生,包括世界一流嘅奧運參加者、演藝事業超卓嘅健康及演員、政治領袖,充滿咗激昂、成功、克服的人生,處於鎂光燈嘅焦點,表現嘅最高峰,但係,你估佢哋會唔會係一出世就即刻去到呢一步?

Nick Vujicic講過:「當一個人漫無目的地活著,或不清楚自己的熱情所在時,最容易陷入谷底」

要活出自己,就要有目標咁生活。


向有光的地方出發

如果你在抑鬱之中,你其實不要太多質疑。你,一定會好起來。

好多人問,究竟點樣可以去證實神嘅存在。

要證明神嘅存在好難,但係要證明佢唔存在,更難。

我們身處的地球,每秒以30公里嘅高速圍著太陽轉動,但你都感覺唔到。

你感覺唔到,唔代表無。正如神、天使一樣。

有時候一場旅行,會幫得到你。

宗教信仰,亦都有可以支撐你。

每一個生命,都係創造嘅課程。

每一個人出生,都有無窮嘅創作力,唔需要俾太多野限制住自己。相信自己,相信耶穌,讓愛與光,療癒你的抑鬱症。


For I am convinced that neither death nor life, neither angels nor demons, neither the present nor the future, nor any powers, 
neither height nor depth, nor anything else in all creation, will be able to separate us from the love of God that is in Christ Jesus our Lord.

- Roman 8:38



More New Age



0 意見

Counter

Flickr Images