【美髮】所謂嘅專業級洗髮護髮!?Goldwell Kerasilk Treatment香港自費測試

7月 22, 2016

去salon整頭髮,令你享受過程又享受結果。做一個高級hair spa treatment,可以令人愉快、幸福、滿足!近日我就去做咗一次傳說中能夠令到受損髮質大幅改善嘅Goldwell Kerasilk Treatment!

去一間時尚又乾淨的salon,由專業髮型師幫你分析頭皮及頭髮的健康狀況,建議使用最佳產品,可以令你知道自己最新嘅頭髮頭皮狀況。然後由髮型助理細心地洗乾淨頭髮,徹底清潔頭皮,然之後有用優質美髮產品修護。最近我就體驗咗一次專業salon級限定嘅洗髮護髮:Goldwell Kerasilk Treatment。真係一次令人驚喜嘅體驗,令我有機會了解到最新美髮科技。(這是本人的自費評論,沒有收到任何品牌的贊助或折扣)


(網上大熱,據說能夠大大改善受傷髮質嘅嘅Goldwell Kerasilk Treatment)


頭髮頭皮保養問題,你會唔會都有?

我好少去salon做treatment,因為以前試過,效果唔算明顯。都係自己去買一啲比較高級嘅日本洗髮水、護髮素,自己屋企攪掂。

直到近年,發覺自己嘅頭髮同皮膚狀態好似各走極端,經過多年嘅美肌、醫學美容學習,皮膚變得越來越好,但頭髮就變得越來越差!隨着近年嘅染髮同埋唔正確使用洗髮露護髮素,造成頭髮枯黃、乾旱、脫髮、頭皮紅腫、頭皮敏感等等問題!

對於醫學美容、美體健身,我同好多香港人一樣都有少少研究。但對於美髮,好多香港人都有頭髮和頭皮的問題,自己可能未必知道!現代社會的生活壓力與及空氣污染,容易造成脱髮和皮膚敏感。有些人可能出現頭髮乾旱、枯黃、開叉、脫髮的問題;而頭皮方面,就出現發炎、發紅、痕癢、種種皮膚狀況。

其實出現頭皮敏感、脫髮、頭髮枯萎的情況好普遍,原因各有不同。好多人喺萬寧、屈臣氏或超級市場,求其挑選一些護髮素胡亂使用,卻不知道如果使用錯誤,又或者使用含有刺激性化學品嘅護髮素,可能令情況更差!尤其係用品質低劣化學物質的中下價貨品,只會導致毛孔閉塞,製造出更多頭髮和頭皮問題。

而一些因為身體機能轉變、荷爾蒙導致的脫髮問題,因為不能及時對症下藥,而導致惡化,甚至不可挽回情況。


Goldwell Kerasilk Treatment絲蛋白重塑護理:一次療程可以keep到5個月?

Keratin角質蛋白,對於美髮有好大幫助。Keratin本身只係一種化學名稱,並唔係任何一間公司嘅專利產品。佢嘅原理,就係喺頭髮表面製造多一層蛋白保護。

Keratin係角質蛋白,但Kerasilk,就係Goldwell嘅獨家品牌。


(只在專業髮型中心出售嘅Goldwell Kerasilk Treatment美髮系列,一般藥房、超級市場買唔到,官網圖片)


平時有做開美髮嘅朋友,都可能會知道一點,就係曾經紅極一時嘅Brazilian Blowout,被發現原來含有甲醛致癌物質!令到好多人都好震驚。呢隻Goldwell keratin絲蛋白重塑護理 treatment係比較安全嘅美髮療程。

首先講一下Goldwell品牌嘅背景,Goldwell係一個源自德國嘅專業美髮品牌,產品都係專門供應髮型屋,大部份產品都不會在超級市場發售。可能一啲專門出售水貨、批發髮型用品專門店就會有。佢出產嘅產品,大部份都係來自歐洲生產,包括德國、奧地利等等,係真正嘅歐洲產品。品牌已經被個人護理花王集團投資,所以亦都證明有規模。



(Goldwell Kerasilk 只在髮型中心經由專業造型師介紹出售,絲蛋白重塑護理係goldwell皇牌療程

之前有好多香港網上打手不停推
Goldwell Kerasilk嘅絲蛋白重塑護理,又話呢個療程對於受損髮質有什麼神奇功效,效果又可以last 3-5個月!對於一啲美容丐幫網上公關文章,我都只係當作參考就算,唔會完全當真。

直到近期,望住自己枯黃嘅頭髮,就決定要尋求專業意見同協助!哈哈!

但一睇到salon價錢,就嚇咗一跳!因為我實在太耐冇去專業髮型屋做專業療程,而家嘅hair treatment價錢原來係以$2000起錶!做一次絲蛋白重塑護理,已經等於去酒店spa做一個高級Facial !

Goldwell,Aveda,Shiseido都係屬於大牌子,喺美髮界都有相當高嘅地位。一直都心思思想嘗試Goldwell Kerasilk 絲蛋白重塑護理。但價錢好貴,由於從來冇做過,對於效果始終有懷疑,甚至預約之後嘅1分鐘之內立即再次致電取消,考慮左成晚,直到第二日先決心去嘗試!

我原本對於價錢貴Goldwell Kerasilk絲蛋白重塑護理有保留,原因在於:

效果唔知係咪顯著。以前試過好多高級護髮產品,效果並唔顯著!

對護髮素化學成份缺乏認知。同好多人一樣,我對化學成份對頭髮皮膚嘅影響,根本唔太了解。只能留在頭髮是否順滑的最原始階段,並不知道其實好多所謂的柔順順滑護髮素,用了好多對皮膚頭髮造成長期損害的不良化學物質!

Goldwell Kerasilk絲蛋白重塑護理香港嘅價錢兩千蚊左右,視乎頭髮長度同師傅。如果要俾超過HK$2000做美髮保養,最低限度,要keep到兩三個月!畢竟,整個療程要$2000多元,如果冇中長期效果就太浪費太唔抵!如果只能做到護髮素都可以做到嘅效果,咁我就完全浪費金錢!

雖然我對於美髮行業唔太熟悉,但係對於美容院嘅運作算係熟悉。為咗避免因為初次購物而被狂sell ,買咗超大量冇用嘅產品,我就決定搵一啲價錢中等嘅普通商場salon,而避開一啲最高級嘅中環、銅鑼灣salon。如果你唔太清楚,髮型師、造型師本身係一個傭金為主要收入嘅行業,你買幾多療程,佢就按比例收幾多。所以要搵到客戶錢,髮型師就一定要游說客人瘋狂消費。我特登選擇一啲價錢中等嘅髮型屋,就係因為就算俾人呃,銀包都唔會咁傷。

對於頭髮嘅保養同美髮行業,可能我真係孤陋寡聞,去到髮型屋,同專業髮型造型師溝通過,先發現原來Goldwell Kerasilk Treatment系列有好多唔同嘅產品同服務,Goldwell KK絲蛋白重塑護理只係其中一個

造型師建議,由於頭髮唔係太長,而受傷情況都唔係太嚴重,暫時唔需要用最王牌最昂貴嘅Goldwell Kerasilk絲蛋白重塑護理。頭髮太短想參加都唔得。哈哈!

反而Goldwell kerasilk系列嘅Repower Treatment包含有效成份Keratin同Elastin護理,可能更加適合。

Kerasilk同一般嘅洗髮露護髮素唔同,佢嘅成份加入左絲蛋白。

既然專業髮型師都建議,就咁樣,我就嘗試Goldwell Kerasilk Repower Treatment嘅產品。

造型師仲建議,由於我會有啲頭皮敏感、紅腫嘅情況,佢會建議用頭皮舒緩系列,針對因為刺激洗髮水引起嘅紅腫、頭瘡問題。

同髮型師溝通過之後,我就決定參加頭皮護理、與及Goldwell Kerasilk Repower Treatment。由於頭髮唔太長,價錢亦唔貴,兩個療程總共$1000,大概兩小時,包含洗頭、按摩,療程完結之後,會獲贈正裝專業級Goldwell Kerasilk洗髮露1枝,同Kerasilk護髮素1枝!

醒目嘅我,就即刻上網用手機查下呢兩支嘢嘅評價同價錢。發現原來評價都相當良好,而且外國都賣緊差唔多17euro同20euro,港幣都超過$310幾蚊!咁即係話,療程本身只係$700。所有嘢都有人幫你搞晒,唔使自己搞,都算可以接受。




Goldwell Kerasilk Treatment經歷都算係新鮮,因為實在太耐無去過髮型屋,做專業美髮療程。我去間salon頭皮護理同Goldwell Kerasilk全包$1000,仲送正裝專業級Goldwell Kerasilk洗髮露1枝,同Kerasilk護髮素1枝!



(療程使用嘅Goldwell Kerasilk Treatment,療程後仲獲得一套免費全新!)




(返屋企持續美髮!)


Shiseido專業頭皮清潔與Goldwell Kerasilk Treatment程序曝光

Shiseido專業頭皮清潔程序,由髮型助理深層清潔、按摩、開始。佢會使用一啲專用嘅藥水,係洗頭嘅時候順便按摩進入頭皮。徹底清潔程序會將汗水、油脂、死皮洗走。然後再喺頭髮濕嘅時候,用特製嘅藥水搽喺頭皮上面,並用專業嘅加熱器幫助吸收。

呢個過程大概為時20分鐘左右,之後就係髮型師10分鐘嘅美髮常識講解,再加上30分鐘嘅吸收時間。

之後,我就再一次洗頭。Goldwell Kerasilk Repower Treatment療程正式開始。

髮型師將我嘅頭髮係仲係洗完頭濕潤嘅時候,用上特製嘅Goldwell Kerasilk Repower護髮精華,一執一執咁按摩、搽上。一定要讚嘅係,髮型師真係好有心機,因為唔係平時係屋企就咁一大隊搽抹,係真係好似染髮咁樣,一執一執詳細按摩,確保精華可以深入每一根頭髮之內。過程大概30到40分鐘左右。

過程有啲似絲蛋白重塑護理!如果係Goldwell Kerasilk 最著名嘅王牌「絲蛋白重塑護理」,就會用專用嘅加熱器將頭髮夾起,將精華夾入頭。呢隻Goldwell Repower療程比較簡單,就唔需要用熱力夾,而用一啲專業圓圈型加熱機。

經過塗抹之後,髮型助理會再次洗頭。髮型師吹乾之後,就會發現啲頭髮真係有好大的程度嘅改善!

即時效果係見到,最大驚喜係,第二日洗完頭吹乾之後,仍然覺得頭髮質地係改善咗!



(療程後繼續使用嘅Goldwell Kerasilk Treatment護髮精華,產品係由奧地利製造,根據髮型師意見,要每日使用)



(Goldwell Kerasilk護髮精華係呈現moouse狀態)


如何用最少錢達到salon級美髮效果

對於Goldwell Kerasilk Hair Treatment,我係會俾正評。不過,我會覺得呢個係nice to have,而唔係美髮must have。

可能因為我做嘅係普通keratin / Kerasilk 護髮,唔係最貴嘅「絲蛋白重塑護理」。感覺上覺得其實係屋企自己搞都可以。

如果你大把錢,的確可以成日出街做keratin treatment,有人幫你仔細清潔頭髮,的確可以改善頭皮同埋頭髮嘅狀況!但係我相信如果你買到呢啲專業級護髮產品,持之以恆地做,一樣有呢種效果。

今次去salon treatment,令我對於護髮有深入嘅了解,髮型師嘅講解亦都令我對於頭髮嘅知識增長不少。

但同時,我會諗,如果我下次,就可能會買返屋企自己做。而且,我應該會去價錢平一大截嘅髮品店直接購買。

隨着美髮專業化,好多美髮品牌都有自己嘅專門店同埋專櫃,就好似Shiseido、Goldwell、aveda同keratase。當然,專門店嘅價錢都唔會平得去邊,但係有心搵,就會搵到好多較為平價又效果良好嘅方案。

香港有好多髮品店會有一啲專業嘅頭髮護理產品出售。呢類型嘅髮品店主要供應批發俾美容院、美髮中心,但亦提供零售。由於目標客群係批發,呢度地方就有好多比專門店更加平價嘅原裝正貨。價錢大概係出面嘅五至八成左右。如果你識得想去呢啲地方,旺角、佐敦都有好多髮品店。

去到呢啲髮品店,知道treatment大約嘅成本價,就會知道成個美容、理髮行業嘅利潤係幾咁高。出面平均一次療程大概$500左右,喺呢度已經足夠買一支大支裝嘅名牌理髮產品,足夠用半年。


(香港著名髮品店shampoo.hk嘅實體店,現場實拍)

香港較為方便嘅髮品店包括:

Shampoo.hk
旺角彌敦道577號高氏大樓1/F C室 電話: 23844377 
筲箕灣東大街59-99號東威大廈地下8A舖 電話: 21530628
可以網購,亦提供免費港鐵站交收

L's 髮品店
九龍旺角道58號地下B 鋪
旺角弼街68號地鋪
2563-7168
ig:lshairshop

呢次係一次好好嘅Kerasilk Treatment體驗,令我知道我嘅頭髮都仲係有得救。同時,亦都原來有好多方法可以用好低嘅價錢,都可以長期得到salon級享受。

更多免費美容教學,平價好用推薦

1 意見

  1. 髮品店内9成treatment的效果都麻麻,十成treatment的效果也無KK絲的工效。

    回覆刪除

Counter

Flickr Images