【減肥】香港秘傳中醫減肥法推薦教學,三個月減16磅年輕7年!(PART 1)

12月 30, 2017

對大部份人來講,一年嘅過去,代表又老咗一年。但係對少部份人來講,真實年齡同身體不成正比,佢哋係逆生長!對於凍齡美魔女美魔男,今年比上一年年輕,而下一年,亦會比今年更加年輕!要鍊成美魔男美魔女逆天顔值不老體質,中醫減肥,內在年輕,可以話係一個最重要嘅健康瘦身美顏議題!但亦都係一個好多人忽略咗嘅議題!學識中醫減肥,你就可以美顔抗衰老,保健身體,改善血氣,改善體重,促進血液循環,避免未老先衰!

之前同大家講過Yanhee減肥藥嘅危險(冇效,對身體有害,非常不推薦)、韓星減肥法(有效但太chur你跟唔到)、同埋V面健康飲食體重控制(推薦),之後有好多人PM問,年紀有返咁上下,未必再可以好似以前一樣高速減肥,點樣先可以減肥又快又健康?點先可以逆轉時光,回到青春?相比起西方醫學同營養學,中醫減肥有相輔相成,相得益彰嘅效果。

唔好睇小中醫減肥嘅功效。事實勝於雄辯,中國人肥胖嘅比例,比西方人少好多!亦都青春苗條好多!

唔少成功人士、闊太都有定期搵中醫調理身體、減肥抗衰老嘅習慣。但去到香港著名中醫師嗰個層次,已經唔係錢嘅問題,因為出名有效、真係懂得中醫理論嘅名中醫師,年紀同埋客戶網絡已經有返咁上下,加上已經一早排滿期,有好多多年長期捧場客,根本上新客喺冇人介紹嘅情況之下係唔會有機會見面。好多係半私人、半退休狀態,就算你有錢,都唔會輪到你!

但係One Carat Beauty作為香港超高人氣醫學美容網站,就同大家揭露下一眾城中名媛、逆齡貴婦、內地凍齡明星,佢哋都識嘅中醫減肥保養方法,同嚴選幾個香港中醫減肥嘅推薦。

 
(泰國小鮮肉天菜男神Iknotus。點解要提醒大家時時刻刻唔可以鬆懈,一定要減肥逆齡,打造完美身材?梗係要keep住自己水準,先可以有機會同呢啲水準嘅人深入交流交往!Photo Credit: Iknotus Piinball Peverel)

 

 

 

 

 

 
(身體回春,荷爾蒙分泌一定旺盛)


 
(有句說話叫做,你的樣子如何,你的日子也必如何。其實係真嘅!稍為肥少少都唔敢擺咁嘅姿勢同著成咁,否則成為笑話!同一個衣著、姿勢去show off大包,靚仔小鮮肉男神做就係天菜、性感,令人花痴高潮尖叫;一個肥人、低顔值麻甩佬做同一樣嘢同一打扮,就被人嫌棄核突、猥瑣、唔要面。你地仲唔去減肥? )


中醫減肥:你有冇以下衰老肥胖跡象?

係講解中醫減肥之前,首先要同大家做一個檢查。你有冇以下嘅跡象?

體重忽高忽低,容易變肥
頭髮開始稀薄、枯乾
雙目無神
皺紋出現
身體容易水腫
血液循環差
生殖能力下降
情緒問題
荷爾蒙失調,導致身體容易積聚脂肪

如果有以上幾項,你就要留意!中醫美容減肥可以幫到你!

好似我成日都提醒大家,管理好營養、食物、生活習慣、同心理健康,係「因」。

美貌、年輕外表、良好體重,係「果」。

但係好多香港人倒果為因!濫用醫學美容。

香港人一講美顏瘦身,第一件事就諗起醫學美容。本來一啲因為生活習慣改變就可以改善嘅面部問題、身材問題,都傾向打針。

一攞起手機自拍,發現自己有問題,香港人就偏向用開刀、打針、打HIFU打RF嘅技術,希望可以極速改變。

面大?就即打Botox、Dysport、Xeomin縮面!或者去韓國大執,開刀放血抽脂。

面部下垂?狂打RF、HIFU。Thermatrix、Thermage、Ulthera一年打幾次。

面色差?胡亂購買食材進補,以為食燕窩一定美容,甚至返大陸黑市診所偷偷地打危險荷爾蒙針、人胎素、打奪命美白針。

皺紋衰老?唔理好醜,第一時間大量打Sculptra、PLLA。30幾歲已經冒險打咗幾次filler同水光針。

肥胖?亂咁節食,一知半解亂咁學人整detox water,胡亂購買網上不明來歷泰國減肥禁藥,或亂咁參HIFU減肥高能量聚焦、RF射頻爆脂、coolsculping冷凍溶脂療程。連自己做咗乜嘢treatment都唔知。

我唔係叫大家唔好做醫學美容,treatment對於改善狀態,提升吸引力,有好大作用,但係要適當咁做,而唔係濫用。

醫學美容嘅首要條件,就係你本身要健康,狀態OK。咁樣先至發揮到作用!

而事實上,如果你本身狀態差,唔健康,就算做咗醫學美容,效果都唔理想。

好似醫美天后Queenie Chan陳莉敏金句:「醫美療程都有微調作用,只做單一種,效果不大,也不持久。Thermage嫩化眼周的肌膚、Scarlet緊化眼尾、Botox放鬆眉心……但,一切hardware的調整,絕對無法掩蓋software缺憾。」

冇錯,醫學美容唔可以改善你體質問題,與及性格上嘅問題。

要靚,要健康,叫充滿希望同正能量,就要學中醫養生方法,健康瘦身美容!

我今日就教大家點樣用中醫方法減肥美容,全面提升自己嘅狀態,獲得健康,提升精神,增強抵抗力。用最自然方法,改善身心狀態。無論你自己之前同之後有冇做、會唔會做醫學美容,你都可以將你嘅美麗進一部提升,達到女神級男神級境界!


醫學美容,中醫美容,本來就應相輔相成

醫學美容,本來係錦上添花嘅小小改善,對於好多香港人,已經變成病態瘋狂注射,搞到塊面越來越硬,越嚟越膠!

只重醫學美容,而忽略中醫美容,雖然塊面係firm咗,但係體質差、容易病、蒼白、冇精神、性生活不協調、敏感嘅衰老問題,不單止冇減少,反而增加。

而且,就算做到面部硬膠冇皺紋,但係踏入25歲之後,身體狀態就會走下坡。

35歲,明顯老化,交友app直播app高顏值靚仔、大隻oppa唔再理你,IG型男大包仔仔取消關注,中環clubbing外國男人對你開始視而不見。被逼加入低顔值、肥胖、低收入、低水準騎呢剩女剩男交友圈;

 45歲,如果唔及時打理,直情見到自己身體同心理極速枯萎,性生活滿意度低,冇男人對你再有興趣,連劣質麻甩佬都改為注意後生過你嗰啲,你自信心同體質下降到危險水平,更年期提早來臨!

身體狀態呃唔到人,行兩步就已經好攰,瞓極都冇精神容易起唔到身,容易病,就係身體老化危機訊號!

醫學美容同中醫美容,係相輔相成,缺一不可。

點解呢?係因為每一個醫學美容療程本身,只係針對指定嘅情況,醫學美容本身唔會改善整體身體狀態。

只有中醫調理身體,先至有健康、精神、提升生理機能呢個效果。

你有冇諗過,皮膚鬆弛,乾燥衰老,或者肥腫難分,有啲時候唔係因為你冇打針,係因為你本身生活習慣唔好,健康唔好?

咁我都要講個好消息比大家知,中醫減肥方法係真正有效,而且唔單止可以幫你減到肥,改善身體機能,更加可以令到你皮膚回復狀態,紅潤,天然,真正可以回到青春狀態。


中醫減肥方法,怎麼做先至有用?

今日就同大家講解一下,中醫減肥方法,背後嘅理念同埋學術根據。

總之減肥其中一個最重要嘅理念,就係調理「脾胃」。

中醫所講嘅「脾胃」,就係食物轉化為營養,將食物變成營養、養分嘅一個主要功能。

一個人嘅食物能夠有效轉化成為能夠滋潤身體嘅營養同養分,就決定咗一個人嘅皮膚狀態、身體狀態、脂肪比例、甚至血脈流暢程度。

中醫亦都特別發現,每日有唔同嘅時段,喺唔同嘅時段食唔同嘅嘢,吸收養份亦都會有提升。

西方嘅減肥着重卡路里計算。東方中醫嘅減肥,主要係運用一種「醫食同源」嘅概念。中醫減肥唔會好似西醫減肥一樣,計算卡路里,反而,佢會留意你食咗乜嘢食物,食嘅食物種性質啱唔啱。

一般人常見嘅問題,例如皮膚老化,失去彈性,脂肪比例上升,面色差,頭髮枯乾,性功能衰退等等,都可以經過中醫調理「脾胃」改善。

即係話,中醫「食療」去改善「脾胃」,可以幫你減肥美顔。

正確嘅食物,能夠改善鍾意水濕積聚問題,就能夠令到身體重新吸收應有嘅營養,得到滋潤,抗衰老,改善新陳代謝,令到身體年齡變得年輕,同時控制體重。

之前有好多人嘅方法錯誤,減肥失敗之餘,仲越嚟越肥。今日就教大家正確嘅中醫減肥方法。


中醫減肥方法一:一定要食早餐,碳水化合物早上食,水果11點鐘之後開始食

中醫建議,如果你想減肥,一日一定要食足三餐。

早餐食得多,午餐食夠,晚餐食得少。(呢一點同西方營養師專業建議相同! )

中醫師建議,9點前早餐應該食穀物類碳水化合物。而減肥神器水果,應該等待11點鐘之後先進食。

中醫認為,早上9點到11點,就係「脾經」運行嘅時間,係呢個時間,對於將營養素運送到身體唔同部份好重要。碳水化合物作為人體重要嘅營養素,呢個時候好需要去進食碳水化合物。

香港好多人鍾意用水果做早餐,但係中醫就唔太建議啦。因為,中醫認為,水果本身性質大部份都係比較寒涼,如果唔係未食早餐嘅情況之下進食水果,會好容易導致脾胃受到影響,令到人出現水腫、疲倦、腹脹嘅問題。

中醫認為,應該先係早上早餐進食左碳水化合物之後,大概11點鐘嘅時間開始,先至進食水果。

中醫認為進食水果最好嘅時間,就係上午11點到下晝1點。呢一個時間,就係「心經」活躍嘅時間。呢一個時間進食水果,就能夠利用水果比較寒涼嘅性質,可以平衡容易中午上火嘅身體循環階段。

適當咁樣吸收水果,就能夠補充營養所需之餘,亦都能夠有一定嘅飽足感,避免中午時間大飲大食,從而達到有效減低食量,減肥瘦身。

中醫認為有幾種水果特別有調理身體嘅效果。對於想改善身體機能,潔淨身體,將營養注入皮膚細胞,就要注意!

中醫認為,夏天,應該進食火龍果,西瓜;冬天,就應該多啲食雪梨、蘋果。檸檬、菠蘿、都可以進食。

大概午飯之前一個鐘進食水果,就會令人有平靜心境、保養嘅效果,有助令到皮膚發光發亮。

同我之前俾大家嘅西方營養師美容瘦身建議一樣,千祈唔好嘗試用飲果汁去代替正餐!

中醫相信,果汁絕對唔可以用嚟減肥。

由於佢缺乏纖維同埋果肉,大部份嘅營養係榨汁嘅過程已經流失!剩返嘅,只係會令你血糖忽然升高嘅糖份,佢只會令你越飲越肥。成為豬扒而係唔係男神女神。

而且大量糖分會導致free radicals大量出現,加快你皮膚老化,令你的皮膚失去應有的年輕彈性;進食原個水果包括纖維、營養,先至可以有減肥效果。


中醫減肥方法:食少少適量碳水化合物控制食慾,幫助長期作戰

之前同大家分享過,好多人對於減肥嘅誤解,以為唔食碳水化合物就係好。好多人以為low carb就係no carb。其實錯晒!原來中醫都完全認同!

東方醫學認為,人體係需要碳水化合物、蛋白質、油脂、維他命、水,與及鹽。
六種物質都要吸收,身體先至會係最佳狀態。

如果完全唔食任何碳水化合物,就會加速衰老。

重點,係適量咁樣食碳水化合物,而唔係完全唔食。

因為完全唔食飯,導致身體更加想吸收糖分,所以你發現,自己好想食多啲餸!亦都係點解完全唔食飯嘅人好可能反而比以前更加肥嘅原因!

完全唔食飯令你身體糖分不足,反而刺激食慾同埋胃口!

食少少碳水化合物,其實有助改善食慾過大的問題。亦都避免食得太多其他類型嘅糖份、油分。

中醫師建議,中午時間就食飯!只要唔好過量就可以。當然,最好就係食紅米、糙米。


中醫減肥方法:進食蔬菜,積極減肥亮肌

中醫非常建議進食蔬菜,因為蔬菜本身有調整體質,養顏美容、改善皮膚質素、快速減肥瘦身嘅效果。

好多人並唔知道,生果同蔬菜,雖然都係植物,但係兩隻必須要同時進食。好多人減肥失敗,就係因為佢哋嘗試用水果,去代替蔬菜減肥。

記住!唔可以以為食咗水果,就唔使食菜!兩隻唔係互相替代!

根據黃帝內經指出:「五穀為養,五果為助,五畜為益,五菜為充,氣味合而服之,以補精益氣」

傳統正統中醫嘅角度,蔬菜同水果,係兩個唔同嘅分類。兩種都要食。

蔬菜本身含有好高嘅食物纖維,可溶性嘅食物纖維,可以令到人體淨化血液,強化內臟功能,積極進食紅蘿蔔、蘑菇、菜心、黑木耳、綠豆牙、蓮藕、白菜、冬瓜、蘆筍、車厘茄、豆苗等等,有助加強美顏瘦身。

專家認為,深綠色嘅蔬菜,營養價值,會比淺色嘅蔬菜更加好,而其中抗氧化嘅效果,亦都會更加強。對於改善皮膚顏色,令到皮膚光澤感增加,白中透光,效果更好,逆轉年齡。


中醫減肥方法:自己沖綠茶,逆齡抗老化

綠茶裏面嘅茶多酚,係有抗氧化、美肌、年輕化作用。但係一定要自己沖,先至會發揮得到最佳嘅抗氧化效果。

市面上你見到出售嘅,其實對身體無益。

市面上買嘅台式奶茶店、茶餐廳奶茶、便利商店樽裝奶茶,因為佢用大茶壺㷛,而且不斷加熱保溫,長期保持高溫,茶嘅有益物質,同有效改善身體質素嘅維他命C 已經完全氧化!


中醫減肥方法:梳頭刺激脈絡

除咗飲食之外,中醫亦都教大家適當咁樣刺激穴位,可以提升血液循環,亦都令到經絡有疏通嘅作用。整體體質就會上升。

好多人都唔知道,一個人的頭頂有近50個穴位!頭頂嘅「百會穴」,透過梳頭去刺激,可以改善血液循環,同埋養分嘅供應,一個人起身嘅時候記住要梳頭!

今次講住咁多,下次會詳細講述教學,具體操作,點去減15到20磅。



0 意見

Counter

Flickr Images