【男神】性感古銅色!香港曬太陽燈價錢、Hawaiian Tropic助曬油、selftanner比較 - OneCaratBeauty【香港美容KOL】

OneCaratBeauty【香港美容KOL】

香港免費醫美教學平台

Hot

Post Top Ad

【免費資詢體驗】


REJU 瑞士年輕科學,正版熱光溶脂,高效健康醫美產品

⇨網站:http://www.reju.hk
⇨Whatsapp免費資詢了解:https://wa.link/yrp6bg


2016年5月1日 星期日

【男神】性感古銅色!香港曬太陽燈價錢、Hawaiian Tropic助曬油、selftanner比較

通常啲雜誌、Instagram同Grindr交友網度見到嘅大隻靚仔,唔單止身型好,而且皮膚顏色都好靚,蜜糖色小麥色嘅健康肌膚,好性感!今時今日要做男神,除咗有結實嘅肌肉與及精緻漂亮嘅五官,潮流嘅髮型打扮同健康深色嘅皮膚,都係缺一不可!好多男仔成為男神,就會去照太陽燈,務求令自己好似彭于晏、古天樂又或者無數嘅Instagram型男一樣咁樣,又或者用上一啲助曬油,好似Hawaiian Tropic咁樣,務求令自己得到男神級嘅健康美麗膚色!


(除咗擁有結實嘅身體,健康嘅皮膚顏色都係男神不可或缺既一部份。就好似圖中嘅N2N Bodywear嘅Model一樣,視覺上已經贏晒)



(經過太陽曬過灼熱嘅身體,會令皮膚肌肉線條更加明顯)

擁有又健康又性感嘅膚色,令到人都醒神啲!而且一齊去曬太陽、去晒太陽燈,都係好多朋友聯絡感情嘅方法之一。今日就想特別講下幾種可以令到皮膚更加深色、性感嘅方法,同埋分別佢哋嘅優缺點。佢哋分別係用Hawaiian Tropic助曬油(俗稱黑鬼油)、曬太陽燈(英文Solarium)、同埋self tanner。


Hawaiian Tropic助曬油


Hawaiian Tropic Dark Tanning Oil黑鬼油可以話係香港最出名亦都最多人用嘅黑鬼油。佢嘅好處係價錢平,周圍都買得到,而且大支,買一樽基本上可以用晒成個夏天。呢種油可以喺你水上活動沙灘時候使用,佢可以喺你瞓係太陽下暴曬嘅時候,加速見到曬黑嘅效果。


曾經有人講過,呢隻Hawaiian Tropic助曬油、黑鬼油係香港最好嘅曬太陽產品。呢個講法有啱有唔啱,無錯香港好多有玩開水上活動嘅人都會用,但係因為香港其實冇幾多隻同類嘅產品係主流嘅零售店出售!所以其實大家嘅選擇實在係唔多。

我先講解下呢隻Hawaiian Tropic Dark Tanning Oil嘅功效。呢種並唔係太陽油,係0 MPF,好多人以為佢係一種太陽油,可以在曬太陽嘅同時保護滋潤身體。對於一啲經常有晒開太陽或太陽燈嘅人來講,都會知道唔係事實。黑鬼油並無任何保護紫外光嘅作用,所以絕對唔係太陽油嘅一種。

先講下呢隻產品嘅效果,根據我個人測試,佢的確有幫助短時間內曬黑嘅特殊功效。基本上只要搽咗啲油,晒30到45分鐘,你嘅皮膚顏色就會變深!

至於點解佢會比就咁曬太陽有效,產品本身並無直接說明。

如果你好似我一樣,追求一種曬太陽時候有種exotic traveling嘅浪漫感覺,Hawaiian Tropic就可以帶俾你一種夏威夷嘅風情,因為佢有種椰子嘅香味,有一種surfer滑浪、享受椰子嘅青春氣息。

就咁聽落去,好似好正咁,但經過我仔細嘅研究,就發現原來呢隻產品都有唔少副作用。呢隻Hawaiian Tropic Dark Tanning Oil嘅主要成份係Paraffinum Liquidium礦物油。即係提煉石油時候嘅副產品,一直以來都有好多健康專家講個礦物油嘅潛在風險,包括致癌!

所以耐唔耐使用就冇問題,但係如果長期使用,甚至夏天每次去暴曬都用Hawaiian Tropic黑鬼油嘅話,就可能會造成問題!

由於呢隻產品並無任何抵擋紫外線嘅功效,用咗呢隻產品去曬太陽,基本上同完全唔用防曬,一樣有造成癌症、皮膚衰老嘅危險!

由於Hawaiian Tropic嘅主要成份係礦物油,有啲港女會以為覺得好滋潤好好,甚至當成身體就油、按摩油用。呢樣真係大錯特錯,因為礦物有風險不明,實在不適宜長期使用。


曬太陽燈

曬太陽燈真係好多香港男神又愛又恨嘅抉擇,因為曬太陽燈本身風險好高,好多醫學研究報告都講過曬太陽燈引發癌症嘅風險!曬太陽燈已經被國際癌症研究協會列入肯定致癌嘅類別。但同時,好似好有效,短期內就可以由變身型棍,令到好多男神都好掙扎!



(曬太陽燈係好多香港健身人士嘅時侯,但係香港同埋外國嘅研究顯示,曬太陽燈可致癌同毁容! )



(正斗嘅身材同埋健康嘅皮膚顏色已經係男神必須擁有嘅條件一部份,但係曬太陽燈係唔係一個可行嘅方法?)

越來越多香港健身男神會曬太陽燈。太陽燈係可以係令你極速變黑,基本上只要完成整個療程(大概五至十次)你就會見到明顯嘅顏色分別。

我以前都係經常曬太陽燈嘅客戶之一,甚至有一啲香港曬太陽燈專門店嘅會籍。依家諗返,都係高風險低回報,嘥錢兼嘥時間!

如果你喺香港又想認識下曬太陽燈,我首先講解曬太陽燈嘅程序。

一般來講曬太陽燈會先進入一個私人嘅房間,之後你就會除去所有衣服,然之後戴上由專門店提供、保護眼睛嘅眼罩(有少少似游水泳鏡,通常另外收費),搽上特製嘅助曬油,之後就進入似太空艙一樣嘅太陽燈機入面,機器開動,你就企或訓大概8至12分鐘左右。

呢段時間入面,太空艙前後左右嘅太陽燈鋼管將會進入暴曬狀態,而你亦都會感到身體非常之灼熱,會流汗,一般嘅太陽燈太空艙都會有非常強勁嘅抽風功能,等你感覺上冇咁辛苦,但當過咗十幾分鐘之後,太陽燈機器會識得自己關掉,你都會有一種輕微灼傷嘅感覺。

一般嘅曬太陽燈機都會有maximum time熄燈嘅自動設定,因為十幾分鐘已經係人類嘅極限,再多,你就會出現晒傷嘅不良情況!

曬太陽燈係令皮膚變黑最直接嘅方法之一,效果非常顯著,曬完太陽燈之後嘅一兩日,你嘅皮膚黑色素就會慢慢正式浮面,而皮膚亦都會開始變得非常深色,基本上只要每個禮拜去晒兩次,一兩個月內已經可以變得好黑好深色!

同好多有副作用嘅美容、整容療程一樣,曬太陽燈開頭嘅時候嘅後果係好好嘅!開頭我成日曬太陽燈嘅時候,皮膚的確喺好短時間內變得深色,令到視覺上睇起嚟更加結實、性感。只不過,時間一長,副作用就會越嚟越明顯。

開頭曬太陽燈嘅時候,我都抱着一種愛靚唔愛命嘅諗法,對於癌症風險,我都抱着一種得過且過,是是但但嘅態度。畢竟,如果我要有皮膚癌,用唔用太陽燈你都會有癌症啦!當年我就係咁幼稚嘅想法,但後來發現,曬太陽燈嘅副作用唔只係有癌症咁簡單。

以下就係我一個香港人曬太陽燈嘅恐怖經歷。

開頭我去香港一啲曬太陽燈嘅專門店,都係抱住一試無妨嘅心態,即管睇吓個效果係咪理想。經過左三兩次成功變黑嘅經驗之後,我就開始買套票Package。

本來都好地地,等大概去到曬十次左右,我就開始發現我嘅皮膚變得乾涸、衰老、好冇彈性!而且我面部皮膚嘅情況惡化得非常之緊要!基本上已經同一個老人家一樣,無光澤之餘又無彈性!因為曬太陽燈係360度,我嘅問題唔單只係面部變得衰老,連我嘅腰,大腿,手臂,都變得鬆馳乾涸!

當時,我都未認識到太陽燈紫外線對於皮膚質素嘅負面影響,仲以為自己嘅護膚唔夠,於是又用唔同類型嘅護膚品希望急救,但係,情況冇改善而且越嚟越差,有一啲新識嘅朋友甚至以為我係年紀好大,佢哋估嘅年齡同我實際年齡相差十年!

個故事都仲未完,當我繼續晒燈嘅時候,發現身體多咗好多類似雀斑嘅墨,就好似外國研究之中講過,曬太陽燈嘅副作用一樣!呢啲都係cancer之前嘅先兆!

之後我仔細研究,發現原來我皮膚衰老係因為我曬咗太陽燈!所以就急急停止,之後我用左差唔多半年嘅時間,同埋好多錢,先至令到皮膚冇咁鬆同埋衰老,曬太陽燈基本上係一次貼錢買難受嘅經歷。

曬太陽燈嘅副作用,你開頭嘅時候唔會覺,當你發現嘅時候就已經太遲!

價錢方面,喺香港曬太陽燈亦都係甚為貴價嘅消費,每次都要百幾蚊都二百幾蚊,如果買package分分鐘成千上萬,仲未計要去專門店購買嘅專門嘅油。

如果你一定要曬太陽燈,你就要留意下一啲係香港太陽燈專門店嘅不良銷售習慣。其中一個要留意嘅就係,好多香港嘅曬太陽燈專門店會出蠱惑,sell你買一啲混合左self tanner嘅所謂專業太陽油,然後要求顧客使用。由於個太陽油本身已經含self tanner,本來已經有令皮膚變深色嘅物質,所以照完後皮膚真係特別黑!令到好多人好開心,但係你要知道呢種混合左self tanner係暫時性,只要時間一過就會冇左。效果咁短暫,點解唔直接使用self tanner呢?


Self Tanner

Self tanner呢種產品,係香港可能唔係好流行,但係喺崇尚太陽健康膚色嘅歐美國家非常之流行,亦都係各種變黑產品之中最安全。點解呢?因為self tanner只係用咗一個好簡單嘅科學原理,令到皮膚顏色變深,當中並不涉及任何紫外光,所以皮膚基本上係無受到時任何嘅傷害。亦唔會有因為紫外線照射導致細胞變化而引起嘅癌症風險。

市面上嘅self tanner,都係利用一種糖粉同皮膚之間嘅化學作用,令到皮膚變得較為深色,模仿日曬嘅後果。

使用self tanner呢種產品亦都有一啲要注意嘅地方,就係必須使用一啲好嘅牌子,否則就會造成災難性嘅效果!一啲好嘅self tanner產品可以令到皮膚變黑,差嘅產品就會令到皮膚變黃變橙!好似黃膽病一樣!

經過我仔細嘅網上研究,發現有一種係外國出售嘅產品係特別好,佢就係Banana Boat Summer Color self tanning lotion。呢個產品暫時係香港無發售,我係經過網上郵購,但係已經回購左好多次,效果都非常之好。






Related

Post Top Ad