【男神】【雙程】超靚仔BL電影「雙程」觀後感討論區與花絮(全網精選連結)

9月 10, 2016

終於,千呼萬喚之後,由靚仔高泰宇、黃靖翔主演嘅「雙程」電影終於係9月12號全網上映,終於,千呼萬喚之後出來!一個星期,就幾十萬views!呢套被譽為耽美小說經典作品,啟蒙無數腐女和同志嘅文學改編電影,由頭1分鐘,牽引情感到最後個1分鐘,70幾分鐘,基本上無冷場!果然,「雙程」係虐心經典!


整體來講,「雙程」電影遠遠比預期好,如果比分,我會比80分。另外再比多20分,係主角嘅靚仔樣貌!

如果,「雙程」電影同小說感動過你,勾起過你對於愛情、同埋hehe伴侶嘅想法,就要繼續睇。

作為一個香港人,作為一個被大陸人、台灣人普遍認為缺乏情感投入嘅香港人,呢套「雙程」電影,實在太窩心,我差唔多,由頭感動到尾。

由線上看嘅一刻,到做完嘅一刻,「雙程」有種撩動你感情深處,窩心到不敢直視、撩起太多回憶所以不敢細看嘅能耐。

「雙程」呢套BL網絡電影犀利嘅地方,就係佢好着重細節,佢表現得到那些年愛情嘅感覺。

電影嘅感染力好強,睇見男主角「小辰」幸福,我就會幸福;睇見佢要忍痛分別,我個心都黯然。

呢套戲,係拍俾所有曾經無知過、甜蜜過、傷心過嘅美男小hehe。

而好多眼淚係幸福、開心嘅眼淚,見到小辰嘅快樂同哀愁,都令人代入其中!







黃靖翔演技令人眼前一亮

「雙程」電影嘅上半部份,即係第一集,都以輕鬆、甜蜜、小小曲折,作為賣點。但「小辰」同「陸風」當中嘅得不到,等待,重逢,喜悅嘅心情,真係演繹得好好。

而最令人驚喜嘅係,「小辰」黃靖翔演技爆錶,令人完全投入佢嗰個脆弱、敏感嘅世界裏面。假戲,當真來做。而且,佢毫不掩飾咁樣愛上咗「陸風」,愛上咗高泰宇。

第一部份來講,黃靖翔應該係亮點。真係估唔到佢靚仔得來,演技都會咁投入!「雙程」電影兩位男主角都咁靚仔,但係如果一定要講演技,黃靖翔一定投入好多!高泰宇始終可能未完全入戲,感覺上都唔係好投入。

難怪「雙程」作者藍淋之前都講過,覺得黃靖翔佢好適合呢個角色!見到佢,小說中嘅美型小受「小辰」,就活靈活現。見到佢,就好似睇緊耽美漫畫!

面對着追求,「小辰」嗰種甜蜜嘅樣貌,真係好難純粹扮出嚟。

可能,黃靖翔佢真係淨係做自己!(之後再係一個花絮訪問當中,佢自己都承認,佢同扮演嘅角色「有共鳴吧」)

見到黃靖翔為左部電影,毫不保留咁樣將自己「小受」嘅一面表現出來,甚至連嗰個扮可憐嘅純面淫底0仔姣樣都出嚟,毫冇掩飾咁,我為佢嘅勇氣同埋專業精神喝采!

亞洲第一美型小受,非佢莫屬!


「雙程」電影最感動位係邊到?

一套電影拍得好唔好,其中一個可以量度嘅方法,就係電影完結之後,你用幾耐先至可以係嗰個情緒裏面走返出嚟。

如果電影能夠牽引着你嘅情緒,跟住落嚟嗰幾個鐘甚至幾日,都不停諗住個套電影,就證明佢成功產生共鳴,亦證明電影拍攝手法成功。

「雙程」電影拍出來嘅效果比想像中好好多,其中最成功嘅地方,就係成功咁樣表達一啲平常生活裏面嘅感動位,同埋高超嘅配樂。呢個值得一讚嘅係,「雙程」電影佢並冇好似一啲電影咁樣,不停喺不必要嘅情況之下胡亂加入三級親熱鏡頭,咁樣反而搞cheap成件事。

電影反而有種日本校園漫畫,嗰種夢幻氣氛。

「雙程」電影感動位其實有幾個,而且全部都好窩心。唔知大家會覺得邊個場景最感動呢?我就覺得以下呢幾個,歡迎大家討論一下(含劇透,小心閱讀)

「雙程」電影亮點位1:小攻「陸風」初見未戴眼鏡嘅小受「小辰」

電影講述青梅竹馬嘅兩位,陸風好想睇吓除低眼鏡、素顏嘅小辰係乜嘢樣,驚鴻一瞥,發現原來咁吸引!















「雙程」電影亮點位2:陸風追番不肯造愛嘅小辰

故事講到,兩人發展得好快,陸風想要親密,但係同時,小辰覺得發展得太快,唔想咁快就俾人X,色慾攻心嘅陸風咁樣就發左佢一餐脾氣!搞到佢走咗,但最後,佢亦都有追番。呢一種求愛不遂變成發爛渣,之後又極速變溫柔嘅行為,令到大家都好冧!(當然首要條件係你要靚仔型棍啦,否則,隨便要求人哋同你做愛,啲人只會覺得你係痴漢並且報警! )








「雙程」電影亮點位3:兩人關係東窗事發,陸風被迫離開學校,小辰孤獨一個人思念

雙程呢套電影最感人嘅地方,就係將同志小hehe面對嘅日常問題,都無保留咁樣表現出來。作為一個小hehe,喺學校嘅保守環境,好多事情無論開心甜蜜、定係傷心失戀,都只可以埋藏於心,唔可以隨便講出嚟。因為事關重大,可能會導致同學嘅排斥、甚至紀律處分!

就因為呢個保守嘅關係,當小辰同志身份曝光,受到學校嚴厲處罰,陸風被迫離開內地要去香港,自己亦都受到同學排擠嘅時候,仲要重新面對一個沒有愛人嘅日子。真係幾難捱!

曾經擁有過動魄傾心嘅戀愛,佢因為世俗嘅原因被迫分開,仲要面對流言蜚語,一個人面對唔知道嘅將來。

自己最愛嗰個,同最愛自己嗰個,而家被迫分隔兩地,一個人面對世界,無助、徬徨、害怕。

就係呢個時候,小辰喺學校嘅圖書館、演講廳、就見到愛人嘅幻覺,彷彿好似聽見佢安慰自己鼓勵自己!加上催淚嘅音樂,真係好感動!











「雙程」電影亮點位4:被逼分開多年,音訊全無,再見時定情戒指竟然未變

陸風小辰兩人分開後,當中家人更從中作梗,偷偷沒收二人嘅書信,導致兩個人產生誤會,陸風誤以為對方已經變咗心,小辰亦都以為對方已經離開咗佢嘅生命, 已經move on。

但到多年之後喺公司相遇嘅時候,小辰竟然發現,新來嘅老闆就係陸風。而多年後見面,陸風仍然配帶當年定情嘅戒指!一個小節,就震撼咗一直都以為被忘記嘅小辰!原來自己,喺對方心目中嘅重要性,多年未變!








「雙程」電影亮點位5:小辰扮有女朋友被揭穿

兩人本來已經多年冇見,重逢之後,都有啲生疏,亦都唔知道對方嘅諗法,係咪同自己一樣,仍然有個特別嘅位置!定係自己原來係自作多情,活在過去之中,因為對方可能已經有咗女朋友、甚至成家立室!呢個時候, 慌張之下小辰就講大話,話自己已經有女朋友,但霸氣小攻唔信,突擊檢查佢屋企,就發現只有一副餐具!而且佢口中嘅女朋友連影都冇!如果真係兩個人,又點會有剩係得一份餐具!好明顯就係得一個人住!

小辰心情忐忑,問你有冇女朋友?霸氣陸風回答,我心裏只有你!

小辰聽到呢個咁正嘅荅案,即刻冧晒!傻笑!












雙程,係我們集體回憶

無論係電影定小說,呢套故事,其實都反映咗好多hehe嘅集體回憶。

當中嘅經歷,我同你可能都試過。喺學校因為自己嘅身份被同學排擠取笑,家庭嘅反對同埋壓力令你唔敢出櫃,被世俗分開嘅愛情同埋愛人,暗戀自己嘅(腐女)女性朋友,同埋多年來對愛情仍然執着同嚮往嘅單純諗法。

「小辰」嘅故事,其實就係你同我嘅故事。

我之前有一篇文章係專門講黃靖翔,當中講過,「美男的美麗與哀愁,只有美男才會懂。」

望見「小辰」黃靖翔,就好似望見自己。當然,佢比我靚仔好多啦!但係對愛情嘅患得患失,對於一啲感情嘅放開,逃避,原來同我,同你,係一樣。

面對一啲女性朋友希望由友情變成愛情,一直以來都暗戀同支持自己,但係你亦無辦法用愛情去回報對方,呢種無奈,電影亦都深深表現出來。

呢個故事,其實就係我和你和他嘅故事。

電影好感動,因為是他也是你和我。


超高顏值:整形美男的迷思

「雙程」呢套劇最終嘅製成品,比原本想像中好好多,尤其係之前「不可抗力」嘅狗血劇情,令到我對呢套劇除咗睇靚仔都冇乜期望。但到真正睇咗「雙程」第一集之後,就發覺改編者嘅功力真係好高,令到大家都覺得故事流暢自如,亦都保留感動位、窩心位。

男主角黃靖翔樣貌真係好高,尤其是立體,真係發覺冇死角!塊面尖,眼大,雖然有人話整形,但係我唔理,有個咁正嘅外表,真係好難溝唔到仔。

好多人觀看電影嘅觀眾,都會話,佢嘅顏值好高呀!

講真,你想睇返以前黃靖翔佢拍嘅相,同埋而家個樣,無可否認,而家真係靚仔左更加多!以前都已經靚仔,而家簡直係完美!啲人成日都問,究竟黃靖翔有冇整型、整容?其實,有心人只要睇吓個下巴,再睇返以前啲相……就一目瞭然啦。但係,有冇整都好,最緊要效果靚!而家變到咁靚,簡直係亞洲十大美男!

另一位男主角高泰宇,樣貌都係好正,兩位男主角嘅配搭, 自然,好恰如其分。

電影第一部份飾演學生時代,高泰宇都已經有人種靚仔嘅感覺,到到電影第二部份嘅預告片,佢更加有種猛男、成熟男人嘅魅力!心心眼!

兩位嘅chemistry真係好正!尤其係見到花絮部份,好明顯兩位都有交流!

我有少少鍾意左你地!


雙程電影,帶動國產BL耽美衝出世界潮流

自從有咗YouTube之類嘅短片分享平台,就發現世界各地嘅人都可以好容易咁樣睇得到唔同國家嘅作品。一個好特別嘅分類,耽美BL,就成功咁樣將好多國產嘅小經典推出世界,獲得世界各地(亞洲、美洲、歐洲)觀眾嘅青睞!

最令人驚喜嘅係,雙程一類嘅電影,已經得到世界各地觀眾嘅觀看!你睇電影嘅留言,好多人都即刻問,有冇英文字幕、法文字幕、甚至阿拉伯文節目!足見觀眾係來自世界各地!係外國,唔少觀眾都流行自己拍攝一段睇預告片之後嘅反應,眾多觀眾自拍之中,竟然驚現一位黑人女性!佢係一位喺美國嘅觀眾,原來,我哋拍嘅BL耽美劇,竟然外國都有咁多人睇!我成日都話,大隻靚仔,就係世界嘅共同語言,一定有市場!哈哈!









0 意見

Counter

Flickr Images