【男神】「上癮」網絡劇最完全介紹(香港特別版 )

3月 05, 2016

改編自柴雞蛋小說「你丫上癮了」嘅強國hehe網絡劇「上癮」,我一口氣睇完左。每集只係二十分鐘,共十五集,極速咁睇完。而家唔單止主角上癮,我都上咗癮。「上癮」喺大陸已經禁播,全面下架,不過越禁,就越多人睇!


未睇嘅人,如果唔想沉溺喺甜蜜,放閃愛情嘅氣氛裏面,就千祈唔好睇!




(上癮網絡劇已經累積左超過億計嘅點擊率! )


點解你要睇「上癮」?

「上癮」呢套網劇,主要講述兩個高中男仔「顧海」同埋「白洛因」之間嘅BL hehe愛情故事。

「上癮」網絡劇,並唔適合以下人士觀看:

1:唔鍾意笑,唔鍾意青春年代嘅熱血、汗水與歡樂嘅人

2:唔鍾意偶像劇,唔鍾意搞笑浪漫喜劇嘅人

3:對於BL / hehe / gay / 腐女文化有極大抗拒嘅人

4:唔鍾意靚仔嘅人

5:討厭「那些年」、「我的少女時代」呢類校園片嘅人

6:香港明光社、台灣護家盟之類癡撚線組織

如果你唔係以上幾種,就會發現呢套網絡劇真係好addictive。而且就算你唔係腐女或同志,呢套網劇都會好上癮。

呢套網劇好甜,唔係網路用語話咸濕嗰種,而係指甜蜜!

好似我上次都講,香港人最缺嘅唔係錢,而係時間。好彩「上癮」只係短短20分鐘一集,而全季只有15集,真係平時搭車、等人、喺屋企無聊都可以攞嚟睇一集。



(一張相已經發放無限電力,再睇埋劇情就知道點解大家都上癮)




「上癮」網劇紅左兩位主角:許魏洲(飾 白洛因)、黃景瑜 (飾 顧海)


「上癮」劇情介紹

呢套網絡劇改編自著名網絡作家柴雞蛋嘅耽美BL小說「你丫上癮了」。網絡劇只係改篇左少少嘅一部份,但係已經非常之受歡迎。

「上癮」網絡劇,佢嘅故事成份故事大綱其實好簡單,就係一個富二代特權階級霸氣小流氓(顧海),同埋一個學業成績好好,有少少驕傲又怕羞嘅窮高材生(白洛因),中間相處感情昇華嘅故事。

15集劇情,發展其實都幾為大路,兩個男主角都係有女朋友,由不打不相識嘅整蠱對象,到互生好感,到面對複雜又嘅情愫,到排除萬難喺埋一齊,其實都係一般偶像劇嘅情節。而故事當中,就一定有出人意表嘅高低潮,就係其實原來兩個係有親戚關係!

「上癮」網劇好睇之處,就係佢從兩位男主角「顧海」同「白洛因」平淡嘅相處過程,日常生活嘅互動,慢慢見到建築左感情,非常之自然。

其實「上癮」網劇係一套校園同青春愛情故事,一個靈魂與靈魂交流嘅故事,多過一個hehe故事。


「上癮」靚仔介紹

當中嘅演員設定真係一絕,強勢攻「顧海」同傲嬌受「白洛因」真係入型入格。

裏面嘅男主角,唔算好polished,但就非常之吸引人。「顧海」(真名 黃景瑜)好似東北人,說話嘅口音都係有濃濃瀋陽口音。而且身形好大隻,望落去都有帝王feel。用大陸嘅詞彙,就係叫做純爺們,即係好男性化自信霸氣嘅男人。「白洛因」(真名 許魏洲)真係好似一個未出櫃,又驕傲又怕羞嘅小hehe,喺深沉內斂外表底下,有一種抑壓唔住嘅骨氣、含蓄同感情。



(左邊係傲嬌0仔角色「白洛因」,右邊係霸氣1仔「顧海」,劇集裏面嘅表現令人眼前一亮)



(劇集裏面唔多唔少都有啲騷肌嘅場面,猛1男主角身材真係好好! )


(小受「白洛因」身材都唔錯)


(顧海呢個角色真係好適合黃景瑜做)


(好靚仔呀! )

「上癮」呢套劇好睇之處,就係令你回顧以前高中年代清新、笨拙、搞笑、浪費時間嘅可愛年代。其實兩個主角角色之間嘅交流互動真係好有默契好自然,就算唔係hehe同志劇,就算由男女主角分別飾演,都一樣會咁好睇。係唔係hehe反而唔係咁重要。

呢套劇令人有種「戀愛」嘅感覺。腐女少女心爆燈!

「上癮」網絡劇,同一般嘅同志電影劇集唔同,佢冇乜矯情嘅生離死別場面,反而有好多小清新、小幸福嘅生活相處片段。感覺好清新,其實有啲似「那些年」、「我的少女時代」。同時,又有啲似日本動畫大師新海誠拍攝嘅校園青春動畫。如果要用一句來概括,「上癮」,就係「那些年我的hehe少年時代」。

「上癮」呢套網絡劇,係小本蚊型嘅製作,但係大陸就非常之爆紅,觀眾以千萬計!呢套網劇令到無數嘅腐女、hehe都感動到!受歡迎程度令到各界大為關注,甚至令到保守嘅大陸當局要立即下架呢套網絡劇,變成禁止搜尋!而家愛奇藝、騰訊都已經搵唔到!

大陸嘅電視劇好多,網絡劇仲多!用海量去形容係絕對不為過。但「上癮」呢套劇可以喺數以萬計嘅網劇製作之中跑出,就別有佢嘅原因。於是我就抱住睇下嘅心態走去搵來睇。一睇,就上咗癮!

我咁快上癮嘅原因,係因為佢完全記錄左我地香港人一個青少年時期,高中時期所會遇到嘅愛情困難,期盼,相處,對於未來嘅希望同埋嚮往。兩位男主角「顧海」同「白洛因」,相信都係你和他(你和她 / 妳和她)的故事。

當然,佢俾人禁止一定有原因。唔止係同志咁簡單。因為佢有好多激情嘅場面,包括左打飛機、綁架、男男強姦等等!畫面本身係好含蓄好隱晦,冇乜explicit嘅鏡頭,但係意識上就一定比一般嘅大陸劇大膽好多!


(劇集主打sweet sweet溫馨場面,但大膽意識都唔少)


「上癮」教識我關於愛情嘅事

同所有好嘅愛情故事一樣,「上癮」呢個網絡劇都為觀眾帶來好多關於愛情嘅思考同啟發。

「顧海」為咗佢鍾意嘅人,真係可以不惜一切。佢溝仔係技巧真係好一流,任何腐女、同志面對着一個好似佢咁嘅男人都會好冧。基本上呢啲技巧就算直男都可以參考一下,用嚟呃蝦條真係一絕!例如:(以下有少少劇透,請注意)


  • 佢會偷偷地買早餐比白洛因。
  • 佢會動用自己富二代特殊背景嘅資源,為男友屋企人安排特殊待遇。例如幫白洛因爸爸安排新嘅工作。
  • 佢會講出一啲求愛金句:例如「有病就吃藥,你就是藥!」「我可以用大把的愛砸你,我就不信砸不動你!」
  • 佢會係適當時候講啲鹹濕笑話,撩下怕羞又內向嘅白洛因,甚至喺身體檢查嘅時候,特別突出佢自己特殊部位嘅巨型size。
  • 佢會突然抱起含羞答答嘅白洛因,然後話「叫聲老公,叫聲老公我把你放下來!」
  • 佢會綁架佢男朋友禁室培育(!)
  • 佢會買架bmw車俾男朋友(!!)
  • 然之後佢會喺呢架車度強姦咗冧爆嘅白洛因(!!!)



(男主角顧海大膽又無賴嘅求愛方式,反而令到好多人好冧好接受!)

而喺「白洛因」方面,佢面對大膽求愛嘅大男人「顧海」,佢欲拒還迎嘅技巧都係好好,值得腐女、港女同hehe學習!


  • 佢唔會每次都應承,有時都扮到好煩厭嘅樣子,咁樣反而令到大膽又無賴嘅求愛者顧海心癢癢。
  • 佢好識做好體貼,明知對方係有錢仔扮窮來接近自己,但係佢都冇即時拆穿,等對方適當時候自爆佢先至講出嚟。
  • 佢會識得係適當時候淨係着件非常之暴露嘅浴袍出嚟,係夜闌人靜嘅時候,兩個男人共處一室,露出雪白結實嘅身體,挑逗勾引其他㷫烚烚男人。



當然,除咗呢啲調情技巧上面嘅野,「上癮」網劇亦都引發咗一個好好嘅思考題目,就係乜嘢係「愛」。

喺現代化嘅香港,好多時愛情,尤其係hehe同志交友同蘭桂坊港女交友,都好過分地側重外表。一出嚟,就睇下你有冇胸肌(有冇波)、睇吓個樣靚唔靚、皮膚靚唔靚、身上面有咩名牌手表、有冇錢等等等等。彷彿有呢啲野,先至係有資格去愛同被愛!但係現實係,一套好似「上癮」嘅網絡劇,就啟發左原來愛,係貴乎相處,了解,關懷,體貼,一齊解決困難,一齊去夢想進發。愛,唔係淨係睇樣咁簡單。

愛係陪伴,同耐心,唔一定要好潮好靚仔好polished 。



(上癮網劇兩位男主角顧海同白洛因嘅相處過程,教識左好多人愛係乜嘢)


「上癮」網絡劇:香港人寫嘅觀後感

呢套擺明係BL耽美嘅網劇,係一個好大嘅驚喜。

作為一個香港人,好多時大陸嘅電視劇、網絡劇睇起上嚟都會有少少嘅格格不入,畢竟我哋嘅成長階段,價值觀,工作環境,所面對嘅困難都有啲唔同,佢哋嘅潛規則我未必明,我哋對某些價值觀嘅熱烈追求,佢哋又未必了解。所以未必一定可以完全理解每套劇劇中主角嘅反應。但呢套「上癮」真係適合任何一個人睇,包括奄奄尖尖嘅香港人。

「上癮」網絡劇最令人驚喜嘅,就係佢用一般偶像劇情節,去包裝男生之間嘅hehe愛情故事。雖然個戲名好似同毒品有關,但其實並無直接關係。而且相對乾淨,冇乜太過激情嘅色情場面。「上癮」網絡劇並無好似一啲傳統同志電影裏面,過度苦情嘅表現。就算「上癮」係BL / hehe嘅故事,都同一般男女嘅偶像嘅冇乜分別,都係有扭計、誤會、搞笑、成長、感動嘅情節。

好多同志電影電視劇,都免不了有一種悲情嘅色彩。通通都係有關生老病死、喊苦喊忽、人生遺憾等等劇情。好似冇乜開心、搞笑、陽光嘅內容。其實現在嘅社會已經越嚟越進步,男男、女女之間嘅感情,亦都越嚟越受到外間嘅接受。隨着同性戀、雙性戀議題越嚟越普遍,偶像劇有呢一類型嘅題材,一啲都唔出奇。

同一般偶像劇一樣,「上癮」呢個網絡劇都係以帥哥為主,而「上癮」其中一個特色,就係當中嘅女主角真係好醜樣,有幾個更加係「極品」級數咁樣衰。唔知係咪因為咁樣可以令男主角們更加靚仔,同埋暗示咗點解佢哋要hehe啦!哈哈!


(男主角前女友,樣衰到呢,omg!)


「上癮」網絡劇必睇場景

呢套劇帶我哋返去高中年代,返返去嗰個有體育堂、教室、無聊同學嘅年代。佢反而冇乜太多好激情、賣弄性感床戲嘅場景。

有幾個場景好窩心,大家真係要留意一下:

面對又冇禮貌又串串貢嘅體育老師出言不遜,強勢攻「顧海」挑機成功,係體能比賽上贏出,傲嬌受「白洛因」喺人群中裏面靜靜咁觀察呢一幕。(好Man啊!)

顧海利用特殊身份,叫單位安排安置俾白洛因家人。(好冧)

綁架事件!


(上癮網絡劇裏面好多好感人嘅場面,真係感動到喊! )


原來我們都活在同一個天空下

好少見一啲大陸嘅網絡劇可以喺高登出現,因為高登一向都好抗拒強國,你套強國片竟然得到正評,仲要係一套同志網絡劇!

而家嘅香港非常之政治化,朋友都會分為黃絲、藍絲,非常之分明。對於強國,亦都係我哋嘅所謂祖國,我哋嘅了解真係好少。一啲好似「上癮」呢啲網絡劇,其實俾咗一個機會我哋去了解真正嘅國情,了解到內地嘅進步,佢哋嘅成長、發展、意識形態上嘅改變、同埋經濟人民之間嘅互動。

唔睇「上癮」都唔知,原來中國內地都有咁多靚仔,個個都高高大大,皮膚又好,身材又好,真係大開眼界。相比起比較瘦削又MK嘅香港男仔,別有另一種嘅睇法同吸引力。

「上癮」網絡劇唔應該禁止,因為佢根本係代表左時代嘅變更同大陸嘅進步。

從「上癮」網絡劇,我重新認識到好多已經差唔多遺忘左嘅青春片段。原來,我哋之間嘅成長係咁相似,原來雖然我唔係活在北京、天津、或者上海,但係我地成長嘅困惑,糾結,抑壓,開心同甜蜜,都有咁多相似嘅地方。

香港人同內地人,除咗政治上嘅唔同之外,其實人同人之間嘅感情,當中微妙嘅甜蜜感覺,真係冇必要過分政治化。我好好彩,活喺一個唔需要翻牆又相對自由嘅世界,從「上癮」網絡劇,我對於強國人多咗了解,令我發現到原來我地之間相同嘅地方,係多過不同嘅地方咁多。

應該仲有無數咁多係內地嘅腐女同男仔翻牆睇緊呢套劇,同埋睇緊佢嘅原著小說「你丫上癮了」,幾萬人一齊沉醉喺顧海同白洛因嘅高中糾結青少年世界裏面。

我放低電話,推開窗,出面係一片蔚藍清爽嘅天空,驚奇地發現,窗外面同喺「上癮」網絡劇裏面經常見到嘅北方天空一樣。

原來我同你,同顧海,同白洛因,都活在喺同一個天空之下。喺呢個廣闊嘅天空之下,曾經有過我哋青澀又衝動嘅愛情故事。希望天下有情人(與及單身毒L無情人),都搵到一個好似顧海一樣嘅男人,而你,都可以做佢最寵愛嘅白洛因。





1 意見

Counter

Flickr Images