【減肥】Isowhey減肥效果親身測試!Whey Protein減肥方法(初學者必看)

Whey Protein減肥瘦身,其實喺外國嘅美體中心、健身圈子好普遍,無論男女,都會喺健身、跳舞、參加田徑比賽嘅時候飲用。近期隨着香港人對於健身、yoga、跑步、健康生活嘅了解增加咗,就對乳淸蛋白whey protein多咗認識,亦都少咗一啲不必要嘅恐懼。

無論係男仔定女仔,whey protein都可以幫你身體更加結實,更加緊緻,更加健康嘅身形,減少脂肪,令你成個人都sharp晒!








(澳洲Isowhey減肥whey protein,官方宣傳好吸引!)


正確使用,Whey protein會越飲越瘦

開頭我對於營養學認識唔多嘅時候,見到呢啲whey protein乳清蛋白,就會好恐懼,會覺得一定係嗰啲gym超大隻、貌似Hulk嘅人先會飲,我嘅理想身形係slim fit,我唔想要嗰種筋肉身材,所以我都唔會想掂whey protein。

後來,我對於營養學嘅研究增加,發現蛋白質對於減肥、瘦身、美容好重要。而同時,乳清蛋白whey protein,就係蛋白質入面比較優質嘅一種,每日如果要維持健康嘅營養比例,就一定要吸收足夠嘅蛋白質。乳清蛋白,就係一個好好嘅途徑,又方便,又好味。而且,身形好快就見到有變化。肌肉多咗,減肥又快咗。

試左我人生第一包whey protein,就發覺效果真係可以話立竿見影!只需要一個星期左右,我就發覺我嘅食慾低咗。

飲Whey Protein會唔會越飲越肥?梗係唔會啦。唯一可能越飲越肥嘅情況,就係你自己平時飲食唔節制,喺平時已經過量嘅飲食上面,在加上呢個乳淸蛋白whey protein,咁樣,只會百上加斤。

如果你飲食健康正常,用代餐嘅方法,係一定會瘦,冇可能唔瘦。


如何選擇高質素嘅乳清蛋白

第一次選購whey protein,難免都覺得有啲疑惑。市面上見到,有好多唔同類型嘅乳清蛋白,尤其是係一啲售賣俾健身人士嘅whey protein專門店,就會更加多。

我要重申一次,whey protein本身對身體好有益,只要你按指示服用,唔好過量,就會達到瘦身減肥效果。唔一定係男人先可以用,男女都可以。

我再重申一次,淨係whey protein唔會令你變得大隻。(好多女仔最擔心,就係變成筋肉女人! )啲仔仔變大隻,係因為佢哋用重力訓練,配合乳清蛋白,重力訓練變大隻嘅效果就會更加明顯。淨係飲whey protein粉,唔會有呢個效果。如果淨係飲whey protein都可以變大隻,大家就唔會去做gym做得咁辛苦。

開始飲whey protein減肥嘅時候,我對乳清蛋白嘅了解同埋要求都唔高,求其試吓萬寧GNC最平嗰啲,冇乜期望,諗住如果唔鍾意就掉咗佢。後來發現,減肥瘦身效果越來越明顯,我就諗,不如揀一啲質素高一啲嘅,可能效果更加理想。

對於一啲whey protein初學者來講,乳清蛋白最容易買嘅地方,就係萬寧嘅GNC,同埋Herbalife。佢哋嘅特點係方便,稍為大啲嘅萬寧分店都會有。價錢大概$300左右,如果係會員就會有折扣。

只要將whey protein加水,同埋冰塊,就會變成奶昔。呢種減肥奶昔,相比起白烚雞肉同雞蛋,比較容易入口。

我開頭接觸GNC whey protein代餐嘅時候,就發現佢嘅減肥效果快,不過味道就真係一般。暫時香港來講都係得朱古力味。

有時,我要加多些少冰塊,同埋多啲水,沖出嚟,先會比較容易入口。否則,味道真係唔太吸引。始終同一般嘅milk shake口味有出入。

GNC Whey Protein個好處係,佢都唔算太肥。可能佢唔係加左好多調味同埋朱古力,所以相對唔算太致肥。有啲所謂嘅乳清蛋白,加左大量嘅脂肪成份、朱古力粉、導致減肥瘦身嘅作用打折扣。

對我來講,減肥,係充滿樂趣!我對於飲食、生活、護膚、健身、美髮,都有好高要求。所以,即使我買whey protein,都會睇清楚,唔會咁隨便!

近期我就發現咗屬於營養補充品大廠Blackmores旗下生產嘅Isowhey。佢嘅賣點,係冇人造色素、冇人造味道、亦冇Gluten。

其實最吸引我嘅,就係佢唔用廉價嘅人造假味,反而用「馬達加斯加」嘅「雲呢拿香草」。

Isowhey產品亦都聲稱,會加入左獨特嘅註冊成分Litesse,可以幫助腸胃平衡與及吸收營養。

Isowhey產品亦都特別加入帶有鹼性嘅seagreens。

就係咁,俾佢吸引左,我俾咗$490買咗Isowhey。一大罐,以我嘅飲用速度,應該可以last差唔多一個月。

要減肥,就要吸收高蛋白、低糖、低碳水化合物,嘅生活飲食習慣。呢啲含有香草雲呢拿味嘅whey protein,就好適合作為甜品、或者下午嘅小食。

我好鍾意飲珍珠奶茶,呢個係我嘅減肥死穴。但係自從有咗朱古力味、香草味嘅減肥whey protein,我唔會咁本能反應地購買珍珠奶茶。有時諗住如果要出去排大隊,不如快快手自己沖杯whey protein飲就算。日積月累,體重就下降!個個見到我都話,你塊面好尖啊!

我就會好得戚咁同佢地講:「有冇蛇精男咁尖先?」😂


飲whey protein可以幫助你長期減肥

健康減肥,最重要就係培養良好嘅飲食習慣。

每日或隔日飲用whey protein,代替一餐正餐,卡路里嘅攝入量,就會急速下降。

減肥,應該係一個自愛同自我美人覺醒嘅過程。

減肥如果乜嘢都唔食得、朋友聚會唔參加得、家人食飯又要呢樣唔食嗰樣唔識,你嘅社交生活甚至情緒都會受到影響,人生就會好冇趣味!咁樣,你好快就會放棄減肥!

曾經有啲人問,我一面介紹香港美食,一面又教人減肥,會唔會自相矛盾?

我覺得完全唔會喎,原因係,如果你平時唔係咁注意飲食,只進食高質素高營養嘅優質食物例如whey protein,養成良好飲食習慣,到真係有高質素但同時比較高卡路里嘅料理嘅時候,你仲邊有quota?

減肥,最主要嘅成功之道,就係保持靚靚心情,又改變飲食「習慣」。我一定要重申「習慣」嘅重要性,因為你食多食少一餐,分別唔係好大。反而最重要嘅決定因素,就係你嘅「習慣」。將養成良好嘅飲食習慣,你就一定會瘦。

(3週後特別更新)

飲用左幾次Isowhey,我發覺佢真係有唔錯嘅後果,而且味道真係非常之好,雲呢拿香草味吸引,真係有效果!呢個係會推薦同埋會繼續keep!

(2017再次更新)

空瓶才有說服力!已經飲完一罐又一罐,體重亦都不加反減,Isowhey我愛死你了!



減肥瘦身



【香港美食】嚴選星街餐廳Le Garçon Saigon:星空下的越南

那一個夏天夜晚,在星空之下,迷惘的氣溫濕度中,我到了灣仔星街的越南餐廳Le Garçon Saigon。那種浪漫可愛又美味的氛圍,令我讚美生活的美好。

香港灣仔星街小區,是香港品味人士、外籍人士晚上消遣的選擇之一,星街又做為數不少的餐廳與cafe,有種文化氛圍,比較蘭桂坊斯文,亦都有一種外國咖啡店、戶外餐廳的閒晃氛圍。

星街小區的靚仔靚女極多,好看的數目遠超不好看的。可能是物以類聚,星街就聚集好多文青、國際人仕,是中上層的生活圈子。這個小區適合拍拖,空氣中,都瀰漫着一種黃昏時段獨有的,心靈相通的拍拖愛情感覺。


(星街著名食肆Le Garçon Saigon)


星街點去

首先,先講講星街點去。去星街最好的方法,就是港鐵。星街在港鐵站金鐘站出口,PP3出口,行1分鐘就到。如果想細微港島區灣仔、金鐘、中環一帶的港英風景,又可以乘搭電車。

星街一帶的食肆和酒吧,不單止各有特色,而且方便。

經過港鐵的出入口,星街可以連接太古廣場Pacific Place、金鐘廊LabConcepts、甚至香港公園。碰巧,這幾個商場都主要售賣護膚品、珠寶、在食物和餐廳方面,沒有太多選擇。所以星街,非常適合在PP行街之後飲杯cocktail,食個特色的晚餐。

星街、永豐街是依山而建,就是向上的斜坡。

到訪星街的最佳時間,是下午到晚上。星街的主要特色,在於酒吧與cafe。好多餐廳的營業時間都是下晝才開始。


(星街地點方便,就在金鐘港鐵站PP3出口,步行1分鐘就到)

去到星街,有幾個地方一定要去。第一,就是著名咖啡店Elephant Grounds,第二,就是Le Garçon Saigon。



(星街著名咖啡店Elephant Grounds,不好不試! )



(Elephant Grounds,星街著名咖啡店)

你是遊客還是香港人,如果行開太古廣場Pacific Place,就千萬不要錯過幾步之遙的這個星街小區,他給你的感受,絕對和珠光寶氣的Pacific Place不同。

如果Pacific Place是一個珠寶盒,儲存着無數的珍貴珠寶鑽石,那麼相隔幾分鐘的星街小區,就是一個香薰蠟燭,他沒有珠寶那種世故犀利,卻是生活中不可缺少的小小享受和品味。


那一年,我們都愛上過越南菜

星街之所以特別,就是他和一般其他區域的餐廳不同。在這裏,無論是依山而建的斜坡,還是夾雜着英語、法語的餐牌,超寬敞的餐廳環境,與及戶外用餐的體驗,都是在主流香港社會少見的。

現在的蘭桂坊已經變得超級遊客化、超級商業化,而且多了很多不明來歷的黑人毒品拆家、扒手、南亞舞女。星街,少了喧嘩,卻多了一種文學和生活的氣息。

星街的餐廳和Cafe甚多,最好特色的,就是這間由澳洲越南華僑經營的越南菜館Le Garçon Saigon。

自開業以來,這間Le Garçon Saigon無論食物、環境、氣氛、網上評價,都好評如潮!絕對可以成為星街代表食肆。

這間Le Garçon Saigon很特別,營業時間,由黃昏六時開始!即是說,是沒有早餐,沒有午餐,沒有下午茶!只有晚餐。

在昏暗的燈光,炎熱潮濕的熱帶環境、和網上評論的影響下,我就去了Le Garçon Saigon





(Le Garçon Saigon的法式越南薄荷荔枝飲品)

受法國殖民地影響甚深的越南菜館Le Garçon Saigon,提供的是一次旅遊的體驗。

Le Garçon Saigon主教的是法國越南菜,主要食物都是燒烤為主,包括越南烤肉、法式麵包、越南雞翼、木瓜沙律、支豆沙律……配合越南啤酒、cocktail等等。

餐廳本身也有些戶外位置,可以提供黃昏室外用餐的體驗,十足越南、泰國旅行的旅館。

環境本身,就是當地越南餐廳的顏色、風扇、完全是亞熱帶的浪漫氣氛。



(Le Garçon Saigon有非常可愛的logo設計)

之前好多朋友都推介過,網上的評論有看過,就發現Le Garçon Saigon最著名的,就是燒烤和法包。我今次點了一個mini法包,進食的時候,咬下去,我就當眾呻吟了一下!令到其他人用奇怪的眼光看着我!哈哈!

我的BB,用責備的眼光看着我。哈哈這件事我也不想。

我是從來未試過做出如此失禮的行為。今次會這樣,因為,法國麵包實在是太好味,口感豐富,食材新鮮,我竟然有一個味覺的高潮!

不要以為我誇張,你自己試就知道,簡直是舌尖天堂。


(Banh Min Thit,法國麵包配合自家製造的札肉,口感簡直無法形容)



(法國麵包香脆之餘,裏面的材料新鮮,香草紅蘿蔔絲,配合新鮮的豬肉,我可以說,Le Garçon Saigon是香港最佳5間越南餐廳之一。)


Le Garçon Saigon的其中一個招牌菜,就是木瓜沙律,味道清甜,材料新鮮,香草的味道令人垂涎三尺)



(越南炸雞翼Canh Ga,我平時盡量不吃煎炸食物,為的,就是在高級又可愛的地方,可以有quota進食。味道只可以用天堂來形容)



Le Garçon Saigon有小小的戶外用餐區,對一些香港人來說可能較為炎熱,但是如果你的接受程度較高,偶爾在沒有那麼大冷氣的地方,也是一種異國體驗)

如果以進食的環境來說,我只可以用超班來形容Le Garçon Saigon。因為,我是美感控,非常喜愛美好的設計、可愛的顏色、與及法國殖民地色彩的環境。在這種環境下進食,心情都會更加開朗,和朋友的傾談,也會更加盡興。

在雞尾酒的味道、及香草的氣味包圍,談笑,令我想起人生中的快樂,生活的快樂。


Le Garçon Saigon不是越南,是幻想中的美好越南

Le Garçon Saigon,嚴格來說,不是正宗的越南菜,他是比較正宗更好的「夢幻正宗」越南菜。

對於好多地方城市,都分為現實的,與及電影、小說、藝術作品幻想出來的,兩個印象。

對於越南的西貢,人們也總有太多的幻想,他的殖民地建築、小販、單車、平靜的湄公河日落……滿眼都是熱帶的生果,與及盛放的蓮花,配合身形纖瘦越南女子。50年代,作家Graham Greene就旅居於此,當時,這裏還叫做indochina。

黃金時代的一切,構成一張對越南西貢永遠的印象。越南西貢,有種上世紀的浪漫。我絕對願意在這裏迷路,迷失在昏黃的街燈裏。

去到真正的越南,就會發現很多落後的基建、混亂的交通、市內衛生狀況差等等……

有時幻想歸幻想,現實歸現實。對一個城市的印象,小說、電影、官方宣傳短片,和真正到達這個城市一下,總會有好大落差。因為電影、小說、旅遊局宣傳往往只着重美好的一面……

有時,我想旅遊去越南、寮國、泰國,好受享受一下在異國風情中的食物、飲品、氣味、讓香草味道的刺激,帶來新鮮感,感受到生活的喜悅。同時,我也不想舟車勞頓,我只想暫時去兩個鐘,然後回到我的PP、圓方!我需要即時的美食,放鬆,享受。最好,就是不需要飛機啦。

Le Garçon Saigon的好處,就是他們已經幫你揀最好的,只留下最令人耳目一新驚喜的部份。其他的,就完全省略。

如果你有時只想飲杯cocktail,三五知己相聚,Le Garçon Saigon就是正確的選擇。


仍然好愛好愛越南

我好幸運好幸運,可以活在香港,有機會品嚐到世界各地的美食,可能,我居住的地方沒有在越南一樣,在18世紀的古宅裏面,有偌大的露台,在月光下彈結他。

雖然我沒有這些,但是我擁有的,更多。

作為香港人,在星光下品嘗地道越南菜,幾步之遙就是出售世界珠寶的Pacific Place。一條街,就有Spa、美甲店、咖啡店、各式各樣的料理店。

我們的世界,蘊含了世界各地的消費精華,最好的食物、護膚品、文化藝術、美酒、料理,都在這裏。

來到Le Garçon Saigon,體驗東南亞國家的文化,感受到法國殖民地的越南風情,和現代香港的crossover。

星光下拍拖,在美食中有心靈上的交流,時光很慢,我鍾意。


更多香港美食介紹,在這裡




【醫學美容】驚嚇!家用HIFU機大踼爆!如何分辨真假HIFU教學

擁有靚靚嘅V面,同埋緊緻嘅輪廓,係好多人嘅夢想!所以,醫學美容中心提供嘅高能量聚焦拉皮HIFU緊緻療程,就好受歡迎!近日,網上就流行一種聲稱係家用版嘅HIFU,機身細細,來自韓國,網站講到,可以媲美美容院效果。(本文有最新版:香港HIFU價錢效果教學,及如何防止後遺症 2019最新資料)

家用HIFU機暫時喺大型嘅鋪頭都買唔到,家用HIFU只係喺一啲網店、樓上鋪、淘寶度見到。但平價家用自己做HIFU呢個概念,就已經引起熱烈討論,令到好多人都好興奮!

真係有啲咁着數嘅嘢?自己係屋企都做到HIFU?你要先搞清楚HIFU家用機係真貨定假貨!如果你唔想俾人呃,美容變毁容,就要做足你嘅功課。


家用HIFU機大踢爆

家用HIFU機暫時都只係喺一啲ig、FB網店同一人店出售。一啲大型嘅連鎖家電專門店嘅美容家電部份,都仲未見到。

好多朋友即刻問我,呢個HIFU家用機值唔值得投資?因為真係好似好抵,只係需要港幣$6000左右,就可以擁有美容院嘅專業儀器!而且,好似係韓國製造!

我第一時間就問佢,你之前所講嗰部HIFU家用機,係咪好似一個白色小盒子咁樣呢?我個朋友話係,我就話,係咪好似下面咁嘅樣?


(近期受到注目嘅其中一款HIFU家用機,但係咪真係有效?又係邊度做?點解會咁平? 網上圖片)


(其中之一種家用HIFU機,網上圖片)

我個朋友話係,我就唯有好直接咁同佢講,呢部所謂嘅HIFU家用機,並唔係韓國製造,係強國製造!

好多不良銷售手法嘅網店,就亂咁吹,又話家用版HIFU韓國製造!我可以好肯定咁同你講,呢部家用HIFU機肯定係大陸製造。佢係生產自大陸嘅工廠,唔信?我下面會有更加多嘅證據逐一踢爆。

一個醫學美容產品係咪安全,並唔係完全取決於原產地。好多只要符合當地同埋世界嘅安全條例標準,就可以接受。如果你想知道HIFU家用機嘅安全性問題,就要先了解HIFU係乜嘢。

HIFU就係高能量聚焦,係超聲波嘅一種。對於醫學美容嘅原理,就係用超聲波重要的打入皮膚底層,刺激膠原自生。從而達到年輕、緊致嘅作用。

HIFU係指高能量聚焦超聲波,而「Ulthera」、「Hi Five」等等,就係指某一個型號品牌嘅產品。就好似,樽裝水,係包含全部類型嘅包裝食水,而「Evian」、「Volvic」、「Hildon」,就係指某個牌子嘅樽裝水。

所以,HIFU本身並無話明係專屬於某個品牌,就好似樽裝水,可以係任何嘅品牌。首先呢個概念你一定要搞清楚。如果用樽裝水來比喻做HIFU,其實可以係任何嘅牌子。佢可以係高質素嘅Evian,亦都可以係不明來歷嘅雜質水。

由於品牌不同,質素亦唔同,並冇一個劃一嘅標準,可以一刀切,究竟HIFU呢個服務應該值幾多錢。當然,脫離市場價錢,太貴或太平,你都要三思啦。

所以,你要先了解清楚,你買呢部家用HIFU機,同出邊做嘅大機,質素差幾遠,無論係有效程度、穩定度、操作容易度、安全程度等等,你都要比較左先,而唔係一下子就話,因為價錢低,就一定係抵用,可能價錢低,只係代表質素差劣、山寨、安全程度冇保障。絕對唔應該人哋話幾千蚊做HIFU,你就即刻仆去買,咁樣做只係自己愚蠢!

無論係醫學美容中心,定係家用版,HIFU係屬於有風險嘅美容療程,操作本身有一定嘅灼傷風險,你一定要先了解,以免出錯。因為如果你做錯,可能會造成疤痕之外,甚至會造成眼睛視力受損, 出現白內障甚至盲眼嘅情況。(香港就發生過因為操作不當造成嘅醫學美容受傷事件)

操作訓練,同埋產品嘅安全性,係做HIFU一個非常非常重要嘅考慮。無論出街做定家用,都要搵一啲規模大嘅醫學美容中心、同埋受個專業訓練嘅治療師操作。不當使用,就會造成創傷甚至毁容。絕對唔應該攞嚟塊面亂咁試,因為出咗乜嘢錯誤,真係唔知可以怪邊個。

醫學角度來講,HIFU亦都有佢嘅科學根據,對於改善皺紋鬆弛等等,都會有作用。但前提係,一定要使用正確,否則會造成灼傷、留下疤痕等等。


家用HIFU機喺邊度生產?
依家香港市面上流通嘅家用HIFU,大部份都係來自大陸。佢哋都係由幾間專門出產醫學美容儀器嘅工廠生產。

喺大陸,呢種疑似HIFU產品叫做「家用超聲刀」。售價大概$5000到$6000人民幣左右。幾間廠都有為其他人做OEM、ODM。你可以去淘寶搜尋。

經過我嘅深入研究同業界人仕傾談,就發現生產商其實係東莞、廣州嘅幾個工廠。其中有部份生產商,亦都有為美容行業生產大型嘅美容儀器,當中亦都有一啲疑似山寨假貨(出產假Thermage、假Ulthera)。

呢啲所謂嘅「超聲刀」,可能真係有HIFU都唔定,但係由於部分(部分,不是全部)生產商信譽麻麻,曾經出產偽劣產品,好難令人百分百相信產品功用。


如何分辨真正HiFU

作為一個醫學美容達人,平時都會見到好多醫學同埋美容業界嘅宣傳。同時,由於興趣同埋工作嘅關係,我對於醫學美容、皮膚學、美容行業商業運作都有少少認識,見到一啲好奇怪嘅異常嘅情況, 就會識得發問,唔會網店講乜你就信。

喺決定係咪購買家用HIFU機嘅時候,第一個問題要諗,咁就係其實部機係唔係真正嘅HIFU,定係只係普通嘅家用射頻機。

依家就教大家幾個方法去分辨咁正嘅HIFU,同埋假貨。


分辨真假方法一:痛楚程度

真正嘅HIFU射頻,一定會有少許痛楚感覺。好多,都真係幾痛!

所以如果有人向你提議購買HIFU家用機,你就一定要測試一下,究竟佢嘅感覺係咪會痛。


分辨真假方法二:效果持續性

第二個分辨嘅方法,就係效果嘅持續性。因為真正嘅HIFU,唔需要做好多次,只要做一次,就可以維持半年,皮膚醫生甚至會建議你,兩個療程中間嘅六個月,唔好再做其他嘅刺激性療程。因為你嘅真皮層膠原蛋白,需要時間去增生,如果不停刺激,又唔給予足夠時間去養成,反而會造成反效果,只係將一啲現有嘅組織破壞,但又冇重新生長,咁樣,面容就會變得蒼老,反而會令人睇起上嚟更加老同疲倦!

真正嘅HIFU,做一次就可以維持六個月,當中唔再需要不停做。

如果你部家用HIFU,你發現要不停地做,先至可以維持到效果,你就可能要懷疑一下,你部機,係唔係真正嘅HIFU。


分辨真假方法三:電腦面部顯像

呢個方法,唔可以係百分百,但係亦都係一個好好嘅指標。

真正嘅HIFU,好似投入服務多年行之有效嘅Ulthera,就會有即時嘅影像,幫醫生監察療程時候,面部嘅受熱情況。咁樣就可以確保,熱力比較平均,而唔會出現灼傷嘅情況。真正HIFU其實能量好高,一定要做啱,所以監察、安全裝置方面,就會做得好嚴謹。

市面上一啲假嘅Ulthera,都會有模仿原裝嘅情況,都會有個電腦畫面,顯示出女人嘅左面同埋右面。但係當然唔會可以好似原裝機咁樣,真係即時監測啦。佢哋只係將一啲面部嘅公仔擺上去,但係就唔係冇任何實際嘅監察作用。


(真正嘅HIFU Ulthera,會有一個畫面,監察面部情況,確保安全)

如果你部家用HIFU機,連監測嘅情況都冇,我都好懷疑佢嘅安全性!

市面上出售嘅家用HIFU機,真係好令人懷疑,博唔博得過,睇你自己嘅智慧啦。

好多嘢我真係唔方便講得太明白,費事好似踩低同行咁樣,但係同時,有啲事實的確係擺在眼前,你肯諗一諗,就可以估到事情嘅真相。

更多:香港HIFU價錢效果教學,及如何防止後遺症 2017最新資料)

有興趣嘗試做全新韓國美國機,各種V面、美肌、逆齡療程嘅朋友,可以直接以試用價到Reju Beauty登記。個人較推「韓國膠原激活童顏術」,效果媲美萬元貴價療程,$688限時優惠(原價$1088)




【愛情】分手後第一日:女神必須要知道嘅失戀知識同金句(失戀7種禮物)

分手之後第一日好重要,因為佢會決定你之後嘅路點樣行。心態正確,你好快就搵得返幸福,甚至,會行一條你發夢都冇諗過嘅幸福之路。

面對分手同失戀,可能大部份人都會感到憤怒、徬徨、沉溺、傷心、失望。但係如果你要做女神男神,就要明白到,分手同失戀,其實係俾到你反思,學習,蛻變嘅機會。

分手後嘅第一日,第一件事要做,就係搵返你嘅「力量」、「希望」。

搵返你幸福嘅能量,無論係一個人,定兩個人。

失戀,基本上係戀愛無可避免嘅一部份,係你成長中必經一課。甚至乎可以係一個個人成長嘅經歷。呢個經歷,可以令你成為一個更加完整、更加好嘅人。

就好似你當年第一次畢業,第一次投票,第一次返工。嗰一刻,令你變成咗大人。

今次你嘅愛情畢業了,無論係幾多分畢業,都可以係一個促進你成長嘅學習。

當然我明白,無論拍拖幾多次,分手,都係嗰次拍拖嘅第一次。所以,你可以不斷成長。你唔單止要做一個大人,更要做一個「優秀」嘅大人。

分手最難以令人接受嘅,就係你終於要正視。面對現實,冇得逃避同埋自欺欺人。你終於明白到,你愛嘅人,原來真係唔太着重你。

原來,其實你喺佢心目中,地位真係唔算太重要。經歷過連番爭奪,佢心中第一冠軍嘅寶座,唔係你。

好多人覺得最難以接受嘅,係認清到「不愛了」或「不夠愛」呢個現實。雖然,呢個事實一直都存在,只不過係你有意無意之間,拒絕面對。

原來一直以來,都係你單方面付出,一個人幻想,一廂情願。呢一個令人驚醒嘅經歷,會令到你尷尬、失望、手足無措,唔想面對現實。但係分手,你想逃避都冇辦法。

陣痛之後,你就會清醒,你就可以放低混亂矛盾嘅思想,迎接另一個更好嘅階段。

愛後餘生,會令你成長、蛻變、高飛。

佢會令你變得更加有智慧、更加堅強、更加纖瘦,對人生,對你自己,會有新嘅了悟。

你將來去到人生新嘅高度,喺高空之中俯瞰,你會多謝你自己當時嘅決定,你嘅成長,同埋勇氣。


(意大利嘅經典Trevi Fountain,並唔係一日造成。而你嘅愛情經典,亦都會隨着你嘅時間,經歷,學習,變得更加完美)


分手不是災難性,勉強一齊才是

好多人都以為分開,心情上就好似身在災難之後嘅廢墟之中。

分手其實唔係最慘,最慘,係明知唔啱都喺埋一齊。浪費你最寶貴資源:生命。

好多人唔知道呢一樣嘢嘅重要性,好似季節更替,好多人都習以為常,但係佢哋唔知道,你人生之中,只有有限嘅季節。你一生之中,點都唔會有超過100個夏季,每浪費多一個,就少咗一個。

你每一個晴空海岸嘅夏天,都要喺愛同成長中渡過,千祈唔好浪費時間喺一啲唔愛你嘅人身上。

而分手,會有佢嘅禮物,會幫你搵返幾樣野。



第一份禮物,係自由。

分手最令人鼓舞嘅,就係一種解放、釋放。

你會突然發現,你嘅時間多咗,更加多時間去發掘你嘅潛能、興趣、新生活。唔會好似以前咁,每一日都要為佢做呢樣做嗰樣。多出嚟嘅時間,你好應該好好發掘點樣去增值自己。

而心態上,你都冇再需要有乜嘢責任。去到呢一步,你同佢,都係有新開始。

以後佢嘅煩惱、挫敗、借題發揮、發脾氣……你都唔需要再浪費時間處理。你而家開始,只要好好經營好你自己就可以。

冇咗佢嘅日子,可能未必一定好,但係有佢嘅日子,亦都唔見得有幾好。既然係咁,不如擁抱自由。

離開一個咁細嘅選妃舞台,原來,世界好大。

放低左呢個人,世界仲有幾十億人。

而你終於有自由。

無法共渡一生,你卻學會點亮靈魂。


第二份禮物,係尊嚴。

相處嘅過程中,總會有啲時刻,令你覺得,你付出左好多,甚至太多。能夠懂得幾時停一停,諗一諗,再俾啲空間自己同對方,係好事。

人,始終都要有尊嚴咁生活,無止境付出同屈就,其實都係放棄左自己嘅尊嚴。

分開,一定要順便攞返尊嚴。

拍拖嘅過程中,有時我哋喪失咗理智,無止境咁付出,忘記咗自己係邊個。

好多拍拖中嘅人,會將自己嘅成就同伴侶嘅成就混為一談。對方做得好好,你當然要開心,但係你千祈唔好搞錯,你見到對方嘅優點、成就,其實唔係只有佢先可以有。你自己都可以有、應該有。

如果你覺得你同對方一齊,係因為佢夠靚、叻、瘦、心地善良、幽默、藝術觸覺、對人生有熱情,呢啲你全部都可以擁有,你嘅目標,就係學習點樣好似佢咁。而唔係將你自己投射左喺佢身上。

你被吸引嘅,其實未必係呢個人,而係呢個人嘅「特質」。而所有特質,你都可以通過學習,觀察,實驗,自己培養。

每一個人,都係值得尊重,包括你自己。你一定要對自己好啲,你自己搵返應有嘅尊嚴,咁樣先對得住,咁多年來對你充滿期望嘅父母、家人、朋友。

愛到要生要死,係情緒化又癡線。有尊嚴地離開,有勇氣咁向新生活邁進,探險,培養新嘅自信心,你會更加尊重你自己。人哋亦都會更加尊重你。


第三份禮物,係自愛。

法文有句迷人嘅話,叫做:Bien dans ta peau。就係愛上你自己!

包括咗,你熱愛同失戀時候。

好多人唔記得咗人生嘅重要道理,就係要學會肯定自己。拍拖嘅時候,你會由對方身上獲得呢類型嘅認同,但係冇拖拍,你就會突然覺得好失望,好空虛。因為再無人比到呢種感覺你。

依家再睇返,其實自我認同,自我感覺良好,呢啲咁重要嘅人生正能量,真係要自己俾自己。得閑,你要諗下自己做得啱咗乜嘢,為世界貢獻咗乜嘢。

你要記住,如果你要幸福,你第一個要愛上嘅人,應該係你自己。

如果只係得一個幸福嘅皇冠,你應該留俾你自己。

請記得,如果你連你自己都唔愛,又點可以奢望人地愛你?


第四份禮物,係寧靜平和嘅心境。

分開咗,其中一個最可貴嘅,就係平靜嘅心境。

拍拖嘅唔同階段,情緒都難免會有啲起伏。可能有啲時候,過分激情,傷心和憤怒,令你忘記咗一個人寧靜嘅幸福感覺。

當你逐漸遠離震央,你嘅心境亦都越來越平和。

由捲起無數雜物,破壞力強大嘅失控海嘯,漸漸變成見證幾百年歷史,京都金閣寺對出,被樹林包圍,平靜迷人嘅湖泊。

中國嘅傳統智慧裏面,亦有一個說話,叫做「靜水深流」。表面看似風平浪靜,其實蘊含左重大嘅力量,同埋智慧,深不可測。

呢一個學問亦都係一個好高嘅境界。

分手帶你去嘅,係地獄、人間、定天堂,其實取決於你嘅心。執念,令你變成怨靈,被困在絶望心境,而愛同智慧,令你見到天使、成為天使。

看似一段愛情安息,其實,係你生命需要嘅休息。

好似冬天過去,春天,就會自然純粹、明亮、新生命。

Give peace a chance。


第五份禮物,係「天涯何處無芳草」嘅處世戀愛智慧。

有時關係太過親密,會令你將所有嘅精神、時間、目光聚焦係一個人身上,有時眼光變得過分狹窄。令你太過將所有心機時間放係同一個人身上。

退一步嘅時候,就發覺原來海闊天空。原來好多人都可以比到同樣甚至更好嘅嘢你。冇需要為一件唔係咁值錢嘅嘢,過分緊張。

你一直苦苦追求嘅認同、關注、愛、甚至資源。原來,除咗呢一個人之外,世界上亦都有好多人,同樣可以俾到呢啲你。

你要記住,呢個世界係唔會缺乏人口,淨係香港,都有幾百萬人,只要你繼續搵,點都可以搵到三幾個相似甚至更加好嘅人。呢個世界冇一個人係不能取代,同樣地,你之前嗰個,都唔係不能取代。

由細到大,我學到最寶貴嘅一課,就係千祈唔好將自己嘅身心健康,全部押係同一注上面。

我唔係鼓勵你交友隨便,只不過,千祈唔好以為只有一個人可以供應到你所需要嘅所有野。只要只要你放開目光,就發覺原來呢個世界好多人都需要你,正在搵緊一個好似你咁嘅人。

你嘅工作,就係開放你嘅心,接觸唔同嘅人,順其自然,亦都令到佢哋更加容易搵到你。


第六份禮物,係重拾被歲月遺忘嘅夢想

因為分手而帶來嘅清醒,係生活一個開始而唔係總結。

隨着年齡增長,好多時小時候嘅夢想同埋幻想,我哋都唔記得咗。有時,我哋生活忙碌到,即使達成咗夢想,都冇乜興奮嘅感覺。因為一切實在太過繁忙,生活、工作、拍拖嘅壓力,令到我哋個心都麻木晒。

有時分開咗,反而多咗時間心機,去欣賞、投入、重新愛上以前嘅興趣,例如彈琴、畫畫、遠足、運動、玩IG、Pinterest甚至有啲人嘅興趣……係夜蒲、3P同集郵!

當然每個人嘅興趣都唔同,我鼓勵你用一啲比較健康正常嘅興趣啦。但係點樣都好,千祈唔好被歲月磨蝕左你嘅夢想!


第七份禮物,係友情。

失戀療癒之路,仲有朋友一齊行。

發生左呢啲小小嘅事件,令你更加發覺自己嘅幸運。原來身邊好多朋友,都願意係你需要嘅時候,扶持你。

人生經歷,就會豐富你嘅風采同氣質。

我今日送咗7份禮物俾你。所以:不要再哭了。

你要記住,人哋其實冇欠你任何野。你自己幻想有甜蜜嘅生活,你自己都有着數過。心裏面有戀愛嘅感覺,就好好,愛情,從來都唔係靠威脅。

分手,係個人成長的經歷。跌倒過,令你懂得真正站起來。

原來,喺你唔知道嘅時候,你嘅人生已經悄悄起飛,航行向充滿光芒嘅高海拔未來。

你嘅未來,無論一個人,兩個人,都可豐盛:

去山丘上睇一個感動日落。

去藝術建築體驗京都料理。

去峇里島按摩。

去杭州茶園,品味濃郁龍井。

去做一個深層海洋水美體療程。

你要仍然相信愛與奇蹟。

相信明天。

放低左眼淚同執着,你迎接嘅,係一個充滿奇蹟嘅未來。

【減肥】日台最愛零卡路里「減肥蒟蒻麵」,功效與香港購買方法

可能大家都聽過,日本台灣美人最流行嘅蒟蒻麵,係當地超級受歡迎嘅減肥食品,蒟蒻麵唔單止纖維高,無澱粉,又飽肚。佢食落好似一碗米線,但係卡路里竟然係……零!無錯,你冇聽錯,卡路里真係零!Zero!

所有要減肥人士注意:蒟蒻麵呢啲食物真係好神奇,食落似麵,但唔單止冇澱粉質,冇糖分,連卡路里都冇!

點解咁神奇?係因為佢係天然植物纖維組成。下面我會再詳細解釋。

呢啲咁好嘅減肥食物,梗係要推介俾香港嘅靚仔靚女啦!

台灣同日本,就好流行食零卡路里嘅蒟蒻麵減肥。唔知點解,喺香港買個蒟蒻麵都好難,好多居住香港嘅靚靚V面台灣仔台灣妹都會問:「香港蒟蒻麵哪裏買?」你唔係唯一一個,我就算係香港人,想買包蒟蒻麵,都要搵到天腳底!一啲網購又話冇貨,日式超級市場嘅門市有時又冇賣(要睇運氣),台灣代購又話唔會送來香港,香港代購又話要收一百幾十蚊郵寄費。

喺香港買蒟蒻麵,真係唔知點解會咁難搵!

仲記得曾幾何時,蒟蒻麵啱啱流行嘅時候,莎莎、卓悅,就有短暫出售過。作為美容教主嘅我,當然冇執輸即刻買返幾包食啦。蒟蒻麵,當時就擺響營養補充品counter出售,同一啲維他命丸、鯊魚丸一齊出手。當時蒟蒻麵一出,就好多靚人搶購,但係價錢都好貴,一包即食面成三十幾蚊 !我買咗五包,接近$200。由於佢嘅價錢差唔多係普通即食麵嘅5倍,只有一啲好注重外表同體重嘅港女同hehe先會買,一般家庭主婦、普通麻甩佬當然未必會食啦。而家,仲無埋。

但係,愛美同變瘦嘅決心,係絕對充滿鬥志!所以,我絕對唔會放棄!周圍發問,就發現原來喺香港買減肥蒟蒻麵,去citysuper就有啦!



(日本、台灣最流行嘅減肥食品蒟蒻,喺香港citysuper都有發售)



(台灣人日本人稱為減肥神器嘅蒟蒻麵,仲有分唔同嘅形狀同病態。但係都有一個共通點,就係冇澱粉質,無糖,冇脂肪,冇卡路里! )



(蒟蒻麵需要冷藏)

去買呢啲零卡路里減肥蒟蒻麵,價錢相當經濟,就算比較高級嘅超級市場,都係買十幾蚊一包。

我四圍研究打聽過,蒟蒻麵,原來,即係「芋絲」!喺香港,佢嘅名稱係「芋絲」。

所以各位唔需要搵得咁辛苦啦,香港買蒟蒻麵,去任何一間超級市場,向店員查詢「芋絲」,就可以。一般嘅百佳、惠康都有。通常嚮打邊爐材料嘅冷凍櫃。




究竟蒟蒻麵、芋絲係乜嘢?

由於佢係零卡路里,而且有食物纖維組成,又夠飽肚,蒟蒻麵很世界各地嘅減肥、瘦身、健康飲食圈子裏面,都好出名。佢嘅英文名,叫做Konjac noodle。

市面上見到嘅蒟蒻,其實都係有「蒟蒻芋」做成。但係佢唔係就咁左一個植物切絲咁簡單。呢種植物經過修割,磨粉,水煮,加入鈣,煮熟,就會變成你見到嘅蒟蒻。冇碳水化合物嘅原因,係因為佢嘅製作過程,會將碳水化合物移除。蒟蒻,其實就係水溶性纖維。當中不含糖分,不含油脂,不含碳水化合物,佢只係一啲纖維。呢種纖維,對於想排毒、增加蠕動嘅人,係會有幫助。

蒟蒻麵本身好似麵條一樣,都係冇乜味道,佢嘅質感同味道,有啲似「譚仔」嘅面線。都係好煙韌彈牙。

由於佢本身係冇乜味道,進食嘅時候就要特別注意,要加一啲味道比較濃嘅調味品,先至可以進食。如果你嘅目標係用佢一面係減肥,你就要注意,調味品嘅營養質素,以免可能個面本身就低卡,但係醬料超高卡,咁就無用。(例如拉麵湯底,由豬油造成,就超高卡路里,不適宜用作減肥)

如果想豐富口味,去買一啲新加坡叻沙湯底、日本醬油湯底、或者四川麻辣麵醬了,只要成份卡路里照過,都可以。全部citysuper都有出售。如果你想要方便,甚至用雞粉、或者出前一丁包調味粉,就可以。

蒟蒻麵本身係零卡路里,所以好適合作為減肥代餐之用。一星期代一兩餐左右,就最適宜。


點樣分辨致肥蒟蒻同減肥蒟蒻

要減肥嘅靚仔靚女都要留意,千祈唔好一見到「蒟蒻」兩個字,就雙眼即刻發光。以為一定可以幫到你減肥!蒟蒻,其實分幾種,只有一啲天然,無卡路里嘅蒟蒻,先至可以做到飽足感覺,而唔會增加卡路里負擔。好多時市面上出售嘅蒟蒻,其實都係加咗澱粉!有啲蒟蒻甜品,仲加埋糖漿同糖水!同減肥真係背道而馳。

要買到真正嘅減肥蒟蒻,你就要去香港超級市場嘅冷凍section,而唔係零食section。零食部位出售嘅,都係一啲多咗糖水同埋澱粉嘅加工食品,如果你想減肥瘦身,唔好掂。你要減肥,就一定要買真正嘅蒟蒻,真正嘅蒟蒻係需要用水浸住,亦都需要冷藏。

喺香港購買蒟蒻麵,一定要先自行檢查食物營養成分表。根據香港嘅法例,食物必須要清楚註明佢嘅成份,包括營養,熱量等等……所以,為免買錯左增加你體重嘅糖水垃圾蒟蒻,你就要檢查成份,要零卡路里先至買。

一啲專賣台灣貨品嘅超級市場,都有出售一隻台灣製造嘅蒟蒻麵,佢嘅特點,就係好似即食麵一樣,有埋醬汁,隨時都可以撈面。佢哋標榜嘅,就係卡路里大概100左右。呢隻蒟蒻麵喺香港部份小型士多、水貨食品店有出售。

呢一點大家就要注意,因為蒟蒻麵本身,應該係接近零卡路里。如果佢有100卡路里,好可能就係sauce本身非常之多糖分。過高嘅糖份,如果集中係醬汁,可能會削弱減肥嘅效果。

相反,如果同樣係100卡路里,但係卡路里嘅來源係來自蔬菜,豆腐,草菇等等,就健康得多。

我之後會教你點樣整一個,超級容易,又好味,有充滿營養,仲抗氧化嘅速成日本美人豆乳火鍋,會利用蒟蒻麵作為材料之一。


蒟蒻麵減肥嘅科學根據

好多人都話蒟蒻麵可以減肥,但係有冇科學根據先?

根據最新嘅科學研究,原來蒟蒻麵,的確可以幫助減肥。佢嘅原理,就係兩方面。第一方面,就係當你進食之後,其實係纖維質嘅蒟蒻麵,你嘅食慾會減少,你唔會咁容易大飲大食,食咗好多高卡路里嘅垃圾食物。

第二方面,就係幫助大腸蠕動,纖維本身亦會減少血糖嘅飄忽指數,糖尿病人都可以食。

日本,相比起其他亞洲國家例如印度、菲律賓、印尼、馬來西亞,佢嘅人的確係比較纖瘦,比較幼細。好少見到啲粗身大勢嘅人。

適量地進食蒟蒻麵嘅好處,就係幫助你身體腸胃嘅健康,因為佢會刺激腸胃蠕動,你第一次進食個入面嘅人士要注意,第一次,都係唔好食太多,因為佢係食物纖維,會有飽肚同埋少少塞嘅感覺。進食之後,就好似食咗大量嘅菜一樣(同樣係食物纖維)。


減肥蒟蒻麵美人鍋製作方法

今日就教大家整一個,超級容易,超級美顏,只需要15分鐘,無需任何烹飪經驗都可以成功做成嘅,日本豆乳美人鍋。

日本人好流行一種食法,就叫做豆乳美人鍋,用新鮮嘅海鮮、豆腐、蔬菜、豆乳,其實係日式火鍋嘅一種。呢個火鍋嘅特點,係食物都屬於低卡路里,而且清甜,海鮮同埋豆乳嘅鮮甜味,令到成個火鍋都好吸引。對於想改善皮膚質素,吸收蛋白質,進食蔬菜抗氧化,與及減輕體重嘅人士,就非常之有幫助。

日本美男美女皮膚好,身形纖瘦,就係因為識得揀呢啲蔬菜為主嘅火鍋,而唔係一大堆廉價肉類、油膩湯底、不明來歷嘅添加物……

我去日本餐廳嘅時候,如果有得揀,多數都會揀呢個火鍋。因為佢又飽肚,而食物嘅成份,都唔算係太過多油脂。所以,如果我明知道嗰餐要出街食日本野,朋友又鍾意大飲大食,叫埋好多什麼天婦羅、肥牛飯、炸物咖喱飯之類,我就會叫呢個火鍋。佢又飽肚,又相對低卡,仲可以食多啲蔬菜。

好多人都鍾意食,自己整,都原來唔係咁難。可以試吓用呢個方法,做出好味嘅減肥火鍋。

可能你都鍾意食火鍋,但係出邊街嘅廣東火鍋,成份真係好恐怖!包括左豬油、味精、唔知用咗幾多次嘅湯底……

日本火鍋,情況會好一啲,如果你要真係百分百乾淨,又可以減肥、美容、增加抗氧化成分,我就會建議你整呢個,用豆腐,豆奶,蒟蒻麵,西蘭花,鮮蝦,蟹柳,日本竹輪魚卷做成嘅,豆乳美人鍋。


(豆乳鍋製作非常簡單,所有材料都可以喺一般超級市場買到,如果你要求比較高好似我咁,就可以去citysuper購買日本火鍋專用嘅鏗魚粉,如果唔想咁麻煩,就可以用濃湯寶代替。)


(蒟蒻麵、芋絲開封之後嘅狀態,要注意,裏面會有水,水唔要,淨係要蒟蒻。如果你想佢呈現普通面嘅狀態,你就要將佢嘅結打開。如果一個人食半包就夠)


(蟹柳同埋竹輪,係選擇性,我通常都會加少少)


(蒟蒻麵本身已經煮熟,但係為咗豐富口感,令佢食上更似一碗麵,我就會首先加熱,確保有足夠時間煮食。同時一啲要多啲時間煮嘅材料,就可以先加)


(俾個小貼士你,西蘭花用水煮熟會要好耐時間,所以我會建議你先用微波爐,將西蘭花叮2分鐘,就變得好淋,再加入沸水煮,就好快達到理想效果)


(加入蝦、豆腐,煮大概幾分鐘)


(加入大概一杯半豆奶,就大功告成)

豆乳火鍋嘅好處,充滿蛋白質、纖維,而冇乜脂肪,亦都冇乜碳水化合物。配合蒟蒻麵,就做到飽肚又美顏瘦身嘅效果!


瘦身美體



【美容】瞬間提升幸福感!「日本之名湯」溫泉粉推薦,將溫泉養分帶回香港家!

日本京都嘅溫泉旅館,無論係單戀、失戀定熱戀,都有佢嘅風景。

可能係一個人失戀之後嘅療癒旅行,一個人搭火車,由市中心出發,到達郊外溫泉旅館。穿上和服浴衣,到充滿神奇生命力嘅熱水中泡天然溫泉,讓水嘅熱力蒸發你嘅眼淚同世間煩惱。定係幾個人嘅旅行,同閨蜜摯友喺和風旅館裏面分享心事,飲清酒講笑到凌晨;又或者同男神一齊赤裸相見浸溫泉,喺充滿禪意嘅秋天竹林之中手拖手漫步,然後喺塌塌米上共渡親密一夜,甜蜜又害羞嘅回憶,一世都難忘。(這是自費評論,沒有收到任何品牌贊助或折扣)

享受溫泉風呂,無論係一個人療癒之旅,兩個人親密之旅,定係一班朋友東洋文化探險之旅,都係一個好特別嘅回憶。

一直都以為,可以帶走回憶,但係溫泉,就冇辦法帶走。愛上溫泉嘅人,就只可以儲錢,下次再去。

隨着時代嘅進步,原來而家日本嘅溫泉,可以帶走,收藏,甚至長期享受!

我想介紹推薦嘅,就係最新嘅發現:「日本之名湯」溫泉粉。「日本之名湯」溫泉粉,係來自日本知名溫泉,有之名左廠出品,配合日本境內最著名嘅溫泉,將溫泉嘅精華濃縮成為粉末,令你係屋企都可以享受泡溫泉嘅樂趣。由於使用好方便,只要加入熱水,你嘅浴缸就可以變身溫泉,溫泉獨有嘅養分,可以幫助你放鬆身心,令到佢係屋企都可以享受到高級風呂溫泉。

而且佢好方便,無需逼旺季機票酒店同舟車勞頓嘅不便,喺香港放工返屋企,都可以享受到京都溫泉嘅樂趣。



(日本知名入浴劑生產商Bathclin,推出左一種媲美日本溫泉嘅產品,聲稱可以將屋企嘅自來水,都變成充滿養分嘅溫泉水! )


(「日本之名湯」入浴劑官網圖片,究竟佢係乜嘢嚟? )

你依家係屋企,都可以一邊浸溫泉,一邊飲清酒,將溫泉美好體驗長期化。




(Bathclin官方網站圖片)

有關溫泉的二三事

京都嘅溫泉風呂,有種懷念舊日時光嘅療癒系浪漫。溫泉風呂本身含有豐富礦物質,可以滋養身心。而泉水嘅熱力,可以幫助你將身體毒素通過汗水排出。長期使用可以幫助你美體。

嚴格來講,風呂同溫泉唔同,只要有熱水浸浴,都可以叫做風呂,但溫泉,要求就嚴格好多,就必須要有天然嘅泉水成份,火山或地熱將水加熱,先至可以叫做溫泉。而溫泉嘅成份一般包含礦物質。

如果仔細分類,溫泉可以分為三種,火山型溫泉,地熱型溫泉,同埋海水型溫泉。

喺日本,去溫泉係一件值得期待嘅事。溫泉旅館,除咗提供浴池、蒸氣桑拿、休息室、美容按摩、同埋充滿東方意境嘅庭園之外,亦都會提供膳食服務。一般會提供高質素嘅海鮮、鍋物、懷石料理等等。令到旅客浸溫泉放鬆之餘,可以享受美食。

去溫泉旅館,係一個重整你身體同心靈嘅感官體驗。

如果能夠用溫泉粉將嗰種溫泉旅館精緻嘅氣氛,帶返屋企,就能夠長時間幸福。

A perfumed bath and a scented massage every day is the way to good health - Hippocrates 

溫泉旅館的美好回憶

我近期喺香港行藥妝店嘅時候,就發現咗真正來自日本嘅「日本名湯溫泉粉」。呢啲溫泉浴鹽,係由Bathclin巴斯克林藥廠出品,將日本各地嘅溫泉科學化,製作成為入浴劑。無論係溫泉裏面嘅天然礦物質、顏色、氣味等等,都一一重現。

之前去旅遊,喺庭院中漫步,欣賞櫻花,美好又寧靜嘅回憶,返晒黎。

呢啲溫泉粉,係真係日本製造,而且製作嘅時候,仲好細心咁同唔同嘅觀光協會、溫泉協會合作,將日本各地著名嘅溫泉,用科學方法,將成份調配,不同成份都介紹出嚟。一盒已經有好多包,各有不同特色,可以讓你嘗試唔同嘅溫泉。

根據包裝介紹,產品其實包含咗日本著名溫泉嘅成份同配方:包括登別、鳴子、乳頭、那須塩原、濁河、奥飛騨新穂高、紀州龍神、嬉野、美作湯原、道後、十和田蔦、山代、黒川。

為求重現日本各地溫泉嘅質地、感受,都特別同不同地方嘅溫泉觀光協會合作,務求質感方面都符合。官方網頁介紹,呢隻產品分別同以下地方合作:

●登別観光協会様 ●蔦温泉旅館様 ●乳頭温泉組合様 ●鳴子温泉郷観光協会様 ●塩原温泉観光協会様 ●山代温泉観光協会様 ●濁河温泉管理組合様 ●奥飛騨温泉郷観光協会様 ●龍神温泉協会様 ●道後温泉旅館協同組合様 ●湯原町旅館協同組合様 ●嬉野温泉観光協会様 ●黒川温泉観光旅館協同組合様 ●十勝川温泉旅館協同組合様 ●野沢温泉野沢会様 ●熱海市観光協会連合会様



(我自己購買嘅溫泉粉,好令人期待)



(我就買咗兩種,一種叫做美人湯)



(每一班都代表左唔同地方嘅溫泉,一盒就有唔同嘅體驗,顏色、成份其實都有啲唔同)

可能你都知道,溫泉本身有天然礦物嘅味道,混合組山林之中嘅香氣,獨特嘅溫泉味道,證明咗佢真係來自大自然嘅水,而唔係自來水。

見到呢包來自日本嘅溫泉粉入浴劑,第一時間,就買包試吓啦!一試,就愛上了。


(溫泉粉倒出嚟之後嘅形態,只要加入浴缸,溫泉嘅養分、礦物質、同埋氣味就會融入普通嘅自來水)


體驗溫泉粉,感受健康養生

浸浴真係一個華麗嘅享受。加埋日本嘅溫泉粉,更加放鬆,有如去溫泉旅館一樣。

我將成包溫泉粉加入熱水之後,水嘅顏色就變咗淺綠色,好似森林的顏色。裏面有好多唔同嘅小包,每一包都代表唔同嘅地方溫泉,代表嘅顏色都唔同。有時係幸福感嘅櫻花粉紅色,有時係奶白色,有時係粉藍色。

唔好以為「日本之名湯」呢隻係普通沖涼液,佢唔係普通沖涼液咁簡單,佢喺日本屬於「醫藥外品」,即係有「藥用成份」嘅入浴劑。同香港唔同,喺日本,只有一啲有預防疾病成份,對健康有正面影響,比一般化妝護膚品更加接近醫藥藥物嘅產品,先至可以比評級為醫藥外品。

佢嘅成份包括左硫酸、碳酸水素、碳酸、鹽化K等等。

氣味方面,佢亦都加入左一啲香料,聞起上嚟,冇一啲硫磺溫泉刺激嘅氣味,佢又加左少少香木味香精,有種清新嘅樹林味。

我使用嘅感受,覺得好舒服。

浸喺熱水裏面,我覺得血液循環改善咗,而出汗都將身體嘅廢物排出。令我面色更加紅潤,有光澤。大大推薦!

喺水蒸氣當中休息,呢個時候,我嘅幸福感、元氣,亦都立即提升。再一次體驗令人身心回復嘅森林浴,令人忘卻了時間嘅存在。

就好似當年,秋天嘅天氣之下,你着住浴衣,喺溫泉月光石之下沉默許願。其實你一直都冇同佢講,你當年第三個願望,係同佢有關。而咁多年之後,竟然實現咗。

嗰日,許願之後,你地望著彼此眼睛,一句野都冇講,但可以感受到佢眼睛嘅愛。

幾年後,我買咗幾包溫泉粉,留俾我嘅好朋友同BF。大家都可以一齊再次體驗下,當時嗰個無盡溫馨又療癒嘅日本溫泉旅程。

有時幸福感,係可以自己經營同提升。即時喺屋企,都可以感受到雲淡風輕嘅歲月。

香港購買溫泉粉地點: Aeon及莎莎


【減肥】Yanhee減肥藥:效果、成份、副作用大揭秘(被禁內幕曝光)

之前掀起一片網購熱潮嘅減肥藥Yanhee,喺香港同埋台灣美容界造成一陣嘅騷動!唔少想減肥嘅人,一聽到呢款來自泰國嘅所謂神奇減肥藥嘅傳聞,都趨之若鶩。甚至好多人,會叫人代購Yanhee!尤其係大陸,好多網店都有出售。


Yanhee背景大踢爆

一個聰明人靚人,選擇減肥產品嘅時候,一定要信科學,仔細檢查佢嘅成份同埋科學根據。就算我去到一啲ifc、海港城、Elements嘅護膚品名店,我都一樣要檢查成份!而唔係信一啲不明來歷,有幾個貌似蛇精女揸住產品影相嘅嘅網店,P圖疑似美女部落格、ig美容黑店。我一直都講,你唔信科學、醫學同營養學,就無資格做一個靚人!

首先講下啲Yanhee減肥藥嘅源頭。

呢隻Yanhee減肥藥係來自泰國嘅曼谷,一間叫做Yanhee Medical Clinic嘅醫學美容診所。

呢間醫院主要幫助顧客做一啲醫學美容、整容、減肥、甚至變性嘅手術。係佢嘅官方網頁裏面,分別講解左佢提供嘅服務,包括抽脂、隆鼻、隆胸、變性手術服務。同時亦都有一啲醫院會提供嘅服務,包括醫治糖尿病、癌症等等。

(位於中環,瑞士年輕管理中心Swiss Reju已經搶先提供單次減肥優惠,高科技醫美儀器幫你定點爆脂、溶脂,脂肪冇得留低!免費了解優先預約whatsapp按這裏:https://bit.ly/2EdcPRJ

嚴格來講,Yanhee Medical Clinic唔知可唔可以算係一間正統嘅醫院,更加似一間醫學美容中心。我去咗官網到睇,亦都睇咗其他代購人士、網店人士發放嘅照片。當地嘅醫院情況真係有點簡陋,就咁睇落去唔覺得係一間好有規模、好乾淨嘅醫學美容中心,絕對唔可以同香港嘅醫學美容中心比較。雖然每個地方嘅發展唔同,我只可以講,有得揀我係絕對唔會喺Yanhee Medical Clinic呢度睇醫生。

呢間Yanhee Medical Clinic診所嘅官方網頁唔太專業。呢個個人認為比較騎呢嘅地方,就係傳說中減肥神藥Yanhee嘅來源地。你市面上見到嘅,就係經過泰國代購,或者係假貨。

好多大陸嘅Yanhee代購,都會扮鬼扮馬咁叫你填一張form,再叫醫生依據你嘅身體狀況開藥,但其實搞咁多都係扮野,你估網店東主會唔會咁好心,真係每張單就係醫院行一轉?

咁你又有冇諗過,如果真係咁正咁好用嘅嘢,點解係香港只可以偷偷摩摩咁出售?只可以喺格仔店、網店出售,反而一啲大型嘅藥房,就買唔到?

對於一啲經常係大陸網上傳來,香港網店標榜什麼日韓熱賣嘅產品,好似之前嘅美容神器乜乜物物一樣,我係非常之懷疑!因為網售美容劣品係一個好大嘅行業,目的就係製造網上輿論,呃大家嘅錢!

其實好多人個心都知道Yanhee減肥藥有啲蠱惑,但係因為好想瘦,明知硬係有啲嘢,都不惜搏一搏。唔太清楚係咩黎,但係見到咁多人都話有效,就照去馬!


(傳說中嘅減肥神藥Yanhee,但係會詳細解釋比你聽其實佢係乜嘢,點解要禁止,圖片來源:香港政府)



(網上圖片)


傳聞中Yanhee減肥嘅功用

雖然外表騎呢,但係Yanhee能夠短時間網上爆紅,一定有佢嘅人。其中一個傳說中嘅功效,就係能夠快速減肥。有啲網店仲話,一個月可以減10公斤!

食咗啲Yanhee藥,你會好口渴,冇乜食慾,最誇張嘅人,可以幾日唔食嘢!

無需運動,無需計算卡路里,都可以極速減肥,對於好多人來講,都係好吸引!

Yanhee佢之所以可以達到所謂嘅減肥效果,係因為佢包含咗一啲西藥

但我要講個震撼我話俾你知,出售嘅其實系一種損害你身體嘅禁藥「西布曲明」,Yanhee嘅主要成份,其實已經比世界各地淘汰,連一啲落後國家都已經禁止。

「西布曲明」Sibutramine以前曾經被利用作為減肥嘅人物,但因為副作用原來會影響到心血管,甚至生命,係2010年開始,世界各地就已經將呢個產品下架。

你所謂減得越快,對你嘅身體創傷越大!

你博,其實係攞嚟條命去博。


Yanhee恐怖真相:奪命副作用

呢啲Yanhee減肥藥,講出嚟真係嚇死人,因為呢種藥,喺香港同埋世界各地已經被禁止生產同出售!

好多經過網店、大陸淘寶購買Yanhee嘅人士,食完Yanhee之後都發覺,現好似有啲唔妥喎,點解食欲會冇晒,之後一般嘅網友都會評論,面色變差、出汗、抑鬱、精神恍惚……

好多美容減肥blogger都冇細心檢查點解會出現呢啲咁嘅症狀,以為只係減低食慾嘅正常反應。尤其是,有啲人真係信網店所講,Yanhee係草本配方!喂西藥嚟架。

其實,佢係令到你嘅精神受損。

Yanhee嘅主要成份西布曲明Sibutramine,連喺大陸都過唔到當地嘅衛生監管指標,被評為不准出售。好多內地嘅醫院、減肥中心已經嫌棄呢種過時嘅藥物!

當然,如果連大陸都過唔到,歐洲、美國、澳洲、日本呢啲喺衛生監管方面比較先進發達嘅國家,都一律過唔到!事實亦都係一樣,其他國家已經將呢種產品下架。

好多網店、黑心商人會話俾你知,Yanhee係冇副作用,絕對安全。如果下次仲有人同你講呢樣野,你就不如問返佢,你係咪有一啲好叻嘅醫學學位,仲叻過醫管局,專家都話Sibutramine有,你竟然話冇。

根據最新嘅維基百科,Sibutramine可以造成以下嘅後果:「過度興奮、迷失、傷心,激動極少數甚至會出現自殺念頭」

你今日買到嘅Yanhee,就係人哋唔要嘅。你真係人棄我取!


做個聰明靚人,不明來歷嘅減肥藥,out!

講咗咁耐,如果你仍然想買Yanhee,對唔住,我真係要好直接咁同你講,你呢世都唔值得變靚變瘦。Yanhee呢啲根本係對身體有害嘅物品。

而且仲唔計市面上好多Yanhee,根本係假貨!如果淨係西布曲明,食咗真係有啲乜嘢事,要去醫院,起碼你都知道要同個醫生講乜嘢。你喺市面上買嘅,根本係乜嘢都唔知!去醫院都唔會知道應該點樣處理。

有時我都忍唔住要講,就係因為你地咁蠢,先至要食Yanhee。你睇吓荷里活啲明星、名媛、社會名人、設計師,有邊個會食Yanhee來減肥?人哋用營養師同私人運動教練架嘛!

如果你真係搞唔掂自己嘅體重,你可以問你嘅家庭醫生,問下佢可唔可以入比到一啲建議你,又或者你自己適唔適合用一啲香港衛生署認可嘅減肥藥Xenical。


比藥物更健康:減低食慾嘅方法

講到減肥藥,好多人都以為冇咗佢就唔得。

好多肥胖人士唔知道點樣可以減低食慾,就諗住借助藥物。但我依家就話俾你知,減低食慾嘅方法,係利用「纖維」、「蛋白質」。

好多人話減唔到肥,控制唔到嘅食慾,忍唔到口,無錯呢啲的確係真實嘅情況。但係忍唔到口嘅原因,係因為你食咗好多碳水化合物(醣類)嘅食物,即係白飯、麵包、腸粉、甜點等等……呢種食物會導致血糖忽高忽低,同埋好容易肚餓!

纖維,同埋蛋白質,即係好似蔬菜、蛋白、肉類,唔單止飽肚,亦都更加穩定你嘅血糖,冇左個飢餓感覺。

對自己好啲,就要搵一啲一線名人、明星會用嘅方法,就係通過食物同埋營養學,加上帶氧同重力訓練運動。





減肥瘦身







Counter

Flickr Images