【香薰】平價好用夢幻香薰推薦:Jurlique Rose Body Oil、Gulsha玫瑰水、 L'Occitane Arlesienne香薰蠟燭

9月 09, 2016

有時,我真係覺得自己好幸福,作為一個經常蒐集美容用品、香薰、儀器、面膜嘅愛美人士,我嘅美容、美髮、按摩、香薰collection,已經達到專業級,甚至比市面上一般美容院更加高級齊全!即使喺屋企,都可以隨時隨地享受得到高級Spa嘅洗浴用品、香薰蠟燭、按摩機、音樂、同埋專業級美容儀器。

隨着天氣漸漸變得清涼,又係享受香薰蠟燭嘅時間啦!為咗幫大家做下研究,我就特別去到唔同嘅地方,試用咗唔同嘅秋冬系列香薰美容舒緩產品,今日就特別推介俾大家,幾樣我去retail store試用過覺得唔錯,並已經自費購入嘅秋冬香薰產品,每樣價錢都唔貴,都係幾百蚊左右,又抵用又好用,超級推薦!包括:

Jurlique Rose body oil (Jurlique玫瑰按摩油)
L'Occitane Arlesienne candle 
Gulsha玫瑰水

當天氣變得慢慢寒冷嘅時候,我就特別鍾意用呢隻來自L'Occitane嘅Arlesienne香薰蠟燭,幽微點光營造一室温暖芬芳。配合歐洲浴鹽熱水浴,抹淨後噴灑少許Gulsha玫瑰水,作為平靜身心之用。瞓覺之前,再用含有天然玫瑰精華嘅Jurlique Rose Body Oil按摩油按摩肩頸身體。每一晚,我都喺濃郁芬芳嘅花香中安靜沉睡。

今年秋天,一齊試試最夢幻又華麗嘅入眠體驗!


左:L'Occitane Arlesienne香薰蠟燭,價錢$290
中:Jurlique Rose body oil玫瑰按摩身體油,價錢$550 ,水貨店大概$350
右:Gulsha玫瑰水,大概$200)


(今期我嘅最愛,L'Occitane Arlesienne香薰蠟燭,將法國式華麗芬芳香味帶回家)


(Gulsha玫瑰水同Jurlique Rose body oil玫瑰按摩身體油,適合睡覺前使用,體驗浪漫愛情睡眠)

高質素嘅香薰治療級精油,可以提高幸福感覺,改善睡眠,放鬆你心情。aromatherapy對於改善神經緊張、平復情緒,療效作用真係神秘又神奇。當天氣開始乾燥嘅時候,就最適合使用一啲使用由高質素精油製作嘅嘅超高質massage oil、body oil,按摩頸、面、手上面,返屋企沖完涼,優雅咁使用唔同嘅香薰產品,都好似去返六星級酒店Spa一樣咁舒服。

其實天然香薰同香水,係充滿歷史同埋藝術意義。例如中東地區盛產嘅玫瑰水,就非常收到歐洲貴族歡迎,喺俄羅斯嘅貴族時代、法國嘅皇室都會大量使用。香薰係西方歷史文化嘅一個重要部份。

香薰嘅歷史源遠流長。所以,外國高級嘅富豪級郵輪、六星級酒店、名媛美容中心,都會使用高質素嘅天然香薰。高質素嘅植物精油香薰,可以有帶來良好放鬆效果,包括舒緩身心。有時能夠將嗰啲香薰產品買返屋企,就可以常常都回憶起當時嘅優質療程。

秋天嘅季節,特別適合使用香薰油!無論係body oil,定係massage oil,lotion,都好適合用滋潤性質嘅香薰精油產品。

舒緩、慢活、深層休息、回復元氣嘅感覺,真係好享受。無論工作幾忙,只要有時間返屋企瞓覺之前,好好享受半個鐘呢幾種產品,你嘅身心狀態,都會得到好大嘅回復。


Jurlique RoseBody Oil:來自南半球純淨天空下嘅優雅秘密

有時細節,就決定一個人究竟係普通人,定係超高質美人。有啲人比較粗枝大葉,對於乜嘢嘢都無乜所謂;但係有啲人對生活嘅藝術追求、歷史知識、美感、都會有更精細更高級嘅要求。而使用body oil,就係其中一個生活小節,係好多美人嘅優雅秘密。

來自澳洲嘅Jurlique ,產品來自南半球純淨天然農莊。Jurlique Rose Body Oil係天然玫瑰精油,成份珍貴。

Jurlique呢個牌子嘅香薰產品質素好高,無論係facial定係復方精油,都係物有所值。我一向都好鍾意!呢一隻Jurlique 玫瑰身體按摩油,就係代表作。

(Jurlique Rose Body Oil官網圖片)



(Jurlique喺澳洲有自己嘅農莊,出產玫瑰花產品同護膚品,我之前都買過,發現水準真係好高,而價錢都唔算貴,係一定會回購。官網圖片)

由於香港係屬於亞熱帶天氣,濕度普遍偏高,所以body oil並唔係必需品,而係奢侈品。多數係某啲季節,例如秋天到冬天,就會比較適合使用。

一支好嘅body oil,對於改善你嘅皮膚狀態、甚至心情,都有神奇嘅作用。尤其係由澳洲製造。

呢支Jurlique Rose Body Oil產品我真係大大推薦,因為價錢唔貴之餘,非常之耐用,而且成份全天然,並無使用任何人做香薰,全部係天然嘅植物精油精華,氣味非常之濃郁芬芳,除咗天然玫瑰花瓣、仲有少量薰衣草、迷迭香嘅氣息,複方精油成分配合渾然天成,非常浪漫舒緩。通常我會將少量嘅精華油滴喺頸同埋按摩喺耳邊,嗰種獨特有芬芳嘅氣味,令人有種幻覺,以為身在玫瑰花海之中,喺月光下祼睡。

喺好多民族文化中,玫瑰精油有戀愛催情嘅作用,玫瑰有種情色禁忌之香味。而呢支玫瑰精油,的確有釋放大膽思想嘅作用。

我咁鍾意Jurlique玫瑰油嘅原因,除咗香味獨特之外,佢更加有一種滋養皮膚嘅作用。Jurlique Rose Body Oil其實係多用途,除咗可以用喺頸、手、胸部、身體之外,亦都可以好似印度嘅自然療法Ayurveda一樣,使用少量係額頭上邊按摩,一支油,同時包含Aromatherapy香薰療法、印度Ayurveda古方療法、護膚、改善睡眠等等作用。Loccitane玫瑰油,真係幾抵用又好用。


Gulsha玫瑰水:土耳其玫瑰花瓣療癒之旅

沖涼後噴灑玫瑰花水,在溫暖熱水蒸氣中出來,感受玫瑰露水嘅冰涼,真係幸福又華貴!

講開最具身心療癒功效的美容水,識揀,就一定揀大馬士革damascan rose全天然玫瑰水!玫瑰水作用好多,從古代以來已經係愛美人士奢華享受之一。歷史以前貴族上層,會用玫瑰水蒸面,吸收香薰入面嘅植物精華,美容之餘又可以感受當中浪漫寵愛的氣息。今次想介紹下Gulsha玫瑰水。

每枝Gulsha玫瑰水,都用1000花瓣造成,極為珍貴!





玫瑰水是來自天然嘅禮物,而且真正由天然玫瑰花蒸餾而成嘅玫瑰水,價錢都不算太貴,功效又廣泛,只要有少少時間同心思,運用玫瑰水美容、浸浴、瞓覺前輕輕按摩,一般人都可以喺屋企享受獨特嘅天然玫瑰體驗。

玫瑰水本身在中東國家是非常之流行嘅美容用品,例如波斯,摩洛哥,印度,土耳其等等地方,玫瑰水都經常被當地人用作沖涼,美容,護膚,香薰治療的作用。

用過真正天然玫瑰水美容、美髮同沖涼,就唔會再想用市面上充滿人造香味旳所謂「玫瑰hand cream」、「玫瑰沖涼油」等廉價產品。聞慣真正玫瑰味,就會被濃郁獨特天然氣味吸引,而廉價嘅仿製品,或者用人工香料混合而成嘅產品,就立即相形見絀。

玫瑰水有種天然植物嘅香味,但係對於追求實際美容效果嘅用家來講,究竟有冇美容嘅效用呢?呢個問題好多人都好想知。

其實,玫瑰水本身有保濕作用。同一般嘅活泉水噴霧唔同,佢唔會令你嘅皮膚越噴越乾。之前都有個研究發現,玫瑰水比自來水保濕,而一啲好似Avene之類嘅噴霧,會有越用越乾嘅問題,因為隨着面部嘅水珠被空氣抽乾,就會連你面上僅有嘅水份都祋抽乾,令你塊面越來越敏感!玫瑰水本身嘅成份,就冇呢個問題。

香港人對於來自土耳其的美容產品,都有一點點嘅陌生。因為一般香港人買的美容和身體護理產品,多數都來自韓國、日本、美國、泰國等等地方。土耳其,非常少見。土耳其本身乃一個基督教和回教並存的獨特國家,同時包含歐洲與中東的思想和生活習慣,土耳其地方本身已經相當傳奇同充滿神秘感。

過去數百年歷史,土耳其在宗教同東西方文化嘅全交流,都有好重要角色。玫瑰水,亦帶有歷史承認傳的地位。

其實土耳其出產的美容產品,我都真係唔係好認識。但係講到土耳其玫瑰水,又或者用玫瑰提煉、蒸餾、收集玫瑰花花瓣製造而成的土耳其美容產品,我就很有信心。因為土耳其本身是非常著名出產玫瑰花嘅國家,而且使用玫瑰花水來美容、美髮傳統,已經係源遠流長,就好似韓國整容,法國時裝一樣,是該國家專門技術之一,所以我有信心。

講返Gulsha呢個牌子,佢真係來自土耳其,係當地人會購買同使用嘅品牌之一,代表性高,就好似日本嘅資生堂一樣。Gulsha係香港最多零售點嘅玫瑰水之一。Gulsha呢個品牌係莎莎主打嘅品牌之一,每間莎莎分店都放喺非常當眼處,主力推銷嘅位置。Gulsha除咗玫瑰水之外,亦都有玫瑰油同埋玫瑰卸妝粉。

每晚瞓覺之前噴一啲天然玫瑰水,深呼吸,吸入充滿歷史色彩嘅中東歐洲氣息。成個人,都準備好進入魅惑夢景。


L'Occitane Arlesienne香薰蠟燭:夢境中的法國農莊

香薰,係氣味嘅甜品,能夠帶來幸福感,一點氣味甜品,幫助對抗冬天抑鬱。

每一次去到灣仔星街L'Occitane spa,都會有流連忘返嘅感覺,最主要原因,就係因為佢點咗醉人嘅香薰蠟燭,香薰蠟燭嗰種令人安心、放鬆嘅特質,令到好多顧客都比佢溫暖平淡嘅小小光芒吸引,身心得到平靜。

L'Occitane呢隻品牌推出嘅Arlesienne香薰蠟燭,就標榜靈感源自法國南部嘅小城Arles。當中色彩鮮艷、豐富、深刻嘅顏色同埋對比,就係呢個城市嘅特點。而Ariesienne香薰系列產品,都會呈現呢個特點。

而且,佢係真正法國製造。

一見到下面個包裝,我已經即刻愛上!粉紅色同金色,真係一個絕配。

L'Occitane呢個品牌系列嘅廣告真係值得大大讚佢!佢真係能夠表現左法國Arles當地嘅鮮艷夢幻色彩。

Loccitane Arlesienne Candke除咗個外表包裝真係好吸引之外,佢嘅氣味亦都好獨特,令人立即就愛上!

呢個外表似法國紅酒冰糖梨嘅香薰蠟燭,味道都吸引。



(Loccitane廣告)

對於loccitane Arlesienne香薰蠟燭嘅獨特氣味,真係好難形容。

我上網站,就發現原來佢嘅香氣調配分別係玫瑰、紫羅蘭、同埋藏紅花。

一個咁特別嘅組合,就彷彿好似一個黃昏,別人屋企後院裏盛開嘅香草。豐富奇幻、花團錦簇之餘又芬芳。

所以,呢幾種產品,就變成我嘅睡眠最愛。

對於一個未了解香薰嘅人來講,很難會想像點解啲香薰控會咁着迷。

其實,現代人工作時間長,可能睡眠不足,又或者日積月累嘅工作壓力導致睡眠質素差,經常失眠或者容易醒。所以係僅有嘅睡眠時間裏面,所有嘢都要盡善盡美,包括溫度、濕度、燈光、音樂、氣味等等……先至可以平衡緊張嘅身體。令到睡眠,成為你嘅真正休息時間。

而香薰,就可以點燃浪漫、舒緩心靈與釋放幻想。

無論係香薰蠟燭、定係玫瑰水、定係天然植物復方精油,佢嘅作用,都係幫助將所有嘅煩惱、憂慮、緊張、全部都隔絕房門之內。睡房入面,係安靜、寧神、休息、保護、希望、與及一夜甜睡。

希望,你每晩都可以有香味相伴,幸福地沉睡去,喺睡眠當中得到休息同充電。

0 意見

Counter

Flickr Images