香薰蠟燭嘅功效同好處
香薰蠟燭雖然唔可以用嚟做香薰治療（下面會詳細解釋）但亦有唔少嘅好處。第一，就係可以喺天氣寒冷嘅時候帶來一點點嘅溫暖，唔需要一定買暖爐，着羽絨咁大陣仗。只需要點一個小小嘅香薰蠟燭，房間就會一室華麗花香，而且溫度都冇咁涷，係寒冷嘅冬天就相當好用。第二，就係助眠嘅作用。香薰蠟燭本身會點燃新鮮空氣，變成二氧化碳，對於一啲精神過分活躍又訓唔到覺嘅人，喺暖和舒緩嘅情況下，有催眠嘅作用，係用易啲瞓覺。
香港香薰蠟燭推薦：Bath and Body Works Candles Hong Kong （包括點樣香港購買）
其實喺香港買好用嘅香薰蠟燭，話難唔難，話易唔易，好多人只係識得去IFC、Lane Crawford、 Harvey Nichols或香薰專門店裏面，呢啲地方係有好多世界各地頂尖一線品牌嘅香薰蠟燭例如Jo Malone、 diptyque，但係佢哋賣嘅香薰蠟燭都超過500蚊起跳。其實如果你識買嘅話，就可以搵到好多好多選擇。
我之前特別介紹咗Jo Malone以外，7種較為正常價錢嘅香港香薰蠟燭選擇。今日我就想特別推薦我經常買嘅BBW。
Bath and Body Works (BBW)係美國非常著名嘅個人護理品牌，佢嘅香薰蠟燭選擇係多到你唔信。BBW嘅香味相當持久，而且香水師製作嘅時候，佢嘅香味都充分反映左唔同嘅環境、材料、想像同氣氛，有時係Island Waters, Love and Sunshine, Moonlight Path，Island Margaritas，Cozy Cabin，Winter Sun等等。總之香氣味道繁多，有啲係形容節日，有啲係形容某些外國地方嘅旅遊記憶，有啲係形容甜品。Bath and Body Works Candles最犀利嘅係，佢能夠用一個非常貼切嘅名字形容抽象嘅香味，而且發現佢嘅命名好貼切恰當！
Bath and Body Works係價錢抵用而且好用嘅香薰牌子，一個大size嘅3 wick candle三頭香薰蠟燭，官網賣$22美元，運到來香港都只係大概港幣＄200左右。而且可以用好耐，起碼兩個月，對於鍾意每晚都點香薰嘅人嚟講，呢個會係非常好用嘅選擇。
BBW最大嘅好處係，可以選擇嘅品種真係好多！而且唔只係玫瑰、薰衣草呢啲簡單嘅香味，佢有好多經過調香師特別設計嘅品種，係獨家製造，出邊根本買唔到質素相近而價錢都係咁抵用嘅香薰蠟燭。
暫時Bath and Body Works喺香港係冇獨家官方代理，我知道佢喺澳門、新加坡都有官方專門店，所以好多香港人就唯有靠買水貨，格仔鋪，網店等等交收。好多時網店入貨都一件起兩件止，一般系列都唔齊，而且如果網店係純網上交易，無實體店，就只能夠靠想像同名字了解蠟燭嘅香味，始終爭小小。
而喺旺角百寶利商業中心、好景、旺角中心、銅鑼灣廣場等等地方，都有水貨嘅Bath and Body Works香薰蠟燭賣，就算搵到黎香港價錢都唔貴，都係＄200內，個好處係隨時都可以聞下香味。
Nest香薰蠟燭@Lane Crawford
呢個品牌嘅蠟燭就會比較貴少少，但係香薰嘅味道就相當之獨特，完全可以了解點解佢可以賣呢個價錢。
Cochine香薰蠟燭@Lane Crawford
Cochine呢個品牌嘅宣傳相當之揼本，而且整個廣告係喺越南西貢拍攝，其中用咗好多法國殖民地佈置、古蹟、標榜嘅就係西貢越南嘅異國風情。香薰蠟燭本身用左好多靑檸，香草為主嘅香味，淨係睇廣告都感到非常之賞心悅目！不過，真係用過啲產品就發覺真係非常之中伏。香味本身真係麻麻，普通平價料，冇乜特別，唔知點解價錢會咁貴！
潮流家庭用品店Zara Home、LOG ON、Franc Franc
Zara home、Log on、Franc Franc都有香薰蠟燭賣。對於有興趣試用香薰蠟燭（入門買手）嘅人，Franc Franc平平地嘅香薰蠟燭都算係一個唔錯嘅選擇，但你要睇清楚，一般來講Franc Franc係賣返自家品牌OEM嘅產品，雖然佢嘅包裝好唔同，好似賣緊好多嘅牌子，有啲亦都唔會寫上零售店嘅名字，但係你仔細留意產品本身，就會發現其實好多係Franc Franc自家代工產品。對於香薰蠟燭有研究嘅人都會知道呢個產品嘅成本其實真係好低，只係一啲廉價嘅香精、工業香料做成，值唔值得呢個價錢就真係見仁見智。
當然Franc Franc佢亦都有一啲比較出名嘅外國牌子例如Voluspa，如果真係要買，我就會建議你買呢種。
淘寶買香薰蠟燭！？咪制！
好多香港玩開香薰蠟燭嘅人，都會心思思上淘寶買。呢呢個方法我就唔建議，因為以下幾點。第一，香薰蠟燭嘅成份，一般來講都有規定，以防是有害嘅致癌物質，對人體造成健康嘅威脅。大陸有冇執行，就好難講，所以我自己係絕對唔會買大陸做，無牌子嘅山寨香薰蠟燭。
而且根據中國法例，香薰蠟燭係危險品，淘寶網店都未必會直接送來香港，都會要求你用集運，用灰色渠道運來香港等等，送貨嘅成本同埋時間又會增加。
係淘寶上面亦都有一啲疑似係名牌嘅香薰蠟燭，價錢大概係專賣店嘅七八成左右。有啲相片都非常之粗糙，令我真係懷疑佢會唔會又係山寨A貨。我係絕對唔會相信任何係淘寶上面係Jo Malone同Diptyque嘅產品。
外國高級百貨公司官網訂購
另一個選擇，就係直接玩最貴嘅香薰蠟燭。好多香港人焗住買兩三個牌子好似jo Malone，但係其實外國香薰市場相當成熟，基本上無論係美國、法國都有好多好多海量嘅選擇。如果係諗住送禮，就真係冇必要送Jo Malone，因為真係好鍾意香薰嘅人其實未必會欣賞咁簡單嘅大路選擇。所以你可以考慮網購由紐約百貨公司Saks、Bergdorf Goodman、Nordstrom，佢都有好多香薰蠟燭可以送來香港。
貴價香薰蠟燭會用全天然物料？
好多對於香薰、香水認識唔係好多嘅香港人，就好容易比一啲推銷員誤導，好多人以為，高級昂貴嘅香薰蠟燭就會使用全天然嘅材料，一啲平嘅香薰蠟燭就會用人工材料。呢個諗法係大錯特錯！如果只係用植物精油，製造出來嘅香薰蠟燭根本不能夠亦唔會有濃烈嘅香味！呢個係事實，所以所有有濃烈香味嘅香薰蠟燭都係經過人工香料嘅調製！同香水一樣，通常最芬芳又富有層次感，清新香味嘅香水係包含咗天然材料與及人工香精，純天然材料可以組合成嘅香味其實真係唔多。所以可以好肯定咁話俾你知，好多人以為買Jo Malone、Laura Ashley就係用全天然材料，呢個係大錯特錯。好多時以為用貴價香薰就好啲，純粹係心理作用。
香薰蠟燭嘅安全考慮
喺外國，香薰蠟燭嘅安全性都會有安全條例嘅保障，所以我會建議你盡量去買一啲外國嘅產品，一般來講中伏嘅機會都會比大陸產品低。
點香薰嘅時間其實唔需要多，每日只會點二十分鐘其實都相當足夠。如果超過一個鐘，香薰蠟燭可能會燃燒左好多房間裏面嘅新鮮空氣，導致二氧化碳過多，所以使用香薰蠟燭都係適可而止。
