重要的事情說在前面！由「我的少女時代」導演陳玉珊執導，授權故事藍本來自經典「惡作劇之吻」嘅「一吻定情」好好睇！好笑、喜劇感重、感動，比預期好好多。如果你同我一樣，之前上網見到好多有關「一吻定情」電影評論，令到你心大心細，我會建議你同我一樣，自己買張飛，然之後享受久違了嘅120分鐘青春、美好、同感動！
唔好理網上嗰啲未睇過就話唔好睇嘅商業打手haters、或者大陸院線潛規則，專門收費差評對手嘅影評，可以話俾你知，以一個正常香港人、台灣人、內地人嘅角度，「一吻定情」電影，真係好好睇！遠遠超越期望！
「一吻定情」電影香港觀眾會唔會鍾意？
之前好似見到好多「一吻定情」電影廣告，尤其是有幾張出色嘅廣告，令到香港觀眾對於呢部電影嘅好奇心同埋好感度上升。
而且，佢係由「我的少女時代」導演陳玉珊執導，同埋同樣係「我的少女時代」嘅主角王大陸領銜主演。再加上係經典故事改編，相信好多少女或中女觀眾都有一定嘅期望！
其實我自己都有考慮過，「一吻定情」電影香港觀眾會唔會適合睇，因為好多拍得好好嘅「中港」、「中台」、「合拍」電影，其實係香港都唔會太受歡迎。
始終，兩地文化不同，笑點、感動位都唔同，成長經歷亦都不一樣，未必一定有共鳴。
當然，只有極少數能拍出跨越地域文化差異，能夠畫龍點睛咁樣拍出少年、少女時代嘅希望同失望嘅電影，先至可以稱為經典，流芳百世。
「一吻定情」電影，其實做到這一點。
「一吻定情」由「我的少女時代」爆紅嘅王大陸擔任男主角，扮演天才高冷學霸江直樹，再由內地女演員林允，飾演女主角湘琴。
好多香港觀眾其實擔心，王大陸嘅選角，未必適合扮演天才高冷學術精英嘅江直樹。
王大陸成名作「我的少女時代」，扮演嘅角色係帥氣、熱血、爆肌小混混「徐太宇」，MK男神角色扮演入型入格，基本上見到佢，已經同「徐太宇」混和一體。
「一吻定情」男主角江直樹，係氣質樣貌完全唔同嘅另一個人，性格冷漠、自私、斯文帥氣，同之前徐太宇角色完全相反。
其實好多香港觀眾，睇認識王大陸，都係由電影「我的少女時代」開始。對於佢嘅認識，亦都好被呢個角色所限制。
香港觀眾見到王大陸扮演江直樹，都會有一種「吓！」嘅疑問。
再加上電影係中國內地投資，女主角亦係內地人，令到給唔少香港觀眾懷疑，會唔會適合香港人睇。
抱住對於兩部經典「惡作劇之吻」、「我的少女時代」嘅致敬心態，我就自己買飛入場去睇。
由於時間緊迫，平時去開，比較光鮮乾淨嘅電影院已經冇晒飛！唯一仲有空位，就係旺角百老匯，即係嗰間位於旺角西洋菜街，又舊又多人，又擠迫又MK嘅陳年電影院！
喺冇選擇嘅情況之下，唯有焗住去旺角百老匯！
旺角，可能係好多人少年時代、少女時代嘅蒲點，當然大家長大，亦都會不斷upgrade，脫離嗰個生活模式與及階層！今次因緣際會，重返旺角，回顧少年時代，真係特別應景！
「一吻定情」男主角選角王大陸扮演江直樹，有冇問題？
到達旺角百老匯之後，發現多年冇見，觀眾層面仍然是那麼MK ！
一路排隊入場，一路睇手機有關「一吻定情」電影嘅影評，順便瀏覽香港觀眾、台灣觀眾、大陸觀眾嘅評論。
一路睇，就發現咗好多香港觀眾對於男主角竟然搵王大陸扮演嘅討論。
老實講，我開頭你香港街頭見到「一吻定情」電影海報，都會好奇，唔知道其實王大陸會唔會能夠勝任，扮演一個自私高冷學霸嘅角色，因為佢個樣，加埋之前電影演出，實在太熱血！
網上好多質疑嘅聲音，有1秒鐘，其實我諗過放棄！
旺角百老匯戲院人咁多，衛生環境又差，而且非常之殘舊，要喺咁嘅環境之下，困喺電影院兩個鐘，如果電影拍出嚟尷尷尬尬唔好睇，就浪費左我寶貴嘅夜晚！
但係，我覺得做人唔可以人云亦云，一定要自己去了解事實真相！所以硬着頭皮，入去睇啦！
王大陸扮演嘅角色完全冇違和感，而且相當帥氣，對於經典角色有另一種更有時代感嘅演繹。完全冇令人失望。
之後，就經歷咗，完全意想不到，超越所有期望，有笑有淚，喚起青春美好回憶嘅兩個鐘。
「一吻定情」喚起你我對於青春的美好回憶
一吻定情、惡作劇之吻，其實已經拍過無數次！
「一吻定情」係日本漫畫原著，後來改編成為日本劇集，由一代男神柏原崇主演，震撼全日本！之後響台灣拍攝成大中華地區經典版本，林依晨、鄭元暢主演，係好多人少年時代少女時代台劇經典回憶。
之後，韓國拍攝當地版本，今年泰國亦有翻拍，日本亦搵新一代演員重新演繹經典。呢啲只係講正式授權版本，仲有無數參考、山寨版本⋯⋯
故事嘅藍本，基本上到一樣，就係普通少女，一連串熱情衝動卻真心嘅舉動，慢慢令到冷漠高富帥愛上佢嘅故事。
演繹方法、選角，其實每個地方都有唔同。
今次電影版本「一吻定情」嘅選角，同大中華經典版本林依晨、鄭元暢好唔同！
之前網上有影評話，女主角林允樣貌非常之網紅樣，似beauty blogger、網絡IG紅人、美妝直播主多個一個傻更更嘅少女。亦都有人批評佢個樣貌太過精靈，唔似清純，更似心機蠱惑女、綠茶婊。
男主角方面，好似之前所講，有影評聲音認為，王大陸個樣太過熱血小混混，難以扮演高冷天才少年。
睇「一吻定情」嘅時候，我都有少少擔心。
好彩，劇情開展十幾分鐘，發現兩位演員表現得相當專業，好快已經令人投入角色。
而且，其實我一向都認為應該放低自己心中嘅偏見，因為好多人第一次認識王大陸，就係「我的少女時代」，亦都係佢哋唯一一次睇王大陸嘅表演。一個演員，其實有好多方面，上次扮演角色入型入格，其實唔一定要永遠扮演同一類角色。一個演員扮演得幾成功都好，荷里活演員最怕Typecast被觀眾定型，因為咁樣真係會影響咗觀眾接受其他類型角色嘅開放程度。
縱觀電影中嘅表現，我覺得兩位主角絕對做得相當好，而且演技非常之驚喜。
大家要明白，每個人嘅少年時代，其實唔一樣。
上一次經典作品有林依晨鄭元暢演出，講緊係2004年嘅事，距離現今10多年！當年觀眾如果係十幾歲嘅少女少男，依家已經成為中女中佬！
當時嘅傻妹標準，當年嘅男神標準，今時今日已經改變。
正如鄭元暢，係當時嘅男神；但係而家嘅男神，除咗斯斯文文之外，仲要有body，有操gym，有胸肌有腹肌的小鮮肉模樣。呢方面王大陸絕對合格。
林依晨，係當年嘅傻妹，但係而家嘅傻妹好多時候已經響網上發展，無論有冇條件，好多傻妹都希望自己成為網紅。林允貪靚得來有點傻，做呢個角色其實幾合適。
呢一個故事，並唔係嘗試用2004年嘅標準去重拍，反而係用現今社會嘅審美觀、價值觀去拍攝一個經典故事。
呢一個，係千禧年代千禧寶寶版本嘅故事。呢個未必係你的少女時代，但一定係「千禧」少女時代。
如果能夠放下心中嘅偏見同埋比較，開放你個心去欣賞呢個故事，你會得到更多。
「一吻定情」香港觀眾其實會鍾意，因為，佢喚起我哋對於青春年代、美好回憶。
電影廣告宣傳的幾句金句，令人難忘：
「你喜歡的人，也喜歡你機率有多少？」
「有人說，16歲喜歡的那一個人，會影響你一輩子」
電影做到中段的時候，我已經深深投入其中，不單止投入在他們的少年情懷裏，更多是，我自己的少年情懷裏。漠視了其實我，仍然在旺角爛透了的殘舊電影院。
「一吻定情」影評：單純熱烈地愛過
一吻定情、惡作劇之吻劇情相信大家都睇過，劇情亦都心中有數，所以相信大家都唔會太介意以下評論有少少劇透。請放心，最驚喜的部份我會留待大家自己喺戲院感受。
湘琴就是那種沒頭沒腦的女人，傻更更地愛上一個條件各方面都比自己好的人，成熟的人當然覺得是不可能，但就是因為天真和一往直前的勇氣，就會嘗試把那種不可能變成可能，以戲劇亦成就了這種弄假成真。
香港觀眾和內地觀眾，都會說「一吻定情」內容夢幻少女心！有內地觀眾支持寫影評，說再也不會相信這種夢幻東西了。因為，成長而令他們了解到現實的各種限制。
我的看法有點不同。
「一吻定情」展現的，是一種理想化的，苦盡一定甘來的美好結局。當然現實上不會每一次也是這樣結局，但同樣地，也不會每一次也是壞結局。
現實生活中的種種不足，其實往往遮蔽了「一吻定情」一直嘗試傳遞的訊息：
好多事情都要努力嘗試過，就能夠不可能變成可能。
不知道大家會不會參加小學、中學同學會活動。有時，都會撞返以前暗戀過、追逐過、戀愛過、甚至約過炮的男神。
事隔多年，依家睇返有點難以描述的複雜感受。
有些，隔咗多年都係喜歡，有些，只好怪自己年少無知鬼揞眼，點解當年咁bad taste！哈哈！
人成年後，往往有好多考慮。
對於伴侶，除了單純的喜歡，往往會有條件上的、金錢上的、社交網絡上的考慮。
全心全意、不勢利的交往，你還記得嗎？
湘琴不惜一切，單純地愛直樹，感動了我們。也喚起了我們對於那一種單純世界的嚮往。
每個人，都會在他和她的年輕年代，熱烈是單純地愛過一個人。
那些年代，頭腦簡單和單純到，不知道原來這種，心理學上叫做「投射」。
頭腦簡單又沒有什麼意見的湘琴，喜歡上有思想有主見的直樹，其實是潛意識對於這些良好條件的追求。
這些年來我終於懂了，如果你被某些性格吸引，最好的方法，並不是去不停嘗試搵某種性格的的伴侶，反而是要提升自己，令也擁有相同的特質。這些是理性的成長，是好事。
謝謝了這套「一吻定情」電影，讓我再次回到了我的青春，感受一下久違了的年輕衝動和感動。
不管你是在香港、在台灣、在大陸，只要你年輕過，青春過，你也總會遇上一兩個直樹。但願我們在花花世界千帆過盡，回來，仍是少年，仍然有個happy ending。
