【醫學美容】Latisse VS Talika Lipocils!超好用睫毛增長液,但安唔安全?(香港人自費測試)

2月 27, 2016

無論男定女,有一對濃密眼睫毛又懂得放電嘅眼睛,真係得天獨厚,但係而家即使天生條件有限,眼睫毛比較稀疏嘅人,只要你識得用啱嘅方法,一樣可以用人工嘅方法種出一對非常之靚,好似外國明星嘅眼睛!


(美國型男Zac Efron擁有一對電眼,其實不論男女,擁有一對豐盈眼睫毛嘅眼睛,都特別吸引人)



(荷里活大美人Jennifer Anniston承認有用Talika Lipocils去令睫毛增長)



(長眼睫毛係外國男人嘅吸引力象徵,Chris Hemsworth嘅長長眼睫毛令佢更man)



(Ian Somerhalder長長嘅眼睫毛真係電死唔少人)


相比起型到爆嘅外國男人同索爆嘅外國女人,亞洲人可能喺身材上較輸蝕,連睫毛都係又短又稀疏,除左喺美體方面要落功夫,對眼啲睫毛都要整整。


睫毛增長醫學美容現況

市面上有好多聲稱可以增加眼睫毛長度嘅產品,自生睫毛嘅好處,係無需要靠化妝、或一啲有可能折斷眼睫毛嘅方法,都可以令眼睫毛又長又密。傳統貼眼睫毛同埋用mascara嘅方法,係即時見到效果,唔好處就係久而久之,眼睫毛就會自然斷裂,導致造成眼睫毛不平均咁甩嘅情況。所以越來越多人會選擇用醫學美容嘅方法增長自己嘅睫毛。

香港其實有兩隻特別好用嘅睫毛增長液,第一隻就係經過FDA認証,能夠增長眼睫毛嘅Latisse。第二種,就係Talika Lipocils睫毛增長液。


(Latisse的外觀)


Latisse大起㡳

嚴格來講,呢個Latisse都算係醫學美容程序之一。因為Latisse睫毛增長液呢種產品只可以經由醫生處方,喺有醫生紙嘅情況之下先可以購買,一般嘅藥房、美容院、莎莎、卓悅等等都唔可以直接喺冇醫生紙嘅情況下購買。

Latisse其實係由Allergan藥廠出品,呢間藥廠亦同時出產世界知名嘅瘦面針Botox,經過臨床嘅驗證與及美國食物及藥物管理局嘅認可,對於眼睫毛增長,係有一定嘅幫助。


Latisse安全性問題

選擇睫毛增長液,最緊要嘅就係成份係唔係安全。因為眼周圍嘅肌膚同埋眼球本身都好敏感,如果選用不當嘅產品,會造成刺激,可能會導致不同嘅眼部疾病,甚至致盲!

Latisse 睫毛增長液嘅主要成份,係一種叫做Bimatoprost嘅化學品。Bimatoprost主要係用來醫青光眼。喺醫學研究嘅過程之中,醫生發現原來呢隻醫青光眼嘅藥物可以增長眼睫毛嘅長度,同埋濃程度,所以Allergan呢間藥廠,就同時將呢兩隻產品用兩個唔同嘅名字,喺市場出售。一隻就係轉系用來醫青光眼嘅Lumigan,一隻就係你見到嘅睫毛增長型Latisse。其實係同一樣野黎。

喺2008年12月,Allergan Latisse獲得美國FDA「醫學美容」功效嘅認證,肯定咗佢對於睫毛增生嘅作用。FDA原文講到Latisse能夠有效「increasing eyelash length, thickness and darkness 」。即係長度、濃度同深色度都可獲得改善。

Latisse嘅原理,就係刺激休息期(Telogen Phase)睫毛,變成生長期,(Anagen Phase)。Latisse同Lumigan都係同一產品。

Latisse睫毛增長液都係醫學美容程序嘅一種,所有醫學美容程序都有風險,雖然呢隻產品得到FDA嘅認可,但喺佢得到認可過程之中,都發生咗一啲令人值得注意嘅事件。包括一啲測試者要求離開實驗,因為覺得產品可能對眼睛造成好大嘅刺激,雖然最後都得到政府認可,但係始終副作用會因為每個人體質嘅唔同意有少許差別,所以使用嘅時候都要自己注意,如果有不適就要立即停止。Latisse如果根據指示使用,基本上係安全嘅。

Latisse佢嘅缺點,就係可能導致眼珠嘅顏色改變!一般亞洲人唔會有呢個問題,因為你嘅眼睛已經係黑色或者深啡色,但係如果係外國人,本身係好靚藍色或綠色嘅眼睛,就有可能變得更加深色,甚至係某啲情況下,變咗啡色!呢個副作用就係要注意嘅地方。

同時,由於Latisse / Lumigan係署方藥,如果你考慮用醫療保險去cover,可能會被認為你有嚴重眼症,可能影響你的醫療紀錄,同增加你將來保費。


Latisse價錢同好用程度

價錢方面,Latisse 30日分量大概港幣$1600左右。

Latisse呢隻產品比較容易用,而且效果好顯著。佢嘅缺點,就係價錢實在太貴。一個療程四個月,就要用$6000!用一年就要超過一萬蚊!而且如果唔係一直使用,效果就會慢慢消退,打回原形。基本上開始咗就唔可以停止。而且一般人本身嘅睫毛如果唔係太短,用一啲化妝嘅方法,都可能做到望起嚟有豐盈嘅眼睫毛嘅視覺效果。用萬幾蚊去增長睫毛,無錯係靚嗰少少,但係就要比多咁多錢,真係要自己諗下值唔值得。


自己買原料整山寨Latisse!?

而家流行直接買美容原液DIY,我就絕唔建議!

Latisse生產原料喺香港係受管制藥物,實在唔適宜自己購買,以免觸犯法例。尤其系因為產品直接接觸眼睛,如果成份比例唔啱,就會造成眼睛嚴重敏感,甚至盲眼!所以呢啲嘢都係唔好搏。另外,好多人會喺網上兜售來歷不明嘅平價產品,尤其是一啲網店,但係千祈唔好制,因為呢啲野一係就係過咗期嘅貨,又或者係假貨!真真正正嘅原廠產品,係必須經過藥廠同醫生嘅正確渠道購買!

如果想購買Latisse睫毛增長液,最好嘅方法都係直接同你嘅家庭醫生講,又或者去一啲醫學美容嘅診所詢問。


Talika Lipocils眼睫毛增長液簡介



(我買嘅Talika Lipocils睫毛增長液實拍 )


同Latisse唔同,Talika Lipocil不含Binatoprost。

根據官網資料,Talika產品係法國醫生Danielle Roches於1948年開創嘅品牌,而家已經係美容集團Nobilis嘅成員之一。

Talika Lipocils睫毛增長液,無論係外國定香港嘅美容網站,都有好多嘅好評。連Jennifer Anniston都講過佢都有用Talika Lipocil去增長睫毛。

成份方面,Talika Lipocils嘅產品成份真係植物精華。作為一個負責任嘅美容評論員,我一向都要追查物品嘅成份,好多時我會留意究竟呢件產品有冇科學根據,成份係乜嘢。根據官網表示,呢隻嘢嘅產品主要成份係植物精華。

搵到嘅資料真係好少,咁就不如自己搏一搏試吓啦。一般嘅情況之下,我都唔會將一啲來歷不明嘅嘢茶上眼,但係由於呢個品牌係法國已經好多年,而且咁多正評,我都抱着搏一搏嘅心態試吓。

Talika Lipocils呢隻產品相比起Latisse更容易買得到,因為佢唔需要任何嘅醫生處方,喺莎莎、卓越、DFS免稅店隨時隨地都買得到。

用咗頭嗰三兩個禮拜,效果可以用兩個字來形容:驚人!

作為一個貪靚嘅人,我已經中伏過無數次!任何聲稱可以視覺上增長眼睫毛嘅用品,包括透明睫毛液、電眼睫毛、假眼睫毛、mascara等等我全部都買過,而效果真係一般。呢隻野的效果真係好好!

我只係用左好短時間,就已經發現睫毛睇起嚟更加濃密,同埋好似比較長。呢一點真係有啲始料不及,因為我喺網上已經見過好多外國網友關於呢隻產品嘅正面評論,但係我都好難想像係咁短時間之內,用一啲非署方嘅藥物,都可以令間睫毛變得咁靚咁多!

我用咗超過兩個月,眼睛都冇一啲唔舒服或者受刺激嘅感覺,相對都比較溫和。

Talika Lipocils嘅好處,就係佢嘅耐用性高,基本上每日使用兩次,都可以用差唔多六個月!

Talika Lipocils價錢方面,真係好平,一支都係$400港幣左右,可以用好耐(超過半年)。而且最好嘅好處,係佢冇包含一啲高刺激性嘅成份,無需要醫生處方,都可以係一般嘅美妝店搵到。

更多有關醫學美容的原創研究,請按這裡

2 意見

Counter

Flickr Images