各位識打扮，樣靚身材正嘅男神女神，今日想講下心理健康同抑鬱症嘅問題。其實，你，開心嗎？
出面有好多網站探討抑鬱症成因，症狀同埋自我評估。抑鬱症嘅成因好多，我今日特別想探討一下嘅係，一啲好似你同妳一樣咁嘅美男美女，同抑鬱症之間嘅關係。
抑鬱症係香港越來越普及，可幸嘅係，大家都唔再覺得抑鬱症係一個禁忌，反而更加開明咁樣攞出黎討論，從而可以通過對抑鬱症嘅認識，發現症狀同原因，可以更快地走出困局，搵到解決抑鬱症嘅方法。
可能你身邊都有啲靚仔靚女，無論樣貌、家庭、經濟、感情生活，都冇乜大問題，甚至喺外人第三者眼中睇起嚟，非常之美滿，但係偏偏佢哋就有種初期抑鬱症嘅症狀，包括經常情緒低落、無力、逃避、收埋自己等等。
同時，亦都有啲人明明好眉好貌，都算係靚仔靚女，但係偏偏一開口就充滿負能量，唔係一啲激進負面嘅諗法，就係一啲怨天尤人嘅投訴，所有嘅美麗，都只限於外表上美容上，完全冇任何修養或內在美。
你真係男神女神，定係「美容賤人」？
今日想特別講「美人」VS「美容賤人」呢個話題。所謂嘅美容賤人，就係對於美容打扮甚有研究，外表光鮮亮麗吸睛，但係品格低下，毫無修養嘅人。
你問十個香港女人或者十個HeHe，十個都想做男神女神；但係現實上可能有一半都只係成功做咗懂得美容打扮、卻品格低下嘅「美容賤人」。
點解要特別探討開「美容賤人」呢個話題呢？因為呢啲行為特徵，就同抑鬱症息息相關。
做得靚仔靚女，就一定係外表下過唔少嘅功夫，醫學美容、做facial、做瑜伽、做gym、跑步、節食、PS修圖、網上交友、親密關係、你都可能係專家！
無論係美容blogger、Facebook、Instagram、Grindr，都係一個「你的樣子如何你的日子也必如何」的世界。呢啲圈子裏面，基本上外貌就係一切。喺呢個世界，除咗樣貌同埋fuckability，其他一切都不在考慮範圍。
對於外在美同埋別人稱讚過分嘅追求，有時會變得走火入魔，會將追求外表完美嘅思想極端化，不停同網上其他嘅網絡紅人男神女神比較，然後覺得自己完全不及人。又或者過分追逐網上世界嘅虛幻人氣，心情高低都同按讚數量成正比。久而久之，呢啲人心目中，所有嘢都只係關於佢自己，而佢嘅世界，就只能夠容納得到佢自己，同埋意見、背景、行為模式都相當接近嘅一小撮人。
喺追求變成男神女神嘅過程之中，不經不覺間，思想就扭曲左，變成眼中只有美容、瘦身、發放性感照呃like，不理會任何其他修養與及內在美，自私自利嘅「美容賤人」。
點解要特別討論「美容賤人」呢？係因為美容賤人同埋「抑鬱症」有密不可分嘅關係。
極端自戀，變成極端抑鬱
唔少靚仔靚女都有種自戀嘅傾向。因為外貌上嘅優勢，可能會有好多追求者、網上粉絲、或「兵」嘅出現。喺成長過程中，都會得到其他人嘅遷就同埋幫忙，可以算係贏在起跑線。
但係呢種因為外貌而得到嘅優勢同埋特權，亦好多時會令一個人嘅價值出現偏差，久而久之，就會引發抑鬱症。
從個人嘅觀察，靚仔靚女抑鬱症初期有以下嘅先兆：
有不明來歷嘅無力感、恐懼感
玩手機上癮、以社交虛擬媒體人氣決定自尊
無真心朋友
對醫學美容、扮靚嘅興趣變成病態嘅偏執
對美和帥的定義，與及對別人的尊重，降呢到純看外表；只着重有沒有波波patpat、或胸肌人魚線
經常抱怨、批評別人
因過度節食或操肌，令健康情況變差
喜怒無常
睡眠質素變差，經常失眠
如果你留意到自己開始有以上嘅抑鬱症症狀，就要改變自己嘅思想，從抑鬱症嘅邊緣掉頭， 走向更光明廣闊嘅未來。
抑鬱症嘅成因
無論係生理或心理嘅原因，都有可能會導致情緒嘅變化，如果唔小心，某些情況下，更加會造成抑鬱症。營養唔均勻，就有可能導致煩躁抑鬱。更加多出現嘅情況係，你嘅價值觀同埋思想，過度聚焦喺某些事情上面，你通常呢啲都係一啲固執而有根深柢固嘅負面思想。
抑鬱症治療方法，包括自我治療方法
係醫學角度上面，抑鬱症可以用心理治療與及藥物治療兩種方法。
抑鬱症心理治療：抑鬱症嘅心理治療方法，係用一種叫做cognitive therapy嘅認知治療法，從改變對於事件嘅理解同認知，改善相關嘅情緒。
第二種，就係利用藥物。
當然，好多感到抑鬱嘅人，都其實只係抑鬱，並未到抑鬱「症」的程度。所以自行改善抑鬱情緒也有方法。
改善抑鬱症症狀方法一：感恩
感恩，即是對於宇宙萬物給予你嘅一切，懷有謝意。感恩呢個方法，對於改變個人運勢、改善抑鬱症，都有神奇又神秘嘅功效。「感恩」心理，能夠在短時間內幫你反敗為勝，改變你嘅運勢，與及用其強大嘅正能量中和了你的負面思想，它能改變你氣場，令你睇到之前睇唔到嘅機會。
對於天地萬物、身邊的人、家人、朋友懷着一個感謝、感恩的心，能夠讓你真思想的焦點，放在身邊正面事物上面。
每當我感到沮喪、頹廢、心情惡劣嘅時候，又或者我需要在短時間內反敗為勝的時候，我就會使出我的殺手鐧：「感恩」。
之前上過一啲靈修嘅課程，當中都講到「感恩」嘅強大力量。而一啲宗教好似基督教天主教，都會有「感恩節」Thanksgiving Day，就係一個特別嘅節日，令你諗返起，你所得到嘅嘢，好多自己有但係唔覺眼嘅大小運氣。
有人話係「吸引力法則」、有人話氣場、有人話係思想焦點嘅訓練……究竟「感恩」點樣可以改變一個人嘅運勢、光速走出抑鬱症、究竟佢點樣運作，點解可以改變一個人嘅運勢，我唔太清楚，但係我就知道一定work！
自從我學識呢個方法之後，就真係冇乜再試過好嚴重嘅抑鬱。因為好快，我嘅心情就由怨天尤人，變成感謝、寬懷、原諒、讚賞、讚嘆；而思想嘅焦點，亦由批評同批判，變成欣賞、珍惜、認同。
愛、欣賞、感謝嘅強大力量，能夠令你立即充滿正能量。
所以下次當你感到初步抑鬱嘅時候，不妨嘗試一個好好嘅小習慣，就係每日瞓覺之前，列舉3個值得你感恩嘅事情。無需要太過宏大，即使只係好少嘅事情，都值得你寫低，每日3個，一個禮拜就有21個值得你寬懷嘅大小事。一個月，就有90幾個！你回顧番一個月，都能夠體會到生命中嘅美好。
當你嘅心裏面充滿咗感恩、欣賞、多謝嘅心態時候，你嘅氣場就會變得平易近人，非常之吸引到別人。
改善抑鬱症症狀方法二：正視自己心中的苦毒
有時，我哋嘅成長過程、家庭背景、經濟因素等等，都可能會導致心裏面留下咗一啲傷痕。
我知道好多美容blogger將自己改頭換面，醫學美容療程一個又一個，有注射透明質酸到水光槍，由Thermage到Botox，由少少改善，變成後期病態整容，整到膠人一樣，都是其實都同自己成長心態有關。好多時係因為一啲遺憾、被冷落同埋被拋棄嘅經驗，導致一個人好想去證明自己仍然係可愛，仍然係有價值。
作為一個美容blog嘅beauty blogger，我要嚴正聲明：要改變命運，淨係改變外表係唔夠，任何聲稱可以純粹改變外觀就可以改變運氣嘅美容服務，都係呃你嘅。
每個人生成長過程中都有一啲失落、遺憾、甚至苦毒。聰明嘅人就會發現，遺憾當中都有一些缺陷美，一啲所謂嘅損失或者缺乏，都可以係你創造人生高峰嘅段練過程。
當你能夠正面面對困擾你嘅回憶、所謂嘅缺失嘅時候，你就會發現，任何所謂唔好嘅地方，其實都喺某啲層面上幫過你，對你有幫助。
以前嘅唔好，成就左你今日嘅好。沒有當時嘅付出，又哪有今日嘅成就？
改善抑鬱症症狀方法三：多欣賞藝術
藝術，包括繪畫同音樂，雕塑同話劇，能夠滋養同埋開拓你嘅思想，由純物質化嘅極有限環境，帶你穿越時間、地點、回到作者嘅內心世界裏面，一同感受當時嘅美感、心情。
能夠去感受和欣賞美麗，係一種天賦。
改善抑鬱症症狀方法四：善心
有啲人其貌不揚，但係就會散發出一種幸福同自愛嘅氣場，令到人好想接近。亦都有啲人，明明好眉好貌，甚至做左唔少人工醫學美容療程，五官比例係完美，但係唔知點解，眼角永遠係流露出一種令人抗拒同討厭嘅氣場，究竟點解呢？
主要原因，係因為一啲人有善心。所謂嘅善心，就係希望帶旺自己帶旺別人嘅思想，除咗把每個機會對自己好之外，佢亦會對其他人好，會懂得有尊嚴地施捨與及接收。
因為佢經常種善因，得到善果亦係非常正常。
改善抑鬱症症狀方法五：著數、利益大家分
懂得俾面別人，維護自己和別人尊嚴，有着數齊齊分，人哋亦懂得投桃報李，你好我好。
有時抑鬱症嘅原因係因為將焦點放左自己身上，而且目光太過狹窄，總覺得人哋對自己唔住，又或者自己有啲好唔抵嘅地方。
改善抑鬱症症狀方法六：閲讀
地球上有1,300,000,000人，呢個數目只包括現在生存嘅人，仲有好多以前嘅人，佢哋留低左唔少思想嘅精華，解決問題嘅方法。通過閱讀，就可以了解到處理問題嘅唔同方法，唔同嘅意見同埋觀點。當你有咗閱讀呢個良好習慣之後，就會明白到世界好大，絕對比任何一個網上討論區、beauty blogger、任何一間萬寧、醫學美容中心更加遼闊。
改善抑鬱症症狀方法七：信仰
對於社會嘅理解越多，物質越豐富，我反而會越返璞歸真，追求信仰與及靈性上嘅真理。對於以前一定唔會理會嘅「聖經」，我竟然會自己攞嚟睇。而我發現除咗我之外，好多大人物小人物，都從呢本書裏面得到唔少嘅啟示同埋啟發，就好似天后鄭秀文，靠信仰走出抑鬱症；前社團大佬14k「Teddy哥」洪漢義，就能夠靠着信仰，啟發左唔少撈偏嘅人。
今日呢個美容專題有啲特別，但係希望大家都鍾意，一齊做一個真正由內靚到外，有尊嚴、智慧、善心嘅男神女神，唔要做美容賤人！
