減肥減極都減唔到，或者越減越肥，又或者係減肥之後體重光速反彈，呢啲咁可怕的經歷，可能你都試過！市面上減肥嘅產品好多，包括溶脂酵素、排油丸、減肥中藥……有人甚至會用醫學美容開刀嘅方法抽脂、水刀減肥、RF射頻減肥、燃脂減肥精油等等，務求令到自己身材更加結實。喺你決定有用幾萬蚊抽脂、打針、推脂之前，不妨先考慮吓以下呢啲低風險而且一定有用嘅方法。
（瘦身fit爆係成為男神重要嘅一部分）
其實極速減肥，如果用啱方法，真係唔係咁難，但係好多人用錯左方法，導致自己新陳代謝減慢，影響減肥效果，最慘就係嗰種越減越肥，反彈比以前更重更核突嘅狀況。
如果你要瘦，就一定要用有科學根據嘅方法！一般嘅美容網站淨係教你食減肥藥、同埋一啲都唔知work唔work嘅方法，今次我同大家介紹嘅醫學美容減肥方法，係經過醫學界認同，完全有科學根據。
醫學瘦身101
好多人話減肥，但係減肥唔成功嘅人，係因為佢唔知道生物學同生理方面嘅解釋。究竟脂肪點樣形成？點解你減肥減唔到？呢啲都係好好嘅問題。我繼續講，我就講解一下你身體嘅脂肪係點樣形成。
你啲脂肪其實係點樣嚟？你啲肚腩、肥大腿、拜拜肉，其實係來自你進食食物之後裏面嘅糖分。太多嘅醣類，會變成肝醣，胰島素會變脂肪！
如果你要瘦，你就要阻止糖粉嘅吸收。
食物纖維素減少大腸有害物，水溶性嘅水果蔬菜可以阻止糖分吸收。
醫學減肥嘅重點在於進食，而唔係節食！
如果你有去開美容院、買開美容減肥產品，嗰啲美容BA姐姐就會教你減肥就要節食。但係如果你問吓一啲真係有醫學常識嘅醫生、同埋經過訓練嘅營養師，佢哋就會話俾你知，減肥最快嘅方法其實係「進食」。
如果你想今次減肥成功，就一定要知一點，減肥嘅重點，並唔係胡亂節食，而係食啱，食到飽！呢一點好多人都唔知道，甚至誤解左，以為減肥就要食好少野，搞到自己好餓，然後又辛苦，先減到幾磅，成個人就虛脫咁滯。所以，你要知道亂節食呢個方法係錯誤。亂節食，只會令你更加肥！
如果平時有用開personal trainer嘅人，又或者有研究開醫學美容減肥嘅人，就會發現，人體佢有自己嘅節奏，如果你要減肥，你就要利用呢個節奏去幫你，而唔係更同你個生理節奏對着幹。
點解我會話減肥嘅重點係進食，千祈唔好節食呢？係因為你一節食嘅時候，你人體嘅新陳代謝就會減慢，你嘅身體同大腦就會自動調節，將一有食物入嚟就就會更加諗住脂肪不放，所以導致人一節食減肥，就會好攰，一停止節食，體重就會立刻反彈！甚至比之前更加肥！所以你要知道，減肥一定唔可以用胡亂節食呢個方法。
如果你要極速瘦，你就要好聰明咁你用食物去幫助你。有啲食物係會對身體好好，而且卡路里熱量唔多，食咗落去又有美顏作用。呢類食物你就要多啲食。咁邊啲係屬於有益嘅食物呢？例如蛋白質、蔬菜、水果等等就係。
一啲高質素嘅食物，例如西蘭花、紅蘿蔔、洋蔥、粟米、豆腐等等，其實都幾飽肚，雖然佢哋本身亦都有卡路里，但係佢哋含有非常大嘅抗氧化作用，本身對皮膚已經有好處，最重要嘅係，好少人會因為食呢啲野而導致肥，多數人減少食白飯嘅份量，多食呢啲野，都會變得更加瘦！係因為蔬菜一般都好飽肚。
同樣道理，生果都一樣。好多人一講起食生果減肥，就好驚，成日都驚新鮮水果裏面嘅果糖會導致身體肥胖！但係你仔細諗下，如果你只係食生果蔬菜，又有幾多人真係會肥呢？啲人話食生果會變肥，係因為佢哋飲生果汁！生果汁，包括鮮榨嘅生果汁，就要避免。生果汁嘅果糖好多，而且唔飽肚，GI過高，其實呢一啲就要避免。如果成個生果連埋纖維一齊食，其實係冇問題嘅。
想減肥美容嘅人，有兩種美容瘦身大敵：活性氧（Reactive oxygen species）同糖化產物（advanced glycation end products）。呢兩種嘢係非常邪惡而且美容嘅大忌，就係佢哋，造成糖化（Glycation）嘅現象，亦造成色班、面下垂、面黃！同時，醫學研究發現，過多嘅carbs仲會導致暗瘡同敏感性肌膚！
活性氧同糖化產物，兩樣都係可以通過不良飲食而惡化，同時，亦都能夠通過健康飲食而避免。兩種都係經過過量嘅糖份引起，所以食碳水化合物（麵包、白飯、甜品、含糖飲料）等等就要盡量避免，越少越好。
醫學減肥第一重點：你要多進食適當嘅高質素食物，包括蔬菜、水果、蛋白質；低質素嘅食物例如油炸食物、白飯、甜品等等，就要避免。少咗由過多糖份引起嘅Glycation，你唔單只會變瘦，皮膚亦會變得更加靚。
醫學減肥第二重點：進食嘅次序亦都好緊要。先食餸同埋菜，最後先食飯。食飯嘅次序都好影響你減肥嘅成功與否。如果你要減肥，開飯嘅時候就唔好用白飯你同餸一齊食，你應該用蔬菜同餸（肉類）一齊食，咁樣就可以導致你食多咗菜，飽飽地嘅時候先求其食少少飯，咁樣整體來講嘅吸收嘅卡路里就會大幅減少。
醫學減肥第三重點：食超慢，你就會變瘦！最好用三份一嘅速度進食。醫學同生物學上面來講，人體進食嘅時候，由肚餓到到飽肚嘅感覺，系有少少時差嘅。即係話，由腸胃吸收覺得飽嘅時候，到到你大腦釋放飽肚嘅訊號，時間係會有啲延遲。所以好多人佢都好餓嘅時候，就食好多野，一下子一發不可收拾，以唔知道吸收過量左，當你終於覺得飽嘅時候，你已經食咗好多卡路里！
所以醫生同埋營養師都會教你，食飯最好慢慢食！食得越慢，就越能夠理解食物當中嘅美感同埋豐富嘅味道，同時確保唔會食太多。最好用平時½甚至三份一嘅速度進食，你就會發現自己原來真係唔需要食咁多野，以對食物嘅享受，反而有所增加。
醫學減肥第四重點：中午食，好過夜晚食。好多人唔知道，同一樣食物，係唔同嘅時段食，對於減肥或者增肥都有唔同嘅結果。醫學界嘅研究發現，人體裏面有一種導致容易增肥嘅蛋白，叫做BMAL-1。BMAL-1下午2點分泌最少，凌晨2時最多！而分泌量係20倍！同樣食物，發胖反應可高20倍！
呢個亦都係點解食消夜嘅人好容易有肚腩嘅原因！
醫學減肥第五重點：足夠睡眠有助減低食慾。醫生發現，一個人瞓得夠，身體會產生瘦體素Leptin，抑制食慾；相反如果瞓覺唔夠，會產生肌餓素ghrelin，令脂肪囤積。
聰明飲食，可以幫助你膠原自生
有啲朋友可能用好多錢買美容護膚品同參加醫學美容療程（Reenex膠原自生之類），但係效果都唔太明顯，其中好主要嘅原因，就係冇好好打理自己嘅飲食。
面部下垂，係因為你真皮層嘅膠原蛋白同埋彈力蛋白隨着年紀而減少。要真正能夠抗衰老，皮膚回復彈性，你就要好好打理膠原蛋白嘅生長。當然，直接注射膠原蛋白（Collagen Injection）係一個方法，但係基於安全考慮，依家醫學美容已經越來越少用，多數都係注射透明質酸Sculptra、Jervuderm或幫助骨膠原自己更新嘅PLLA。
可能你都知道，膠原蛋白其實可以通過食物可以補充。但究竟要食乜嘢先有用呢？係啲化妝品店、藥房、成日見到標榜美容用嘅美肌骨膠原蛋白粉有冇用呢？
如果你塊面出現咗下垂、皺紋、彈力不足嘅情況，你就要檢討下自己嘅飲食情況，睇吓有冇吸收足夠嘅蛋白質。因為如果你要又靚又飽滿嘅皮膚，你嘅真皮層就必須要有蛋白。你嘅飲食裏面，就一定要有足夠嘅蛋白，去幫助面上皮膚膠原蛋白同彈力蛋白嘅生長。否則你再外用幾多野都只可以有非常有限效果。
市面上有好多口服嘅骨膠原粉，好似Fancl膠原蛋白等等，佢哋對於你面上嘅膠原增生究竟有冇用呢？呢個問題我就要先同你講解一下，骨膠原粉係點樣進入體內。
進食呢一類口服膠原蛋白，你嘅身體就會將佢當成其他食物一樣，消化並將有用嘅物料同營養、熱量進入吸收體內。你嘅身體並唔會識得自己分別邊啲係從正常食物吸入嘅膠原蛋白，邊啲係額外補充品，甚至有時會將額外嘅膠原蛋白補充劑當係熱量咁樣吸收。你嘅身體會將吸收到嘅膠原蛋白同埋其他食物，一次過吸收而且自行分發到身體唔同嘅部份，但並唔會集中係你面上。所以一般口服膠原蛋白嘅用處，係輔助嘅形式。
醫學發展越嚟越先進，而家已經發得發現到幾隻囗服嘅膠原蛋白，真係可以有助面部皮膚嘅膠原蛋白增生，根據美國政府嘅資料顯示，有一隻膠原蛋白對於改善皮膚質素係有幫助。呢隻叫做Verisol嘅Collagen產品，通過實驗室測試，就的確可以改善皮膚鬆弛問題。
維持着高蛋白質嘅飲食，就會有助膠原蛋白嘅自生。無論係自然新陳代謝又好，你用射頻、去Reenex刺激膠原增生又好，適當嘅蛋白飲食好重要。
Protein Shake減肥可行性？
蛋白質除咗幫助你面部嘅膠原蛋白自生之外，對於減少你嘅食慾，都有好大嘅幫助。
GNC、Herbalife都有賣據說可以減肥嘅Whey Protein同Protein Shakes 。究竟呢啲係咪有科學根據呢？點解有啲人會越飲越瘦，有啲人就越飲越肥？
根據人體嘅構造，蛋白質較容易有飽肚感覺（Satiety）。
Protein Shake這主要成份都係蛋白質，一飲完，好快就會覺得飽飽地，而且食慾都會變小，久而久之，你食嘅碳水化合物、糖粉等等就會迅速下降，當你身體裏面再無其他由進食碳水化合物或糖分提供嘅能量之後，你嘅身體就會識得燃燒體內嘅脂肪去彌補，從而達到瘦身嘅效果。
蛋白粉Protein Shake嘅好處，就係佢非常之飽肚，令到人好自然咁食少左野。Protein Shake減肥呢樣野只要你小心行事，對於減肥係有一定嘅幫助。
點解我會提你如果你要用來減肥，你就要小心？個原因係第一，蛋白粉本身都有一定嘅卡路里，你要記住如果你某一餐飲咗蛋白粉，你就唔可以食正餐，否則你就會比平時吸取左更加多嘅熱量！
喺選擇Protein Shake、Whry Protein嘅時候，你都要留意，個產品本身有冇添加一啲幫助卡路里燃燒速度嘅添加劑。因為好多蛋白粉代餐嘅產品，成份裏面都添加左咖啡因（caffeine），如果你對咖啡因敏感，容易失眠嘅情況，你就要留意產品成份。
RF射頻減肥（做機） / Thermage / Tripollar Pose
一啲高級嘅美容院會提供，究竟是RF射頻減肥嘅有冇科學根據呢？
我上次就大篇幅咁討論過RF射頻V面嘅方法，當中分析比大家聽，RF的確有破壞脂肪令到脂肪細胞釋出細脂肪液嘅情況，從而對於部分減肥也有一定嘅作用。（一般運動瘦身多數會瘦全身，未必能夠好似RF射頻一樣，有局部減肥針對性嘅作用）。
Thermage、Tripolllar Pose一類RF射頻減肥機究竟有無效果，其實好取決於個人嘅情況。第一，你要睇部機本身係咪能夠有足夠嘅火力，深入你嘅真皮層，將射頻射入並破壞脂肪組織，一定要做到呢一樣野，先至可以有減肥瘦身嘅效果。第二，就係你本身脂肪有幾厚，我個人嘅觀察就係，射頻減肥對於一啲中等身形嘅人想局部改善身形，效果會最明顯，相反一啲身形比較肥胖嘅人，由於脂肪層真係好厚，即使完成左一個療程，脂肪液成功進入淋巴系統，由於身型都好肥胖，視覺上望落去分別不大。
食減肥藥
講開醫學美容減肥，曾幾何時，食減肥藥都係好流行，好彩呢幾年市民嘅知識增加，明白到減肥藥可能有好大嘅副作用，醫學美容有好多方法，未必一定要用到減肥藥咁誇張。
香港衛生署批准嘅減肥藥xenical，主要嘅作用係防止脂肪油脂份被吸收，所以亦被稱為痾油丸，理論上是適合一啲被醫學界評定為痴肥人士（BMI 30以上）使用，一般人用其他方法減肥可能更加安全。
瘦身美體
